Utshovঅধ্যায় 106
106.1
যুধিষ্ঠির উবাচ
দানং বহুবিধাকারং শান্তিঃ সত্যমহিংসতা
স্বদারতুষ্টিশ্চোক্তা তে ফলং দানস্য চৈব যৎ
106.2
পিতামহস্য বিদিতং কিমন্যত্র তপোবলাৎ
তপসো যত্পরং তেঽদ্য তন্মে ব্যাখ্যাতুমর্হসি
106.3
ভীষ্ম উবাচ
তপঃ প্রচক্ষতে যাবত্তাবল্লোকা যুধিষ্ঠির
মতং মম তু কৌন্তেয় তপো নানশনাত্পরম্
106.4
অত্রাপ্যুদাহরন্তীমমিতিহাসং পুরাতনম্
ভগীরথস্য সংবাদং ব্রহ্মণশ্চ মহাত্মনঃ
106.5
অতীত্য সুরলোকং চ গবাং লোকং চ ভারত
ঋষিলোকং চ সোঽগচ্ছদ্ভগীরথ ইতি শ্রুতিঃ
106.6
তং দৃষ্ট্বা স বচঃ প্রাহ ব্রহ্মা রাজন্ভগীরথম্
কথং ভগীরথাগাস্ত্বমিমং দেশং দুরাসদম্
106.7
ন হি দেবা ন গন্ধর্বা ন মনুষ্যা ভগীরথ
আয়ান্ত্যতপ্ততপসঃ কথং বৈ ত্বমিহাগতঃ
106.8
ভগীরথ উবাচ
নিঃশঙ্কমন্নমদদং ব্রাহ্মণেভ্যঃ; শতং সহস্রাণি সদৈব দানম্
ব্রাহ্মং ব্রতং নিত্যমাস্থায় বিদ্ধি; ন ত্বেবাহং তস্য ফলাদিহাগাম্
106.9
দশৈকরাত্রান্দশ পঞ্চরাত্রা;নেকাদশৈকাদশকান্ক্রতূংশ্চ
জ্যোতিষ্টোমানাং চ শতং যদিষ্টং; ফলেন তেনাপি চ নাগতোঽহম্
106.10
যচ্চাবসং জাহ্নবীতীরনিত্যঃ; শতং সমাস্তপ্যমানস্তপোঽহম্
অদাং চ তত্রাশ্বতরীসহস্রং; নারীপুরং ন চ তেনাহমাগাম্
106.11
দশায়ুতানি চাশ্বানাময়ুতানি চ বিংশতিম্
পুষ্করেষু দ্বিজাতিভ্যঃ প্রাদাং গাশ্চ সহস্রশঃ
106.12
সুবর্ণচন্দ্রোডুপধারিণীনাং; কন্যোত্তমানামদদং স্রগ্বিণীনাম্
ষষ্টিং সহস্রাণি বিভূষিতানাং; জাম্বূনদৈরাভরণৈর্ন তেন
106.13
দশার্বুদান্যদদং গোসবেজ্যা;স্বেকৈকশো দশ গা লোকনাথ
সমানবত্সাঃ পয়সা সমন্বিতাঃ; সুবর্ণকাংস্যোপদুহা ন তেন
106.14
অপ্তোর্যামেষু নিয়তমেকৈকস্মিন্দশাদদম্
গৃষ্টীনাং ক্ষীরদাত্রীণাং রোহিণীনাং ন তেন চ
106.15
দোগ্ধ্রীণাং বৈ গবাং চৈব প্রয়ুতানি দশৈব হ
প্রাদাং দশগুণং ব্রহ্মন্ন চ তেনাহমাগতঃ
106.16
বাজিনাং বাহ্লিজাতানাময়ুতান্যদদং দশ
কর্কাণাং হেমমালানাং ন চ তেনাহমাগতঃ
106.17
কোটীশ্চ কাঞ্চনস্যাষ্টৌ প্রাদাং ব্রহ্মন্দশ ত্বহম্
একৈকস্মিন্ক্রতৌ তেন ফলেনাহং ন চাগতঃ
106.18
বাজিনাং শ্যামকর্ণানাং হরিতানাং পিতামহ
প্রাদাং হেমস্রজাং ব্রহ্মন্কোটীর্দশ চ সপ্ত চ
106.19
ঈষাদন্তান্মহাকায়ান্কাঞ্চনস্রগ্বিভূষিতান্
পত্নীমতঃ সহস্রাণি প্রায়চ্ছং দশ সপ্ত চ
106.20
অলংকৃতানাং দেবেশ দিব্যৈঃ কনকভূষণৈঃ
রথানাং কাঞ্চনাঙ্গানাং সহস্রাণ্যদদং দশ
সপ্ত চান্যানি যুক্তানি বাজিভিঃ সমলংকৃতৈঃ
106.21
দক্ষিণাবয়বাঃ কেচিদ্বেদৈর্যে সংপ্রকীর্তিতাঃ
বাজপেয়েষু দশসু প্রাদাং তেনাপি নাপ্যহম্
106.22
শক্রতুল্যপ্রভাবানামিজ্যয়া বিক্রমেণ চ
সহস্রং নিষ্ককণ্ঠানামদদং দক্ষিণামহম্
