Utshovঅধ্যায় 103
103.1
যুধিষ্ঠির উবাচ
কথং স বৈ বিপন্নশ্চ কথং বৈ পাতিতো ভুবি
কথং চানিন্দ্রতাং প্রাপ্তস্তদ্ভবান্বক্তুমর্হতি
103.2
ভীষ্ম উবাচ
এবং তয়োঃ সংবদতোঃ ক্রিয়াস্তস্য মহাত্মনঃ
সর্বা এবাভ্যবর্তন্ত যা দিব্যা যাশ্চ মানুষাঃ
103.3
তথৈব দীপদানানি সর্বোপকরণানি চ
বলিকর্ম চ যচ্চান্যদুত্সেকাশ্চ পৃথগ্বিধাঃ
সর্বাস্তস্য সমুত্পন্না দেবরাজ্ঞো মহাত্মনঃ
103.4
দেবলোকে নৃলোকে চ সদাচারা বুধৈঃ স্মৃতাঃ
তে চেদ্ভবন্তি রাজেন্দ্র ঋধ্যন্তে গৃহমেধিনঃ
ধূপপ্রদানৈর্দীপৈশ্চ নমস্কারৈস্তথৈব চ
103.5
যথা সিদ্ধস্য চান্নস্য দ্বিজায়াগ্রং প্রদীয়তে
বলয়শ্চ গৃহোদ্দেশে অতঃ প্রীয়ন্তি দেবতাঃ
103.6
যথা চ গৃহিণস্তোষো ভবেদ্বৈ বলিকর্মণা
তথা শতগুণা প্রীতির্দেবতানাং স্ম জায়তে
103.7
এবং ধূপপ্রদানং চ দীপদানং চ সাধবঃ
প্রশংসন্তি নমস্কারৈর্যুক্তমাত্মগুণাবহম্
103.8
স্নানেনাদ্ভিশ্চ যত্কর্ম ক্রিয়তে বৈ বিপশ্চিতা
নমস্কারপ্রয়ুক্তেন তেন প্রীয়ন্তি দেবতাঃ
গৃহ্যাশ্চ দেবতাঃ সর্বাঃ প্রীয়ন্তে বিধিনার্চিতাঃ
103.9
ইত্যেতাং বুদ্ধিমাস্থায় নহুষঃ স নরেশ্বরঃ
সুরেন্দ্রত্বং মহত্প্রাপ্য কৃতবানেতদদ্ভুতম্
103.10
কস্যচিত্ত্বথ কালস্য ভাগ্যক্ষয় উপস্থিতে
সর্বমেতদবজ্ঞায় ন চকারৈতদীদৃশম্
103.11
ততঃ স পরিহীণোঽভূত্সুরেন্দ্রো বলিকর্মতঃ
ধূপদীপোদকবিধিং ন যথাবচ্চকার হ
ততোঽস্য যজ্ঞবিষয়ো রক্ষোভিঃ পর্যবাধ্যত
103.12
অথাগস্ত্যমৃষিশ্রেষ্ঠং বাহনায়াজুহাব হ
দ্রুতং সরস্বতীকূলাত্স্ময়ন্নিব মহাবলঃ
103.13
ততো ভৃগুর্মহাতেজা মৈত্রাবরুণিমব্রবীৎ
নিমীলয়স্ব নয়নে জটা যাবদ্বিশামি তে
103.14
স্থাণুভূতস্য তস্যাথ জটাঃ প্রাবিশদচ্যুতঃ
ভৃগুঃ স সুমহাতেজাঃ পাতনায় নৃপস্য হ
103.15
ততঃ স দেবরাট্প্রাপ্তস্তমৃষিং বাহনায় বৈ
ততোঽগস্ত্যঃ সুরপতিং বাক্যমাহ বিশাং পতে
103.16
যোজয়স্বেন্দ্র মাং ক্ষিপ্রং কং চ দেশং বহামি তে
যত্র বক্ষ্যসি তত্র ত্বাং নয়িষ্যামি সুরাধিপ
103.17
ইত্যুক্তো নহুষস্তেন যোজয়ামাস তং মুনিম্
ভৃগুস্তস্য জটাসংস্থো বভূব হৃষিতো ভৃশম্
103.18
ন চাপি দর্শনং তস্য চকার স ভৃগুস্তদা
বরদানপ্রভাবজ্ঞো নহুষস্য মহাত্মনঃ
103.19
