Utshovঅধ্যায় 107
107.1
যুধিষ্ঠির উবাচ
শতায়ুরুক্তঃ পুরুষঃ শতবীর্যশ্চ বৈদিকে
কস্মান্ম্রিয়ন্তে পুরুষা বালা অপি পিতামহ
107.2
আয়ুষ্মান্কেন ভবতি স্বল্পায়ুর্বাপি মানবঃ
কেন বা লভতে কীর্তিং কেন বা লভতে শ্রিয়ম্
107.3
তপসা ব্রহ্মচর্যেণ জপৈর্হোমৈস্তথৌষধৈঃ
জন্মনা যদি বাচারাত্তন্মে ব্রূহি পিতামহ
107.4
ভীষ্ম উবাচ
অত্র তে বর্তয়িষ্যামি যন্মাং ত্বমনুপৃচ্ছসি
অল্পায়ুর্যেন ভবতি দীর্ঘায়ুর্বাপি মানবঃ
107.5
যেন বা লভতে কীর্তিং যেন বা লভতে শ্রিয়ম্
যথা চ বর্তন্পুরুষঃ শ্রেয়সা সংপ্রয়ুজ্যতে
107.6
আচারাল্লভতে হ্যায়ুরাচারাল্লভতে শ্রিয়ম্
আচারাত্কীর্তিমাপ্নোতি পুরুষঃ প্রেত্য চেহ চ
107.7
দুরাচারো হি পুরুষো নেহায়ুর্বিন্দতে মহৎ
ত্রসন্তি যস্মাদ্ভূতানি তথা পরিভবন্তি চ
107.8
তস্মাত্কুর্যাদিহাচারং য ইচ্ছেদ্ভূতিমাত্মনঃ
অপি পাপশরীরস্য আচারো হন্ত্যলক্ষণম্
107.9
আচারলক্ষণো ধর্মঃ সন্তশ্চাচারলক্ষণাঃ
সাধূনাং চ যথা বৃত্তমেতদাচারলক্ষণম্
107.10
অপ্যদৃষ্টং শ্রুতং বাপি পুরুষং ধর্মচারিণম্
ভূতিকর্মাণি কুর্বাণং তং জনাঃ কুর্বতে প্রিয়ম্
107.11
যে নাস্তিকা নিষ্ক্রিয়াশ্চ গুরুশাস্ত্রাতিলঙ্ঘিনঃ
অধর্মজ্ঞা দুরাচারাস্তে ভবন্তি গতায়ুষঃ
107.12
বিশীলা ভিন্নমর্যাদা নিত্যং সংকীর্ণমৈথুনাঃ
অল্পায়ুষো ভবন্তীহ নরা নিরয়গামিনঃ
107.13
সর্বলক্ষণহীনোঽপি সমুদাচারবান্নরঃ
শ্রদ্দধানোঽনসূয়শ্চ শতং বর্ষাণি জীবতি
107.14
অক্রোধনঃ সত্যবাদী ভূতানামবিহিংসকঃ
অনসূয়ুরজিহ্মশ্চ শতং বর্ষাণি জীবতি
107.15
লোষ্টমর্দী তৃণচ্ছেদী নখখাদী চ যো নরঃ
নিত্যোচ্ছিষ্টঃ সংকুসুকো নেহায়ুর্বিন্দতে মহৎ
107.16
ব্রাহ্মে মুহূর্তে বুধ্যেত ধর্মার্থৌ চানুচিন্তয়েৎ
উত্থায়াচম্য তিষ্ঠেত পূর্বাং সংধ্যাং কৃতাঞ্জলিঃ
107.17
এবমেবাপরাং সংধ্যাং সমুপাসীত বাগ্যতঃ
নেক্ষেতাদিত্যমুদ্যন্তং নাস্তং যান্তং কদাচন
107.18
ঋষয়ো দীর্ঘসংধ্যত্বাদ্দীর্ঘমায়ুরবাপ্নুবন্
তস্মাত্তিষ্ঠেত্সদা পূর্বাং পশ্চিমাং চৈব বাগ্যতঃ
107.19
যে চ পূর্বামুপাসন্তে দ্বিজাঃ সংধ্যাং ন পশ্চিমাম্
সর্বাংস্তান্ধার্মিকো রাজা শূদ্রকর্মাণি কারয়েৎ
107.20
