Utshovঅধ্যায় 90
90.1
যুধিষ্ঠির উবাচ
কীদৃশেভ্যঃ প্রদাতব্যং ভবেচ্ছ্রাদ্ধং পিতামহ
দ্বিজেভ্যঃ কুরুশার্দূল তন্মে ব্যাখ্যাতুমর্হসি
90.2
ভীষ্ম উবাচ
ব্রাহ্মণান্ন পরীক্ষেত ক্ষত্রিয়ো দানধর্মবিৎ
দৈবে কর্মণি পিত্র্যে তু ন্যায্যমাহুঃ পরীক্ষণম্
90.3
দেবতাঃ পূজয়ন্তীহ দৈবেনৈবেহ তেজসা
উপেত্য তস্মাদ্দেবেভ্যঃ সর্বেভ্যো দাপয়েন্নরঃ
90.4
শ্রাদ্ধে ত্বথ মহারাজ পরীক্ষেদ্ব্রাহ্মণান্বুধঃ
কুলশীলবয়োরূপৈর্বিদ্যয়াভিজনেন চ
90.5
এষামন্যে পঙ্ক্তিদূষাস্তথান্যে পঙ্ক্তিপাবনাঃ
অপাঙ্ক্তেয়াস্তু যে রাজন্কীর্তয়িষ্যামি তাঞ্শৃণু
90.6
কিতবো ভ্রূণহা যক্ষ্মী পশুপালো নিরাকৃতিঃ
গ্রামপ্রেষ্যো বার্ধুষিকো গায়নঃ সর্ববিক্রয়ী
90.7
অগারদাহী গরদঃ কুণ্ডাশী সোমবিক্রয়ী
সামুদ্রিকো রাজভৃত্যস্তৈলিকঃ কূটকারকঃ
90.8
পিত্রা বিবদমানশ্চ যস্য চোপপতির্গৃহে
অভিশস্তস্তথা স্তেনঃ শিল্পং যশ্চোপজীবতি
90.9
পর্বকারশ্চ সূচী চ মিত্রধ্রুক্পারদারিকঃ
অব্রতানামুপাধ্যায়ঃ কাণ্ডপৃষ্ঠস্তথৈব চ
90.10
শ্বভির্যশ্চ পরিক্রামেদ্যঃ শুনা দষ্ট এব চ
পরিবিত্তিশ্চ যশ্চ স্যাদ্দুশ্চর্মা গুরুতল্পগঃ
কুশীলবো দেবলকো নক্ষত্রৈর্যশ্চ জীবতি
90.11
এতানিহ বিজানীয়াদপাঙ্ক্তেয়ান্দ্বিজাধমান্
শূদ্রাণামুপদেশং চ যে কুর্বন্ত্যল্পচেতসঃ
90.12
ষষ্টিং কাণঃ শতং ষণ্ঢঃ শ্বিত্রী যাবত্প্রপশ্যতি
পঙ্ক্ত্যাং সমুপবিষ্টায়াং তাবদ্দূষয়তে নৃপ
90.13
যদ্বেষ্টিতশিরা ভুঙ্ক্তে যদ্ভুঙ্ক্তে দক্ষিণামুখঃ
সোপানত্কশ্চ যদ্ভুঙ্ক্তে সর্বং বিদ্যাত্তদাসুরম্
90.14
অসূয়তা চ যদ্দত্তং যচ্চ শ্রদ্ধাবিবর্জিতম্
সর্বং তদসুরেন্দ্রায় ব্রহ্মা ভাগমকল্পয়ৎ
90.15
শ্বানশ্চ পঙ্ক্তিদূষাশ্চ নাবেক্ষেরন্কথংচন
তস্মাত্পরিবৃতে দদ্যাত্তিলাংশ্চান্ববকীরয়েৎ
90.16
তিলাদানে চ ক্রব্যাদা যে চ ক্রোধবশা গণাঃ
যাতুধানাঃ পিশাচাশ্চ বিপ্রলুম্পন্তি তদ্ধবিঃ
90.17
যাবদ্ধ্যপঙ্ক্ত্যঃ পঙ্ক্ত্যাং বৈ ভুঞ্জানাননুপশ্যতি
