Utshovঅধ্যায় 110
110.1
যুধিষ্ঠির উবাচ
পিতামহেন বিধিবদ্যজ্ঞাঃ প্রোক্তা মহাত্মনা
গুণাশ্চৈষাং যথাতত্ত্বং প্রেত্য চেহ চ সর্বশঃ
110.2
ন তে শক্যা দরিদ্রেণ যজ্ঞাঃ প্রাপ্তুং পিতামহ
বহূপকরণা যজ্ঞা নানাসংভারবিস্তরাঃ
110.3
পার্থিবৈ রাজপুত্রৈর্বা শক্যাঃ প্রাপ্তুং পিতামহ
নার্থন্যূনৈরবগুণৈরেকাত্মভিরসংহতৈঃ
110.4
যো দরিদ্রৈরপি বিধিঃ শক্যঃ প্রাপ্তুং সদা ভবেৎ
তুল্যো যজ্ঞফলৈরেতৈস্তন্মে ব্রূহি পিতামহ
110.5
ভীষ্ম উবাচ
ইদমঙ্গিরসা প্রোক্তমুপবাসফলাত্মকম্
বিধিং যজ্ঞফলৈস্তুল্যং তন্নিবোধ যুধিষ্ঠির
110.6
যস্তু কল্যং তথা সায়ং ভুঞ্জানো নান্তরা পিবেৎ
অহিংসানিরতো নিত্যং জুহ্বানো জাতবেদসম্
110.7
ষড্ভিরেব তু বর্ষৈঃ স সিধ্যতে নাত্র সংশয়ঃ
তপ্তকাঞ্চনবর্ণং চ বিমানং লভতে নরঃ
110.8
দেবস্ত্রীণামধীবাসে নৃত্যগীতনিনাদিতে
প্রাজাপত্যে বসেত্পদ্মং বর্ষাণামগ্নিসংনিভে
110.9
ত্রীণি বর্ষাণি যঃ প্রাশেত্সততং ত্বেকভোজনম্
ধর্মপত্নীরতো নিত্যমগ্নিষ্টোমফলং লভেৎ
110.10
দ্বিতীয়ে দিবসে যস্তু প্রাশ্নীয়াদেকভোজনম্
সদা দ্বাদশমাসাংস্তু জুহ্বানো জাতবেদসম্
যজ্ঞং বহুসুবর্ণং বা বাসবপ্রিয়মাহরেৎ
110.11
সত্যবাগ্দানশীলশ্চ ব্রহ্মণ্যশ্চানসূয়কঃ
ক্ষান্তো দান্তো জিতক্রোধঃ স গচ্ছতি পরাং গতিম্
110.12
পাণ্ডুরাভ্রপ্রতীকাশে বিমানে হংসলক্ষণে
দ্বে সমাপ্তে ততঃ পদ্মে সোঽপ্সরোভির্বসেত্সহ
110.13
তৃতীয়ে দিবসে যস্তু প্রাশ্নীয়াদেকভোজনম্
সদা দ্বাদশমাসাংস্তু জুহ্বানো জাতবেদসম্
110.14
অতিরাত্রস্য যজ্ঞস্য ফলং প্রাপ্নোত্যনুত্তমম্
ময়ূরহংসসংয়ুক্তং বিমানং লভতে নরঃ
110.15
সপ্তর্ষীণাং সদা লোকে সোঽপ্সরোভির্বসেত্সহ
নিবর্তনং চ তত্রাস্য ত্রীণি পদ্মানি বৈ বিদুঃ
110.16
দিবসে যশ্চতুর্থে তু প্রাশ্নীয়াদেকভোজনম্
সদা দ্বাদশমাসান্বৈ জুহ্বানো জাতবেদসম্
110.17
বাজপেয়স্য যজ্ঞস্য ফলং প্রাপ্নোত্যনুত্তমম্
ইন্দ্রকন্যাভিরূঢং চ বিমানং লভতে নরঃ
110.18
সাগরস্য চ পর্যন্তে বাসবং লোকমাবসেৎ
দেবরাজস্য চ ক্রীডাং নিত্যকালমবেক্ষতে
110.19
দিবসে পঞ্চমে যস্তু প্রাশ্নীয়াদেকভোজনম্
