অধ্যায় 95

95.1

ভীষ্ম উবাচ
অথাত্রিপ্রমুখা রাজন্বনে তস্মিন্মহর্ষয়ঃ
ব্যচরন্ভক্ষয়ন্তো বৈ মূলানি চ ফলানি চ

95.2

অথাপশ্যন্সুপীনাংসপাণিপাদমুখোদরম্
পরিব্রজন্তং স্থূলাঙ্গং পরিব্রাজং শুনঃসখম্

95.3

অরুন্ধতী তু তং দৃষ্ট্বা সর্বাঙ্গোপচিতং শুভা
ভবিতারো ভবন্তো বৈ নৈবমিত্যব্রবীদৃষীন্

95.4

বসিষ্ঠ উবাচ
নৈতস্যেহ যথাস্মাকমগ্নিহোত্রমনির্হুতম্
সায়ং প্রাতশ্চ হোতব্যং তেন পীবাঞ্শুনঃসখঃ

95.5

অত্রিরুবাচ
নৈতস্যেহ যথাস্মাকং ক্ষুধা বীর্যং সমাহতম্
কৃচ্ছ্রাধীতং প্রনষ্টং চ তেন পীবাঞ্শুনঃসখঃ

95.6

বিশ্বামিত্র উবাচ
নৈতস্যেহ যথাস্মাকং শশ্বচ্ছাস্ত্রং জরদ্গবঃ
অলসঃ ক্ষুত্পরো মূর্খস্তেন পীবাঞ্শুনঃসখঃ

95.7

জমদগ্নিরুবাচ
নৈতস্যেহ যথাস্মাকং ভক্তমিন্ধনমেব চ
সংচিন্ত্য বার্ষিকং কিংচিত্তেন পীবাঞ্শুনঃসখঃ

95.8

কশ্যপ উবাচ
নৈতস্যেহ যথাস্মাকং চত্বারশ্চ সহোদরাঃ
দেহি দেহীতি ভিক্ষন্তি তেন পীবাঞ্শুনঃসখঃ

95.9

ভরদ্বাজ উবাচ
নৈতস্যেহ যথাস্মাকং ব্রহ্মবন্ধোরচেতসঃ
শোকো ভার্যাপবাদেন তেন পীবাঞ্শুনঃসখঃ

95.10

গৌতম উবাচ
নৈতস্যেহ যথাস্মাকং ত্রিকৌশেয়ং হি রাঙ্কবম্
একৈকং বৈ ত্রিবার্ষীয়ং তেন পীবাঞ্শুনঃসখঃ

95.11

ভীষ্ম উবাচ
অথ দৃষ্ট্বা পরিব্রাট্স তান্মহর্ষীঞ্শুনঃসখঃ
অভিগম্য যথান্যায়ং পাণিস্পর্শমথাচরৎ

95.12

পরিচর্যাং বনে তাং তু ক্ষুত্প্রতীঘাতকারিকাম্
অন্যোন্যেন নিবেদ্যাথ প্রাতিষ্ঠন্ত সহৈব তে

95.13

একনিশ্চয়কার্যাশ্চ ব্যচরন্ত বনানি তে
আদদানাঃ সমুদ্ধৃত্য মূলানি চ ফলানি চ

95.14

কদাচিদ্বিচরন্তস্তে বৃক্ষৈরবিরলৈর্বৃতাম্
শুচিবারিপ্রসন্নোদাং দদৃশুঃ পদ্মিনীং শুভাম্

95.15

বালাদিত্যবপুঃপ্রখ্যৈঃ পুষ্করৈরুপশোভিতাম্
বৈদূর্যবর্ণসদৃশৈঃ পদ্মপত্রৈরথাবৃতাম্

95.16

নানাবিধৈশ্চ বিহগৈর্জলপ্রকরসেবিভিঃ
একদ্বারামনাদেয়াং সূপতীর্থামকর্দমাম্

95.17

বৃষাদর্ভিপ্রয়ুক্তা তু কৃত্যা বিকৃতদর্শনা
যাতুধানীতি বিখ্যাতা পদ্মিনীং তামরক্ষত

95.18

শুনঃসখসহায়াস্তু বিসার্থং তে মহর্ষয়ঃ
পদ্মিনীমভিজগ্মুস্তে সর্বে কৃত্যাভিরক্ষিতাম্

95.19

ততস্তে যাতুধানীং তাং দৃষ্ট্বা বিকৃতদর্শনাম্
স্থিতাং কমলিনীতীরে কৃত্যামূচুর্মহর্ষয়ঃ

95.20

একা তিষ্ঠসি কা নু ত্বং কস্যার্থে কিং প্রয়োজনম্
পদ্মিনীতীরমাশ্রিত্য ব্রূহি ত্বং কিং চিকীর্ষসি

