Utshovঅধ্যায় 109
109.1
যুধিষ্ঠির উবাচ
সর্বেষামেব বর্ণানাং ম্লেচ্ছানাং চ পিতামহ
উপবাসে মতিরিয়ং কারণং চ ন বিদ্মহে
109.2
ব্রহ্মক্ষত্রেণ নিয়মাশ্চর্তব্যা ইতি নঃ শ্রুতম্
উপবাসে কথং তেষাং কৃত্যমস্তি পিতামহ
109.3
নিয়মং চোপবাসানাং সর্বেষাং ব্রূহি পার্থিব
অবাপ্নোতি গতিং কাং চ উপবাসপরায়ণঃ
109.4
উপবাসঃ পরং পুণ্যমুপবাসঃ পরায়ণম্
উপোষ্যেহ নরশ্রেষ্ঠ কিং ফলং প্রতিপদ্যতে
109.5
অধর্মান্মুচ্যতে কেন ধর্মমাপ্নোতি বৈ কথম্
স্বর্গং পুণ্যং চ লভতে কথং ভরতসত্তম
109.6
উপোষ্য চাপি কিং তেন প্রদেয়ং স্যান্নরাধিপ
ধর্মেণ চ সুখানর্থাঁল্লভেদ্যেন ব্রবীহি তম্
109.7
বৈশংপায়ন উবাচ
এবং ব্রুবাণং কৌন্তেয়ং ধর্মজ্ঞং ধর্মতত্ত্ববিৎ
ধর্মপুত্রমিদং বাক্যং ভীষ্মঃ শাংতনবোঽব্রবীৎ
109.8
ইদং খলু মহারাজ শ্রুতমাসীত্পুরাতনম্
উপবাসবিধৌ শ্রেষ্ঠা যে গুণা ভরতর্ষভ
109.9
প্রাজাপত্যং হ্যঙ্গিরসং পৃষ্টবানস্মি ভারত
যথা মাং ত্বং তথৈবাহং পৃষ্টবাংস্তং তপোধনম্
109.10
প্রশ্নমেতং ময়া পৃষ্টো ভগবানগ্নিসংভবঃ
উপবাসবিধিং পুণ্যমাচষ্ট ভরতর্ষভ
109.11
অঙ্গিরা উবাচ
ব্রহ্মক্ষত্রে ত্রিরাত্রং তু বিহিতং কুরুনন্দন
দ্বিস্ত্রিরাত্রমথৈবাত্র নির্দিষ্টং পুরুষর্ষভ
109.12
বৈশ্যশূদ্রৌ তু যৌ মোহাদুপবাসং প্রকুর্বতে
ত্রিরাত্রং দ্বিস্ত্রিরাত্রং বা তয়োঃ পুষ্টির্ন বিদ্যতে
109.13
চতুর্থভক্তক্ষপণং বৈশ্যশূদ্রে বিধীয়তে
ত্রিরাত্রং ন তু ধর্মজ্ঞৈর্বিহিতং ব্রহ্মবাদিভিঃ
109.14
পঞ্চম্যাং চৈব ষষ্ঠ্যাং চ পৌর্ণমাস্যাং চ ভারত
ক্ষমাবান্রূপসংপন্নঃ শ্রুতবাংশ্চৈব জায়তে
109.15
নানপত্যো ভবেত্প্রাজ্ঞো দরিদ্রো বা কদাচন
যজিষ্ণুঃ পঞ্চমীং ষষ্ঠীং ক্ষপেদ্যো ভোজয়েদ্দ্বিজান্
109.16
অষ্টমীমথ কৌন্তেয় শুক্লপক্ষে চতুর্দশীম্
উপোষ্য ব্যাধিরহিতো বীর্যবানভিজায়তে
109.17
মার্গশীর্ষং তু যো মাসমেকভক্তেন সংক্ষিপেৎ
ভোজয়েচ্চ দ্বিজান্ভক্ত্যা স মুচ্যেদ্ব্যাধিকিল্বিষৈঃ
