অধ্যায় 98

98.1

যুধিষ্ঠির উবাচ
এবং তদা প্রয়াচন্তং ভাস্করং মুনিসত্তমঃ
জমদগ্নির্মহাতেজাঃ কিং কার্যং প্রত্যপদ্যত

ভীষ্ম উবাচ
তথা প্রয়াচমানস্য মুনিরগ্নিসমপ্রভঃ
জমদগ্নিঃ শমং নৈব জগাম কুরুনন্দন

ততঃ সূর্যো মধুরয়া বাচা তমিদমব্রবীৎ
কৃতাঞ্জলির্বিপ্ররূপী প্রণম্যেদং বিশাং পতে

চলং নিমিত্তং বিপ্রর্ষে সদা সূর্যস্য গচ্ছতঃ
কথং চলং বেত্স্যসি ত্বং সদা যান্তং দিবাকরম্

জমদগ্নিরুবাচ
স্থিরং বাপি চলং বাপি জানে ত্বাং জ্ঞানচক্ষুষা
অবশ্যং বিনয়াধানং কার্যমদ্য ময়া তব

অপরাহ্ণে নিমেষার্ধং তিষ্ঠসি ত্বং দিবাকর
তত্র বেত্স্যামি সূর্য ত্বাং ন মেঽত্রাস্তি বিচারণা

সূর্য উবাচ
অসংশয়ং মাং বিপ্রর্ষে বেত্স্যসে ধন্বিনাং বর
অপকারিণং তু মাং বিদ্ধি ভগবঞ্শরণাগতম্

ভীষ্ম উবাচ
ততঃ প্রহস্য ভগবাঞ্জমদগ্নিরুবাচ তম্
ন ভীঃ সূর্য ত্বয়া কার্যা প্রণিপাতগতো হ্যসি

ব্রাহ্মণেষ্বার্জবং যচ্চ স্থৈর্যং চ ধরণীতলে
সৌম্যতাং চৈব সোমস্য গাম্ভীর্যং বরুণস্য চ

দীপ্তিমগ্নেঃ প্রভাং মেরোঃ প্রতাপং তপনস্য চ
এতান্যতিক্রমেদ্যো বৈ স হন্যাচ্ছরণাগতম্

ভবেত্স গুরুতল্পী চ ব্রহ্মহা চ তথা ভবেৎ
সুরাপানং চ কুর্যাত্স যো হন্যাচ্ছরণাগতম্

এতস্য ত্বপনীতস্য সমাধিং তাত চিন্তয়
যথা সুখগমঃ পন্থা ভবেত্ত্বদ্রশ্মিতাপিতঃ

ভীষ্ম উবাচ
এতাবদুক্ত্বা স তদা তূষ্ণীমাসীদ্ভৃগূদ্বহঃ
অথ সূর্যো দদৌ তস্মৈ ছত্রোপানহমাশু বৈ

সূর্য উবাচ
মহর্ষে শিরসস্ত্রাণং ছত্রং মদ্রশ্মিবারণম্
প্রতিগৃহ্ণীষ্ব পদ্ভ্যাং চ ত্রাণার্থং চর্মপাদুকে

অদ্যপ্রভৃতি চৈবৈতল্লোকে সংপ্রচরিষ্যতি
পুণ্যদানেষু সর্বেষু পরমক্ষয্যমেব চ

ভীষ্ম উবাচ
উপানচ্ছত্রমেতদ্বৈ সূর্যেণেহ প্রবর্তিতম্
পুণ্যমেতদভিখ্যাতং ত্রিষু লোকেষু ভারত

তস্মাত্প্রয়চ্ছ বিপ্রেভ্যশ্ছত্রোপানহমুত্তমম্
ধর্মস্তে সুমহান্ভাবী ন মেঽত্রাস্তি বিচারণা

ছত্রং হি ভরতশ্রেষ্ঠ যঃ প্রদদ্যাদ্দ্বিজাতয়ে
শুভ্রং শতশলাকং বৈ স প্রেত্য সুখমেধতে

স শক্রলোকে বসতি পূজ্যমানো দ্বিজাতিভিঃ
অপ্সরোভিশ্চ সততং দেবৈশ্চ ভরতর্ষভ

দহ্যমানায় বিপ্রায় যঃ প্রয়চ্ছত্যুপানহৌ
স্নাতকায় মহাবাহো সংশিতায় দ্বিজাতয়ে

সোঽপি লোকানবাপ্নোতি দৈবতৈরভিপূজিতান্
গোলোকে স মুদা যুক্তো বসতি প্রেত্য ভারত

এতত্তে ভরতশ্রেষ্ঠ ময়া কার্ত্স্ন্যেন কীর্তিতম্
ছত্রোপানহদানস্য ফলং ভরতসত্তম