Utshovঅধ্যায় 91
91.1
যুধিষ্ঠির উবাচ
কেন সংকল্পিতং শ্রাদ্ধং কস্মিন্কালে কিমাত্মকম্
ভৃগ্বঙ্গিরসকে কালে মুনিনা কতরেণ বা
91.2
কানি শ্রাদ্ধেষু বর্জ্যানি তথা মূলফলানি চ
ধান্যজাতিশ্চ কা বর্জ্যা তন্মে ব্রূহি পিতামহ
91.3
ভীষ্ম উবাচ
যথা শ্রাদ্ধং সংপ্রবৃত্তং যস্মিন্কালে যদাত্মকম্
যেন সংকল্পিতং চৈব তন্মে শৃণু জনাধিপ
91.4
স্বায়ংভুবোঽত্রিঃ কৌরব্য পরমর্ষিঃ প্রতাপবান্
তস্য বংশে মহারাজ দত্তাত্রেয় ইতি স্মৃতঃ
91.5
দত্তাত্রেয়স্য পুত্রোঽভূন্নিমির্নাম তপোধনঃ
নিমেশ্চাপ্যভবত্পুত্রঃ শ্রীমান্নাম শ্রিয়া বৃতঃ
91.6
পূর্ণে বর্ষসহস্রান্তে স কৃত্বা দুষ্করং তপঃ
কালধর্মপরীতাত্মা নিধনং সমুপাগতঃ
91.7
নিমিস্তু কৃত্বা শৌচানি বিধিদৃষ্টেন কর্মণা
সংতাপমগমত্তীব্রং পুত্রশোকপরায়ণঃ
91.8
অথ কৃত্বোপহার্যাণি চতুর্দশ্যাং মহামতিঃ
তমেব গণয়ঞ্শোকং বিরাত্রে প্রত্যবুধ্যত
91.9
তস্যাসীত্প্রতিবুদ্ধস্য শোকেন পিহিতাত্মনঃ
মনঃ সংহৃত্য বিষয়ে বুদ্ধির্বিস্তরগামিনী
91.10
ততঃ সংচিন্তয়ামাস শ্রাদ্ধকল্পং সমাহিতঃ
যানি তস্যৈব ভোজ্যানি মূলানি চ ফলানি চ
91.11
উক্তানি যানি চান্যানি যানি চেষ্টানি তস্য হ
তানি সর্বাণি মনসা বিনিশ্চিত্য তপোধনঃ
91.12
অমাবাস্যাং মহাপ্রাজ্ঞ বিপ্রানানায্য পূজিতান্
দক্ষিণাবর্তিকাঃ সর্বা বৃসীঃ স্বয়মথাকরোৎ
91.13
সপ্ত বিপ্রাংস্ততো ভোজ্যে যুগপত্সমুপানয়ৎ
ঋতে চ লবণং ভোজ্যং শ্যামাকান্নং দদৌ প্রভুঃ
91.14
দক্ষিণাগ্রাস্ততো দর্ভা বিষ্টরেষু নিবেশিতাঃ
পাদয়োশ্চৈব বিপ্রাণাং যে ত্বন্নমুপভুঞ্জতে
91.15
কৃত্বা চ দক্ষিণাগ্রান্বৈ দর্ভান্সুপ্রয়তঃ শুচিঃ
প্রদদৌ শ্রীমতে পিণ্ডং নামগোত্রমুদাহরন্
91.16
তত্কৃত্বা স মুনিশ্রেষ্ঠো ধর্মসংকরমাত্মনঃ
পশ্চাত্তাপেন মহতা তপ্যমানোঽভ্যচিন্তয়ৎ
91.17
অকৃতং মুনিভিঃ পূর্বং কিং ময়ৈতদনুষ্ঠিতম্
কথং নু শাপেন ন মাং দহেয়ুর্ব্রাহ্মণা ইতি
91.18
ততঃ সংচিন্তয়ামাস বংশকর্তারমাত্মনঃ
ধ্যাতমাত্রস্তথা চাত্রিরাজগাম তপোধনঃ
91.19
অথাত্রিস্তং তথা দৃষ্ট্বা পুত্রশোকেন কর্শিতম্
ভৃশমাশ্বাসয়ামাস বাগ্ভিরিষ্টাভিরব্যয়ঃ
91.20
নিমে সংকল্পিতস্তেঽয়ং পিতৃয়জ্ঞস্তপোধনঃ
মা তে ভূদ্ভীঃ পূর্বদৃষ্টো ধর্মোঽয়ং ব্রহ্মণা স্বয়ম্
91.21
সোঽয়ং স্বয়ংভুবিহিতো ধর্মঃ সংকল্পিতস্ত্বয়া
ঋতে স্বয়ংভুবঃ কোঽন্যঃ শ্রাদ্ধেয়ং বিধিমাহরেৎ
91.22
আখ্যাস্যামি চ তে ভূয়ঃ শ্রাদ্ধেয়ং বিধিমুত্তমম্
স্বয়ংভুবিহিতং পুত্র তত্কুরুষ্ব নিবোধ মে
91.23
কৃত্বাগ্নিকরণং পূর্বং মন্ত্রপূর্বং তপোধন
