Utshovঅধ্যায় 102
102.1
যুধিষ্ঠির উবাচ
শ্রুতং মে ভরতশ্রেষ্ঠ পুষ্পধূপপ্রদায়িনাম্
ফলং বলিবিধানে চ তদ্ভূয়ো বক্তুমর্হসি
102.2
ধূপপ্রদানস্য ফলং প্রদীপস্য তথৈব চ
বলয়শ্চ কিমর্থং বৈ ক্ষিপ্যন্তে গৃহমেধিভিঃ
102.3
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
নহুষং প্রতি সংবাদমগস্ত্যস্য ভৃগোস্তথা
102.4
নহুষো হি মহারাজ রাজর্ষিঃ সুমহাতপাঃ
দেবরাজ্যমনুপ্রাপ্তঃ সুকৃতেনেহ কর্মণা
102.5
তত্রাপি প্রয়তো রাজন্নহুষস্ত্রিদিবে বসন্
মানুষীশ্চৈব দিব্যাশ্চ কুর্বাণো বিবিধাঃ ক্রিয়াঃ
102.6
মানুষ্যস্তত্র সর্বাঃ স্ম ক্রিয়াস্তস্য মহাত্মনঃ
প্রবৃত্তাস্ত্রিদিবে রাজন্দিব্যাশ্চৈব সনাতনাঃ
102.7
অগ্নিকার্যাণি সমিধঃ কুশাঃ সুমনসস্তথা
বলয়শ্চান্নলাজাভির্ধূপনং দীপকর্ম চ
102.8
সর্বং তস্য গৃহে রাজ্ঞঃ প্রাবর্তত মহাত্মনঃ
জপয়জ্ঞান্মনোয়জ্ঞাংস্ত্রিদিবেঽপি চকার সঃ
102.9
দৈবতান্যর্চয়ংশ্চাপি বিধিবত্স সুরেশ্বরঃ
সর্বাণ্যেব যথান্যায়ং যথাপূর্বমরিংদম
102.10
অথেন্দ্রস্য ভবিষ্যত্বাদহংকারস্তমাবিশৎ
সর্বাশ্চৈব ক্রিয়াস্তস্য পর্যহীয়ন্ত ভূপতে
102.11
স ঋষীন্বাহয়ামাস বরদানমদান্বিতঃ
পরিহীনক্রিয়শ্চাপি দুর্বলত্বমুপেয়িবান্
102.12
তস্য বাহয়তঃ কালো মুনিমুখ্যাংস্তপোধনান্
অহংকারাভিভূতস্য সুমহানত্যবর্তত
102.13
অথ পর্যায়শ ঋষীন্বাহনায়োপচক্রমে
পর্যায়শ্চাপ্যগস্ত্যস্য সমপদ্যত ভারত
102.14
অথাগম্য মহাতেজা ভৃগুর্ব্রহ্মবিদাং বরঃ
অগস্ত্যমাশ্রমস্থং বৈ সমুপেত্যেদমব্রবীৎ
102.15
এবং বয়মসত্কারং দেবেন্দ্রস্যাস্য দুর্মতেঃ
নহুষস্য কিমর্থং বৈ মর্ষয়াম মহামুনে
102.16
অগস্ত্য উবাচ
কথমেষ ময়া শক্যঃ শপ্তুং যস্য মহামুনে
বরদেন বরো দত্তো ভবতো বিদিতশ্চ সঃ
102.17
যো মে দৃষ্টিপথং গচ্ছেত্স মে বশ্যো ভবেদিতি
ইত্যনেন বরো দেবাদ্যাচিতো গচ্ছতা দিবম্
102.18
এবং ন দগ্ধঃ স ময়া ভবতা চ ন সংশয়ঃ
অন্যেনাপ্যৃষিমুখ্যেন ন শপ্তো ন চ পাতিতঃ
102.19
অমৃতং চৈব পানায় দত্তমস্মৈ পুরা বিভো
মহাত্মনে তদর্থং চ নাস্মাভির্বিনিপাত্যতে
102.20
প্রায়চ্ছত বরং দেবঃ প্রজানাং দুঃখকারকম্
দ্বিজেষ্বধর্ময়ুক্তানি স করোতি নরাধমঃ
102.21
অত্র যত্প্রাপ্তকালং নস্তদ্ব্রূহি বদতাং বর
ভবাংশ্চাপি যথা ব্রূয়াত্কুর্বীমহি তথা বয়ম্
102.22
ভৃগুরুবাচ
পিতামহনিয়োগেন ভবন্তমহমাগতঃ
প্রতিকর্তুং বলবতি নহুষে দর্পমাস্থিতে
102.23
অদ্য হি ত্বা সুদুর্বুদ্ধী রথে যোক্ষ্যতি দেবরাট্
অদ্যৈনমহমুদ্বৃত্তং করিষ্যেঽনিন্দ্রমোজসা
102.24
অদ্যেন্দ্রং স্থাপয়িষ্যামি পশ্যতস্তে শতক্রতুম্
সংচাল্য পাপকর্মাণমিন্দ্রস্থানাত্সুদুর্মতিম্
102.25
অদ্য চাসৌ কুদেবেন্দ্রস্ত্বাং পদা ধর্ষয়িষ্যতি
দৈবোপহতচিত্তত্বাদাত্মনাশায় মন্দধীঃ
102.26
ব্যুত্ক্রান্তধর্মং তমহং ধর্ষণামর্ষিতো ভৃশম্
অহির্ভবস্বেতি রুষা শপ্স্যে পাপং দ্বিজদ্রুহম্
102.27
তত এনং সুদুর্বুদ্ধিং ধিক্শব্দাভিহতত্বিষম্
ধরণ্যাং পাতয়িষ্যামি প্রেক্ষতস্তে মহামুনে
102.28
নহুষং পাপকর্মাণমৈশ্বর্যবলমোহিতম্
যথা চ রোচতে তুভ্যং তথা কর্তাস্ম্যহং মুনে
102.29
এবমুক্তস্তু ভৃগুণা মৈত্রাবরুণিরব্যয়ঃ
অগস্ত্যঃ পরমপ্রীতো বভূব বিগতজ্বরঃ