সদা দ্বাদশমাসাংস্তু জুহ্বানো জাতবেদসম্
110.20
অলুব্ধঃ সত্যবাদী চ ব্রহ্মণ্যশ্চাবিহিংসকঃ
অনসূয়ুরপাপস্থো দ্বাদশাহফলং লভেৎ
110.21
জাম্বূনদময়ং দিব্যং বিমানং হংসলক্ষণম্
সূর্যমালাসমাভাসমারোহেত্পাণ্ডুরং গৃহম্
110.22
আবর্তনানি চত্বারি তথা পদ্মানি দ্বাদশ
শরাগ্নিপরিমাণং চ তত্রাসৌ বসতে সুখম্
110.23
দিবসে যস্তু ষষ্ঠে বৈ মুনিঃ প্রাশেত ভোজনম্
সদা দ্বাদশমাসান্বৈ জুহ্বানো জাতবেদসম্
110.24
সদা ত্রিষবণস্নায়ী ব্রহ্মচার্যনসূয়কঃ
গবাময়স্য যজ্ঞস্য ফলং প্রাপ্নোত্যনুত্তমম্
110.25
অগ্নিজ্বালাসমাভাসং হংসবর্হিণসেবিতম্
শাতকুম্ভময়ং যুক্তং সাধয়েদ্যানমুত্তমম্
110.26
তথৈবাপ্সরসামঙ্কে প্রসুপ্তঃ প্রতিবুধ্যতে
নূপুরাণাং নিনাদেন মেখলানাং চ নিস্বনৈঃ
110.27
কোটীসহস্রং বর্ষাণাং ত্রীণি কোটিশতানি চ
পদ্মান্যষ্টাদশ তথা পতাকে দ্বে তথৈব চ
110.28
অয়ুতানি চ পঞ্চাশদৃক্ষচর্মশতস্য চ
লোম্নাং প্রমাণেন সমং ব্রহ্মলোকে মহীয়তে
110.29
দিবসে সপ্তমে যস্তু প্রাশ্নীয়াদেকভোজনম্
সদা দ্বাদশমাসান্বৈ জুহ্বানো জাতবেদসম্
110.30
সরস্বতীং গোপয়ানো ব্রহ্মচর্যং সমাচরন্
সুমনোবর্ণকং চৈব মধুমাংসং চ বর্জয়েৎ
110.31
পুরুষো মরুতাং লোকমিন্দ্রলোকং চ গচ্ছতি
তত্র তত্র চ সিদ্ধার্থো দেবকন্যাভিরুহ্যতে
110.32
ফলং বহুসুবর্ণস্য যজ্ঞস্য লভতে নরঃ
সংখ্যামতিগুণাং চাপি তেষু লোকেষু মোদতে
110.33
যস্তু সংবত্সরং ক্ষান্তো ভুঙ্ক্তেঽহন্যষ্টমে নরঃ
দেবকার্যপরো নিত্যং জুহ্বানো জাতবেদসম্
110.34
পৌণ্ডরীকস্য যজ্ঞস্য ফলং প্রাপ্নোত্যনুত্তমম্
পদ্মবর্ণনিভং চৈব বিমানমধিরোহতি
110.35
কৃষ্ণাঃ কনকগৌর্যশ্চ নার্যঃ শ্যামাস্তথাপরাঃ
বয়োরূপবিলাসিন্যো লভতে নাত্র সংশয়ঃ
110.36
যস্তু সংবত্সরং ভুঙ্ক্তে নবমে নবমেঽহনি
সদা দ্বাদশমাসান্বৈ জুহ্বানো জাতবেদসম্
110.37
অশ্বমেধস্য যজ্ঞস্য ফলং প্রাপ্নোতি মানবঃ
পুণ্ডরীকপ্রকাশং চ বিমানং লভতে নরঃ
110.38
দীপ্তসূর্যাগ্নিতেজোভির্দিব্যমালাভিরেব চ
নীয়তে রুদ্রকন্যাভিঃ সোঽন্তরিক্ষং সনাতনম্
110.39
অষ্টাদশসহস্রাণি বর্ষাণাং কল্পমেব চ
কোটীশতসহস্রং চ তেষু লোকেষু মোদতে
