অধ্যায় 108

108.1

যুধিষ্ঠির উবাচ
যথা জ্যেষ্ঠঃ কনিষ্ঠেষু বর্ততে ভরতর্ষভ
কনিষ্ঠাশ্চ যথা জ্যেষ্ঠে বর্তেরংস্তদ্ব্রবীহি মে

ভীষ্ম উবাচ
জ্যেষ্ঠবত্তাত বর্তস্ব জ্যেষ্ঠো হি সততং ভবান্
গুরোর্গরীয়সী বৃত্তির্যা চেচ্ছিষ্যস্য ভারত

ন গুরাবকৃতপ্রজ্ঞে শক্যং শিষ্যেণ বর্তিতুম্
গুরোর্হি দীর্ঘদর্শিত্বং যত্তচ্ছিষ্যস্য ভারত

অন্ধঃ স্যাদন্ধবেলায়াং জডঃ স্যাদপি বা বুধঃ
পরিহারেণ তদ্ব্রূয়াদ্যস্তেষাং স্যাদ্ব্যতিক্রমঃ

প্রত্যক্ষং ভিন্নহৃদয়া ভেদয়েয়ুঃ কৃতং নরাঃ
শ্রিয়াভিতপ্তাঃ কৌন্তেয় ভেদকামাস্তথারয়ঃ

জ্যেষ্ঠঃ কুলং বর্ধয়তি বিনাশয়তি বা পুনঃ
হন্তি সর্বমপি জ্যেষ্ঠঃ কুলং যত্রাবজায়তে

অথ যো বিনিকুর্বীত জ্যেষ্ঠো ভ্রাতা যবীয়সঃ
অজ্যেষ্ঠঃ স্যাদভাগশ্চ নিয়ম্যো রাজভিশ্চ সঃ

নিকৃতী হি নরো লোকান্পাপান্গচ্ছত্যসংশয়ম্
বিদুলস্যেব তত্পুষ্পং মোঘং জনয়িতুঃ স্মৃতম্

সর্বানর্থঃ কুলে যত্র জায়তে পাপপূরুষঃ
অকীর্তিং জনয়ত্যেব কীর্তিমন্তর্দধাতি চ

সর্বে চাপি বিকর্মস্থা ভাগং নার্হন্তি সোদরাঃ
নাপ্রদায় কনিষ্ঠেভ্যো জ্যেষ্ঠঃ কুর্বীত যৌতকম্

অনুজং হি পিতুর্দায়ো জঙ্ঘাশ্রমফলোঽধ্বগঃ
স্বয়মীহিতলব্ধং তু নাকামো দাতুমর্হতি

ভ্রাতৄণামবিভক্তানামুত্থানমপি চেত্সহ
ন পুত্রভাগং বিষমং পিতা দদ্যাত্কথংচন

ন জ্যেষ্ঠানবমন্যেত দুষ্কৃতঃ সুকৃতোঽপি বা
যদি স্ত্রী যদ্যবরজঃ শ্রেয়ঃ পশ্যেত্তথাচরেৎ
ধর্মং হি শ্রেয় ইত্যাহুরিতি ধর্মবিদো বিদুঃ

দশাচার্যানুপাধ্যায় উপাধ্যায়ান্পিতা দশ
দশ চৈব পিতৄন্মাতা সর্বাং বা পৃথিবীমপি

গৌরবেণাভিভবতি নাস্তি মাতৃসমো গুরুঃ
মাতা গরীয়সী যচ্চ তেনৈতাং মন্যতে জনঃ

জ্যেষ্ঠো ভ্রাতা পিতৃসমো মৃতে পিতরি ভারত
স হ্যেষাং বৃত্তিদাতা স্যাত্স চৈতান্পরিপালয়েৎ

কনিষ্ঠাস্তং নমস্যেরন্সর্বে ছন্দানুবর্তিনঃ
তমেব চোপজীবেরন্যথৈব পিতরং তথা

শরীরমেতৌ সৃজতঃ পিতা মাতা চ ভারত
আচার্যশাস্তা যা জাতিঃ সা সত্যা সাজরামরা

জ্যেষ্ঠা মাতৃসমা চাপি ভগিনী ভরতর্ষভ
ভ্রাতুর্ভার্যা চ তদ্বত্স্যাদ্যস্যা বাল্যে স্তনং পিবেৎ