পরদারা ন গন্তব্যাঃ সর্ববর্ণেষু কর্হিচিৎ
ন হীদৃশমনায়ুষ্যং লোকে কিংচন বিদ্যতে
যাদৃশং পুরুষস্যেহ পরদারোপসেবনম্
107.21
প্রসাধনং চ কেশানামঞ্জনং দন্তধাবনম্
পূর্বাহ্ণ এব কুর্বীত দেবতানাং চ পূজনম্
107.22
পুরীষমূত্রে নোদীক্ষেন্নাধিতিষ্ঠেত্কদাচন
উদক্যয়া চ সংভাষাং ন কুর্বীত কদাচন
107.23
নোত্সৃজেত পুরীষং চ ক্ষেত্রে গ্রামস্য চান্তিকে
উভে মূত্রপুরীষে তু নাপ্সু কুর্যাত্কদাচন
107.24
প্রাঙ্মুখো নিত্যমশ্নীয়াদ্বাগ্যতোঽন্নমকুত্সয়ন্
প্রস্কন্দয়েচ্চ মনসা ভুক্ত্বা চাগ্নিমুপস্পৃশেৎ
107.25
আয়ুষ্যং প্রাঙ্মুখো ভুঙ্ক্তে যশস্যং দক্ষিণামুখঃ
ধন্যং পশ্চান্মুখো ভুঙ্ক্তে ঋতং ভুঙ্ক্তে উদঙ্মুখঃ
107.26
নাধিতিষ্ঠেত্তুষাঞ্জাতু কেশভস্মকপালিকাঃ
অন্যস্য চাপ্যুপস্থানং দূরতঃ পরিবর্জয়েৎ
107.27
শান্তিহোমাংশ্চ কুর্বীত সাবিত্রাণি চ কারয়েৎ
নিষণ্ণশ্চাপি খাদেত ন তু গচ্ছন্কথংচন
107.28
মূত্রং ন তিষ্ঠতা কার্যং ন ভস্মনি ন গোব্রজে
107.29
আর্দ্রপাদস্তু ভুঞ্জীত নার্দ্রপাদস্তু সংবিশেৎ
আর্দ্রপাদস্তু ভুঞ্জানো বর্ষাণাং জীবতে শতম্
107.30
ত্রীণি তেজাংসি নোচ্ছিষ্ট আলভেত কদাচন
অগ্নিং গাং ব্রাহ্মণং চৈব তথাস্যায়ুর্ন রিষ্যতে
107.31
ত্রীণি তেজাংসি নোচ্ছিষ্ট উদীক্ষেত কদাচন
সূর্যাচন্দ্রমসৌ চৈব নক্ষত্রাণি চ সর্বশঃ
107.32
ঊর্ধ্বং প্রাণা হ্যুত্ক্রামন্তি যূনঃ স্থবির আয়তি
প্রত্যুত্থানাভিবাদাভ্যাং পুনস্তান্প্রতিপদ্যতে
107.33
অভিবাদয়েত বৃদ্ধাংশ্চ আসনং চৈব দাপয়েৎ
কৃতাঞ্জলিরুপাসীত গচ্ছন্তং পৃষ্ঠতোঽন্বিয়াৎ
107.34
ন চাসীতাসনে ভিন্নে ভিন্নং কাংস্যং চ বর্জয়েৎ
নৈকবস্ত্রেণ ভোক্তব্যং ন নগ্নঃ স্নাতুমর্হতি
স্বপ্তব্যং নৈব নগ্নেন ন চোচ্ছিষ্টোঽপি সংবিশেৎ
107.35
উচ্ছিষ্টো ন স্পৃশেচ্ছীর্ষং সর্বে প্রাণাস্তদাশ্রয়াঃ
কেশগ্রহান্প্রহারাংশ্চ শিরস্যেতান্বিবর্জয়েৎ
107.36
ন পাণিভ্যামুভাভ্যাং চ কণ্ডূয়েজ্জাতু বৈ শিরঃ
ন চাভীক্ষ্ণং শিরঃ স্নায়াত্তথাস্যায়ুর্ন রিষ্যতে
107.37
শিরঃস্নাতশ্চ তৈলেন নাঙ্গং কিংচিদুপস্পৃশেৎ
তিলপিষ্টং ন চাশ্নীয়াত্তথায়ুর্বিন্দতে মহৎ
107.38
নাধ্যাপয়েত্তথোচ্ছিষ্টো নাধীয়ীত কদাচন