110.40
যস্তু সংবত্সরং ভুঙ্ক্তে দশাহে বৈ গতে গতে
সদা দ্বাদশমাসান্বৈ জুহ্বানো জাতবেদসম্
110.41
ব্রহ্মকন্যানিবেশে চ সর্বভূতমনোহরে
অশ্বমেধসহস্রস্য ফলং প্রাপ্নোত্যনুত্তমম্
110.42
রূপবত্যশ্চ তং কন্যা রময়ন্তি সদা নরম্
নীলোত্পলনিভৈর্বর্ণৈ রক্তোত্পলনিভৈস্তথা
110.43
বিমানং মণ্ডলাবর্তমাবর্তগহনাবৃতম্
সাগরোর্মিপ্রতীকাশং সাধয়েদ্যানমুত্তমম্
110.44
বিচিত্রমণিমালাভির্নাদিতং শঙ্খপুষ্করৈঃ
স্ফাটিকৈর্বজ্রসারৈশ্চ স্তম্ভৈঃ সুকৃতবেদিকম্
আরোহতি মহদ্যানং হংসসারসবাহনম্
110.45
একাদশে তু দিবসে যঃ প্রাপ্তে প্রাশতে হবিঃ
সদা দ্বাদশমাসান্বৈ জুহ্বানো জাতবেদসম্
110.46
পরস্ত্রিয়ো নাভিলষেদ্বাচাথ মনসাপি বা
অনৃতং চ ন ভাষেত মাতাপিত্রোঃ কৃতেঽপি বা
110.47
অভিগচ্ছেন্মহাদেবং বিমানস্থং মহাবলম্
স্বয়ংভুবং চ পশ্যেত বিমানং সমুপস্থিতম্
110.48
কুমার্যঃ কাঞ্চনাভাসা রূপবত্যো নয়ন্তি তম্
রুদ্রাণাং তমধীবাসং দিবি দিব্যং মনোহরম্
110.49
বর্ষাণ্যপরিমেয়ানি যুগান্তমপি চাবসেৎ
কোটীশতসহস্রং চ দশ কোটিশতানি চ
110.50
রুদ্রং নিত্যং প্রণমতে দেবদানবসংমতম্
স তস্মৈ দর্শনং প্রাপ্তো দিবসে দিবসে ভবেৎ
110.51
দিবসে দ্বাদশে যস্তু প্রাপ্তে বৈ প্রাশতে হবিঃ
সদা দ্বাদশমাসান্বৈ সর্বমেধফলং লভেৎ
110.52
আদিত্যৈর্দ্বাদশৈস্তস্য বিমানং সংবিধীয়তে
মণিমুক্তাপ্রবালৈশ্চ মহার্হৈরুপশোভিতম্
110.53
হংসমালাপরিক্ষিপ্তং নাগবীথীসমাকুলম্
ময়ূরৈশ্চক্রবাকৈশ্চ কূজদ্ভিরুপশোভিতম্
110.54
অট্টৈর্মহদ্ভিঃ সংয়ুক্তং ব্রহ্মলোকে প্রতিষ্ঠিতম্
নিত্যমাবসতে রাজন্নরনারীসমাবৃতম্
ঋষিরেবং মহাভাগস্ত্বঙ্গিরাঃ প্রাহ ধর্মবিৎ
110.55
ত্রয়োদশে তু দিবসে যঃ প্রাপ্তে প্রাশতে হবিঃ
সদা দ্বাদশ মাসান্বৈ দেবসত্রফলং লভেৎ
110.56
রক্তপদ্মোদয়ং নাম বিমানং সাধয়েন্নরঃ
জাতরূপপ্রয়ুক্তং চ রত্নসংচয়ভূষিতম্
110.57
দেবকন্যাভিরাকীর্ণং দিব্যাভরণভূষিতম্
পুণ্যগন্ধোদয়ং দিব্যং বায়ব্যৈরুপশোভিতম্
110.58
তত্র শঙ্কুপতাকং চ যুগান্তং কল্পমেব চ
অয়ুতায়ুতং তথা পদ্মং সমুদ্রং চ তথা বসেৎ
110.59
