Utshovঅধ্যায় 99
99.1
যুধিষ্ঠির উবাচ
আরামাণাং তডাগানাং যত্ফলং কুরুনন্দন
তদহং শ্রোতুমিচ্ছামি ত্বত্তোঽদ্য ভরতর্ষভ
99.2
ভীষ্ম উবাচ
সুপ্রদর্শা বনবতী চিত্রধাতুবিভূষিতা
উপেতা সর্ববীজৈশ্চ শ্রেষ্ঠা ভূমিরিহোচ্যতে
99.3
তস্যাঃ ক্ষেত্রবিশেষং চ তডাগানাং নিবেশনম্
ঔদকানি চ সর্বাণি প্রবক্ষ্যাম্যনুপূর্বশঃ
99.4
তডাগানাং চ বক্ষ্যামি কৃতানাং চাপি যে গুণাঃ
ত্রিষু লোকেষু সর্বত্র পূজিতো যস্তডাগবান্
99.5
অথ বা মিত্রসদনং মৈত্রং মিত্রবিবর্ধনম্
কীর্তিসংজননং শ্রেষ্ঠং তডাগানাং নিবেশনম্
99.6
ধর্মস্যার্থস্য কামস্য ফলমাহুর্মনীষিণঃ
তডাগং সুকৃতং দেশে ক্ষেত্রমেব মহাশ্রয়ম্
99.7
চতুর্বিধানাং ভূতানাং তডাগমুপলক্ষয়েৎ
তডাগানি চ সর্বাণি দিশন্তি শ্রিয়মুত্তমাম্
99.8
দেবা মনুষ্যা গন্ধর্বাঃ পিতরোরগরাক্ষসাঃ
স্থাবরাণি চ ভূতানি সংশ্রয়ন্তি জলাশয়ম্
99.9
তস্মাত্তাংস্তে প্রবক্ষ্যামি তডাগে যে গুণাঃ স্মৃতাঃ
যা চ তত্র ফলাবাপ্তিরৃষিভিঃ সমুদাহৃতা
99.10
বর্ষমাত্রে তডাগে তু সলিলং যস্য তিষ্ঠতি
অগ্নিহোত্রফলং তস্য ফলমাহুর্মনীষিণঃ
99.11
শরত্কালে তু সলিলং তডাগে যস্য তিষ্ঠতি
গোসহস্রস্য স প্রেত্য লভতে ফলমুত্তমম্
99.12
হেমন্তকালে সলিলং তডাগে যস্য তিষ্ঠতি
স বৈ বহুসুবর্ণস্য যজ্ঞস্য লভতে ফলম্
99.13
যস্য বৈ শৈশিরে কালে তডাগে সলিলং ভবেৎ
অগ্নিষ্টোমস্য যজ্ঞস্য ফলমাহুর্মনীষিণঃ
99.14
তডাগং সুকৃতং যস্য বসন্তে তু মহাশ্রয়ম্
অতিরাত্রস্য যজ্ঞস্য ফলং স সমুপাশ্নুতে
99.15
নিদাঘকালে পানীয়ং তডাগে যস্য তিষ্ঠতি
বাজপেয়সমং তস্য ফলং বৈ মুনয়ো বিদুঃ
99.16
স কুলং তারয়েত্সর্বং যস্য খাতে জলাশয়ে
গাবঃ পিবন্তি পানীয়ং সাধবশ্চ নরাঃ সদা
99.17
তডাগে যস্য গাবস্তু পিবন্তি তৃষিতা জলম্
মৃগপক্ষিমনুষ্যাশ্চ সোঽশ্বমেধফলং লভেৎ
99.18
যত্পিবন্তি জলং তত্র স্নায়ন্তে বিশ্রমন্তি চ
তডাগদস্য তত্সর্বং প্রেত্যানন্ত্যায় কল্পতে
99.19
দুর্লভং সলিলং তাত বিশেষেণ পরত্র বৈ
পানীয়স্য প্রদানেন প্রীতির্ভবতি শাশ্বতী
99.20
তিলান্দদত পানীয়ং দীপান্দদত জাগ্রত
জ্ঞাতিভিঃ সহ মোদধ্বমেতত্প্রেতেষু দুর্লভম্
99.21
সর্বদানৈর্গুরুতরং সর্বদানৈর্বিশিষ্যতে
পানীয়ং নরশার্দূল তস্মাদ্দাতব্যমেব হি
99.22
এবমেতত্তডাগেষু কীর্তিতং ফলমুত্তমম্
অত ঊর্ধ্বং প্রবক্ষ্যামি বৃক্ষাণামপি রোপণে
99.23
স্থাবরাণাং চ ভূতানাং জাতয়ঃ ষট্প্রকীর্তিতাঃ
বৃক্ষগুল্মলতাবল্ল্যস্ত্বক্সারাস্তৃণজাতয়ঃ
99.24
এতা জাত্যস্তু বৃক্ষাণাং তেষাং রোপে গুণাস্ত্বিমে
কীর্তিশ্চ মানুষে লোকে প্রেত্য চৈব ফলং শুভম্
99.25
লভতে নাম লোকে চ পিতৃভিশ্চ মহীয়তে
দেবলোকগতস্যাপি নাম তস্য ন নশ্যতি
99.26
অতীতানাগতে চোভে পিতৃবংশং চ ভারত
তারয়েদ্বৃক্ষরোপী চ তস্মাদ্বৃক্ষান্প্ররোপয়েৎ
99.27
তস্য পুত্রা ভবন্ত্যেতে পাদপা নাত্র সংশয়ঃ
পরলোকগতঃ স্বর্গং লোকাংশ্চাপ্নোতি সোঽব্যয়ান্
99.28
পুষ্পৈঃ সুরগণান্বৃক্ষাঃ ফলৈশ্চাপি তথা পিতৄন্
ছায়য়া চাতিথীংস্তাত পূজয়ন্তি মহীরুহাঃ
99.29
কিংনরোরগরক্ষাংসি দেবগন্ধর্বমানবাঃ
তথা ঋষিগণাশ্চৈব সংশ্রয়ন্তি মহীরুহান্
99.30
পুষ্পিতাঃ ফলবন্তশ্চ তর্পয়ন্তীহ মানবান্
বৃক্ষদং পুত্রবদ্বৃক্ষাস্তারয়ন্তি পরত্র চ
99.31
তস্মাত্তডাগে বৃক্ষা বৈ রোপ্যাঃ শ্রেয়োর্থিনা সদা
পুত্রবত্পরিপাল্যাশ্চ পুত্রাস্তে ধর্মতঃ স্মৃতাঃ
99.32
তডাগকৃদ্বৃক্ষরোপী ইষ্টয়জ্ঞশ্চ যো দ্বিজঃ
এতে স্বর্গে মহীয়ন্তে যে চান্যে সত্যবাদিনঃ
99.33
তস্মাত্তডাগং কুর্বীত আরামাংশ্চৈব রোপয়েৎ
যজেচ্চ বিবিধৈর্যজ্ঞৈঃ সত্যং চ সততং বদেৎ