বাতে চ পূতিগন্ধে চ মনসাপি ন চিন্তয়েৎ
107.39
অত্র গাথা যমোদ্গীতাঃ কীর্তয়ন্তি পুরাবিদঃ
আয়ুরস্য নিকৃন্তামি প্রজামস্যাদদে তথা
107.40
য উচ্ছিষ্টঃ প্রবদতি স্বাধ্যায়ং চাধিগচ্ছতি
যশ্চানধ্যায়কালেঽপি মোহাদভ্যস্যতি দ্বিজঃ
তস্মাদ্যুক্তোঽপ্যনধ্যায়ে নাধীয়ীত কদাচন
107.41
প্রত্যাদিত্যং প্রত্যনিলং প্রতি গাং চ প্রতি দ্বিজান্
যে মেহন্তি চ পন্থানং তে ভবন্তি গতায়ুষঃ
107.42
উভে মূত্রপুরীষে তু দিবা কুর্যাদুদঙ্মুখঃ
দক্ষিণাভিমুখো রাত্রৌ তথাস্যায়ুর্ন রিষ্যতে
107.43
ত্রীন্কৃশান্নাবজানীয়াদ্দীর্ঘমায়ুর্জিজীবিষুঃ
ব্রাহ্মণং ক্ষত্রিয়ং সর্পং সর্বে হ্যাশীবিষাস্ত্রয়ঃ
107.44
দহত্যাশীবিষঃ ক্রুদ্ধো যাবত্পশ্যতি চক্ষুষা
ক্ষত্রিয়োঽপি দহেত্ক্রুদ্ধো যাবত্স্পৃশতি তেজসা
107.45
ব্রাহ্মণস্তু কুলং হন্যাদ্ধ্যানেনাবেক্ষিতেন চ
তস্মাদেতত্ত্রয়ং যত্নাদুপসেবেত পণ্ডিতঃ
107.46
গুরুণা বৈরনির্বন্ধো ন কর্তব্যঃ কদাচন
অনুমান্যঃ প্রসাদ্যশ্চ গুরুঃ ক্রুদ্ধো যুধিষ্ঠির
107.47
সম্যঙ্মিথ্যাপ্রবৃত্তেঽপি বর্তিতব্যং গুরাবিহ
গুরুনিন্দা দহত্যায়ুর্মনুষ্যাণাং ন সংশয়ঃ
107.48
দূরাদাবসথান্মূত্রং দূরাত্পাদাবসেচনম্
উচ্ছিষ্টোত্সর্জনং চৈব দূরে কার্যং হিতৈষিণা
107.49
নাতিকল্পং নাতিসায়ং ন চ মধ্যংদিনে স্থিতে
নাজ্ঞাতৈঃ সহ গচ্ছেত নৈকো ন বৃষলৈঃ সহ
107.50
পন্থা দেয়ো ব্রাহ্মণায় গোভ্যো রাজভ্য এব চ
বৃদ্ধায় ভারতপ্তায় গর্ভিণ্যৈ দুর্বলায় চ
107.51
প্রদক্ষিণং চ কুর্বীত পরিজ্ঞাতান্বনস্পতীন্
চতুষ্পথান্প্রকুর্বীত সর্বানেব প্রদক্ষিণান্
107.52
মধ্যংদিনে নিশাকালে মধ্যরাত্রে চ সর্বদা
চতুষ্পথান্ন সেবেত উভে সংধ্যে তথৈব চ
107.53
উপানহৌ চ বস্ত্রং চ ধৃতমন্যৈর্ন ধারয়েৎ
ব্রহ্মচারী চ নিত্যং স্যাত্পাদং পাদেন নাক্রমেৎ
107.54
অমাবাস্যাং পৌর্ণমাস্যাং চতুর্দশ্যাং চ সর্বশঃ
অষ্টম্যাং সর্বপক্ষাণাং ব্রহ্মচারী সদা ভবেৎ
107.55
বৃথা মাংসং ন খাদেত পৃষ্ঠমাংসং তথৈব চ
আক্রোশং পরিবাদং চ পৈশুন্যং চ বিবর্জয়েৎ
107.56
নারুংতুদঃ স্যান্ন নৃশংসবাদী; ন হীনতঃ পরমভ্যাদদীত
যয়াস্য বাচা পর উদ্বিজেত; ন তাং বদেদ্রুশতীং পাপলোক্যাম্