গীতগন্ধর্বঘোষৈশ্চ ভেরীপণবনিস্বনৈঃ
সদা প্রমুদিতস্তাভির্দেবকন্যাভিরীড্যতে
110.60
চতুর্দশে তু দিবসে যঃ পূর্ণে প্রাশতে হবিঃ
সদা দ্বাদশ মাসান্বৈ মহামেধফলং লভেৎ
110.61
অনির্দেশ্যবয়োরূপা দেবকন্যাঃ স্বলংকৃতাঃ
মৃষ্টতপ্তাঙ্গদধরা বিমানৈরনুয়ান্তি তম্
110.62
কলহংসবিনির্ঘোষৈর্নূপুরাণাং চ নিস্বনৈঃ
কাঞ্চীনাং চ সমুত্কর্ষৈস্তত্র তত্র বিবোধ্যতে
110.63
দেবকন্যানিবাসে চ তস্মিন্বসতি মানবঃ
জাহ্নবীবালুকাকীর্ণে পূর্ণং সংবত্সরং নরঃ
110.64
যস্তু পক্ষে গতে ভুঙ্ক্তে একভক্তং জিতেন্দ্রিয়ঃ
সদা দ্বাদশ মাসাংস্তু জুহ্বানো জাতবেদসম্
রাজসূয়সহস্রস্য ফলং প্রাপ্নোত্যনুত্তমম্
110.65
যানমারোহতে নিত্যং হংসবর্হিণসেবিতম্
মণিমণ্ডলকৈশ্চিত্রং জাতরূপসমাবৃতম্
110.66
দিব্যাভরণশোভাভির্বরস্ত্রীভিরলংকৃতম্
একস্তম্ভং চতুর্দ্বারং সপ্তভৌমং সুমঙ্গলম্
বৈজয়ন্তীসহস্রৈশ্চ শোভিতং গীতনিস্বনৈঃ
110.67
দিব্যং দিব্যগুণোপেতং বিমানমধিরোহতি
মণিমুক্তাপ্রবালৈশ্চ ভূষিতং বৈদ্যুতপ্রভম্
বসেদ্যুগসহস্রং চ খড্গকুঞ্জরবাহনঃ
110.68
ষোডশে দিবসে যস্তু সংপ্রাপ্তে প্রাশতে হবিঃ
সদা দ্বাদশ মাসান্বৈ সোময়জ্ঞফলং লভেৎ
110.69
সোমকন্যানিবাসেষু সোঽধ্যাবসতি নিত্যদা
সৌম্যগন্ধানুলিপ্তশ্চ কামচারগতির্ভবেৎ
110.70
সুদর্শনাভির্নারীভির্মধুরাভিস্তথৈব চ
অর্চ্যতে বৈ বিমানস্থঃ কামভোগৈশ্চ সেব্যতে
110.71
ফলং পদ্মশতপ্রখ্যং মহাকল্পং দশাধিকম্
আবর্তনানি চত্বারি সাগরে যাত্যসৌ নরঃ
110.72
দিবসে সপ্তদশমে যঃ প্রাপ্তে প্রাশতে হবিঃ
সদা দ্বাদশ মাসান্বৈ জুহ্বানো জাতবেদসম্
110.73
স্থানং বারুণমৈন্দ্রং চ রৌদ্রং চৈবাধিগচ্ছতি
মারুতৌশনসে চৈব ব্রহ্মলোকং চ গচ্ছতি
110.74
তত্র দৈবতকন্যাভিরাসনেনোপচর্যতে
ভূর্ভুবং চাপি দেবর্ষিং বিশ্বরূপমবেক্ষতে
110.75
তত্র দেবাধিদেবস্য কুমার্যো রময়ন্তি তম্
দ্বাত্রিংশদ্রূপধারিণ্যো মধুরাঃ সমলংকৃতাঃ
110.76
চন্দ্রাদিত্যাবুভৌ যাবদ্গগনে চরতঃ প্রভো
তাবচ্চরত্যসৌ বীরঃ সুধামৃতরসাশনঃ
110.77
অষ্টাদশে তু দিবসে প্রাশ্নীয়াদেকভোজনম্
সদা দ্বাদশ মাসান্বৈ সপ্ত লোকান্স পশ্যতি
110.78
