Utshovঅধ্যায় 101
101.1
যুধিষ্ঠির উবাচ
আলোকদানং নামৈতত্কীদৃশং ভরতর্ষভ
কথমেতত্সমুত্পন্নং ফলং চাত্র ব্রবীহি মে
101.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
মনোঃ প্রজাপতের্বাদং সুবর্ণস্য চ ভারত
101.3
তপস্বী কশ্চিদভবত্সুবর্ণো নাম নামতঃ
বর্ণতো হেমবর্ণঃ স সুবর্ণ ইতি পপ্রথে
101.4
কুলশীলগুণোপেতঃ স্বাধ্যায়ে চ পরং গতঃ
বহূন্স্ববংশপ্রভবান্সমতীতঃ স্বকৈর্গুণৈঃ
101.5
স কদাচিন্মনুং বিপ্রো দদর্শোপসসর্প চ
কুশলপ্রশ্নমন্যোন্যং তৌ চ তত্র প্রচক্রতুঃ
101.6
ততস্তৌ সিদ্ধসংকল্পৌ মেরৌ কাঞ্চনপর্বতে
রমণীয়ে শিলাপৃষ্ঠে সহিতৌ সংন্যষীদতাম্
101.7
তত্র তৌ কথয়ামাস্তাং কথা নানাবিধাশ্রয়াঃ
ব্রহ্মর্ষিদেবদৈত্যানাং পুরাণানাং মহাত্মনাম্
101.8
সুবর্ণস্ত্বব্রবীদ্বাক্যং মনুং স্বায়ংভুবং প্রভুম্
হিতার্থং সর্বভূতানাং প্রশ্নং মে বক্তুমর্হসি
101.9
সুমনোভির্যদিজ্যন্তে দৈবতানি প্রজেশ্বর
কিমেতত্কথমুত্পন্নং ফলয়োগং চ শংস মে
101.10
মনুরুবাচ
অত্রাপ্যুদাহরন্তীমমিতিহাসং পুরাতনম্
শুক্রস্য চ বলেশ্চৈব সংবাদং বৈ সমাগমে
101.11
বলের্বৈরোচনস্যেহ ত্রৈলোক্যমনুশাসতঃ
সমীপমাজগামাশু শুক্রো ভৃগুকুলোদ্বহঃ
101.12
তমর্ঘ্যাদিভিরভ্যর্চ্য ভার্গবং সোঽসুরাধিপঃ
নিষসাদাসনে পশ্চাদ্বিধিবদ্ভূরিদক্ষিণঃ
101.13
কথেয়মভবত্তত্র যা ত্বয়া পরিকীর্তিতা
সুমনোধূপদীপানাং সংপ্রদানে ফলং প্রতি
101.14
ততঃ পপ্রচ্ছ দৈত্যেন্দ্রঃ কবীন্দ্রং প্রশ্নমুত্তমম্
সুমনোধূপদীপানাং কিং ফলং ব্রহ্মবিত্তম
প্রদানস্য দ্বিজশ্রেষ্ঠ তদ্ভবান্বক্তুমর্হতি
101.15
শুক্র উবাচ
তপঃ পূর্বং সমুত্পন্নং ধর্মস্তস্মাদনন্তরম্
এতস্মিন্নন্তরে চৈব বীরুদোষধ্য এব চ
101.16
সোমস্যাত্মা চ বহুধা সংভূতঃ পৃথিবীতলে
অমৃতং চ বিষং চৈব যাশ্চান্যাস্তুল্যজাতয়ঃ
101.17
অমৃতং মনসঃ প্রীতিং সদ্যঃ পুষ্টিং দদাতি চ
মনো গ্লপয়তে তীব্রং বিষং গন্ধেন সর্বশঃ
101.18
অমৃতং মঙ্গলং বিদ্ধি মহদ্বিষমমঙ্গলম্
ওষধ্যো হ্যমৃতং সর্বং বিষং তেজোঽগ্নিসংভবম্
101.19
মনো হ্লাদয়তে যস্মাচ্ছ্রিয়ং চাপি দধাতি হ
তস্মাত্সুমনসঃ প্রোক্তা নরৈঃ সুকৃতকর্মভিঃ
101.20
দেবতাভ্যঃ সুমনসো যো দদাতি নরঃ শুচিঃ
তস্মাত্সুমনসঃ প্রোক্তা যস্মাত্তুষ্যন্তি দেবতাঃ
101.21
যং যমুদ্দিশ্য দীয়েরন্দেবং সুমনসঃ প্রভো
মঙ্গলার্থং স তেনাস্য প্রীতো ভবতি দৈত্যপ
101.22
জ্ঞেয়াস্তূগ্রাশ্চ সৌম্যাশ্চ তেজস্বিন্যশ্চ তাঃ পৃথক্
