Utshovঅধ্যায় 105
105.1
যুধিষ্ঠির উবাচ
একো লোকঃ সুকৃতিনাং সর্বে ত্বাহো পিতামহ
উত তত্রাপি নানাত্বং তন্মে ব্রূহি পিতামহ
105.2
ভীষ্ম উবাচ
কর্মভিঃ পার্থ নানাত্বং লোকানাং যান্তি মানবাঃ
পুণ্যান্পুণ্যকৃতো যান্তি পাপান্পাপকৃতো জনাঃ
105.3
অত্রাপ্যুদাহরন্তীমমিতিহাসং পুরাতনম্
গৌতমস্য মুনেস্তাত সংবাদং বাসবস্য চ
105.4
ব্রাহ্মণো গৌতমঃ কশ্চিন্মৃদুর্দান্তো জিতেন্দ্রিয়ঃ
মহাবনে হস্তিশিশুং পরিদ্যূনমমাতৃকম্
105.5
তং দৃষ্ট্বা জীবয়ামাস সানুক্রোশো ধৃতব্রতঃ
স তু দীর্ঘেণ কালেন বভূবাতিবলো মহান্
105.6
তং প্রভিন্নং মহানাগং প্রস্রুতং সর্বতো মদম্
ধৃতরাষ্ট্রস্য রূপেণ শক্রো জগ্রাহ হস্তিনম্
105.7
হ্রিয়মাণং তু তং দৃষ্ট্বা গৌতমঃ সংশিতব্রতঃ
অভ্যভাষত রাজানং ধৃতরাষ্ট্রং মহাতপাঃ
105.8
মা মে হার্ষীর্হস্তিনং পুত্রমেনং; দুঃখাত্পুষ্টং ধৃতরাষ্ট্রাকৃতজ্ঞ
মিত্রং সতাং সপ্তপদং বদন্তি; মিত্রদ্রোহো নৈব রাজন্স্পৃশেত্ত্বাম্
105.9
ইধ্মোদকপ্রদাতারং শূন্যপালকমাশ্রমে
বিনীতমাচার্যকুলে সুয়ুক্তং গুরুকর্মণি
105.10
শিষ্টং দান্তং কৃতজ্ঞং চ প্রিয়ং চ সততং মম
ন মে বিক্রোশতো রাজন্হর্তুমর্হসি কুঞ্জরম্
105.11
ধৃতরাষ্ট্র উবাচ
গবাং সহস্রং ভবতে দদামি; দাসীশতং নিষ্কশতানি পঞ্চ
অন্যচ্চ বিত্তং বিবিধং মহর্ষে; কিং ব্রাহ্মণস্যেহ গজেন কৃত্যম্
105.12
গৌতম উবাচ
ত্বামেব গাবোঽভি ভবন্তু রাজ;ন্দাস্যঃ সনিষ্কা বিবিধং চ রত্নম্
অন্যচ্চ বিত্তং বিবিধং নরেন্দ্র; কিং ব্রাহ্মণস্যেহ ধনেন কৃত্যম্
105.13
ধৃতরাষ্ট্র উবাচ
ব্রাহ্মণানাং হস্তিভির্নাস্তি কৃত্যং; রাজন্যানাং নাগকুলানি বিপ্র
স্বং বাহনং নয়তো নাস্ত্যধর্মো; নাগশ্রেষ্ঠাদ্গৌতমাস্মান্নিবর্ত
105.14
গৌতম উবাচ
যত্র প্রেতো নন্দতি পুণ্যকর্মা; যত্র প্রেতঃ শোচতি পাপকর্মা
বৈবস্বতস্য সদনে মহাত্মন;স্তত্র ত্বাহং হস্তিনং যাতয়িষ্যে
105.15
ধৃতরাষ্ট্র উবাচ
যে নিষ্ক্রিয়া নাস্তিকাঃ শ্রদ্দধানাঃ; পাপাত্মান ইন্দ্রিয়ার্থে নিবিষ্টাঃ
যমস্য তে যাতনাং প্রাপ্নুবন্তি; পরং গন্তা ধৃতরাষ্ট্রো ন তত্র
105.16
গৌতম উবাচ
বৈবস্বতী সংয়মনী জনানাং; যত্রানৃতং নোচ্যতে যত্র সত্যম্
যত্রাবলা বলিনং যাতয়ন্তি; তত্র ত্বাহং হস্তিনং যাতয়িষ্যে
105.17
ধৃতরাষ্ট্র উবাচ
জ্যেষ্ঠাং স্বসারং পিতরং মাতরং চ; গুরুং যথা মানয়ন্তশ্চরন্তি