রথৈঃ সনন্দিঘোষৈশ্চ পৃষ্ঠতঃ সোঽনুগম্যতে
দেবকন্যাধিরূঢৈস্তু ভ্রাজমানৈঃ স্বলংকৃতৈঃ
110.79
ব্যাঘ্রসিংহপ্রয়ুক্তং চ মেঘস্বননিনাদিতম্
বিমানমুত্তমং দিব্যং সুসুখী হ্যধিরোহতি
110.80
তত্র কল্পসহস্রং স কান্তাভিঃ সহ মোদতে
সুধারসং চ ভুঞ্জীত অমৃতোপমমুত্তমম্
110.81
একোনবিংশে দিবসে যো ভুঙ্ক্তে একভোজনম্
সদা দ্বাদশ মাসান্বৈ সপ্ত লোকান্স পশ্যতি
110.82
উত্তমং লভতে স্থানমপ্সরোগণসেবিতম্
গন্ধর্বৈরুপগীতং চ বিমানং সূর্যবর্চসম্
110.83
তত্রামরবরস্ত্রীভির্মোদতে বিগতজ্বরঃ
দিব্যাম্বরধরঃ শ্রীমানয়ুতানাং শতং সমাঃ
110.84
পূর্ণেঽথ দিবসে বিংশে যো ভুঙ্ক্তে হ্যেকভোজনম্
সদা দ্বাদশ মাসাংস্তু সত্যবাদী ধৃতব্রতঃ
110.85
অমাংসাশী ব্রহ্মচারী সর্বভূতহিতে রতঃ
স লোকান্বিপুলান্দিব্যানাদিত্যানামুপাশ্নুতে
110.86
গন্ধর্বৈরপ্সরোভিশ্চ দিব্যমাল্যানুলেপনৈঃ
বিমানৈঃ কাঞ্চনৈর্দিব্যৈঃ পৃষ্ঠতশ্চানুগম্যতে
110.87
একবিংশে তু দিবসে যো ভুঙ্ক্তে হ্যেকভোজনম্
সদা দ্বাদশ মাসান্বৈ জুহ্বানো জাতবেদসম্
110.88
লোকমৌশনসং দিব্যং শক্রলোকং চ গচ্ছতি
অশ্বিনোর্মরুতাং চৈব সুখেষ্বভিরতঃ সদা
110.89
অনভিজ্ঞশ্চ দুঃখানাং বিমানবরমাস্থিতঃ
সেব্যমানো বরস্ত্রীভিঃ ক্রীডত্যমরবত্প্রভুঃ
110.90
দ্বাবিংশে দিবসে প্রাপ্তে যো ভুঙ্ক্তে হ্যেকভোজনম্
সদা দ্বাদশ মাসান্বৈ জুহ্বানো জাতবেদসম্
110.91
ধৃতিমানহিংসানিরতঃ সত্যবাগনসূয়কঃ
লোকান্বসূনামাপ্নোতি দিবাকরসমপ্রভঃ
110.92
কামচারী সুধাহারো বিমানবরমাস্থিতঃ
রমতে দেবকন্যাভির্দিব্যাভরণভূষিতঃ
110.93
ত্রয়োবিংশে তু দিবসে প্রাশেদ্যস্ত্বেকভোজনম্
সদা দ্বাদশ মাসাংস্তু মিতাহারো জিতেন্দ্রিয়ঃ
110.94
বায়োরুশনসশ্চৈব রুদ্রলোকং চ গচ্ছতি
কামচারী কামগমঃ পূজ্যমানোঽপ্সরোগণৈঃ
110.95
অনেকগুণপর্যন্তং বিমানবরমাস্থিতঃ
রমতে দেবকন্যাভির্দিব্যাভরণভূষিতঃ
110.96
চতুর্বিংশে তু দিবসে যঃ প্রাশেদেকভোজনম্
সদা দ্বাদশ মাসান্বৈ জুহ্বানো জাতবেদসম্
110.97
আদিত্যানামধীবাসে মোদমানো বসেচ্চিরম্
দিব্যমাল্যাম্বরধরো দিব্যগন্ধানুলেপনঃ
110.98
বিমানে কাঞ্চনে দিব্যে হংসয়ুক্তে মনোরমে