ওষধ্যো বহুবীর্যাশ্চ বহুরূপাস্তথৈব চ
101.23
যজ্ঞিয়ানাং চ বৃক্ষাণাময়জ্ঞিয়ান্নিবোধ মে
আসুরাণি চ মাল্যানি দৈবতেভ্যো হিতানি চ
101.24
রাক্ষসানাং সুরাণাং চ যক্ষাণাং চ তথা প্রিয়াঃ
পিতৄণাং মানুষাণাং চ কান্তা যাস্ত্বনুপূর্বশঃ
101.25
বন্যা গ্রাম্যাশ্চেহ তথা কৃষ্টোপ্তাঃ পর্বতাশ্রয়াঃ
অকণ্টকাঃ কণ্টকিন্যো গন্ধরূপরসান্বিতাঃ
101.26
দ্বিবিধো হি স্মৃতো গন্ধ ইষ্টোঽনিষ্টশ্চ পুষ্পজঃ
ইষ্টগন্ধানি দেবানাং পুষ্পাণীতি বিভাবয়েৎ
101.27
অকণ্টকানাং বৃক্ষাণাং শ্বেতপ্রায়াশ্চ বর্ণতঃ
তেষাং পুষ্পাণি দেবানামিষ্টানি সততং প্রভো
101.28
জলজানি চ মাল্যানি পদ্মাদীনি চ যানি চ
গন্ধর্বনাগয়ক্ষেভ্যস্তানি দদ্যাদ্বিচক্ষণঃ
101.29
ওষধ্যো রক্তপুষ্পাশ্চ কটুকাঃ কণ্টকান্বিতাঃ
শত্রূণামভিচারার্থমথর্বসু নিদর্শিতাঃ
101.30
তীক্ষ্ণবীর্যাস্তু ভূতানাং দুরালম্ভাঃ সকণ্টকাঃ
রক্তভূয়িষ্ঠবর্ণাশ্চ কৃষ্ণাশ্চৈবোপহারয়েৎ
101.31
মনোহৃদয়নন্দিন্যো বিমর্দে মধুরাশ্চ যাঃ
চারুরূপাঃ সুমনসো মানুষাণাং স্মৃতা বিভো
101.32
ন তু শ্মশানসংভূতা ন দেবায়তনোদ্ভবাঃ
সংনয়েত্পুষ্টিয়ুক্তেষু বিবাহেষু রহঃসু চ
101.33
গিরিসানুরুহাঃ সৌম্যা দেবানামুপপাদয়েৎ
প্রোক্ষিতাভ্যুক্ষিতাঃ সৌম্যা যথায়োগং যথাস্মৃতি
101.34
গন্ধেন দেবাস্তুষ্যন্তি দর্শনাদ্যক্ষরাক্ষসাঃ
নাগাঃ সমুপভোগেন ত্রিভিরেতৈস্তু মানুষাঃ
101.35
সদ্যঃ প্রীণাতি দেবান্বৈ তে প্রীতা ভাবয়ন্ত্যুত
সংকল্পসিদ্ধা মর্ত্যানামীপ্সিতৈশ্চ মনোরথৈঃ
101.36
দেবাঃ প্রীণন্তি সততং মানিতা মানয়ন্তি চ
অবজ্ঞাতাবধূতাশ্চ নির্দহন্ত্যধমান্নরান্
101.37
অতঊর্ধ্বং প্রবক্ষ্যামি ধূপদানবিধৌ ফলম্
ধূপাংশ্চ বিবিধান্সাধূনসাধূংশ্চ নিবোধ মে
101.38
নির্যাসঃ সরলশ্চৈব কৃত্রিমশ্চৈব তে ত্রয়ঃ
ইষ্টানিষ্টো ভবেদ্গন্ধস্তন্মে বিস্তরতঃ শৃণু
101.39
নির্যাসাঃ সল্লকীবর্জ্যা দেবানাং দয়িতাস্তু তে
গুগ্গুলুঃ প্রবরস্তেষাং সর্বেষামিতি নিশ্চয়ঃ
101.40
অগুরুঃ সারিণাং শ্রেষ্ঠো যক্ষরাক্ষসভোগিনাম্
দৈত্যানাং সল্লকীজশ্চ কাঙ্ক্ষিতো যশ্চ তদ্বিধঃ
101.41
অথ সর্জরসাদীনাং গন্ধৈঃ পার্থিবদারবৈঃ
ফাণিতাসবসংয়ুক্তৈর্মনুষ্যাণাং বিধীয়তে
101.42
দেবদানবভূতানাং সদ্যস্তুষ্টিকরঃ স্মৃতঃ
যেঽন্যে বৈহারিকাস্তে তু মানুষাণামিতি স্মৃতাঃ
101.43
য এবোক্তাঃ সুমনসাং প্রদানে গুণহেতবঃ
ধূপেষ্বপি পরিজ্ঞেয়াস্ত এব প্রীতিবর্ধনাঃ