তাবত্ফলাদ্ভ্রংশয়তি দাতারং তস্য বালিশম্
90.18
ইমে তু ভরতশ্রেষ্ঠ বিজ্ঞেয়াঃ পঙ্ক্তিপাবনাঃ
যে ত্বতস্তান্প্রবক্ষ্যামি পরীক্ষস্বেহ তান্দ্বিজান্
90.19
বেদবিদ্যাব্রতস্নাতা ব্রাহ্মণাঃ সর্ব এব হি
পাঙ্ক্তেয়ান্যাংস্তু বক্ষ্যামি জ্ঞেয়াস্তে পঙ্ক্তিপাবনাঃ
90.20
ত্রিণাচিকেতঃ পঞ্চাগ্নিস্ত্রিসুপর্ণঃ ষডঙ্গবিৎ
ব্রহ্মদেয়ানুসংতানশ্ছন্দোগো জ্যেষ্ঠসামগঃ
90.21
মাতাপিত্রোর্যশ্চ বশ্যঃ শ্রোত্রিয়ো দশপূরুষঃ
ঋতুকালাভিগামী চ ধর্মপত্নীষু যঃ সদা
বেদবিদ্যাব্রতস্নাতো বিপ্রঃ পঙ্ক্তিং পুনাত্যুত
90.22
অথর্বশিরসোঽধ্যেতা ব্রহ্মচারী যতব্রতঃ
সত্যবাদী ধর্মশীলঃ স্বকর্মনিরতশ্চ যঃ
90.23
যে চ পুণ্যেষু তীর্থেষু অভিষেককৃতশ্রমাঃ
মখেষু চ সমন্ত্রেষু ভবন্ত্যবভৃথাপ্লুতাঃ
90.24
অক্রোধনা অচপলাঃ ক্ষান্তা দান্তা জিতেন্দ্রিয়াঃ
সর্বভূতহিতা যে চ শ্রাদ্ধেষ্বেতান্নিমন্ত্রয়েৎ
এতেষু দত্তমক্ষয্যমেতে বৈ পঙ্ক্তিপাবনাঃ
90.25
ইমে পরে মহারাজ বিজ্ঞেয়াঃ পঙ্ক্তিপাবনাঃ
যতয়ো মোক্ষধর্মজ্ঞা যোগাঃ সুচরিতব্রতাঃ
90.26
যে চেতিহাসং প্রয়তাঃ শ্রাবয়ন্তি দ্বিজোত্তমান্
যে চ ভাষ্যবিদঃ কেচিদ্যে চ ব্যাকরণে রতাঃ
90.27
অধীয়তে পুরাণং যে ধর্মশাস্ত্রাণ্যথাপি চ
অধীত্য চ যথান্যায়ং বিধিবত্তস্য কারিণঃ
90.28
উপপন্নো গুরুকুলে সত্যবাদী সহস্রদঃ
অগ্র্যঃ সর্বেষু বেদেষু সর্বপ্রবচনেষু চ
90.29
যাবদেতে প্রপশ্যন্তি পঙ্ক্ত্যাস্তাবত্পুনন্ত্যুত
ততো হি পাবনাত্পঙ্ক্ত্যাঃ পঙ্ক্তিপাবন উচ্যতে
90.30
ক্রোশাদর্ধতৃতীয়াত্তু পাবয়েদেক এব হি
ব্রহ্মদেয়ানুসংতান ইতি ব্রহ্মবিদো বিদুঃ
90.31
অনৃত্বিগনুপাধ্যায়ঃ স চেদগ্রাসনং ব্রজেৎ
ঋত্বিগ্ভিরননুজ্ঞাতঃ পঙ্ক্ত্যা হরতি দুষ্কৃতম্
90.32
অথ চেদ্বেদবিত্সর্বৈঃ পঙ্ক্তিদোষৈর্বিবর্জিতঃ
ন চ স্যাত্পতিতো রাজন্পঙ্ক্তিপাবন এব সঃ
90.33
তস্মাত্সর্বপ্রয়ত্নেন পরীক্ষ্যামন্ত্রয়েদ্দ্বিজান্
