অধ্যায় 93

93.1

যুধিষ্ঠির উবাচ
দ্বিজাতয়ো ব্রতোপেতা হবিস্তে যদি ভুঞ্জতে
অন্নং ব্রাহ্মণকামায় কথমেতত্পিতামহ

ভীষ্ম উবাচ
অবেদোক্তব্রতাশ্চৈব ভুঞ্জানাঃ কার্যকারিণঃ
বেদোক্তেষু তু ভুঞ্জানা ব্রতলুপ্তা যুধিষ্ঠির

যুধিষ্ঠির উবাচ
যদিদং তপ ইত্যাহুরুপবাসং পৃথগ্জনাঃ
তপঃ স্যাদেতদিহ বৈ তপোঽন্যদ্বাপি কিং ভবেৎ

ভীষ্ম উবাচ
মাসার্ধমাসৌ নোপবসেদ্যত্তপো মন্যতে জনঃ
আত্মতন্ত্রোপঘাতী যো ন তপস্বী ন ধর্মবিৎ

ত্যাগস্যাপি চ সংপত্তিঃ শিষ্যতে তপ উত্তমম্
সদোপবাসী চ ভবেদ্ব্রহ্মচারী তথৈব চ

মুনিশ্চ স্যাত্সদা বিপ্রো দেবাংশ্চৈব সদা যজেৎ
কুটুম্বিকো ধর্মকামঃ সদাস্বপ্নশ্চ ভারত

অমৃতাশী সদা চ স্যাত্পবিত্রী চ সদা ভবেৎ
ঋতবাদী সদা চ স্যান্নিয়তশ্চ সদা ভবেৎ

বিঘসাশী সদা চ স্যাত্সদা চৈবাতিথিপ্রিয়ঃ
অমাংসাশী সদা চ স্যাত্পবিত্রী চ সদা ভবেৎ

যুধিষ্ঠির উবাচ
কথং সদোপবাসী স্যাদ্ব্রহ্মচারী চ পার্থিব
বিঘসাশী কথং চ স্যাত্কথং চৈবাতিথিপ্রিয়ঃ

ভীষ্ম উবাচ
অন্তরা সায়মাশং চ প্রাতরাশং তথৈব চ
সদোপবাসী ভবতি যো ন ভুঙ্ক্তেঽন্তরা পুনঃ

ভার্যাং গচ্ছন্ব্রহ্মচারী সদা ভবতি চৈব হ
ঋতবাদী সদা চ স্যাদ্দানশীলশ্চ মানবঃ

অভক্ষয়ন্বৃথা মাংসমমাংসাশী ভবত্যুত
দানং দদত্পবিত্রী স্যাদস্বপ্নশ্চ দিবাস্বপন্

ভৃত্যাতিথিষু যো ভুঙ্ক্তে ভুক্তবত্সু নরঃ সদা
অমৃতং কেবলং ভুঙ্ক্তে ইতি বিদ্ধি যুধিষ্ঠির

অভুক্তবত্সু নাশ্নাতি ব্রাহ্মণেষু তু যো নরঃ
অভোজনেন তেনাস্য জিতঃ স্বর্গো ভবত্যুত

দেবেভ্যশ্চ পিতৃভ্যশ্চ ভৃত্যেভ্যোঽতিথিভিঃ সহ
অবশিষ্টানি যো ভুঙ্ক্তে তমাহুর্বিঘসাশিনম্

তেষাং লোকা হ্যপর্যন্তাঃ সদনে ব্রহ্মণঃ স্মৃতাঃ
উপস্থিতা হ্যপ্সরোভির্গন্ধর্বৈশ্চ জনাধিপ

দেবতাতিথিভিঃ সার্ধং পিতৃভিশ্চোপভুঞ্জতে
রমন্তে পুত্রপৌত্রৈশ্চ তেষাং গতিরনুত্তমা