Utshovঅধ্যায় 97
97.1
যুধিষ্ঠির উবাচ
যদিদং শ্রাদ্ধধর্মেষু দীয়তে ভরতর্ষভ
ছত্রং চোপানহৌ চৈব কেনৈতত্সংপ্রবর্তিতম্
কথং চৈতত্সমুত্পন্নং কিমর্থং চ প্রদীয়তে
97.2
ন কেবলং শ্রাদ্ধধর্মে পুণ্যকেষ্বপি দীয়তে
এতদ্বিস্তরতো রাজঞ্শ্রোতুমিচ্ছামি তত্ত্বতঃ
97.3
ভীষ্ম উবাচ
শৃণু রাজন্নবহিতশ্ছত্রোপানহবিস্তরম্
যথৈতত্প্রথিতং লোকে যেন চৈতত্প্রবর্তিতম্
97.4
যথা চাক্ষয্যতাং প্রাপ্তং পুণ্যতাং চ যথা গতম্
সর্বমেতদশেষেণ প্রবক্ষ্যামি জনাধিপ
97.5
ইতিহাসং পুরাবৃত্তমিমং শৃণু নরাধিপ
জমদগ্নেশ্চ সংবাদং সূর্যস্য চ মহাত্মনঃ
97.6
পুরা স ভগবান্সাক্ষাদ্ধনুষাক্রীডত প্রভো
সংধায় সংধায় শরাংশ্চিক্ষেপ কিল ভার্গবঃ
97.7
তান্ক্ষিপ্তান্রেণুকা সর্বাংস্তস্যেষূন্দীপ্ততেজসঃ
আনায্য সা তদা তস্মৈ প্রাদাদসকৃদচ্যুত
97.8
অথ তেন স শব্দেন জ্যাতলস্য শরস্য চ
প্রহৃষ্টঃ সংপ্রচিক্ষেপ সা চ প্রত্যাজহার তান্
97.9
ততো মধ্যাহ্নমারূঢে জ্যেষ্ঠামূলে দিবাকরে
স সায়কান্দ্বিজো বিদ্ধ্বা রেণুকামিদমব্রবীৎ
97.10
গচ্ছানয় বিশালাক্ষি শরানেতান্ধনুশ্চ্যুতান্
যাবদেতান্পুনঃ সুভ্রু ক্ষিপামীতি জনাধিপ
97.11
সা গচ্ছত্যন্তরা ছায়াং বৃক্ষমাশ্রিত্য ভামিনী
তস্থৌ তস্যা হি সংতপ্তং শিরঃ পাদৌ তথৈব চ
97.12
স্থিতা সা তু মুহূর্তং বৈ ভর্তুঃ শাপভয়াচ্ছুভা
যয়াবানয়িতুং ভূয়ঃ সায়কানসিতেক্ষণা
প্রত্যাজগাম চ শরাংস্তানাদায় যশস্বিনী
97.13
সা প্রস্বিন্না সুচার্বঙ্গী পদ্ভ্যাং দুঃখং নিয়চ্ছতী
উপাজগাম ভর্তারং ভয়াদ্ভর্তুঃ প্রবেপতী
97.14
স তামৃষিস্ততঃ ক্রুদ্ধো বাক্যমাহ শুভাননাম্
রেণুকে কিং চিরেণ ত্বমাগতেতি পুনঃ পুনঃ
97.15
রেণুকোবাচ
শিরস্তাবত্প্রদীপ্তং মে পাদৌ চৈব তপোধন
সূর্যতেজোনিরুদ্ধাহং বৃক্ষচ্ছায়ামুপাশ্রিতা
97.16
এতস্মাত্কারণাদ্ব্রহ্মংশ্চিরমেতত্কৃতং ময়া
এতজ্জ্ঞাত্বা মম বিভো মা ক্রুধস্ত্বং তপোধন
97.17
জমদগ্নিরুবাচ
অদ্যৈনং দীপ্তকিরণং রেণুকে তব দুঃখদম্
শরৈর্নিপাতয়িষ্যামি সূর্যমস্ত্রাগ্নিতেজসা
97.18
ভীষ্ম উবাচ
স বিস্ফার্য ধনুর্দিব্যং গৃহীত্বা চ বহূঞ্শরান্
অতিষ্ঠত্সূর্যমভিতো যতো যাতি ততোমুখঃ
97.19
অথ তং প্রহরিষ্যন্তং সূর্যোঽভ্যেত্য বচোঽব্রবীৎ
দ্বিজরূপেণ কৌন্তেয় কিং তে সূর্যোঽপরাধ্যতে
97.20
আদত্তে রশ্মিভিঃ সূর্যো দিবি বিদ্বংস্ততস্ততঃ
রসং স তং বৈ বর্ষাসু প্রবর্ষতি দিবাকরঃ
97.21
ততোঽন্নং জায়তে বিপ্র মনুষ্যাণাং সুখাবহম্
অন্নং প্রাণা ইতি যথা বেদেষু পরিপঠ্যতে
97.22
অথাভ্রেষু নিগূঢশ্চ রশ্মিভিঃ পরিবারিতঃ
সপ্ত দ্বীপানিমান্ব্রহ্মন্বর্ষেণাভিপ্রবর্ষতি
97.23
ততস্তদৌষধীনাং চ বীরুধাং পত্রপুষ্পজম্
সর্বং বর্ষাভিনির্বৃত্তমন্নং সংভবতি প্রভো
97.24
জাতকর্মাণি সর্বাণি ব্রতোপনয়নানি চ
গোদানানি বিবাহাশ্চ তথা যজ্ঞসমৃদ্ধয়ঃ
97.25
সত্রাণি দানানি তথা সংয়োগা বিত্তসংচয়াঃ
অন্নতঃ সংপ্রবর্তন্তে যথা ত্বং বেত্থ ভার্গব
97.26
রমণীয়ানি যাবন্তি যাবদারম্ভকাণি চ
সর্বমন্নাত্প্রভবতি বিদিতং কীর্তয়ামি তে
97.27
সর্বং হি বেত্থ বিপ্র ত্বং যদেতত্কীর্তিতং ময়া
প্রসাদয়ে ত্বা বিপ্রর্ষে কিং তে সূর্যো নিপাত্যতে