109.18
সর্বকল্যাণসংপূর্ণঃ সর্বৌষধিসমন্বিতঃ
কৃষিভাগী বহুধনো বহুপুত্রশ্চ জায়তে
109.19
পৌষমাসং তু কৌন্তেয় ভক্তেনৈকেন যঃ ক্ষপেৎ
সুভগো দর্শনীয়শ্চ যশোভাগী চ জায়তে
109.20
পিতৃভক্তো মাঘমাসমেকভক্তেন যঃ ক্ষপেৎ
শ্রীমত্কুলে জ্ঞাতিমধ্যে স মহত্ত্বং প্রপদ্যতে
109.21
ভগদৈবং তু যো মাসমেকভক্তেন যঃ ক্ষপেৎ
স্ত্রীষু বল্লভতাং যাতি বশ্যাশ্চাস্য ভবন্তি তাঃ
109.22
চৈত্রং তু নিয়তো মাসমেকভক্তেন যঃ ক্ষপেৎ
সুবর্ণমণিমুক্তাঢ্যে কুলে মহতি জায়তে
109.23
নিস্তরেদেকভক্তেন বৈশাখং যো জিতেন্দ্রিয়ঃ
নরো বা যদি বা নারী জ্ঞাতীনাং শ্রেষ্ঠতাং ব্রজেৎ
109.24
জ্যেষ্ঠামূলং তু যো মাসমেকভক্তেন সংক্ষপেৎ
ঐশ্বর্যমতুলং শ্রেষ্ঠং পুমান্স্ত্রী বাভিজায়তে
109.25
আষাঢমেকভক্তেন স্থিত্বা মাসমতন্দ্রিতঃ
বহুধান্যো বহুধনো বহুপুত্রশ্চ জায়তে
109.26
শ্রাবণং নিয়তো মাসমেকভক্তেন যঃ ক্ষপেৎ
যত্র তত্রাভিষেকেণ যুজ্যতে জ্ঞাতিবর্ধনঃ
109.27
প্রৌষ্ঠপদং তু যো মাসমেকাহারো ভবেন্নরঃ
ধনাঢ্যং স্ফীতমচলমৈশ্বর্যং প্রতিপদ্যতে
109.28
তথৈবাশ্বয়ুজং মাসমেকভক্তেন যঃ ক্ষপেৎ
প্রজাবান্বাহনাঢ্যশ্চ বহুপুত্রশ্চ জায়তে
109.29
কার্ত্তিকং তু নরো মাসং যঃ কুর্যাদেকভোজনম্
শূরশ্চ বহুভার্যশ্চ কীর্তিমাংশ্চৈব জায়তে
109.30
ইতি মাসা নরব্যাঘ্র ক্ষপতাং পরিকীর্তিতাঃ
তিথীনাং নিয়মা যে তু শৃণু তানপি পার্থিব
109.31
পক্ষে পক্ষে গতে যস্তু ভক্তমশ্নাতি ভারত
গবাঢ্যো বহুপুত্রশ্চ দীর্ঘায়ুশ্চ স জায়তে
109.32
মাসি মাসি ত্রিরাত্রাণি কৃত্বা বর্ষাণি দ্বাদশ
গণাধিপত্যং প্রাপ্নোতি নিঃসপত্নমনাবিলম্
109.33
এতে তু নিয়মাঃ সর্বে কর্তব্যাঃ শরদো দশ
দ্বে চান্যে ভরতশ্রেষ্ঠ প্রবৃত্তিমনুবর্ততা
109.34
যস্তু প্রাতস্তথা সায়ং ভুঞ্জানো নান্তরা পিবেৎ
অহিংসানিরতো নিত্যং জুহ্বানো জাতবেদসম্
109.35
ষড্ভিঃ স বর্ষৈর্নৃপতে সিধ্যতে নাত্র সংশয়ঃ
