Utshovঅধ্যায় 104
104.1
যুধিষ্ঠির উবাচ
ব্রাহ্মণস্বানি যে মন্দা হরন্তি ভরতর্ষভ
নৃশংসকারিণো মূঢাঃ ক্ব তে গচ্ছন্তি মানবাঃ
104.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
চণ্ডালস্য চ সংবাদং ক্ষত্রবন্ধোশ্চ ভারত
104.3
রাজন্য উবাচ
বৃদ্ধরূপোঽসি চণ্ডাল বালবচ্চ বিচেষ্টসে
শ্বখরাণাং রজঃসেবী কস্মাদুদ্বিজসে গবাম্
104.4
সাধুভির্গর্হিতং কর্ম চণ্ডালস্য বিধীয়তে
কস্মাদ্গোরজসা ধ্বস্তমপাং কুণ্ডে নিষিঞ্চসি
104.5
চণ্ডাল উবাচ
ব্রাহ্মণস্য গবাং রাজন্হ্রিয়তীনাং রজঃ পুরা
সোমমুদ্ধ্বংসয়ামাস তং সোমং যেঽপিবন্দ্বিজাঃ
104.6
দীক্ষিতশ্চ স রাজাপি ক্ষিপ্রং নরকমাবিশৎ
সহ তৈর্যাজকৈঃ সর্বৈর্ব্রহ্মস্বমুপজীব্য তৎ
104.7
যেঽপি তত্রাপিবন্ক্ষীরং ঘৃতং দধি চ মানবাঃ
ব্রাহ্মণাঃ সহরাজন্যাঃ সর্বে নরকমাবিশন্
104.8
জঘ্নুস্তাঃ পয়সা পুত্রাংস্তথা পৌত্রান্বিধুন্বতীঃ
পশূনবেক্ষমাণাশ্চ সাধুবৃত্তেন দংপতী
104.9
অহং তত্রাবসং রাজন্ব্রহ্মচারী জিতেন্দ্রিয়ঃ
তাসাং মে রজসা ধ্বস্তং ভৈক্ষমাসীন্নরাধিপ
104.10
চণ্ডালোঽহং ততো রাজন্ভুক্ত্বা তদভবং মৃতঃ
ব্রহ্মস্বহারী চ নৃপঃ সোঽপ্রতিষ্ঠাং গতিং যয়ৌ
104.11
তস্মাদ্ধরেন্ন বিপ্রস্বং কদাচিদপি কিংচন
ব্রহ্মস্বরজসা ধ্বস্তং ভুক্ত্বা মাং পশ্য যাদৃশম্
104.12
তস্মাত্সোমোঽপ্যবিক্রেয়ঃ পুরুষেণ বিপশ্চিতা
বিক্রয়ং হীহ সোমস্য গর্হয়ন্তি মনীষিণঃ
104.13
যে চৈনং ক্রীণতে রাজন্যে চ বিক্রীণতে জনাঃ
তে তু বৈবস্বতং প্রাপ্য রৌরবং যান্তি সর্বশঃ
104.14
সোমং তু রজসা ধ্বস্তং বিক্রীয়াদ্বুদ্ধিপূর্বকম্
শ্রোত্রিয়ো বার্ধুষী ভূত্বা চিররাত্রায় নশ্যতি
নরকং ত্রিংশতং প্রাপ্য শ্ববিষ্ঠামুপজীবতি
104.15
শ্বচর্যামতিমানং চ সখিদারেষু বিপ্লবম্
তুলয়াধারয়দ্ধর্মো হ্যতিমানোঽতিরিচ্যতে
104.16
শ্বানং বৈ পাপিনং পশ্য বিবর্ণং হরিণং কৃশম্
অতিমানেন ভূতানামিমাং গতিমুপাগতম্
104.17
অহং বৈ বিপুলে জাতঃ কুলে ধনসমন্বিতে
অন্যস্মিঞ্জন্মনি বিভো জ্ঞানবিজ্ঞানপারগঃ
104.18
অভবং তত্র জানানো হ্যেতান্দোষান্মদাত্তদা
সংরব্ধ এব ভূতানাং পৃষ্ঠমাংসান্যভক্ষয়ম্
104.19
সোঽহং তেন চ বৃত্তেন ভোজনেন চ তেন বৈ
ইমামবস্থাং সংপ্রাপ্তঃ পশ্য কালস্য পর্যয়ম্
104.20
আদীপ্তমিব চৈলান্তং ভ্রমরৈরিব চার্দিতম্
ধাবমানং সুসংরব্ধং পশ্য মাং রজসান্বিতম্
104.21
স্বাধ্যায়ৈস্তু মহত্পাপং তরন্তি গৃহমেধিনঃ
দানৈঃ পৃথগ্বিধৈশ্চাপি যথা প্রাহুর্মনীষিণঃ
104.22
তথা পাপকৃতং বিপ্রমাশ্রমস্থং মহীপতে
সর্বসঙ্গবিনির্মুক্তং ছন্দাংস্যুত্তারয়ন্ত্যুত
104.23
অহং তু পাপয়োন্যাং বৈ প্রসূতঃ ক্ষত্রিয়র্ষভ
নিশ্চয়ং নাধিগচ্ছামি কথং মুচ্যেয়মিত্যুত
104.24
জাতিস্মরত্বং তু মম কেনচিত্পূর্বকর্মণা
শুভেন যেন মোক্ষং বৈ প্রাপ্তুমিচ্ছাম্যহং নৃপ
104.25
ত্বমিমং মে প্রপন্নায় সংশয়ং ব্রূহি পৃচ্ছতে
চণ্ডালত্বাত্কথমহং মুচ্যেয়মিতি সত্তম
104.26
রাজন্য উবাচ
চণ্ডাল প্রতিজানীহি যেন মোক্ষমবাপ্স্যসি
ব্রাহ্মণার্থে ত্যজন্প্রাণান্গতিমিষ্টামবাপ্স্যসি
104.27
দত্ত্বা শরীরং ক্রব্যাদ্ভ্যো রণাগ্নৌ দ্বিজহেতুকম্
হুত্বা প্রাণান্প্রমোক্ষস্তে নান্যথা মোক্ষমর্হসি
104.28
ভীষ্ম উবাচ
ইত্যুক্তঃ স তদা রাজন্ব্রহ্মস্বার্থে পরংতপ
হুত্বা রণমুখে প্রাণান্গতিমিষ্টামবাপ হ
104.29
তস্মাদ্রক্ষ্যং ত্বয়া পুত্র ব্রহ্মস্বং ভরতর্ষভ
যদীচ্ছসি মহাবাহো শাশ্বতীং গতিমুত্তমাম্