Utshovঅধ্যায় 94
94.1
যুধিষ্ঠির উবাচ
ব্রাহ্মণেভ্যঃ প্রয়চ্ছন্তি দানানি বিবিধানি চ
দাতৃপ্রতিগ্রহীত্রোর্বা কো বিশেষঃ পিতামহ
94.2
ভীষ্ম উবাচ
সাধোর্যঃ প্রতিগৃহ্ণীয়াত্তথৈবাসাধুতো দ্বিজঃ
গুণবত্যল্পদোষঃ স্যান্নির্গুণে তু নিমজ্জতি
94.3
অত্রাপ্যুদাহরন্তীমমিতিহাসং পুরাতনম্
বৃষাদর্ভেশ্চ সংবাদং সপ্তর্ষীণাং চ ভারত
94.4
কশ্যপোঽত্রির্বসিষ্ঠশ্চ ভরদ্বাজোঽথ গৌতমঃ
বিশ্বামিত্রো জমদগ্নিঃ সাধ্বী চৈবাপ্যরুন্ধতী
94.5
সর্বেষামথ তেষাং তু গণ্ডাভূত্কর্মকারিকা
শূদ্রঃ পশুসখশ্চৈব ভর্তা চাস্যা বভূব হ
94.6
তে বৈ সর্বে তপস্যন্তঃ পুরা চেরুর্মহীমিমাম্
সমাধিনোপশিক্ষন্তো ব্রহ্মলোকং সনাতনম্
94.7
অথাভবদনাবৃষ্টির্মহতী কুরুনন্দন
কৃচ্ছ্রপ্রাণোঽভবদ্যত্র লোকোঽয়ং বৈ ক্ষুধান্বিতঃ
94.8
কস্মিংশ্চিচ্চ পুরা যজ্ঞে যাজ্যেন শিবিসূনুনা
দক্ষিণার্থেঽথ ঋত্বিগ্ভ্যো দত্তঃ পুত্রো নিজঃ কিল
94.9
তস্মিন্কালেঽথ সোঽল্পায়ুর্দিষ্টান্তমগমত্প্রভো
তে তং ক্ষুধাভিসংতপ্তাঃ পরিবার্যোপতস্থিরে
94.10
যাজ্যাত্মজমথো দৃষ্ট্বা গতাসুমৃষিসত্তমাঃ
অপচন্ত তদা স্থাল্যাং ক্ষুধার্তাঃ কিল ভারত
94.11
নিরাদ্যে মর্ত্যলোকেঽস্মিন্নাত্মানং তে পরীপ্সবঃ
কৃচ্ছ্রামাপেদিরে বৃত্তিমন্নহেতোস্তপস্বিনঃ
94.12
অটমানোঽথ তান্মার্গে পচমানান্মহীপতিঃ
রাজা শৈব্যো বৃষাদর্ভিঃ ক্লিশ্যমানান্দদর্শ হ
94.13
বৃষাদর্ভিরুবাচ
প্রতিগ্রহস্তারয়তি পুষ্টির্বৈ প্রতিগৃহ্ণতাম্
ময়ি যদ্বিদ্যতে বিত্তং তচ্ছৃণুধ্বং তপোধনাঃ
94.14
প্রিয়ো হি মে ব্রাহ্মণো যাচমানো; দদ্যামহং বোঽশ্বতরীসহস্রম্
একৈকশঃ সবৃষাঃ সংপ্রসূতাঃ; সর্বেষাং বৈ শীঘ্রগাঃ শ্বেতলোমাঃ
94.15
কুলংভরাননডুহঃ শতংশতা;ন্ধুর্যাঞ্শুভান্সর্বশোঽহং দদানি
পৃথ্বীবাহান্পীবরাংশ্চৈব তাব;দগ্র্যা গৃষ্ট্যো ধেনবঃ সুব্রতাশ্চ
94.16
বরান্গ্রামান্ব্রীহিয়বং রসাংশ্চ; রত্নং চান্যদ্দুর্লভং কিং দদানি
মা স্মাভক্ষ্যে ভাবমেবং কুরুধ্বং; পুষ্ট্যর্থং বৈ কিং প্রয়চ্ছাম্যহং বঃ
94.17
ঋষয় ঊচুঃ
রাজন্প্রতিগ্রহো রাজ্ঞো মধ্বাস্বাদো বিষোপমঃ
তজ্জানমানঃ কস্মাত্ত্বং কুরুষে নঃ প্রলোভনম্
94.18
ক্ষত্রং হি দৈবতমিব ব্রাহ্মণং সমুপাশ্রিতম্
অমলো হ্যেষ তপসা প্রীতঃ প্রীণাতি দেবতাঃ
94.19
অহ্নাপীহ তপো জাতু ব্রাহ্মণস্যোপজায়তে
তদ্দাব ইব নির্দহ্যাত্প্রাপ্তো রাজপ্রতিগ্রহঃ
94.20
কুশলং সহ দানেন রাজন্নস্তু সদা তব
অর্থিভ্যো দীয়তাং সর্বমিত্যুক্ত্বা তে ততো যয়ুঃ
94.21
অপক্বমেব তন্মাংসমভূত্তেষাং চ ধীমতাম্
অথ হিত্বা যয়ুঃ সর্বে বনমাহারকাঙ্ক্ষিণঃ
94.22
ততঃ প্রচোদিতা রাজ্ঞা বনং গত্বাস্য মন্ত্রিণঃ
প্রচীয়োদুম্বরাণি স্ম দানং দাতুং প্রচক্রমুঃ