ততোঽর্যম্ণে চ সোমায় বরুণায় চ নিত্যশঃ
91.24
বিশ্বেদেবাশ্চ যে নিত্যং পিতৃভিঃ সহ গোচরাঃ
তেভ্যঃ সংকল্পিতা ভাগাঃ স্বয়মেব স্বয়ংভুবা
91.25
স্তোতব্যা চেহ পৃথিবী নিবাপস্যেহ ধারিণী
বৈষ্ণবী কাশ্যপী চেতি তথৈবেহাক্ষয়েতি চ
91.26
উদকানয়নে চৈব স্তোতব্যো বরুণো বিভুঃ
ততোঽগ্নিশ্চৈব সোমশ্চ আপ্যায্যাবিহ তেঽনঘ
91.27
দেবাস্তু পিতরো নাম নির্মিতা বৈ স্বয়ংভুবা
ঊষ্মপাঃ সুমহাভাগাস্তেষাং ভাগাঃ প্রকল্পিতাঃ
91.28
তে শ্রাদ্ধেনার্চ্যমানা বৈ বিমুচ্যন্তে হ কিল্বিষাৎ
সপ্তকঃ পিতৃবংশস্তু পূর্বদৃষ্টঃ স্বয়ংভুবা
91.29
বিশ্বে চাগ্নিমুখা দেবাঃ সংখ্যাতাঃ পূর্বমেব তে
তেষাং নামানি বক্ষ্যামি ভাগার্হাণাং মহাত্মনাম্
91.30
সহঃ কৃতির্বিপাপ্মা চ পুণ্যকৃত্পাবনস্তথা
গ্রাম্নিঃ ক্ষেমঃ সমূহশ্চ দিব্যসানুস্তথৈব চ
91.31
বিবস্বান্বীর্যবান্হ্রীমান্কীর্তিমান্কৃত এব চ
বিপূর্বঃ সোমপূর্বশ্চ সূর্যশ্রীশ্চেতি নামতঃ
91.32
সোমপঃ সূর্যসাবিত্রো দত্তাত্মা পুষ্করীয়কঃ
উষ্ণীনাভো নভোদশ্চ বিশ্বায়ুর্দীপ্তিরেব চ
91.33
চমূহরঃ সুবেষশ্চ ব্যোমারিঃ শংকরো ভবঃ
ঈশঃ কর্তা কৃতির্দক্ষো ভুবনো দিব্যকর্মকৃৎ
91.34
গণিতঃ পঞ্চবীর্যশ্চ আদিত্যো রশ্মিমাংস্তথা
সপ্তকৃত্সোমবর্চাশ্চ বিশ্বকৃত্কবিরেব চ
91.35
অনুগোপ্তা সুগোপ্তা চ নপ্তা চেশ্বর এব চ
জিতাত্মা মুনিবীর্যশ্চ দীপ্তলোমা ভয়ংকরঃ
91.36
অতিকর্মা প্রতীতশ্চ প্রদাতা চাংশুমাংস্তথা
শৈলাভঃ পরমক্রোধী ধীরোষ্ণী ভূপতিস্তথা
91.37
স্রজী বজ্রী বরী চৈব বিশ্বেদেবাঃ সনাতনাঃ
কীর্তিতাস্তে মহাভাগাঃ কালস্য গতিগোচরাঃ
91.38
অশ্রাদ্ধেয়ানি ধান্যানি কোদ্রবাঃ পুলকাস্তথা
হিঙ্গু দ্রব্যেষু শাকেষু পলাণ্ডুং লশুনং তথা
91.39
পলাণ্ডুঃ সৌভঞ্জনকস্তথা গৃঞ্জনকাদয়ঃ
কূষ্মাণ্ডজাত্যলাবুং চ কৃষ্ণং লবণমেব চ
91.40
গ্রাম্যং বারাহমাংসং চ যচ্চৈবাপ্রোক্ষিতং ভবেৎ
কৃষ্ণাজাজী বিডশ্চৈব শীতপাকী তথৈব চ
অঙ্কুরাদ্যাস্তথা বর্জ্যা ইহ শৃঙ্গাটকানি চ
91.41
বর্জয়েল্লবণং সর্বং তথা জম্বূফলানি চ
অবক্ষুতাবরুদিতং তথা শ্রাদ্ধেষু বর্জয়েৎ
91.42
নিবাপে হব্যকব্যে বা গর্হিতং চ শ্বদর্শনম্
পিতরশ্চৈব দেবাশ্চ নাভিনন্দন্তি তদ্ধবিঃ
91.43
চণ্ডালশ্বপচৌ বর্জ্যৌ নিবাপে সমুপস্থিতে
কাষায়বাসী কুষ্ঠী বা পতিতো ব্রহ্মহাপি বা
91.44
সংকীর্ণয়োনির্বিপ্রশ্চ সংবন্ধী পতিতশ্চ যঃ
বর্জনীয়া বুধৈরেতে নিবাপে সমুপস্থিতে
91.45
ইত্যেবমুক্ত্বা ভগবান্স্ববংশজমৃষিং পুরা
পিতামহসভাং দিব্যাং জগামাত্রিস্তপোধনঃ