অগ্নিষ্টোমস্য যজ্ঞস্য ফলং প্রাপ্নোতি মানবঃ
109.36
অধিবাসে সোঽপ্সরসাং নৃত্যগীতবিনাদিতে
তপ্তকাঞ্চনবর্ণাভং বিমানমধিরোহতি
109.37
পূর্ণং বর্ষসহস্রং তু ব্রহ্মলোকে মহীয়তে
তত্ক্ষয়াদিহ চাগম্য মাহাত্ম্যং প্রতিপদ্যতে
109.38
যস্তু সংবত্সরং পূর্ণমেকাহারো ভবেন্নরঃ
অতিরাত্রস্য যজ্ঞস্য স ফলং সমুপাশ্নুতে
109.39
দশবর্ষসহস্রাণি স্বর্গে চ স মহীয়তে
তত্ক্ষয়াদিহ চাগম্য মাহাত্ম্যং প্রতিপদ্যতে
109.40
যস্তু সংবত্সরং পূর্ণং চতুর্থং ভক্তমশ্নুতে
অহিংসানিরতো নিত্যং সত্যবাঙ্নিয়তেন্দ্রিয়ঃ
109.41
বাজপেয়স্য যজ্ঞস্য ফলং বৈ সমুপাশ্নুতে
ত্রিংশদ্বর্ষসহস্রাণি স্বর্গে চ স মহীয়তে
109.42
ষষ্ঠে কালে তু কৌন্তেয় নরঃ সংবত্সরং ক্ষপেৎ
অশ্বমেধস্য যজ্ঞস্য ফলং প্রাপ্নোতি মানবঃ
109.43
চক্রবাকপ্রয়ুক্তেন বিমানেন স গচ্ছতি
চত্বারিংশত্সহস্রাণি বর্ষাণাং দিবি মোদতে
109.44
অষ্টমেন তু ভক্তেন জীবন্সংবত্সরং নৃপ
গবাময়স্য যজ্ঞস্য ফলং প্রাপ্নোতি মানবঃ
109.45
হংসসারসয়ুক্তেন বিমানেন স গচ্ছতি
পঞ্চাশতং সহস্রাণি বর্ষাণাং দিবি মোদতে
109.46
পক্ষে পক্ষে গতে রাজন্যোঽশ্নীয়াদ্বর্ষমেব তু
ষণ্মাসানশনং তস্য ভগবানঙ্গিরাব্রবীৎ
ষষ্টিং বর্ষসহস্রাণি দিবমাবসতে চ সঃ
109.47
বীণানাং বল্লকীনাং চ বেণূনাং চ বিশাং পতে
সুঘোষৈর্মধুরৈঃ শব্দৈঃ সুপ্তঃ স প্রতিবোধ্যতে
109.48
সংবত্সরমিহৈকং তু মাসি মাসি পিবেত্পয়ঃ
ফলং বিশ্বজিতস্তাত প্রাপ্নোতি স নরো নৃপ
109.49
সিংহব্যাঘ্রপ্রয়ুক্তেন বিমানেন স গচ্ছতি
সপ্ততিং চ সহস্রাণি বর্ষাণাং দিবি মোদতে
109.50
মাসাদূর্ধ্বং নরব্যাঘ্র নোপবাসো বিধীয়তে
বিধিং ত্বনশনস্যাহুঃ পার্থ ধর্মবিদো জনাঃ
109.51
অনার্তো ব্যাধিরহিতো গচ্ছেদনশনং তু যঃ
পদে পদে যজ্ঞফলং স প্রাপ্নোতি ন সংশয়ঃ
109.52
দিবং হংসপ্রয়ুক্তেন বিমানেন স গচ্ছতি
শতং চাপ্সরসঃ কন্যা রময়ন্ত্যপি তং নরম্
109.53