106.23
বিজিত্য নৃপতীন্সর্বান্মখৈরিষ্ট্বা পিতামহ
অষ্টভ্যো রাজসূয়েভ্যো ন চ তেনাহমাগতঃ
106.24
স্রোতশ্চ যাবদ্গঙ্গায়াশ্ছন্নমাসীজ্জগত্পতে
দক্ষিণাভিঃ প্রবৃত্তাভির্মম নাগাং চ তত্কৃতে
106.25
বাজিনাং চ সহস্রে দ্বে সুবর্ণশতভূষিতে
বরং গ্রামশতং চাহমেকৈকস্য ত্রিধাদদম্
তপস্বী নিয়তাহারঃ শমমাস্থায় বাগ্যতঃ
106.26
দীর্ঘকালং হিমবতি গঙ্গায়াশ্চ দুরুত্সহাম্
মূর্ধ্না ধারাং মহাদেবঃ শিরসা যামধারয়ৎ
ন তেনাপ্যহমাগচ্ছং ফলেনেহ পিতামহ
106.27
শম্যাক্ষেপৈরয়জং যচ্চ দেবা;ন্সদ্যস্কানাময়ুতৈশ্চাপি যত্তৎ
ত্রয়োদশদ্বাদশাহাংশ্চ দেব; সপৌণ্ডরীকান্ন চ তেষাং ফলেন
106.28
অষ্টৌ সহস্রাণি ককুদ্মিনামহং; শুক্লর্ষভাণামদদং ব্রাহ্মণেভ্যঃ
একৈকং বৈ কাঞ্চনং শৃঙ্গমেভ্যঃ; পত্নীশ্চৈষামদদং নিষ্ককণ্ঠীঃ
106.29
হিরণ্যরত্ননিচিতানদদং রত্নপর্বতান্
ধনধান্যসমৃদ্ধাংশ্চ গ্রামাঞ্শতসহস্রশঃ
106.30
শতং শতানাং গৃষ্টীনামদদং চাপ্যতন্দ্রিতঃ
ইষ্ট্বানেকৈর্মহায়জ্ঞৈর্ব্রাহ্মণেভ্যো ন তেন চ
106.31
একাদশাহৈরয়জং সদক্ষিণৈ;র্দ্বির্দ্বাদশাহৈরশ্বমেধৈশ্চ দেব
আর্কায়ণৈঃ ষোডশভিশ্চ ব্রহ্মং;স্তেষাং ফলেনেহ ন চাগতোঽস্মি
106.32
নিষ্কৈককণ্ঠমদদং যোজনায়তং; তদ্বিস্তীর্ণং কাঞ্চনপাদপানাম্
বনং চূতানাং রত্নবিভূষিতানাং; ন চৈব তেষামাগতোঽহং ফলেন
106.33
তুরায়ণং হি ব্রতমপ্রধৃষ্য;মক্রোধনোঽকরবং ত্রিংশতোঽব্দান্
শতং গবামষ্ট শতানি চৈব; দিনে দিনে হ্যদদং ব্রাহ্মণেভ্যঃ
106.34
পয়স্বিনীনামথ রোহিণীনাং; তথৈব চাপ্যনডুহাং লোকনাথ
প্রাদাং নিত্যং ব্রাহ্মণেভ্যঃ সুরেশ; নেহাগতস্তেন ফলেন চাহম্
106.35
ত্রিংশদগ্নিমহং ব্রহ্মন্নয়জং যচ্চ নিত্যদা
অষ্টাভিঃ সর্বমেধৈশ্চ নরমেধৈশ্চ সপ্তভিঃ
106.36
দশভির্বিশ্বজিদ্ভিশ্চ শতৈরষ্টাদশোত্তরৈঃ
ন চৈব তেষাং দেবেশ ফলেনাহমিহাগতঃ
106.37
সরয্বাং বাহুদায়াং চ গঙ্গায়ামথ নৈমিষে
গবাং শতানাময়ুতমদদং ন চ তেন বৈ
106.38
ইন্দ্রেণ গুহ্যং নিহিতং বৈ গুহায়াং; যদ্ভার্গবস্তপসেহাভ্যবিন্দৎ
জাজ্বল্যমানমুশনস্তেজসেহ; তত্সাধয়ামাস মহং বরেণ্যম্
106.39
ততো মে ব্রাহ্মণাস্তুষ্টাস্তস্মিন্কর্মণি সাধিতে
সহস্রমৃষয়শ্চাসন্যে বৈ তত্র সমাগতাঃ
উক্তস্তৈরস্মি গচ্ছ ত্বং ব্রহ্মলোকমিতি প্রভো
106.40
প্রীতেনোক্তঃ সহস্রেণ ব্রাহ্মণানামহং প্রভো
ইমং লোকমনুপ্রাপ্তো মা ভূত্তেঽত্র বিচারণা
106.41
কামং যথাবদ্বিহিতং বিধাত্রা; পৃষ্টেন বাচ্যং তু ময়া যথাবৎ
তপো হি নান্যচ্চানশনান্মতং মে; নমোঽস্তু তে দেববর প্রসীদ
106.42
ভীষ্ম উবাচ
ইত্যুক্তবন্তং তং ব্রহ্মা রাজানং স্ম ভগীরথম্
পূজয়ামাস পূজার্হং বিধিদৃষ্টেন কর্মণা