107.57
বাক্সায়কা বদনান্নিষ্পতন্তি; যৈরাহতঃ শোচতি রাত্র্যহানি
পরস্য নামর্মসু তে পতন্তি; তান্পণ্ডিতো নাবসৃজেত্পরেষু
107.58
রোহতে সায়কৈর্বিদ্ধং বনং পরশুনা হতম্
বাচা দুরুক্তং বীভত্সং ন সংরোহতি বাক্ক্ষতম্
107.59
হীনাঙ্গানতিরিক্তাঙ্গান্বিদ্যাহীনান্বয়োধিকান্
রূপদ্রবিণহীনাংশ্চ সত্ত্বহীনাংশ্চ নাক্ষিপেৎ
107.60
নাস্তিক্যং বেদনিন্দাং চ দেবতানাং চ কুত্সনম্
দ্বেষস্তম্ভাভিমানাংশ্চ তৈক্ষ্ণ্যং চ পরিবর্জয়েৎ
107.61
পরস্য দণ্ডং নোদ্যচ্ছেত্ক্রোদ্ধো নৈনং নিপাতয়েৎ
অন্যত্র পুত্রাচ্ছিষ্যাদ্বা শিক্ষার্থং তাডনং স্মৃতম্
107.62
ন ব্রাহ্মণান্পরিবদেন্নক্ষত্রাণি ন নির্দিশেৎ
তিথিং পক্ষস্য ন ব্রূয়াত্তথাস্যায়ুর্ন রিষ্যতে
107.63
কৃত্বা মূত্রপুরীষে তু রথ্যামাক্রম্য বা পুনঃ
পাদপ্রক্ষালনং কুর্যাত্স্বাধ্যায়ে ভোজনে তথা
107.64
ত্রীণি দেবাঃ পবিত্রাণি ব্রাহ্মণানামকল্পয়ন্
অদৃষ্টমদ্ভির্নির্ণিক্তং যচ্চ বাচা প্রশস্যতে
107.65
সংয়াবং কৃসরং মাংসং শষ্কুলী পায়সং তথা
আত্মার্থং ন প্রকর্তব্যং দেবার্থং তু প্রকল্পয়েৎ
107.66
নিত্যমগ্নিং পরিচরেদ্ভিক্ষাং দদ্যাচ্চ নিত্যদা
বাগ্যতো দন্তকাষ্ঠং চ নিত্যমেব সমাচরেৎ
ন চাভ্যুদিতশায়ী স্যাত্প্রায়শ্চিত্তী তথা ভবেৎ
107.67
মাতাপিতরমুত্থায় পূর্বমেবাভিবাদয়েৎ
আচার্যমথ বাপ্যেনং তথায়ুর্বিন্দতে মহৎ
107.68
বর্জয়েদ্দন্তকাষ্ঠানি বর্জনীয়ানি নিত্যশঃ
ভক্ষয়েচ্ছাস্ত্রদৃষ্টানি পর্বস্বপি চ বর্জয়েৎ
107.69
উদঙ্মুখশ্চ সততং শৌচং কুর্যাত্সমাহিতঃ
107.70
অকৃত্বা দেবতাপূজাং নান্যং গচ্ছেত্কদাচন
অন্যত্র তু গুরুং বৃদ্ধং ধার্মিকং বা বিচক্ষণম্
107.71
অবলোক্যো ন চাদর্শো মলিনো বুদ্ধিমত্তরৈঃ
ন চাজ্ঞাতাং স্ত্রিয়ং গচ্ছেদ্গর্ভিণীং বা কদাচন
107.72
উদক্শিরা ন স্বপেত তথা প্রত্যক্শিরা ন চ
প্রাক্শিরাস্তু স্বপেদ্বিদ্বানথ বা দক্ষিণাশিরাঃ
107.73
ন ভগ্নে নাবদীর্ণে বা শয়নে প্রস্বপেত চ
নান্তর্ধানে ন সংয়ুক্তে ন চ তির্যক্কদাচন
107.74
ন নগ্নঃ কর্হিচিত্স্নায়ান্ন নিশায়াং কদাচন
স্নাত্বা চ নাবমৃজ্যেত গাত্রাণি সুবিচক্ষণঃ
107.75