ন চুকোপ স চাগস্ত্যো যুক্তোঽপি নহুষেণ বৈ
তং তু রাজা প্রতোদেন চোদয়ামাস ভারত
103.20
ন চুকোপ স ধর্মাত্মা ততঃ পাদেন দেবরাট্
অগস্ত্যস্য তদা ক্রুদ্ধো বামেনাভ্যহনচ্ছিরঃ
103.21
তস্মিঞ্শিরস্যভিহতে স জটান্তর্গতো ভৃগুঃ
শশাপ বলবত্ক্রুদ্ধো নহুষং পাপচেতসম্
103.22
ভৃগুরুবাচ
যস্মাত্পদাহনঃ ক্রোধাচ্ছিরসীমং মহামুনিম্
তস্মাদাশু মহীং গচ্ছ সর্পো ভূত্বা সুদুর্মতে
103.23
ইত্যুক্তঃ স তদা তেন সর্পো ভূত্বা পপাত হ
অদৃষ্টেনাথ ভৃগুণা ভূতলে ভরতর্ষভ
103.24
ভৃগুং হি যদি সোঽদ্রাক্ষীন্নহুষঃ পৃথিবীপতে
ন স শক্তোঽভবিষ্যদ্বৈ পাতনে তস্য তেজসা
103.25
স তু তৈস্তৈঃ প্রদানৈশ্চ তপোভির্নিয়মৈস্তথা
পতিতোঽপি মহারাজ ভূতলে স্মৃতিমানভূৎ
প্রসাদয়ামাস ভৃগুং শাপান্তো মে ভবেদিতি
103.26
ততোঽগস্ত্যঃ কৃপাবিষ্টঃ প্রাসাদয়ত তং ভৃগুম্
শাপান্তার্থং মহারাজ স চ প্রাদাত্কৃপান্বিতঃ
103.27
ভৃগুরুবাচ
রাজা যুধিষ্ঠিরো নাম ভবিষ্যতি কুরূদ্বহঃ
স ত্বাং মোক্ষয়িতা শাপাদিত্যুক্ত্বান্তরধীয়ত
103.28
অগস্ত্যোঽপি মহাতেজাঃ কৃত্বা কার্যং শতক্রতোঃ
স্বমাশ্রমপদং প্রায়াত্পূজ্যমানো দ্বিজাতিভিঃ
103.29
নহুষোঽপি ত্বয়া রাজংস্তস্মাচ্ছাপাত্সমুদ্ধৃতঃ
জগাম ব্রহ্মসদনং পশ্যতস্তে জনাধিপ
103.30
তদা তু পাতয়িত্বা তং নহুষং ভূতলে ভৃগুঃ
জগাম ব্রহ্মসদনং ব্রহ্মণে চ ন্যবেদয়ৎ
103.31
ততঃ শক্রং সমানায্য দেবানাহ পিতামহঃ
বরদানান্মম সুরা নহুষো রাজ্যমাপ্তবান্
স চাগস্ত্যেন ক্রুদ্ধেন ভ্রংশিতো ভূতলং গতঃ
103.32
ন চ শক্যং বিনা রাজ্ঞা সুরা বর্তয়িতুং ক্বচিৎ
তস্মাদয়ং পুনঃ শক্রো দেবরাজ্যেঽভিষিচ্যতাম্
103.33
এবং সংভাষমাণং তু দেবাঃ পার্থ পিতামহম্
এবমস্ত্বিতি সংহৃষ্টাঃ প্রত্যূচুস্তে পিতামহম্
103.34
সোঽভিষিক্তো ভগবতা দেবরাজ্যেন বাসবঃ
ব্রহ্মণা রাজশার্দূল যথাপূর্বং ব্যরোচত
103.35
এবমেতত্পুরাবৃত্তং নহুষস্য ব্যতিক্রমাৎ
স চ তৈরেব সংসিদ্ধো নহুষঃ কর্মভিঃ পুনঃ
103.36
তস্মাদ্দীপাঃ প্রদাতব্যাঃ সায়ং বৈ গৃহমেধিভিঃ
দিব্যং চক্ষুরবাপ্নোতি প্রেত্য দীপপ্রদায়কঃ
পূর্ণচন্দ্রপ্রতীকাশা দীপদাশ্চ ভবন্ত্যুত
103.37
যাবদক্ষিনিমেষাণি জ্বলতে তাবতীঃ সমাঃ
রূপবান্ধনবাংশ্চাপি নরো ভবতি দীপদঃ