Utshovঅধ্যায় 96
96.1
ভীষ্ম উবাচ
অত্রৈবোদাহরন্তীমমিতিহাসং পুরাতনম্
যদ্বৃত্তং তীর্থয়াত্রায়াং শপথং প্রতি তচ্ছৃণু
96.2
পুষ্করার্থং কৃতং স্তৈন্যং পুরা ভরতসত্তম
রাজর্ষিভির্মহারাজ তথৈব চ দ্বিজর্ষিভিঃ
96.3
ঋষয়ঃ সমেতাঃ পশ্চিমে বৈ প্রভাসে; সমাগতা মন্ত্রমমন্ত্রয়ন্ত
চরাম সর্বে পৃথিবীং পুণ্যতীর্থাং; তন্নঃ কার্যং হন্ত গচ্ছাম সর্বে
96.4
শুক্রোঽঙ্গিরাশ্চৈব কবিশ্চ বিদ্বাং;স্তথাগস্ত্যো নারদপর্বতৌ চ
ভৃগুর্বসিষ্ঠঃ কশ্যপো গৌতমশ্চ; বিশ্বামিত্রো জমদগ্নিশ্চ রাজন্
96.5
ঋষিস্তথা গালবোঽথাষ্টকশ্চ; ভরদ্বাজোঽরুন্ধতী বালখিল্যাঃ
শিবির্দিলীপো নহুষোঽম্বরীষো; রাজা যয়াতির্ধুন্ধুমারোঽথ পূরুঃ
96.6
জগ্মুঃ পুরস্কৃত্য মহানুভাবং; শতক্রতুং বৃত্রহণং নরেন্দ্র
তীর্থানি সর্বাণি পরিক্রমন্তো; মাঘ্যাং যয়ুঃ কৌশিকীং পুণ্যতীর্থাম্
96.7
সর্বেষু তীর্থেষ্বথ ধূতপাপা; জগ্মুস্ততো ব্রহ্মসরঃ সুপুণ্যম্
দেবস্য তীর্থে জলমগ্নিকল্পা; বিগাহ্য তে ভুক্তবিসপ্রসূনাঃ
96.8
কেচিদ্বিসান্যখনংস্তত্র রাজ;ন্নন্যে মৃণালান্যখনংস্তত্র বিপ্রাঃ
অথাপশ্যন্পুষ্করং তে হ্রিয়ন্তং; হ্রদাদগস্ত্যেন সমুদ্ধৃতং বৈ
96.9
তানাহ সর্বানৃষিমুখ্যানগস্ত্যঃ; কেনাদত্তং পুষ্করং মে সুজাতম্
যুষ্মাঞ্শঙ্কে দীয়তাং পুষ্করং মে; ন বৈ ভবন্তো হর্তুমর্হন্তি পদ্মম্
96.10
শৃণোমি কালো হিংসতে ধর্মবীর্যং; সেয়ং প্রাপ্তা বর্ধতে ধর্মপীডা
পুরাধর্মো বর্ধতে নেহ যাব;ত্তাবদ্গচ্ছামি পরলোকং চিরায়
96.11
পুরা বেদান্ব্রাহ্মণা গ্রামমধ্যে; ঘুষ্টস্বরা বৃষলাঞ্শ্রাবয়ন্তি
পুরা রাজা ব্যবহারানধর্ম্যা;ন্পশ্যত্যহং পরলোকং ব্রজামি
96.12
পুরাবরান্প্রত্যবরান্গরীয়সো; যাবন্নরা নাবমংস্যন্তি সর্বে
তমোত্তরং যাবদিদং ন বর্ততে; তাবদ্ব্রজামি পরলোকং চিরায়
96.13
পুরা প্রপশ্যামি পরেণ মর্ত্যা;ন্বলীয়সা দুর্বলান্ভুজ্যমানান্
তস্মাদ্যাস্যামি পরলোকং চিরায়; ন হ্যুত্সহে দ্রষ্টুমীদৃঙ্নৃলোকে
96.14
তমাহুরার্তা ঋষয়ো মহর্ষিং; ন তে বয়ং পুষ্করং চোরয়ামঃ
মিথ্যাভিষঙ্গো ভবতা ন কার্যঃ; শপাম তীক্ষ্ণাঞ্শপথান্মহর্ষে
96.15
তে নিশ্চিতাস্তত্র মহর্ষয়স্তু; সংমন্যন্তো ধর্মমেবং নরেন্দ্র
ততোঽশপঞ্শপথান্পর্যয়েণ; সহৈব তে পার্থিব পুত্রপৌত্রৈঃ
96.16
ভৃগুরুবাচ
প্রত্যাক্রোশেদিহাক্রুষ্টস্তাডিতঃ প্রতিতাডয়েৎ
খাদেচ্চ পৃষ্ঠমাংসানি যস্তে হরতি পুষ্করম্