তথাবিধানামেষ লোকো মহর্ষে; পরং গন্তা ধৃতরাষ্ট্রো ন তত্র
105.18
গৌতম উবাচ
মন্দাকিনী বৈশ্রবণস্য রাজ্ঞো; মহাভোগা ভোগিজনপ্রবেশ্যা
গন্ধর্বয়ক্ষৈরপ্সরোভিশ্চ জুষ্টা; তত্র ত্বাহং হস্তিনং যাতয়িষ্যে
105.19
ধৃতরাষ্ট্র উবাচ
অতিথিব্রতাঃ সুব্রতা যে জনা বৈ; প্রতিশ্রয়ং দদতি ব্রাহ্মণেভ্যঃ
শিষ্টাশিনঃ সংবিভজ্যাশ্রিতাংশ্চ; মন্দাকিনীং তেঽপি বিভূষয়ন্তি
105.20
গৌতম উবাচ
মেরোরগ্রে যদ্বনং ভাতি রম্যং; সুপুষ্পিতং কিংনরগীতজুষ্টম্
সুদর্শনা যত্র জম্বূর্বিশালা; তত্র ত্বাহং হস্তিনং যাতয়িষ্যে
105.21
ধৃতরাষ্ট্র উবাচ
যে ব্রাহ্মণা মৃদবঃ সত্যশীলা; বহুশ্রুতাঃ সর্বভূতাভিরামাঃ
যেঽধীয়ন্তে সেতিহাসং পুরাণং; মধ্বাহুত্যা জুহ্বতি চ দ্বিজেভ্যঃ
105.22
তথাবিধানামেষ লোকো মহর্ষে; পরং গন্তা ধৃতরাষ্ট্রো ন তত্র
যদ্বিদ্যতে বিদিতং স্থানমস্তি; তদ্ব্রূহি ত্বং ত্বরিতো হ্যেষ যামি
105.23
গৌতম উবাচ
সুপুষ্পিতং কিংনররাজজুষ্টং; প্রিয়ং বনং নন্দনং নারদস্য
গন্ধর্বাণামপ্সরসাং চ সদ্ম; তত্র ত্বাহং হস্তিনং যাতয়িষ্যে
105.24
ধৃতরাষ্ট্র উবাচ
যে নৃত্তগীতকুশলা জনাঃ সদা; হ্যয়াচমানাঃ সহিতাশ্চরন্তি
তথাবিধানামেষ লোকো মহর্ষে; পরং গন্তা ধৃতরাষ্ট্রো ন তত্র
105.25
গৌতম উবাচ
যত্রোত্তরাঃ কুরবো ভান্তি রম্যা; দেবৈঃ সার্ধং মোদমানা নরেন্দ্র
যত্রাগ্নিয়ৌনাশ্চ বসন্তি বিপ্রা; হ্যয়োনয়ঃ পর্বতয়োনয়শ্চ
105.26
যত্র শক্রো বর্ষতি সর্বকামা;ন্যত্র স্ত্রিয়ঃ কামচারাশ্চরন্তি
যত্র চের্ষ্যা নাস্তি নারীনরাণাং; তত্র ত্বাহং হস্তিনং যাতয়িষ্যে
105.27
ধৃতরাষ্ট্র উবাচ
যে সর্বভূতেষু নিবৃত্তকামা; অমাংসাদা ন্যস্তদণ্ডাশ্চরন্তি
ন হিংসন্তি স্থাবরং জঙ্গমং চ; ভূতানাং যে সর্বভূতাত্মভূতাঃ
105.28
নিরাশিষো নির্মমা বীতরাগা; লাভালাভে তুল্যনিন্দাপ্রশংসাঃ
তথাবিধানামেষ লোকো মহর্ষে; পরং গন্তা ধৃতরাষ্ট্রো ন তত্র
105.29
গৌতম উবাচ
ততঃ পরং ভান্তি লোকাঃ সনাতনাঃ; সুপুণ্যগন্ধা নির্মলা বীতশোকাঃ
সোমস্য রাজ্ঞঃ সদনে মহাত্মন;স্তত্র ত্বাহং হস্তিনং যাতয়িষ্যে
105.30
ধৃতরাষ্ট্র উবাচ
যে দানশীলা ন প্রতিগৃহ্ণতে সদা; ন চাপ্যর্থানাদদতে পরেভ্যঃ
যেষামদেয়মর্হতে নাস্তি কিংচি;ত্সর্বাতিথ্যাঃ সুপ্রসাদা জনাশ্চ
105.31
যে ক্ষন্তারো নাভিজল্পন্তি চান্যা;ঞ্শক্তা ভূত্বা সততং পুণ্যশীলাঃ
তথাবিধানামেষ লোকো মহর্ষে; পরং গন্তা ধৃতরাষ্ট্রো ন তত্র
