অধ্যায় 92

92.1

ভীষ্ম উবাচ
তথা বিধৌ প্রবৃত্তে তু সর্ব এব মহর্ষয়ঃ
পিতৃয়জ্ঞানকুর্বন্ত বিধিদৃষ্টেন কর্মণা

ঋষয়ো ধর্মনিত্যাস্তু কৃত্বা নিবপনান্যুত
তর্পণং চাপ্যকুর্বন্ত তীর্থাম্ভোভির্যতব্রতাঃ

নিবাপৈর্দীয়মানৈশ্চ চাতুর্বর্ণ্যেন ভারত
তর্পিতাঃ পিতরো দেবাস্তে নান্নং জরয়ন্তি বৈ

অজীর্ণেনাভিহন্যন্তে তে দেবাঃ পিতৃভিঃ সহ
সোমমেবাভ্যপদ্যন্ত নিবাপান্নাভিপীডিতাঃ

তেঽব্রুবন্সোমমাসাদ্য পিতরোঽজীর্ণপীডিতাঃ
নিবাপান্নেন পীড্যামঃ শ্রেয়ো নোঽত্র বিধীয়তাম্

তান্সোমঃ প্রত্যুবাচাথ শ্রেয়শ্চেদীপ্সিতং সুরাঃ
স্বয়ংভূসদনং যাত স বঃ শ্রেয়ো বিধাস্যতি

তে সোমবচনাদ্দেবাঃ পিতৃভিঃ সহ ভারত
মেরুশৃঙ্গে সমাসীনং পিতামহমুপাগমন্

পিতর ঊচুঃ
নিবাপান্নেন ভগবন্ভৃশং পীড্যামহে বয়ম্
প্রসাদং কুরু নো দেব শ্রেয়ো নঃ সংবিধীয়তাম্

ইতি তেষাং বচঃ শ্রুত্বা স্বয়ংভূরিদমব্রবীৎ
এষ মে পার্শ্বতো বহ্নির্যুষ্মচ্ছ্রেয়ো বিধাস্যতি

অগ্নিরুবাচ
সহিতাস্তাত ভোক্ষ্যামো নিবাপে সমুপস্থিতে
জরয়িষ্যথ চাপ্যন্নং ময়া সার্ধং ন সংশয়ঃ

এতচ্ছ্রুত্বা তু পিতরস্ততস্তে বিজ্বরাভবন্
এতস্মাত্কারণাচ্চাগ্নেঃ প্রাক্তনং দীয়তে নৃপ

নিবপ্তে চাগ্নিপূর্বে বৈ নিবাপে পুরুষর্ষভ
ন ব্রহ্মরাক্ষসাস্তং বৈ নিবাপং ধর্ষয়ন্ত্যুত
রক্ষাংসি চাপবর্তন্তে স্থিতে দেবে বিভাবসৌ

পূর্বং পিণ্ডং পিতুর্দদ্যাত্ততো দদ্যাত্পিতামহে
প্রপিতামহায় চ তত এষ শ্রাদ্ধবিধিঃ স্মৃতঃ

ব্রূয়াচ্ছ্রাদ্ধে চ সাবিত্রীং পিণ্ডে পিণ্ডে সমাহিতঃ
সোমায়েতি চ বক্তব্যং তথা পিতৃমতেতি চ

রজস্বলা চ যা নারী ব্যঙ্গিতা কর্ণয়োশ্চ যা
নিবাপে নোপতিষ্ঠেত সংগ্রাহ্যা নান্যবংশজাঃ

জলং প্রতরমাণশ্চ কীর্তয়েত পিতামহান্
নদীমাসাদ্য কুর্বীত পিতৄণাং পিণ্ডতর্পণম্

পূর্বং স্ববংশজানাং তু কৃত্বাদ্ভিস্তর্পণং পুনঃ
সুহৃত্সংবন্ধিবর্গাণাং ততো দদ্যাজ্জলাঞ্জলিম্

কল্মাষগোয়ুগেনাথ যুক্তেন তরতো জলম্
পিতরোঽভিলষন্তে বৈ নাবং চাপ্যধিরোহতঃ
সদা নাবি জলং তজ্জ্ঞাঃ প্রয়চ্ছন্তি সমাহিতাঃ

মাসার্ধে কৃষ্ণপক্ষস্য কুর্যান্নিবপনানি বৈ
পুষ্টিরায়ুস্তথা বীর্যং শ্রীশ্চৈব পিতৃবর্তিনঃ

পিতামহঃ পুলস্ত্যশ্চ বসিষ্ঠঃ পুলহস্তথা
অঙ্গিরাশ্চ ক্রতুশ্চৈব কশ্যপশ্চ মহানৃষিঃ
এতে কুরুকুলশ্রেষ্ঠ মহায়োগেশ্বরাঃ স্মৃতাঃ

এতে চ পিতরো রাজন্নেষ শ্রাদ্ধবিধিঃ পরঃ
প্রেতাস্তু পিণ্ডসংবন্ধান্মুচ্যন্তে তেন কর্মণা

ইত্যেষা পুরুষশ্রেষ্ঠ শ্রাদ্ধোত্পত্তির্যথাগমম্
খ্যাপিতা পূর্বনির্দিষ্টা দানং বক্ষ্যাম্যতঃ পরম্