96.17
বসিষ্ঠ উবাচ
অস্বাধ্যায়পরো লোকে শ্বানং চ পরিকর্ষতু
পুরে চ ভিক্ষুর্ভবতু যস্তে হরতি পুষ্করম্
96.18
কশ্যপ উবাচ
সর্বত্র সর্বং পণতু ন্যাসে লোভং করোতু চ
কূটসাক্ষিত্বমভ্যেতু যস্তে হরতি পুষ্করম্
96.19
গৌতম উবাচ
জীবত্বহংকৃতো বুদ্ধ্যা বিপণত্বধমেন সঃ
কর্ষকো মত্সরী চাস্তু যস্তে হরতি পুষ্করম্
96.20
অঙ্গিরা উবাচ
অশুচির্ব্রহ্মকূটোঽস্তু শ্বানং চ পরিকর্ষতু
ব্রহ্মহানিকৃতিশ্চাস্তু যস্তে হরতি পুষ্করম্
96.21
ধুন্ধুমার উবাচ
অকৃতজ্ঞোঽস্তু মিত্রাণাং শূদ্রায়াং তু প্রজায়তু
একঃ সংপন্নমশ্নাতু যস্তে হরতি পুষ্করম্
96.22
পূরুরুবাচ
চিকিত্সায়াং প্রচরতু ভার্যয়া চৈব পুষ্যতু
শ্বশুরাত্তস্য বৃত্তিঃ স্যাদ্যস্তে হরতি পুষ্করম্
96.23
দিলীপ উবাচ
উদপানপ্লবে গ্রামে ব্রাহ্মণো বৃষলীপতিঃ
তস্য লোকান্স ব্রজতু যস্তে হরতি পুষ্করম্
96.24
শুক্র উবাচ
পৃষ্ঠমাংসং সমশ্নাতু দিবা গচ্ছতু মৈথুনম্
প্রেষ্যো ভবতু রাজ্ঞশ্চ যস্তে হরতি পুষ্করম্
96.25
জমদগ্নিরুবাচ
অনধ্যায়েষ্বধীয়ীত মিত্রং শ্রাদ্ধে চ ভোজয়েৎ
শ্রাদ্ধে শূদ্রস্য চাশ্নীয়াদ্যস্তে হরতি পুষ্করম্
96.26
শিবিরুবাচ
অনাহিতাগ্নির্ম্রিয়তাং যজ্ঞে বিঘ্নং করোতু চ
তপস্বিভির্বিরুধ্যেত যস্তে হরতি পুষ্করম্
96.27
যয়াতিরুবাচ
অনৃতৌ জটী ব্রতিন্যাং বৈ ভার্যায়াং সংপ্রজায়তু
নিরাকরোতু বেদাংশ্চ যস্তে হরতি পুষ্করম্
96.28
নহুষ উবাচ
অতিথিং গৃহস্থো নুদতু কামবৃত্তোঽস্তু দীক্ষিতঃ
বিদ্যাং প্রয়চ্ছতু ভৃতো যস্তে হরতি পুষ্করম্
96.29
অম্বরীষ উবাচ
নৃশংসস্ত্যক্তধর্মোঽস্তু স্ত্রীষু জ্ঞাতিষু গোষু চ
ব্রাহ্মণং চাপি জহতু যস্তে হরতি পুষ্করম্
96.30
নারদ উবাচ
গূঢোঽজ্ঞানী বহিঃ শাস্ত্রং পঠতাং বিস্বরং পদম্
গরীয়সোঽবজানাতু যস্তে হরতি পুষ্করম্
96.31
নাভাগ উবাচ
অনৃতং ভাষতু সদা সদ্ভিশ্চৈব বিরুধ্যতু
শুল্কেন কন্যাং দদতু যস্তে হরতি পুষ্করম্
96.32
কবিরুবাচ
পদা স গাং তাডয়তু সূর্যং চ প্রতি মেহতু
শরণাগতং চ ত্যজতু যস্তে হরতি পুষ্করম্
96.33
বিশ্বামিত্র উবাচ
করোতু ভৃতকোঽবর্ষাং রাজ্ঞশ্চাস্তু পুরোহিতঃ
ঋত্বিগস্তু হ্যয়াজ্যস্য যস্তে হরতি পুষ্করম্
96.34
পর্বত উবাচ
গ্রামে চাধিকৃতঃ সোঽস্তু খরয়ানেন গচ্ছতু
শুনঃ কর্ষতু বৃত্ত্যর্থে যস্তে হরতি পুষ্করম্
96.35
ভরদ্বাজ উবাচ
সর্বপাপসমাদানং নৃশংসে চানৃতে চ যৎ
তত্তস্যাস্তু সদা পাপং যস্তে হরতি পুষ্করম্