ন চানুলিম্পেদস্নাত্বা স্নাত্বা বাসো ন নির্ধুনেৎ
আর্দ্র এব তু বাসাংসি নিত্যং সেবেত মানবঃ
স্রজশ্চ নাবকর্ষেত ন বহির্ধারয়েত চ
107.76
রক্তমাল্যং ন ধার্যং স্যাচ্ছুক্লং ধার্যং তু পণ্ডিতৈঃ
বর্জয়িত্বা তু কমলং তথা কুবলয়ং বিভো
107.77
রক্তং শিরসি ধার্যং তু তথা বানেয়মিত্যপি
কাঞ্চনী চৈব যা মালা ন সা দুষ্যতি কর্হিচিৎ
স্নাতস্য বর্ণকং নিত্যমার্দ্রং দদ্যাদ্বিশাং পতে
107.78
বিপর্যয়ং ন কুর্বীত বাসসো বুদ্ধিমান্নরঃ
তথা নান্যধৃতং ধার্যং ন চাপদশমেব চ
107.79
অন্যদেব ভবেদ্বাসঃ শয়নীয়ে নরোত্তম
অন্যদ্রথ্যাসু দেবানামর্চায়ামন্যদেব হি
107.80
প্রিয়ঙ্গুচন্দনাভ্যাং চ বিল্বেন তগরেণ চ
পৃথগেবানুলিম্পেত কেসরেণ চ বুদ্ধিমান্
107.81
উপবাসং চ কুর্বীত স্নাতঃ শুচিরলংকৃতঃ
পর্বকালেষু সর্বেষু ব্রহ্মচারী সদা ভবেৎ
107.82
নালীঢয়া পরিহতং ভক্ষয়ীত কদাচন
তথা নোদ্ধৃতসারাণি প্রেক্ষতাং নাপ্রদায় চ
107.83
ন সংনিকৃষ্টো মেধাবী নাশুচির্ন চ সত্সু চ
প্রতিষিদ্ধান্ন ধর্মেষু ভক্ষান্ভুঞ্জীত পৃষ্ঠতঃ
107.84
পিপ্পলং চ বটং চৈব শণশাকং তথৈব চ
উদুম্বরং ন খাদেচ্চ ভবার্থী পুরুষোত্তমঃ
107.85
আজং গব্যং চ যন্মাংসং মায়ূরং চৈব বর্জয়েৎ
বর্জয়েচ্ছুষ্কমাংসং চ তথা পর্যুষিতং চ যৎ
107.86
ন পাণৌ লবণং বিদ্বান্প্রাশ্নীয়ান্ন চ রাত্রিষু
দধিসক্তূন্ন ভুঞ্জীত বৃথামাংসং চ বর্জয়েৎ
107.87
বালেন তু ন ভুঞ্জীত পরশ্রাদ্ধং তথৈব চ
সায়ং প্রাতশ্চ ভুঞ্জীত নান্তরালে সমাহিতঃ
107.88
বাগ্যতো নৈকবস্ত্রশ্চ নাসংবিষ্টঃ কদাচন
ভূমৌ সদৈব নাশ্নীয়ান্নানাসীনো ন শব্দবৎ
107.89
তোয়পূর্বং প্রদায়ান্নমতিথিভ্যো বিশাং পতে
পশ্চাদ্ভুঞ্জীত মেধাবী ন চাপ্যন্যমনা নরঃ
107.90
সমানমেকপঙ্ক্ত্যাং তু ভোজ্যমন্নং নরেশ্বর
বিষং হালাহলং ভুঙ্ক্তে যোঽপ্রদায় সুহৃজ্জনে
107.91
পানীয়ং পায়সং সর্পির্দধিসক্তুমধূন্যপি
নিরস্য শেষমেতেষাং ন প্রদেয়ং তু কস্যচিৎ
107.92
ভুঞ্জানো মনুজব্যাঘ্র নৈব শঙ্কাং সমাচরেৎ
দধি চাপ্যনুপানং বৈ ন কর্তব্যং ভবার্থিনা
107.93
আচম্য চৈব হস্তেন পরিস্রাব্য তথোদকম্
অঙ্গুষ্ঠং চরণস্যাথ দক্ষিণস্যাবসেচয়েৎ
107.94