95.21

যাতুধান্যুবাচ
যাস্মি সাস্ম্যনুয়োগো মে ন কর্তব্যঃ কথংচন
আরক্ষিণীং মাং পদ্মিন্যা বিত্ত সর্বে তপোধনাঃ

95.22

ঋষয় ঊচুঃ
সর্ব এব ক্ষুধার্তাঃ স্ম ন চান্যত্কিংচিদস্তি নঃ
ভবত্যাঃ সংমতে সর্বে গৃহ্ণীমহি বিসান্যুত

95.23

যাতুধান্যুবাচ
সময়েন বিসানীতো গৃহ্ণীধ্বং কামকারতঃ
একৈকো নাম মে প্রোক্ত্বা ততো গৃহ্ণীত মাচিরম্

95.24

ভীষ্ম উবাচ
বিজ্ঞায় যাতুধানীং তাং কৃত্যামৃষিবধৈষিণীম্
অত্রিঃ ক্ষুধাপরীতাত্মা ততো বচনমব্রবীৎ

95.25

অরাত্রিরত্রেঃ সা রাত্রির্যাং নাধীতে ত্রিরদ্য বৈ
অরাত্রিরত্রিরিত্যেব নাম মে বিদ্ধি শোভনে

95.26

যাতুধান্যুবাচ
যথোদাহৃতমেতত্তে ময়ি নাম মহামুনে
দুর্ধার্যমেতন্মনসা গচ্ছাবতর পদ্মিনীম্

95.27

বসিষ্ঠ উবাচ
বসিষ্ঠোঽস্মি বরিষ্ঠোঽস্মি বসে বাসং গৃহেষ্বপি
বরিষ্ঠত্বাচ্চ বাসাচ্চ বসিষ্ঠ ইতি বিদ্ধি মাম্

95.28

যাতুধান্যুবাচ
নামনৈরুক্তমেতত্তে দুঃখব্যাভাষিতাক্ষরম্
নৈতদ্ধারয়িতুং শক্যং গচ্ছাবতর পদ্মিনীম্

95.29

কশ্যপ উবাচ
কুলং কুলং চ কুপপঃ কুপয়ঃ কশ্যপো দ্বিজঃ
কাশ্যঃ কাশনিকাশত্বাদেতন্মে নাম ধারয়

95.30

95.31

ভরদ্বাজ উবাচ
ভরে সুতান্ভরে শিষ্যান্ভরে দেবান্ভরে দ্বিজান্
ভরে ভার্যামনব্যাজো ভরদ্বাজোঽস্মি শোভনে

95.32

95.33

গৌতম উবাচ
গোদমো দমগোঽধূমো দমো দুর্দর্শনশ্চ তে
বিদ্ধি মাং গৌতমং কৃত্যে যাতুধানি নিবোধ মে

95.34

যাতুধান্যুবাচ
যথোদাহৃতমেতত্তে ময়ি নাম মহামুনে
নৈতদ্ধারয়িতুং শক্যং গচ্ছাবতর পদ্মিনীম্

95.35

বিশ্বামিত্র উবাচ
বিশ্বেদেবাশ্চ মে মিত্রং মিত্রমস্মি গবাং তথা
বিশ্বামিত্রমিতি খ্যাতং যাতুধানি নিবোধ মে

95.36

95.37

জমদগ্নিরুবাচ
জাজমদ্যজজা নাম মৃজা মাহ জিজায়িষে
জমদগ্নিরিতি খ্যাতমতো মাং বিদ্ধি শোভনে

95.38

95.39

অরুন্ধত্যুবাচ
ধরাং ধরিত্রীং বসুধাং ভর্তুস্তিষ্ঠাম্যনন্তরম্
মনোঽনুরুন্ধতী ভর্তুরিতি মাং বিদ্ধ্যরুন্ধতীম্

95.40

95.41

গণ্ডোবাচ
গণ্ডং গণ্ডং গতবতী গণ্ডগণ্ডেতি সংজ্ঞিতা
গণ্ডগণ্ডেব গণ্ডেতি বিদ্ধি মানলসংভবে

95.42

95.43

পশুসখ উবাচ
সখা সখে যঃ সখ্যেয়ঃ পশূনাং চ সখা সদা
গৌণং পশুসখেত্যেবং বিদ্ধি মামগ্নিসংভবে

95.44

95.45

শুনঃসখ উবাচ
এভিরুক্তং যথা নাম নাহং বক্তুমিহোত্সহে
শুনঃসখসখায়ং মাং যাতুধান্যুপধারয়

95.46

যাতুধান্যুবাচ
নাম তেঽব্যক্তমুক্তং বৈ বাক্যং সংদিগ্ধয়া গিরা
তস্মাত্সকৃদিদানীং ত্বং ব্রূহি যন্নাম তে দ্বিজ