105.32
গৌতম উবাচ
ততঃ পরং ভান্তি লোকাঃ সনাতনা; বিরজসো বিতমস্কা বিশোকাঃ
আদিত্যস্য সুমহান্তঃ সুবৃত্তা;স্তত্র ত্বাহং হস্তিনং যাতয়িষ্যে
105.33
ধৃতরাষ্ট্র উবাচ
স্বাধ্যায়শীলা গুরুশুশ্রূষণে রতা;স্তপস্বিনঃ সুব্রতাঃ সত্যসংধাঃ
আচার্যাণামপ্রতিকূলভাষিণো; নিত্যোত্থিতা গুরুকর্মস্বচোদ্যাঃ
105.34
তথাবিধানামেষ লোকো মহর্ষে; বিশুদ্ধানাং ভাবিতবাঙ্মতীনাম্
সত্যে স্থিতানাং বেদবিদাং মহাত্মনাং; পরং গন্তা ধৃতরাষ্ট্রো ন তত্র
105.35
গৌতম উবাচ
ততঃ পরে ভান্তি লোকাঃ সনাতনাঃ; সুপুণ্যগন্ধা বিরজা বিশোকাঃ
বরুণস্য রাজ্ঞঃ সদনে মহাত্মন;স্তত্র ত্বাহং হস্তিনং যাতয়িষ্যে
105.36
ধৃতরাষ্ট্র উবাচ
চাতুর্মাস্যৈর্যে যজন্তে জনাঃ সদা; তথেষ্টীনাং দশশতং প্রাপ্নুবন্তি
যে চাগ্নিহোত্রং জুহ্বতি শ্রদ্দধানা; যথান্যায়ং ত্রীণি বর্ষাণি বিপ্রাঃ
105.37
স্বদারিণাং ধর্মধুরে মহাত্মনাং; যথোচিতে বর্ত্মনি সুস্থিতানাম্
ধর্মাত্মনামুদ্বহতাং গতিং তাং; পরং গন্তা ধৃতরাষ্ট্রো ন তত্র
105.38
গৌতম উবাচ
ইন্দ্রস্য লোকা বিরজা বিশোকা; দুরন্বয়াঃ কাঙ্ক্ষিতা মানবানাম্
তস্যাহং তে ভবনে ভূরিতেজসো; রাজন্নিমং হস্তিনং যাতয়িষ্যে
105.39
ধৃতরাষ্ট্র উবাচ
শতবর্ষজীবী যশ্চ শূরো মনুষ্যো; বেদাধ্যায়ী যশ্চ যজ্বাপ্রমত্তঃ
এতে সর্বে শক্রলোকং ব্রজন্তি; পরং গন্তা ধৃতরাষ্ট্রো ন তত্র
105.40
গৌতম উবাচ
প্রাজাপত্যাঃ সন্তি লোকা মহান্তো; নাকস্য পৃষ্ঠে পুষ্কলা বীতশোকাঃ
মনীষিতাঃ সর্বলোকোদ্ভবানাং; তত্র ত্বাহং হস্তিনং যাতয়িষ্যে
105.41
ধৃতরাষ্ট্র উবাচ
যে রাজানো রাজসূয়াভিষিক্তা; ধর্মাত্মানো রক্ষিতারঃ প্রজানাম্
যে চাশ্বমেধাবভৃথাপ্লুতাঙ্গা;স্তেষাং লোকা ধৃতরাষ্ট্রো ন তত্র
105.42
গৌতম উবাচ
ততঃ পরং ভান্তি লোকাঃ সনাতনাঃ; সুপুণ্যগন্ধা বিরজা বীতশোকাঃ
তস্মিন্নহং দুর্লভে ত্বাপ্রধৃষ্যে; গবাং লোকে হস্তিনং যাতয়িষ্যে
105.43
ধৃতরাষ্ট্র উবাচ
যো গোসহস্রী শতদঃ সমাং সমাং; যো গোশতী দশ দদ্যাচ্চ শক্ত্যা
তথা দশভ্যো যশ্চ দদ্যাদিহৈকাং; পঞ্চভ্যো বা দানশীলস্তথৈকাম্
105.44
যে জীর্যন্তে ব্রহ্মচর্যেণ বিপ্রা; ব্রাহ্মীং বাচং পরিরক্ষন্তি চৈব
মনস্বিনস্তীর্থয়াত্রাপরায়ণা;স্তে তত্র মোদন্তি গবাং বিমানে
105.45
প্রভাসং মানসং পুণ্যং পুষ্করাণি মহত্সরঃ
পুণ্যং চ নৈমিষং তীর্থং বাহুদাং করতোয়িনীম্