101.44
দীপদানে প্রবক্ষ্যামি ফলয়োগমনুত্তমম্
যথা যেন যদা চৈব প্রদেয়া যাদৃশাশ্চ তে
101.45
জ্যোতিস্তেজঃ প্রকাশশ্চাপ্যূর্ধ্বগং চাপি বর্ণ্যতে
প্রদানং তেজসাং তস্মাত্তেজো বর্ধয়তে নৃণাম্
101.46
অন্ধং তমস্তমিস্রং চ দক্ষিণায়নমেব চ
উত্তরায়ণমেতস্মাজ্জ্যোতির্দানং প্রশস্যতে
101.47
যস্মাদূর্ধ্বগমেতত্তু তমসশ্চৈব ভেষজম্
তস্মাদূর্ধ্বগতের্দাতা ভবেদিতি বিনিশ্চয়ঃ
101.48
দেবাস্তেজস্বিনো যস্মাত্প্রভাবন্তঃ প্রকাশকাঃ
তামসা রাক্ষসাশ্চেতি তস্মাদ্দীপঃ প্রদীয়তে
101.49
আলোকদানাচ্চক্ষুষ্মান্প্রভায়ুক্তো ভবেন্নরঃ
তান্দত্ত্বা নোপহিংসেত ন হরেন্নোপনাশয়েৎ
101.50
দীপহর্তা ভবেদন্ধস্তমোগতিরসুপ্রভঃ
দীপপ্রদঃ স্বর্গলোকে দীপমালী বিরাজতে
101.51
হবিষা প্রথমঃ কল্পো দ্বিতীয়স্ত্বৌষধীরসৈঃ
বসামেদোস্থিনির্যাসৈর্ন কার্যঃ পুষ্টিমিচ্ছতা
101.52
গিরিপ্রপাতে গহনে চৈত্যস্থানে চতুষ্পথে
দীপদাতা ভবেন্নিত্যং য ইচ্ছেদ্ভূতিমাত্মনঃ
101.53
কুলোদ্দ্যোতো বিশুদ্ধাত্মা প্রকাশত্বং চ গচ্ছতি
জ্যোতিষাং চৈব সালোক্যং দীপদাতা নরঃ সদা
101.54
বলিকর্মসু বক্ষ্যামি গুণান্কর্মফলোদয়ান্
দেবয়ক্ষোরগনৃণাং ভূতানামথ রক্ষসাম্
101.55
যেষাং নাগ্রভুজো বিপ্রা দেবতাতিথিবালকাঃ
রাক্ষসানেব তান্বিদ্ধি নির্বষট্কারমঙ্গলান্
101.56
তস্মাদগ্রং প্রয়চ্ছেত দেবেভ্যঃ প্রতিপূজিতম্
শিরসা প্রণতশ্চাপি হরেদ্বলিমতন্দ্রিতঃ
101.57
গৃহ্যা হি দেবতা নিত্যমাশংসন্তি গৃহাত্সদা
বাহ্যাশ্চাগন্তবো যেঽন্যে যক্ষরাক্ষসপন্নগাঃ
101.58
ইতো দত্তেন জীবন্তি দেবতাঃ পিতরস্তথা
তে প্রীতাঃ প্রীণয়ন্ত্যেতানায়ুষা যশসা ধনৈঃ
101.59
বলয়ঃ সহ পুষ্পৈস্তু দেবানামুপহারয়েৎ
দধিদ্রপ্সয়ুতাঃ পুণ্যাঃ সুগন্ধাঃ প্রিয়দর্শনাঃ
101.60
কার্যা রুধিরমাংসাঢ্যা বলয়ো যক্ষরক্ষসাম্
সুরাসবপুরস্কারা লাজোল্লেপনভূষিতাঃ
101.61
নাগানাং দয়িতা নিত্যং পদ্মোত্পলবিমিশ্রিতাঃ
তিলান্গুডসুসংপন্নান্ভূতানামুপহারয়েৎ
101.62
অগ্রদাতাগ্রভোগী স্যাদ্বলবর্ণসমন্বিতঃ
তস্মাদগ্রং প্রয়চ্ছেত দেবেভ্যঃ প্রতিপূজিতম্
101.63
জ্বলত্যহরহো বেশ্ম যাশ্চাস্য গৃহদেবতাঃ
তাঃ পূজ্যা ভূতিকামেন প্রসৃতাগ্রপ্রদায়িনা
101.64
ইত্যেতদসুরেন্দ্রায় কাব্যঃ প্রোবাচ ভার্গবঃ
সুবর্ণায় মনুঃ প্রাহ সুবর্ণো নারদায় চ
101.65
নারদোঽপি ময়ি প্রাহ গুণানেতান্মহাদ্যুতে
ত্বমপ্যেতদ্বিদিত্বেহ সর্বমাচর পুত্রক