আর্তো বা ব্যাধিতো বাপি গচ্ছেদনশনং তু যঃ
শতং বর্ষসহস্রাণাং মোদতে দিবি স প্রভো
কাঞ্চীনূপুরশব্দেন সুপ্তশ্চৈব প্রবোধ্যতে
109.54
সহস্রহংসসংয়ুক্তে বিমানে সোমবর্চসি
স গত্বা স্ত্রীশতাকীর্ণে রমতে ভরতর্ষভ
109.55
ক্ষীণস্যাপ্যায়নং দৃষ্টং ক্ষতস্য ক্ষতরোহণম্
ব্যাধিতস্যৌষধগ্রামঃ ক্রুদ্ধস্য চ প্রসাদনম্
109.56
দুঃখিতস্যার্থমানাভ্যাং দ্রব্যাণাং প্রতিপাদনম্
ন চৈতে স্বর্গকামস্য রোচন্তে সুখমেধসঃ
109.57
অতঃ স কামসংয়ুক্তো বিমানে হেমসংনিভে
রমতে স্ত্রীশতাকীর্ণে পুরুষোঽলংকৃতঃ শুভে
109.58
স্বস্থঃ সফলসংকল্পঃ সুখী বিগতকল্মষঃ
অনশ্নন্দেহমুত্সৃজ্য ফলং প্রাপ্নোতি মানবঃ
109.59
বালসূর্যপ্রতীকাশে বিমানে হেমবর্চসি
বৈডূর্যমুক্তাখচিতে বীণামুরজনাদিতে
109.60
পতাকাদীপিকাকীর্ণে দিব্যঘণ্টানিনাদিতে
স্ত্রীসহস্রানুচরিতে স নরঃ সুখমেধতে
109.61
যাবন্তি রোমকূপাণি তস্য গাত্রেষু পাণ্ডব
তাবন্ত্যেব সহস্রাণি বর্ষাণাং দিবি মোদতে
109.62
নাস্তি বেদাত্পরং শাস্ত্রং নাস্তি মাতৃসমো গুরুঃ
ন ধর্মাত্পরমো লাভস্তপো নানশনাত্পরম্
109.63
ব্রাহ্মণেভ্যঃ পরং নাস্তি পাবনং দিবি চেহ চ
উপবাসৈস্তথা তুল্যং তপঃকর্ম ন বিদ্যতে
109.64
উপোষ্য বিধিবদ্দেবাস্ত্রিদিবং প্রতিপেদিরে
ঋষয়শ্চ পরাং সিদ্ধিমুপবাসৈরবাপ্নুবন্
109.65
দিব্যং বর্ষসহস্রং হি বিশ্বামিত্রেণ ধীমতা
ক্ষান্তমেকেন ভক্তেন তেন বিপ্রত্বমাগতঃ
109.66
চ্যবনো জমদগ্নিশ্চ বসিষ্ঠো গৌতমো ভৃগুঃ
সর্ব এব দিবং প্রাপ্তাঃ ক্ষমাবন্তো মহর্ষয়ঃ
109.67
ইদমঙ্গিরসা পূর্বং মহর্ষিভ্যঃ প্রদর্শিতম্
যঃ প্রদর্শয়তে নিত্যং ন স দুঃখমবাপ্নুতে
109.68
ইমং তু কৌন্তেয় যথাক্রমং বিধিং; প্রবর্তিতং হ্যঙ্গিরসা মহর্ষিণা
পঠেত যো বৈ শৃণুয়াচ্চ নিত্যদা; ন বিদ্যতে তস্য নরস্য কিল্বিষম্
109.69
বিমুচ্যতে চাপি স সর্বসংকরৈ;র্ন চাস্য দোষৈরভিভূয়তে মনঃ
বিয়োনিজানাং চ বিজানতে রুতং; ধ্রুবাং চ কীর্তিং লভতে নরোত্তমঃ