105.46
গয়াং গয়শিরশ্চৈব বিপাশাং স্থূলবালুকাম্
তূষ্ণীংগঙ্গাং দশগঙ্গাং মহাহ্রদমথাপি চ
105.47
গৌতমীং কৌশিকীং পাকাং মহাত্মানো ধৃতব্রতাঃ
সরস্বতীদৃষদ্বত্যৌ যমুনাং যে প্রয়ান্তি চ
105.48
তত্র তে দিব্যসংস্থানা দিব্যমাল্যধরাঃ শিবাঃ
প্রয়ান্তি পুণ্যগন্ধাঢ্যা ধৃতরাষ্ট্রো ন তত্র বৈ
105.49
গৌতম উবাচ
যত্র শীতভয়ং নাস্তি ন চোষ্ণভয়মণ্বপি
ন ক্ষুত্পিপাসে ন গ্লানির্ন দুঃখং ন সুখং তথা
105.50
ন দ্বেষ্যো ন প্রিয়ঃ কশ্চিন্ন বন্ধুর্ন রিপুস্তথা
ন জরামরণে বাপি ন পুণ্যং ন চ পাতকম্
105.51
তস্মিন্বিরজসি স্ফীতে প্রজ্ঞাসত্ত্বব্যবস্থিতে
স্বয়ংভুভবনে পুণ্যে হস্তিনং মে যতিষ্যতি
105.52
ধৃতরাষ্ট্র উবাচ
নির্মুক্তাঃ সর্বসঙ্গেভ্যো কৃতাত্মানো যতব্রতাঃ
অধ্যাত্ময়োগসংস্থানে যুক্তাঃ স্বর্গগতিং গতাঃ
105.53
তে ব্রহ্মভবনং পুণ্যং প্রাপ্নুবন্তীহ সাত্ত্বিকাঃ
ন তত্র ধৃতরাষ্ট্রস্তে শক্যো দ্রষ্টুং মহামুনে
105.54
গৌতম উবাচ
রথন্তরং যত্র বৃহচ্চ গীয়তে; যত্র বেদী পুণ্ডরীকৈঃ স্তৃণোতি
যত্রোপয়াতি হরিভিঃ সোমপীথী; তত্র ত্বাহং হস্তিনং যাতয়িষ্যে
105.55
বুধ্যামি ত্বাং বৃত্রহণং শতক্রতুং; ব্যতিক্রমন্তং ভুবনানি বিশ্বা
কচ্চিন্ন বাচা বৃজিনং কদাচি;দকার্ষং তে মনসোঽভিষঙ্গাৎ
105.56
শক্র উবাচ
যস্মাদিমং লোকপথং প্রজানা;মন্বাগমং পদবাদে গজস্য
তস্মাদ্ভবান্প্রণতং মানুশাস্তু; ব্রবীষি যত্তত্করবাণি সর্বম্
105.57
গৌতম উবাচ
শ্বেতং করেণুং মম পুত্রনাগং; যং মেঽহার্ষীর্দশবর্ষাণি বালম্
যো মে বনে বসতোঽভূদ্দ্বিতীয়;স্তমেব মে দেহি সুরেন্দ্র নাগম্
105.58
শক্র উবাচ
অয়ং সুতস্তে দ্বিজমুখ্য নাগ;শ্চাঘ্রায়তে ত্বামভিবীক্ষমাণঃ
পাদৌ চ তে নাসিকয়োপজিঘ্রতে; শ্রেয়ো মম ধ্যাহি নমশ্চ তেঽস্তু
105.59
গৌতম উবাচ
শিবং সদৈবেহ সুরেন্দ্র তুভ্যং; ধ্যায়ামি পূজাং চ সদা প্রয়ুঞ্জে
মমাপি ত্বং শক্র শিবং দদস্ব; ত্বয়া দত্তং প্রতিগৃহ্ণামি নাগম্
105.60
শক্র উবাচ
যেষাং বেদা নিহিতা বৈ গুহায়াং; মনীষিণাং সত্ত্ববতাং মহাত্মনাম্
তেষাং ত্বয়ৈকেন মহাত্মনাস্মি; বুদ্ধস্তস্মাত্প্রীতিমাংস্তেঽহমদ্য
105.61
হন্তৈহি ব্রাহ্মণ ক্ষিপ্রং সহ পুত্রেণ হস্তিনা
প্রাপ্নুহি ত্বং শুভাঁল্লোকানহ্নায় চ চিরায় চ
105.62
ভীষ্ম উবাচ
স গৌতমং পুরস্কৃত্য সহ পুত্রেণ হস্তিনা
দিবমাচক্রমে বজ্রী সদ্ভিঃ সহ দুরাসদম্