পাণিং মূর্ধ্নি সমাধায় স্পৃষ্ট্বা চাগ্নিং সমাহিতঃ
জ্ঞাতিশ্রৈষ্ঠ্যমবাপ্নোতি প্রয়োগকুশলো নরঃ
107.95
অদ্ভিঃ প্রাণান্সমালভ্য নাভিং পাণিতলেন চ
স্পৃশংশ্চৈব প্রতিষ্ঠেত ন চাপ্যার্দ্রেণ পাণিনা
107.96
অঙ্গুষ্ঠস্যান্তরালে চ ব্রাহ্মং তীর্থমুদাহৃতম্
কনিষ্ঠিকায়াঃ পশ্চাত্তু দেবতীর্থমিহোচ্যতে
107.97
অঙ্গুষ্ঠস্য চ যন্মধ্যং প্রদেশিন্যাশ্চ ভারত
তেন পিত্র্যাণি কুর্বীত স্পৃষ্ট্বাপো ন্যায়তস্তথা
107.98
পরাপবাদং ন ব্রূয়ান্নাপ্রিয়ং চ কদাচন
ন মন্যুঃ কশ্চিদুত্পাদ্যঃ পুরুষেণ ভবার্থিনা
107.99
পতিতৈস্তু কথাং নেচ্ছেদ্দর্শনং চাপি বর্জয়েৎ
সংসর্গং চ ন গচ্ছেত তথায়ুর্বিন্দতে মহৎ
107.100
ন দিবা মৈথুনং গচ্ছেন্ন কন্যাং ন চ বন্ধকীম্
ন চাস্নাতাং স্ত্রিয়ং গচ্ছেত্তথায়ুর্বিন্দতে মহৎ
107.101
স্বে স্বে তীর্থে সমাচম্য কার্যে সমুপকল্পিতে
ত্রিঃ পীত্বাপো দ্বিঃ প্রমৃজ্য কৃতশৌচো ভবেন্নরঃ
107.102
ইন্দ্রিয়াণি সকৃত্স্পৃশ্য ত্রিরভ্যুক্ষ্য চ মানবঃ
কুর্বীত পিত্র্যং দৈবং চ বেদদৃষ্টেন কর্মণা
107.103
ব্রাহ্মণার্থে চ যচ্ছৌচং তচ্চ মে শৃণু কৌরব
প্রবৃত্তং চ হিতং চোক্ত্বা ভোজনাদ্যন্তয়োস্তথা
107.104
সর্বশৌচেষু ব্রাহ্মেণ তীর্থেন সমুপস্পৃশেৎ
নিষ্ঠীব্য তু তথা ক্ষুত্বা স্পৃশ্যাপো হি শুচির্ভবেৎ
107.105
বৃদ্ধো জ্ঞাতিস্তথা মিত্রং দরিদ্রো যো ভবেদপি
গৃহে বাসয়িতব্যাস্তে ধন্যমায়ুষ্যমেব চ
107.106
গৃহে পারাবতা ধন্যাঃ শুকাশ্চ সহসারিকাঃ
গৃহেষ্বেতে ন পাপায় তথা বৈ তৈলপায়িকাঃ
107.107
উদ্দীপকাশ্চ গৃধ্রাশ্চ কপোতা ভ্রমরাস্তথা
নিবিশেয়ুর্যদা তত্র শান্তিমেব তদাচরেৎ
107.108
অমঙ্গল্যানি চৈতানি তথাক্রোশো মহাত্মনাম্
মহাত্মনাং চ গুহ্যানি ন বক্তব্যানি কর্হিচিৎ
107.109
অগম্যাশ্চ ন গচ্ছেত রাজপত্নীঃ সখীস্তথা
বৈদ্যানাং বালবৃদ্ধানাং ভৃত্যানাং চ যুধিষ্ঠির
107.110
বন্ধূনাং ব্রাহ্মণানাং চ তথা শারণিকস্য চ
সংবন্ধিনাং চ রাজেন্দ্র তথায়ুর্বিন্দতে মহৎ
107.111
ব্রাহ্মণস্থপতিভ্যাং চ নির্মিতং যন্নিবেশনম্
তদাবসেত্সদা প্রাজ্ঞো ভবার্থী মনুজেশ্বর
107.112
সংধ্যায়াং ন স্বপেদ্রাজন্বিদ্যাং ন চ সমাচরেৎ