রমতে দেবকন্যানাং সহস্রৈরয়ুতৈস্তথা
110.99
পঞ্চবিংশে তু দিবসে যঃ প্রাশেদেকভোজনম্
সদা দ্বাদশ মাসাংস্তু পুষ্কলং যানমারুহেৎ
110.100
সিংহব্যাঘ্রপ্রয়ুক্তৈশ্চ মেঘস্বননিনাদিতৈঃ
রথৈঃ সনন্দিঘোষৈশ্চ পৃষ্ঠতঃ সোঽনুগম্যতে
110.101
দেবকন্যাসমারূঢৈ রাজতৈর্বিমলৈঃ শুভৈঃ
বিমানমুত্তমং দিব্যমাস্থায় সুমনোহরম্
110.102
তত্র কল্পসহস্রং বৈ বসতে স্ত্রীশতাবৃতে
সুধারসং চোপজীবন্নমৃতোপমমুত্তমম্
110.103
ষড্বিংশে দিবসে যস্তু প্রাশ্নীয়াদেকভোজনম্
সদা দ্বাদশ মাসাংস্তু নিয়তো নিয়তাশনঃ
110.104
জিতেন্দ্রিয়ো বীতরাগো জুহ্বানো জাতবেদসম্
স প্রাপ্নোতি মহাভাগঃ পূজ্যমানোঽপ্সরোগণৈঃ
110.105
সপ্তানাং মরুতাং লোকান্বসূনাং চাপি সোঽশ্নুতে
বিমানে স্ফাটিকে দিব্যে সর্বরত্নৈরলংকৃতে
110.106
গন্ধর্বৈরপ্সরোভিশ্চ পূজ্যমানঃ প্রমোদতে
দ্বে যুগানাং সহস্রে তু দিব্যে দিব্যেন তেজসা
110.107
সপ্তবিংশে তু দিবসে যঃ প্রাশেদেকভোজনম্
সদা দ্বাদশ মাসাংস্তু জুহ্বানো জাতবেদসম্
110.108
ফলং প্রাপ্নোতি বিপুলং দেবলোকে চ পূজ্যতে
অমৃতাশী বসংস্তত্র স বিতৃপ্তঃ প্রমোদতে
110.109
দেবর্ষিচরিতং রাজন্রাজর্ষিভিরধিষ্ঠিতম্
অধ্যাবসতি দিব্যাত্মা বিমানবরমাস্থিতঃ
110.110
স্ত্রীভির্মনোভিরামাভী রমমাণো মদোত্কটঃ
যুগকল্পসহস্রাণি ত্রীণ্যাবসতি বৈ সুখম্
110.111
যোঽষ্টাবিংশে তু দিবসে প্রাশ্নীয়াদেকভোজনম্
সদা দ্বাদশ মাসাংস্তু জিতাত্মা বিজিতেন্দ্রিয়ঃ
110.112
ফলং দেবর্ষিচরিতং বিপুলং সমুপাশ্নুতে
ভোগবাংস্তেজসা ভাতি সহস্রাংশুরিবামলঃ
110.113
সুকুমার্যশ্চ নার্যস্তং রমমাণাঃ সুবর্চসঃ
পীনস্তনোরুজঘনা দিব্যাভরণভূষিতাঃ
110.114
রময়ন্তি মনঃ কান্তা বিমানে সূর্যসংনিভে
সর্বকামগমে দিব্যে কল্পায়ুতশতং সমাঃ
110.115
একোনত্রিংশে দিবসে যঃ প্রাশেদেকভোজনম্
সদা দ্বাদশ মাসান্বৈ সত্যব্রতপরায়ণঃ
110.116
তস্য লোকাঃ শুভা দিব্যা দেবরাজর্ষিপূজিতাঃ
বিমানং চন্দ্রশুভ্রাভং দিব্যং সমধিগচ্ছতি
110.117
জাতরূপময়ং যুক্তং সর্বরত্নবিভূষিতম্
অপ্সরোগণসংপূর্ণং গন্ধর্বৈরভিনাদিতম্
110.118
তত্র চৈনং শুভা নার্যো দিব্যাভরণভূষিতাঃ