94.23
উদুম্বরাণ্যথান্যানি হেমগর্ভাণ্যুপাহরন্
ভৃত্যাস্তেষাং ততস্তানি প্রগ্রাহিতুমুপাদ্রবন্
94.24
গুরূণীতি বিদিত্বাথ ন গ্রাহ্যাণ্যত্রিরব্রবীৎ
ন স্ম হে মূঢবিজ্ঞানা ন স্ম হে মন্দবুদ্ধয়ঃ
হৈমানীমানি জানীমঃ প্রতিবুদ্ধাঃ স্ম জাগৃমঃ
94.25
ইহ হ্যেতদুপাদত্তং প্রেত্য স্যাত্কটুকোদয়ম্
অপ্রতিগ্রাহ্যমেবৈতত্প্রেত্য চেহ সুখেপ্সুনা
94.26
বসিষ্ঠ উবাচ
শতেন নিষ্কং গণিতং সহস্রেণ চ সংমিতম্
যথা বহু প্রতীচ্ছন্হি পাপিষ্ঠাং লভতে গতিম্
94.27
কশ্যপ উবাচ
যত্পৃথিব্যাং ব্রীহিয়বং হিরণ্যং পশবঃ স্ত্রিয়ঃ
সর্বং তন্নালমেকস্য তস্মাদ্বিদ্বাঞ্শমং ব্রজেৎ
94.28
ভরদ্বাজ উবাচ
উত্পন্নস্য রুরোঃ শৃঙ্গং বর্ধমানস্য বর্ধতে
প্রার্থনা পুরুষস্যেব তস্য মাত্রা ন বিদ্যতে
94.29
গৌতম উবাচ
ন তল্লোকে দ্রব্যমস্তি যল্লোকং প্রতিপূরয়েৎ
সমুদ্রকল্পঃ পুরুষো ন কদাচন পূর্যতে
94.30
বিশ্বামিত্র উবাচ
কামং কাময়মানস্য যদা কামঃ সমৃধ্যতে
অথৈনমপরঃ কামস্তৃষ্ণা বিধ্যতি বাণবৎ
94.31
জমদগ্নিরুবাচ
প্রতিগ্রহে সংয়মো বৈ তপো ধারয়তে ধ্রুবম্
তদ্ধনং ব্রাহ্মণস্যেহ লুভ্যমানস্য বিস্রবেৎ
94.32
অরুন্ধত্যুবাচ
ধর্মার্থং সংচয়ো যো বৈ দ্রব্যাণাং পক্ষসংমতঃ
তপঃসংচয় এবেহ বিশিষ্টো দ্রব্যসংচয়াৎ
94.33
গণ্ডোবাচ
উগ্রাদিতো ভয়াদ্যস্মাদ্বিভ্যতীমে মমেশ্বরাঃ
বলীয়াংসো দুর্বলবদ্বিভেম্যহমতঃ পরম্
94.34
পশুসখ উবাচ
যদ্বৈ ধর্মে পরং নাস্তি ব্রাহ্মণাস্তদ্ধনং বিদুঃ
বিনয়ার্থং সুবিদ্বাংসমুপাসেয়ং যথাতথম্
94.35
ঋষয় ঊচুঃ
কুশলং সহ দানায় তস্মৈ যস্য প্রজা ইমাঃ
ফলান্যুপধিয়ুক্তানি য এবং নঃ প্রয়চ্ছসি
94.36
ভীষ্ম উবাচ
ইত্যুক্ত্বা হেমগর্ভাণি হিত্বা তানি ফলানি তে
ঋষয়ো জগ্মুরন্যত্র সর্ব এব ধৃতব্রতাঃ
94.37
মন্ত্রিণঃ ঊচুঃ
উপধিং শঙ্কমানাস্তে হিত্বেমানি ফলানি বৈ
ততোঽন্যেনৈব গচ্ছন্তি বিদিতং তেঽস্তু পার্থিব
94.38
ইত্যুক্তঃ স তু ভৃত্যৈস্তৈর্বৃষাদর্ভিশ্চুকোপ হ
তেষাং সংপ্রতিকর্তুং চ সর্বেষামগমদ্গৃহম্
94.39
স গত্বাহবনীয়েঽগ্নৌ তীব্রং নিয়মমাস্থিতঃ
জুহাব সংস্কৃতাং মন্ত্রৈরেকৈকামাহুতিং নৃপঃ
94.40
তস্মাদগ্নেঃ সমুত্তস্থৌ কৃত্যা লোকভয়ংকরী
তস্যা নাম বৃষাদর্ভির্যাতুধানীত্যথাকরোৎ
94.41
সা কৃত্যা কালরাত্রীব কৃতাঞ্জলিরুপস্থিতা
বৃষাদর্ভিং নরপতিং কিং করোমীতি চাব্রবীৎ
94.42
বৃষাদর্ভিরুবাচ
ঋষীণাং গচ্ছ সপ্তানামরুন্ধত্যাস্তথৈব চ
দাসীভর্তুশ্চ দাস্যাশ্চ মনসা নাম ধারয়
94.43
জ্ঞাত্বা নামানি চৈতেষাং সর্বানেতান্বিনাশয়
বিনষ্টেষু যথা স্বৈরং গচ্ছ যত্রেপ্সিতং তব
94.44
সা তথেতি প্রতিশ্রুত্য যাতুধানী স্বরূপিণী
জগাম তদ্বনং যত্র বিচেরুস্তে মহর্ষয়ঃ