Utshovঅধ্যায় 100
100.1
যুধিষ্ঠির উবাচ
গার্হস্থ্যং ধর্মমখিলং প্রব্রূহি ভরতর্ষভ
ঋদ্ধিমাপ্নোতি কিং কৃত্বা মনুষ্য ইহ পার্থিব
100.2
ভীষ্ম উবাচ
অত্র তে বর্তয়িষ্যামি পুরাবৃত্তং জনাধিপ
বাসুদেবস্য সংবাদং পৃথিব্যাশ্চৈব ভারত
100.3
সংস্তূয় পৃথিবীং দেবীং বাসুদেবঃ প্রতাপবান্
পপ্রচ্ছ ভরতশ্রেষ্ঠ যদেতত্পৃচ্ছসেঽদ্য মাম্
100.4
বাসুদেব উবাচ
গার্হস্থ্যং ধর্মমাশ্রিত্য ময়া বা মদ্বিধেন বা
কিমবশ্যং ধরে কার্যং কিং বা কৃত্বা সুখী ভবেৎ
100.5
পৃথিব্যুবাচ
ঋষয়ঃ পিতরো দেবা মনুষ্যাশ্চৈব মাধব
ইজ্যাশ্চৈবার্চনীয়াশ্চ যথা চৈবং নিবোধ মে
100.6
সদা যজ্ঞেন দেবাংশ্চ আতিথ্যেন চ মানবান্
ছন্দতশ্চ যথানিত্যমর্হান্যুঞ্জীত নিত্যশঃ
তেন হ্যৃষিগণাঃ প্রীতা ভবন্তি মধুসূদন
100.7
নিত্যমগ্নিং পরিচরেদভুক্ত্বা বলিকর্ম চ
কুর্যাত্তথৈব দেবা বৈ প্রীয়ন্তে মধুসূদন
100.8
কুর্যাদহরহঃ শ্রাদ্ধমন্নাদ্যেনোদকেন বা
পয়োমূলফলৈর্বাপি পিতৄণাং প্রীতিমাহরন্
100.9
সিদ্ধান্নাদ্বৈশ্বদেবং বৈ কুর্যাদগ্নৌ যথাবিধি
অগ্নীষোমং বৈশ্বদেবং ধান্বন্তর্যমনন্তরম্
100.10
প্রজানাং পতয়ে চৈব পৃথগ্ঘোমো বিধীয়তে
তথৈব চানুপূর্ব্যেণ বলিকর্ম প্রয়োজয়েৎ
100.11
দক্ষিণায়াং যমায়েহ প্রতীচ্যাং বরুণায় চ
সোমায় চাপ্যুদীচ্যাং বৈ বাস্তুমধ্যে দ্বিজাতয়ে
100.12
ধন্বন্তরেঃ প্রাগুদীচ্যাং প্রাচ্যাং শক্রায় মাধব
মনোর্বৈ ইতি চ প্রাহুর্বলিং দ্বারে গৃহস্য বৈ
মরুদ্ভ্যো দেবতাভ্যশ্চ বলিমন্তর্গৃহে হরেৎ
100.13
তথৈব বিশ্বেদেবেভ্যো বলিমাকাশতো হরেৎ
নিশাচরেভ্যো ভূতেভ্যো বলিং নক্তং তথা হরেৎ
100.14
এবং কৃত্বা বলিং সম্যগ্দদ্যাদ্ভিক্ষাং দ্বিজাতয়ে
অলাভে ব্রাহ্মণস্যাগ্নাবগ্রমুত্ক্ষিপ্য নিক্ষিপেৎ
100.15
যদা শ্রাদ্ধং পিতৃভ্যশ্চ দাতুমিচ্ছেত মানবঃ
তদা পশ্চাত্প্রকুর্বীত নিবৃত্তে শ্রাদ্ধকর্মণি
100.16
পিতৄন্সংতর্পয়িত্বা তু বলিং কুর্যাদ্বিধানতঃ
বৈশ্বদেবং ততঃ কুর্যাত্পশ্চাদ্ব্রাহ্মণবাচনম্
100.17
ততোঽন্নেনাবশেষেণ ভোজয়েদতিথীনপি
অর্চাপূর্বং মহারাজ ততঃ প্রীণাতি মানুষান্
100.18
অনিত্যং হি স্থিতো যস্মাত্তস্মাদতিথিরুচ্যতে
100.19
আচার্যস্য পিতুশ্চৈব সখ্যুরাপ্তস্য চাতিথেঃ
ইদমস্তি গৃহে মহ্যমিতি নিত্যং নিবেদয়েৎ
100.20
তে যদ্বদেয়ুস্তত্কুর্যাদিতি ধর্মো বিধীয়তে
গৃহস্থঃ পুরুষঃ কৃষ্ণ শিষ্টাশী চ সদা ভবেৎ
100.21
রাজর্ত্বিজং স্নাতকং চ গুরুং শ্বশুরমেব চ
অর্চয়েন্মধুপর্কেণ পরিসংবত্সরোষিতান্
100.22
শ্বভ্যশ্চ শ্বপচেভ্যশ্চ বয়োভ্যশ্চাবপেদ্ভুবি
বৈশ্বদেবং হি নামৈতত্সায়ংপ্রাতর্বিধীয়তে
100.23
এতাংস্তু ধর্মান্গার্হস্থান্যঃ কুর্যাদনসূয়কঃ
স ইহর্দ্ধিং পরাং প্রাপ্য প্রেত্য নাকে মহীয়তে
100.24
ভীষ্ম উবাচ
ইতি ভূমের্বচঃ শ্রুত্বা বাসুদেবঃ প্রতাপবান্
তথা চকার সততং ত্বমপ্যেবং সমাচর
100.25
এবং গৃহস্থধর্মং ত্বং চেতয়ানো নরাধিপ
ইহলোকে যশঃ প্রাপ্য প্রেত্য স্বর্গমবাপ্স্যসি