স্বকর্মনিরতান্দান্তান্কুলে জাতান্বহুশ্রুতান্
90.34
যস্য মিত্রপ্রধানানি শ্রাদ্ধানি চ হবীংষি চ
ন প্রীণাতি পিতৄন্দেবান্স্বর্গং চ ন স গচ্ছতি
90.35
যশ্চ শ্রাদ্ধে কুরুতে সংগতানি; ন দেবয়ানেন পথা স যাতি
স বৈ মুক্তঃ পিপ্পলং বন্ধনাদ্বা; স্বর্গাল্লোকাচ্চ্যবতে শ্রাদ্ধমিত্রঃ
90.36
তস্মান্মিত্রং শ্রাদ্ধকৃন্নাদ্রিয়েত; দদ্যান্মিত্রেভ্যঃ সংগ্রহার্থং ধনানি
যং মন্যতে নৈব শত্রুং ন মিত্রং; তং মধ্যস্থং ভোজয়েদ্ধব্যকব্যে
90.37
যথোষরে বীজমুপ্তং ন রোহে;ন্ন চাস্যোপ্তা প্রাপ্নুয়াদ্বীজভাগম্
এবং শ্রাদ্ধং ভুক্তমনর্হমাণৈ;র্ন চেহ নামুত্র ফলং দদাতি
90.38
ব্রাহ্মণো হ্যনধীয়ানস্তৃণাগ্নিরিব শাম্যতি
তস্মৈ শ্রাদ্ধং ন দাতব্যং ন হি ভস্মনি হূয়তে
90.39
সংভোজনী নাম পিশাচদক্ষিণা; সা নৈব দেবান্ন পিতৄনুপৈতি
ইহৈব সা ভ্রাম্যতি ক্ষীণপুণ্যা; শালান্তরে গৌরিব নষ্টবত্সা
90.40
যথাগ্নৌ শান্তে ঘৃতমাজুহোতি; তন্নৈব দেবান্ন পিতৄনুপৈতি
তথা দত্তং নর্তনে গায়নে চ; যাং চানৃচে দক্ষিণামাবৃণোতি
90.41
উভৌ হিনস্তি ন ভুনক্তি চৈষা; যা চানৃচে দক্ষিণা দীয়তে বৈ
আঘাতনী গর্হিতৈষা পতন্তী; তেষাং প্রেতান্পাতয়েদ্দেবয়ানাৎ
90.42
ঋষীণাং সময়ং নিত্যং যে চরন্তি যুধিষ্ঠির
নিশ্চিতাঃ সর্বধর্মজ্ঞাস্তান্দেবা ব্রাহ্মণান্বিদুঃ
90.43
স্বাধ্যায়নিষ্ঠা ঋষয়ো জ্ঞাননিষ্ঠাস্তথৈব চ
তপোনিষ্ঠাশ্চ বোদ্ধব্যাঃ কর্মনিষ্ঠাশ্চ ভারত
90.44
কব্যানি জ্ঞাননিষ্ঠেভ্যঃ প্রতিষ্ঠাপ্যানি ভারত
তত্র যে ব্রাহ্মণাঃ কেচিন্ন নিন্দতি হি তে বরাঃ
90.45
যে তু নিন্দন্তি জল্পেষু ন তাঞ্শ্রাদ্ধেষু ভোজয়েৎ
ব্রাহ্মণা নিন্দিতা রাজন্হন্যুস্ত্রিপুরুষং কুলম্
90.46
বৈখানসানাং বচনমৃষীণাং শ্রূয়তে নৃপ
দূরাদেব পরীক্ষেত ব্রাহ্মণান্বেদপারগান্
প্রিয়ান্বা যদি বা দ্বেষ্যাংস্তেষু তচ্ছ্রাদ্ধমাবপেৎ
90.47
যঃ সহস্রং সহস্রাণাং ভোজয়েদনৃচাং নরঃ
একস্তান্মন্ত্রবিত্প্রীতঃ সর্বানর্হতি ভারত