95.47

শুনঃসখ উবাচ
সকৃদুক্তং ময়া নাম ন গৃহীতং যদা ত্বয়া
তস্মাত্ত্রিদণ্ডাভিহতা গচ্ছ ভস্মেতি মাচিরম্

95.48

ভীষ্ম উবাচ
সা ব্রহ্মদণ্ডকল্পেন তেন মূর্ধ্নি হতা তদা
কৃত্যা পপাত মেদিন্যাং ভস্মসাচ্চ জগাম হ

95.49

শুনঃসখশ্চ হত্বা তাং যাতুধানীং মহাবলাম্
ভুবি ত্রিদণ্ডং বিষ্টভ্য শাদ্বলে সমুপাবিশৎ

95.50

ততস্তে মুনয়ঃ সর্বে পুষ্করাণি বিসানি চ
যথাকামমুপাদায় সমুত্তস্থুর্মুদান্বিতাঃ

95.51

শ্রমেণ মহতা যুক্তাস্তে বিসানি কলাপশঃ
তীরে নিক্ষিপ্য পদ্মিন্যাস্তর্পণং চক্রুরম্ভসা

95.52

অথোত্থায় জলাত্তস্মাত্সর্বে তে বৈ সমাগমন্
নাপশ্যংশ্চাপি তে তানি বিসানি পুরুষর্ষভ

95.53

ঋষয় ঊচুঃ
কেন ক্ষুধাভিভূতানামস্মাকং পাপকর্মণা
নৃশংসেনাপনীতানি বিসান্যাহারকাঙ্ক্ষিণাম্

95.54

তে শঙ্কমানাস্ত্বন্যোন্যং পপ্রচ্ছুর্দ্বিজসত্তমাঃ
ত ঊচুঃ শপথং সর্বে কুর্ম ইত্যরিকর্শন

95.55

ত উক্ত্বা বাঢমিত্যেব সর্ব এব শুনঃসখম্
ক্ষুধার্তাঃ সুপরিশ্রান্তাঃ শপথায়োপচক্রমুঃ

95.56

অত্রিরুবাচ
স গাং স্পৃশতু পাদেন সূর্যং চ প্রতিমেহতু
অনধ্যায়েষ্বধীয়ীত বিসস্তৈন্যং করোতি যঃ

95.57

বসিষ্ঠ উবাচ
অনধ্যায়পরো লোকে শুনঃ স পরিকর্ষতু
পরিব্রাট্কামবৃত্তোঽস্তু বিসস্তৈন্যং করোতি যঃ

95.58

শরণাগতং হন্তু মিত্রং স্বসুতাং চোপজীবতু
অর্থান্কাঙ্ক্ষতু কীনাশাদ্বিসস্তৈন্যং করোতি যঃ

95.59

কশ্যপ উবাচ
সর্বত্র সর্বং পণতু ন্যাসলোপং করোতু চ
কূটসাক্ষিত্বমভ্যেতু বিসস্তৈন্যং করোতি যঃ

95.60

বৃথামাংসং সমশ্নাতু বৃথাদানং করোতু চ
যাতু স্ত্রিয়ং দিবা চৈব বিসস্তৈন্যং করোতি যঃ

95.61

ভরদ্বাজ উবাচ
নৃশংসস্ত্যক্তধর্মাস্তু স্ত্রীষু জ্ঞাতিষু গোষু চ
ব্রাহ্মণং চাপি জয়তাং বিসস্তৈন্যং করোতি যঃ

95.62

উপাধ্যায়মধঃ কৃত্বা ঋচোঽধ্যেতু যজূংষি চ
জুহোতু চ স কক্ষাগ্নৌ বিসস্তৈন্যং করোতি যঃ

95.63

জমদগ্নিরুবাচ
পুরীষমুত্সৃজত্বপ্সু হন্তু গাং চাপি দোহিনীম্
অনৃতৌ মৈথুনং যাতু বিসস্তৈন্যং করোতি যঃ

95.64

দ্বেষ্যো ভার্যোপজীবী স্যাদ্দূরবন্ধুশ্চ বৈরবান্
অন্যোন্যস্যাতিথিশ্চাস্তু বিসস্তৈন্যং করোতি যঃ

95.65

গৌতম উবাচ
অধীত্য বেদাংস্ত্যজতু ত্রীনগ্নীনপবিধ্যতু
বিক্রীণাতু তথা সোমং বিসস্তৈন্যং করোতি যঃ

95.66

উদপানপ্লবে গ্রামে ব্রাহ্মণো বৃষলীপতিঃ
তস্য সালোক্যতাং যাতু বিসস্তৈন্যং করোতি যঃ

95.67

বিশ্বামিত্র উবাচ
জীবতো বৈ গুরূন্ভৃত্যান্ভরন্ত্বস্য পরে জনাঃ
অগতির্বহুপুত্রঃ স্যাদ্বিসস্তৈন্যং করোতি যঃ