ন ভুঞ্জীত চ মেধাবী তথায়ুর্বিন্দতে মহৎ
107.113
নক্তং ন কুর্যাত্পিত্র্যাণি ভুক্ত্বা চৈব প্রসাধনম্
পানীয়স্য ক্রিয়া নক্তং ন কার্যা ভূতিমিচ্ছতা
107.114
বর্জনীয়াশ্চ বৈ নিত্যং সক্তবো নিশি ভারত
শেষাণি চাবদাতানি পানীয়ং চৈব ভোজনে
107.115
সৌহিত্যং চ ন কর্তব্যং রাত্রৌ নৈব সমাচরেৎ
দ্বিজচ্ছেদং ন কুর্বীত ভুক্ত্বা ন চ সমাচরেৎ
107.116
মহাকুলপ্রসূতাং চ প্রশস্তাং লক্ষণৈস্তথা
বয়ঃস্থাং চ মহাপ্রাজ্ঞ কন্যামাবোঢুমর্হতি
107.117
অপত্যমুত্পাদ্য ততঃ প্রতিষ্ঠাপ্য কুলং তথা
পুত্রাঃ প্রদেয়া জ্ঞানেষু কুলধর্মেষু ভারত
107.118
কন্যা চোত্পাদ্য দাতব্যা কুলপুত্রায় ধীমতে
পুত্রা নিবেশ্যাশ্চ কুলাদ্ভৃত্যা লভ্যাশ্চ ভারত
107.119
শিরঃস্নাতোঽথ কুর্বীত দৈবং পিত্র্যমথাপি চ
নক্ষত্রে ন চ কুর্বীত যস্মিঞ্জাতো ভবেন্নরঃ
ন প্রোষ্ঠপদয়োঃ কার্যং তথাগ্নেয়ে চ ভারত
107.120
দারুণেষু চ সর্বেষু প্রত্যহং চ বিবর্জয়েৎ
জ্যোতিষে যানি চোক্তানি তানি সর্বাণি বর্জয়েৎ
107.121
প্রাঙ্মুখঃ শ্মশ্রুকর্মাণি কারয়েত সমাহিতঃ
উদঙ্মুখো বা রাজেন্দ্র তথায়ুর্বিন্দতে মহৎ
107.122
পরিবাদং ন চ ব্রূয়াত্পরেষামাত্মনস্তথা
পরিবাদো ন ধর্মায় প্রোচ্যতে ভরতর্ষভ
107.123
বর্জয়েদ্ব্যঙ্গিনীং নারীং তথা কন্যাং নরোত্তম
সমার্ষাং ব্যঙ্গিতাং চৈব মাতুঃ স্বকুলজাং তথা
107.124
বৃদ্ধাং প্রব্রজিতাং চৈব তথৈব চ পতিব্রতাম্
তথাতিকৃষ্ণবর্ণাং চ বর্ণোত্কৃষ্টাং চ বর্জয়েৎ
107.125
অয়োনিং চ বিয়োনিং চ ন গচ্ছেত বিচক্ষণঃ
পিঙ্গলাং কুষ্ঠিনীং নারীং ন ত্বমাবোঢুমর্হসি
107.126
অপস্মারিকুলে জাতাং নিহীনাং চৈব বর্জয়েৎ
শ্বিত্রিণাং চ কুলে জাতাং ত্রয়াণাং মনুজেশ্বর
107.127
লক্ষণৈরন্বিতা যা চ প্রশস্তা যা চ লক্ষণৈঃ
মনোজ্ঞা দর্শনীয়া চ তাং ভবান্বোঢুমর্হতি
107.128
মহাকুলে নিবেষ্টব্যং সদৃশে বা যুধিষ্ঠির
অবরা পতিতা চৈব ন গ্রাহ্যা ভূতিমিচ্ছতা
107.129
অগ্নীনুত্পাদ্য যত্নেন ক্রিয়াঃ সুবিহিতাশ্চ যাঃ
বেদেষু ব্রাহ্মণৈঃ প্রোক্তাস্তাশ্চ সর্বাঃ সমাচরেৎ
107.130
ন চের্ষ্যা স্ত্রীষু কর্তব্যা দারা রক্ষ্যাশ্চ সর্বশঃ
অনায়ুষ্যা ভবেদীর্ষ্যা তস্মাদীর্ষ্যাং বিবর্জয়েৎ