96.36
অষ্টক উবাচ
স রাজাস্ত্বকৃতপ্রজ্ঞঃ কামবৃত্তিশ্চ পাপকৃৎ
অধর্মেণানুশাস্তূর্বীং যস্তে হরতি পুষ্করম্
96.37
গালব উবাচ
পাপিষ্ঠেভ্যস্ত্বনর্ঘার্হঃ স নরোঽস্তু স্বপাপকৃৎ
দত্ত্বা দানং কীর্তয়তু যস্তে হরতি পুষ্করম্
96.38
অরুন্ধত্যুবাচ
শ্বশ্র্বাপবাদং বদতু ভর্তুর্ভবতু দুর্মনাঃ
একা স্বাদু সমশ্নাতু যা তে হরতি পুষ্করম্
96.39
বালখিল্যা ঊচুঃ
একপাদেন বৃত্ত্যর্থং গ্রামদ্বারে স তিষ্ঠতু
ধর্মজ্ঞস্ত্যক্তধর্মোঽস্তু যস্তে হরতি পুষ্করম্
96.40
পশুসখ উবাচ
অগ্নিহোত্রমনাদৃত্য সুখং স্বপতু স দ্বিজঃ
পরিব্রাট্কামবৃত্তোঽস্তু যস্তে হরতি পুষ্করম্
96.41
সুরভ্যুবাচ
বাল্বজেন নিদানেন কাংস্যং ভবতু দোহনম্
দুহ্যেত পরবত্সেন যা তে হরতি পুষ্করম্
96.42
ভীষ্ম উবাচ
ততস্তু তৈঃ শপথৈঃ শপ্যমানৈ;র্নানাবিধৈর্বহুভিঃ কৌরবেন্দ্র
সহস্রাক্ষো দেবরাট্সংপ্রহৃষ্টঃ; সমীক্ষ্য তং কোপনং বিপ্রমুখ্যম্
96.43
অথাব্রবীন্মঘবা প্রত্যয়ং স্বং; সমাভাষ্য তমৃষিং জাতরোষম্
ব্রহ্মর্ষিদেবর্ষিনৃপর্ষিমধ্যে; যত্তন্নিবোধেহ মমাদ্য রাজন্
96.44
শক্র উবাচ
অধ্বর্যবে দুহিতরং দদাতু; চ্ছন্দোগে বা চরিতব্রহ্মচর্যে
আথর্বণং বেদমধীত্য বিপ্রঃ; স্নায়ীত যঃ পুষ্করমাদদাতি
96.45
সর্বান্বেদানধীয়ীত পুণ্যশীলোঽস্তু ধার্মিকঃ
ব্রহ্মণঃ সদনং যাতু যস্তে হরতি পুষ্করম্
96.46
অগস্ত্য উবাচ
আশীর্বাদস্ত্বয়া প্রোক্তঃ শপথো বলসূদন
দীয়তাং পুষ্করং মহ্যমেষ ধর্মঃ সনাতনঃ
96.47
ইন্দ্র উবাচ
ন ময়া ভগবঁল্লোভাদ্ধৃতং পুষ্করমদ্য বৈ
ধর্মং তু শ্রোতুকামেন হৃতং ন ক্রোদ্ধুমর্হসি
96.48
ধর্মঃ শ্রুতিসমুত্কর্ষো ধর্মসেতুরনাময়ঃ
আর্ষো বৈ শাশ্বতো নিত্যমব্যয়োঽয়ং ময়া শ্রুতঃ
96.49
তদিদং গৃহ্যতাং বিদ্বন্পুষ্করং মুনিসত্তম
অতিক্রমং মে ভগবন্ক্ষন্তুমর্হস্যনিন্দিত
96.50
ইত্যুক্তঃ স মহেন্দ্রেণ তপস্বী কোপনো ভৃশম্
জগ্রাহ পুষ্করং ধীমান্প্রসন্নশ্চাভবন্মুনিঃ
96.51
প্রয়য়ুস্তে ততো ভূয়স্তীর্থানি বনগোচরাঃ
পুণ্যতীর্থেষু চ তথা গাত্রাণ্যাপ্লাবয়ন্তি তে
96.52
আখ্যানং য ইদং যুক্তঃ পঠেত্পর্বণি পর্বণি
ন মূর্খং জনয়েত্পুত্রং ন ভবেচ্চ নিরাকৃতিঃ
96.53
ন তমাপত্স্পৃশেত্কাচিন্ন জ্বরো ন রুজশ্চ হ
বিরজাঃ শ্রেয়সা যুক্তঃ প্রেত্য স্বর্গমবাপ্নুয়াৎ
96.54
যশ্চ শাস্ত্রমনুধ্যায়েদৃষিভিঃ পরিপালিতম্
স গচ্ছেদ্ব্রহ্মণো লোকমব্যয়ং চ নরোত্তম