95.68

অশুচির্ব্রহ্মকূটোঽস্তু ঋদ্ধ্যা চৈবাপ্যহংকৃতঃ
কর্ষকো মত্সরী চাস্তু বিসস্তৈন্যং করোতি যঃ

95.69

বর্ষান্করোতু ভৃতকো রাজ্ঞশ্চাস্তু পুরোহিতঃ
অয়াজ্যস্য ভবেদৃত্বিগ্বিসস্তৈন্যং করোতি যঃ

95.70

অরুন্ধত্যুবাচ
নিত্যং পরিবদেচ্ছ্বশ্রূং ভর্তুর্ভবতু দুর্মনাঃ
একা স্বাদু সমশ্নাতু বিসস্তৈন্যং করোতি যা

95.71

জ্ঞাতীনাং গৃহমধ্যস্থা সক্তূনত্তু দিনক্ষয়ে
অভাগ্যাবীরসূরস্তু বিসস্তৈন্যং করোতি যা

95.72

গণ্ডোবাচ
অনৃতং ভাষতু সদা সাধুভিশ্চ বিরুধ্যতু
দদাতু কন্যাং শুল্কেন বিসস্তৈন্যং করোতি যা

95.73

সাধয়িত্বা স্বয়ং প্রাশেদ্দাস্যে জীবতু চৈব হ
বিকর্মণা প্রমীয়েত বিসস্তৈন্যং করোতি যা

95.74

পশুসখ উবাচ
দাস্য এব প্রজায়েত সোঽপ্রসূতিরকিংচনঃ
দৈবতেষ্বনমস্কারো বিসস্তৈন্যং করোতি যঃ

95.75

শুনঃসখ উবাচ
অধ্বর্যবে দুহিতরং দদাতু; চ্ছন্দোগে বা চরিতব্রহ্মচর্যে
আথর্বণং বেদমধীত্য বিপ্রঃ; স্নায়ীত যো বৈ হরতে বিসানি

95.76

ঋষয় ঊচুঃ
ইষ্টমেতদ্দ্বিজাতীনাং যোঽয়ং তে শপথঃ কৃতঃ
ত্বয়া কৃতং বিসস্তৈন্যং সর্বেষাং নঃ শুনঃসখ

95.77

শুনঃসখ উবাচ
ন্যস্তমাদ্যমপশ্যদ্ভির্যদুক্তং কৃতকর্মভিঃ
সত্যমেতন্ন মিথ্যৈতদ্বিসস্তৈন্যং কৃতং ময়া

95.78

ময়া হ্যন্তর্হিতানীহ বিসানীমানি পশ্যত
পরীক্ষার্থং ভগবতাং কৃতমেতন্ময়ানঘাঃ
রক্ষণার্থং চ সর্বেষাং ভবতামহমাগতঃ

95.79

যাতুধানী হ্যতিক্রুদ্ধা কৃত্যৈষা বো বধৈষিণী
বৃষাদর্ভিপ্রয়ুক্তৈষা নিহতা মে তপোধনাঃ

95.80

দুষ্টা হিংস্যাদিয়ং পাপা যুষ্মান্প্রত্যগ্নিসংভবা
তস্মাদস্ম্যাগতো বিপ্রা বাসবং মাং নিবোধত

95.81

অলোভাদক্ষয়া লোকাঃ প্রাপ্তা বঃ সার্বকামিকাঃ
উত্তিষ্ঠধ্বমিতঃ ক্ষিপ্রং তানবাপ্নুত বৈ দ্বিজাঃ

95.82

ভীষ্ম উবাচ
ততো মহর্ষয়ঃ প্রীতাস্তথেত্যুক্ত্বা পুরংদরম্
সহৈব ত্রিদশেন্দ্রেণ সর্বে জগ্মুস্ত্রিবিষ্টপম্

95.83

এবমেতে মহাত্মানো ভোগৈর্বহুবিধৈরপি
ক্ষুধা পরময়া যুক্তাশ্ছন্দ্যমানা মহাত্মভিঃ
নৈব লোভং তদা চক্রুস্ততঃ স্বর্গমবাপ্নুবন্

95.84

তস্মাত্সর্বাস্ববস্থাসু নরো লোভং বিবর্জয়েৎ
এষ ধর্মঃ পরো রাজন্নলোভ ইতি বিশ্রুতঃ

95.85

ইদং নরঃ সচ্চরিতং সমবায়েষু কীর্তয়েৎ
সুখভাগী চ ভবতি ন চ দুর্গাণ্যবাপ্নুতে

95.86

প্রীয়ন্তে পিতরশ্চাস্য ঋষয়ো দেবতাস্তথা
যশোধর্মার্থভাগী চ ভবতি প্রেত্য মানবঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.