107.131
অনায়ুষ্যো দিবাস্বপ্নস্তথাভ্যুদিতশায়িতা
প্রাতর্নিশায়াং চ তথা যে চোচ্ছিষ্টাঃ স্বপন্তি বৈ
107.132
পারদার্যমনায়ুষ্যং নাপিতোচ্ছিষ্টতা তথা
যত্নতো বৈ ন কর্তব্যমভ্যাসশ্চৈব ভারত
107.133
সংধ্যাং ন ভুঞ্জেন্ন স্নায়ান্ন পুরীষং সমুত্সৃজেৎ
প্রয়তশ্চ ভবেত্তস্যাং ন চ কিংচিত্সমাচরেৎ
107.134
ব্রাহ্মণান্পূজয়েচ্চাপি তথা স্নাত্বা নরাধিপ
দেবাংশ্চ প্রণমেত্স্নাতো গুরূংশ্চাপ্যভিবাদয়েৎ
107.135
অনিমন্ত্রিতো ন গচ্ছেত যজ্ঞং গচ্ছেত্তু দর্শকঃ
অনিমন্ত্রিতে হ্যনায়ুষ্যং গমনং তত্র ভারত
107.136
ন চৈকেন পরিব্রাজ্যং ন গন্তব্যং তথা নিশি
অনাগতায়াং সংধ্যায়াং পশ্চিমায়াং গৃহে বসেৎ
107.137
মাতুঃ পিতুর্গুরূণাং চ কার্যমেবানুশাসনম্
হিতং বাপ্যহিতং বাপি ন বিচার্যং নরর্ষভ
107.138
ধনুর্বেদে চ বেদে চ যত্নঃ কার্যো নরাধিপ
হস্তিপৃষ্ঠেঽশ্বপৃষ্ঠে চ রথচর্যাসু চৈব হ
যত্নবান্ভব রাজেন্দ্র যত্নবান্সুখমেধতে
107.139
অপ্রধৃষ্যশ্চ শত্রূণাং ভৃত্যানাং স্বজনস্য চ
প্রজাপালনয়ুক্তশ্চ ন ক্ষতিং লভতে ক্বচিৎ
107.140
যুক্তিশাস্ত্রং চ তে জ্ঞেয়ং শব্দশাস্ত্রং চ ভারত
গন্ধর্বশাস্ত্রং চ কলাঃ পরিজ্ঞেয়া নরাধিপ
107.141
পুরাণমিতিহাসাশ্চ তথাখ্যানানি যানি চ
মহাত্মনাং চ চরিতং শ্রোতব্যং নিত্যমেব তে
107.142
পত্নীং রজস্বলাং চৈব নাভিগচ্ছেন্ন চাহ্বয়েৎ
স্নাতাং চতুর্থে দিবসে রাত্রৌ গচ্ছেদ্বিচক্ষণঃ
107.143
পঞ্চমে দিবসে নারী ষষ্ঠেঽহনি পুমান্ভবেৎ
এতেন বিধিনা পত্নীমুপগচ্ছেত পণ্ডিতঃ
107.144
জ্ঞাতিসংবন্ধিমিত্রাণি পূজনীয়ানি নিত্যশঃ
যষ্টব্যং চ যথাশক্তি যজ্ঞৈর্বিবিধদক্ষিণৈঃ
অতঊর্ধ্বমরণ্যং চ সেবিতব্যং নরাধিপ
107.145
এষ তে লক্ষণোদ্দেশ আয়ুষ্যাণাং প্রকীর্তিতঃ
শেষস্ত্রৈবিদ্যবৃদ্ধেভ্যঃ প্রত্যাহার্যো যুধিষ্ঠির
107.146
আচারো ভূতিজনন আচারঃ কীর্তিবর্ধনঃ
আচারাদ্বর্ধতে হ্যায়ুরাচারো হন্ত্যলক্ষণম্
107.147
আগমানাং হি সর্বেষামাচারঃ শ্রেষ্ঠ উচ্যতে
আচারপ্রভবো ধর্মো ধর্মাদায়ুর্বিবর্ধতে
107.148
এতদ্যশস্যমায়ুষ্যং স্বর্গ্যং স্বস্ত্যয়নং মহৎ
অনুকম্পতা সর্ববর্ণান্ব্রহ্মণা সমুদাহৃতম্