মনোভিরামা মধুরা রময়ন্তি মদোত্কটাঃ
110.119
ভোগবাংস্তেজসা যুক্তো বৈশ্বানরসমপ্রভঃ
দিব্যো দিব্যেন বপুষা ভ্রাজমান ইবামরঃ
110.120
বসূনাং মরুতাং চৈব সাধ্যানামশ্বিনোস্তথা
রুদ্রাণাং চ তথা লোকান্ব্রহ্মলোকং চ গচ্ছতি
110.121
যস্তু মাসে গতে ভুঙ্ক্তে একভক্তং শমাত্মকঃ
সদা দ্বাদশ মাসান্বৈ ব্রহ্মলোকমবাপ্নুয়াৎ
110.122
সুধারসকৃতাহারঃ শ্রীমান্সর্বমনোহরঃ
তেজসা বপুষা লক্ষ্ম্যা ভ্রাজতে রশ্মিবানিব
110.123
দিব্যমাল্যাম্বরধরো দিব্যগন্ধানুলেপনঃ
সুখেষ্বভিরতো যোগী দুঃখানামবিজানকঃ
110.124
স্বয়ংপ্রভাভির্নারীভির্বিমানস্থো মহীয়তে
রুদ্রদেবর্ষিকন্যাভিঃ সততং চাভিপূজ্যতে
110.125
নানাবিধসুরূপাভির্নানারাগাভিরেব চ
নানামধুরভাষাভির্নানারতিভিরেব চ
110.126
বিমানে নগরাকারে সূর্যবত্সূর্যসংনিভে
পৃষ্ঠতঃ সোমসংকাশে উদক্চৈবাভ্রসংনিভে
110.127
দক্ষিণায়াং তু রক্তাভে অধস্তান্নীলমণ্ডলে
ঊর্ধ্বং চিত্রাভিসংকাশে নৈকো বসতি পূজিতঃ
110.128
যাবদ্বর্ষসহস্রং তু জম্বূদ্বীপে প্রবর্ষতি
তাবত্সংবত্সরাঃ প্রোক্তা ব্রহ্মলোকস্য ধীমতঃ
110.129
বিপ্রুষশ্চৈব যাবন্ত্যো নিপতন্তি নভস্তলাৎ
বর্ষাসু বর্ষতস্তাবন্নিবসত্যমরপ্রভঃ
110.130
মাসোপবাসী বর্ষৈস্তু দশভিঃ স্বর্গমুত্তমম্
মহর্ষিত্বমথাসাদ্য সশরীরগতির্ভবেৎ
110.131
মুনির্দান্তো জিতক্রোধো জিতশিশ্নোদরঃ সদা
জুহ্বন্নগ্নীংশ্চ নিয়তঃ সংধ্যোপাসনসেবিতা
110.132
বহুভির্নিয়মৈরেবং মাসানশ্নাতি যো নরঃ
অভ্রাবকাশশীলশ্চ তস্য বাসো নিরুচ্যতে
110.133
দিবং গত্বা শরীরেণ স্বেন রাজন্যথামরঃ
স্বর্গং পুণ্যং যথাকামমুপভুঙ্ক্তে যথাবিধি
110.134
এষ তে ভরতশ্রেষ্ঠ যজ্ঞানাং বিধিরুত্তমঃ
ব্যাখ্যাতো হ্যানুপূর্ব্যেণ উপবাসফলাত্মকঃ
110.135
দরিদ্রৈর্মনুজৈঃ পার্থ প্রাপ্যং যজ্ঞফলং যথা
উপবাসমিমং কৃত্বা গচ্ছেচ্চ পরমাং গতিম্
দেবদ্বিজাতিপূজায়াং রতো ভরতসত্তম
110.136
উপবাসবিধিস্ত্বেষ বিস্তরেণ প্রকীর্তিতঃ
নিয়তেষ্বপ্রমত্তেষু শৌচবত্সু মহাত্মসু
110.137
দম্ভদ্রোহনিবৃত্তেষু কৃতবুদ্ধিষু ভারত
অচলেষ্বপ্রকম্পেষু মা তে ভূদত্র সংশয়ঃ