UtshovChapter 98
98.1
युधिष्ठिर उवाच
एवं तदा प्रयाचन्तं भास्करं मुनिसत्तमः
जमदग्निर्महातेजाः किं कार्यं प्रत्यपद्यत
Yudhishthira uvacha
Evam tada prayachantam bhaskaram munisattamah
Jamadagnirmahatejah kim karyam pratyapadyata
98.2
भीष्म उवाच
तथा प्रयाचमानस्य मुनिरग्निसमप्रभः
जमदग्निः शमं नैव जगाम कुरुनन्दन
Bhishma uvacha
Tatha prayachamanasya muniragnisamaprabhah
Jamadagnih shamam naiva jagama kurunandana
98.3
ततः सूर्यो मधुरया वाचा तमिदमब्रवीत्
कृताञ्जलिर्विप्ररूपी प्रणम्येदं विशां पते
Tatah suryo madhuraya vacha tamidamabravit
Kritanjalirviprarupi pranamyedam visham pate
98.4
चलं निमित्तं विप्रर्षे सदा सूर्यस्य गच्छतः
कथं चलं वेत्स्यसि त्वं सदा यान्तं दिवाकरम्
Chalam nimittam viprarshe sada suryasya gachchhatah
Katham chalam vetsyasi tvam sada yantam divakaram
98.5
जमदग्निरुवाच
स्थिरं वापि चलं वापि जाने त्वां ज्ञानचक्षुषा
अवश्यं विनयाधानं कार्यमद्य मया तव
Jamadagniruvacha
Sthiram vapi chalam vapi jane tvam gyanachakshusha
Avashyam vinayadhanam karyamadya maya tava
98.6
अपराह्णे निमेषार्धं तिष्ठसि त्वं दिवाकर
तत्र वेत्स्यामि सूर्य त्वां न मेऽत्रास्ति विचारणा
Aparahne nimeshardham tishthasi tvam divakara
Tatra vetsyami surya tvam na metrasti vicharana
98.7
सूर्य उवाच
असंशयं मां विप्रर्षे वेत्स्यसे धन्विनां वर
अपकारिणं तु मां विद्धि भगवञ्शरणागतम्
Surya uvacha
Asanshayam mam viprarshe vetsyase dhanvinam vara
Apakarinam tu mam viddhi bhagavansharanagatam
98.8
भीष्म उवाच
ततः प्रहस्य भगवाञ्जमदग्निरुवाच तम्
न भीः सूर्य त्वया कार्या प्रणिपातगतो ह्यसि
Bhishma uvacha
Tatah prahasya bhagavanjamadagniruvacha tam
Na bhih surya tvaya karya pranipatagato hyasi
98.9
ब्राह्मणेष्वार्जवं यच्च स्थैर्यं च धरणीतले
सौम्यतां चैव सोमस्य गाम्भीर्यं वरुणस्य च
Brahmaneshvarjavam yachcha sthairyam cha dharanitale
Saumyatam chaiva somasya gambhiryam varunasya cha
98.10
दीप्तिमग्नेः प्रभां मेरोः प्रतापं तपनस्य च
एतान्यतिक्रमेद्यो वै स हन्याच्छरणागतम्
Diptimagneh prabham meroh pratapam tapanasya cha
Etanyatikramedyo vai sa hanyachchharanagatam
98.11
भवेत्स गुरुतल्पी च ब्रह्महा च तथा भवेत्
सुरापानं च कुर्यात्स यो हन्याच्छरणागतम्
Bhavetsa gurutalpi cha brahmaha cha tatha bhavet
Surapanam cha kuryatsa yo hanyachchharanagatam
98.12
एतस्य त्वपनीतस्य समाधिं तात चिन्तय
यथा सुखगमः पन्था भवेत्त्वद्रश्मितापितः
Etasya tvapanitasya samadhim tata chintaya
Yatha sukhagamah pantha bhavettvadrashmitapitah
98.13
भीष्म उवाच
एतावदुक्त्वा स तदा तूष्णीमासीद्भृगूद्वहः
अथ सूर्यो ददौ तस्मै छत्रोपानहमाशु वै
Bhishma uvacha
Etavaduktva sa tada tushnimasidbhrigudvahah
Atha suryo dadau tasmai chhatropanahamashu vai
98.14
सूर्य उवाच
महर्षे शिरसस्त्राणं छत्रं मद्रश्मिवारणम्
प्रतिगृह्णीष्व पद्भ्यां च त्राणार्थं चर्मपादुके
Surya uvacha
Maharshe shirasastranam chhatram madrashmivaranam
Pratigrihnishva padbhyam cha tranartham charmapaduke
98.15
अद्यप्रभृति चैवैतल्लोके संप्रचरिष्यति
पुण्यदानेषु सर्वेषु परमक्षय्यमेव च
Adyaprabhriti chaivaitalloke sampracharishyati
Punyadaneshu sarveshu paramakshayyameva cha
98.16
भीष्म उवाच
उपानच्छत्रमेतद्वै सूर्येणेह प्रवर्तितम्
पुण्यमेतदभिख्यातं त्रिषु लोकेषु भारत
Bhishma uvacha
Upanachchhatrametadvai suryeneha pravartitam
Punyametadabhikhyatam trishu lokeshu bharata
98.17
तस्मात्प्रयच्छ विप्रेभ्यश्छत्रोपानहमुत्तमम्
धर्मस्ते सुमहान्भावी न मेऽत्रास्ति विचारणा
Tasmatprayachchha viprebhyashchhatropanahamuttamam
Dharmaste sumahanbhavi na metrasti vicharana
98.18
छत्रं हि भरतश्रेष्ठ यः प्रदद्याद्द्विजातये
शुभ्रं शतशलाकं वै स प्रेत्य सुखमेधते
Chhatram hi bharatashreshtha yah pradadyaddvijataye
Shubhram shatashalakam vai sa pretya sukhamedhate
98.19
स शक्रलोके वसति पूज्यमानो द्विजातिभिः
अप्सरोभिश्च सततं देवैश्च भरतर्षभ
Sa shakraloke vasati pujyamano dvijatibhih
Apsarobhishcha satatam devaishcha bharatarshabha
98.20
दह्यमानाय विप्राय यः प्रयच्छत्युपानहौ
स्नातकाय महाबाहो संशिताय द्विजातये
Dahyamanaya vipraya yah prayachchhatyupanahau
Snatakaya mahabaho sanshitaya dvijataye
98.21
सोऽपि लोकानवाप्नोति दैवतैरभिपूजितान्
गोलोके स मुदा युक्तो वसति प्रेत्य भारत
Sopi lokanavapnoti daivatairabhipujitan
Goloke sa muda yukto vasati pretya bharata
98.22
एतत्ते भरतश्रेष्ठ मया कार्त्स्न्येन कीर्तितम्
छत्रोपानहदानस्य फलं भरतसत्तम
Etatte bharatashreshtha maya kartsnyena kirtitam
Chhatropanahadanasya phalam bharatasattama