Utshovঅধ্যায় 111
111.1
যুধিষ্ঠির উবাচ
যদ্বরং সর্বতীর্থানাং তদ্ব্রবীহি পিতামহ
যত্র বৈ পরমং শৌচং তন্মে ব্যাখ্যাতুমর্হসি
111.2
ভীষ্ম উবাচ
সর্বাণি খলু তীর্থানি গুণবন্তি মনীষিণাম্
যত্তু তীর্থং চ শৌচং চ তন্মে শৃণু সমাহিতঃ
111.3
অগাধে বিমলে শুদ্ধে সত্যতোয়ে ধৃতিহ্রদে
স্নাতব্যং মানসে তীর্থে সত্ত্বমালম্ব্য শাশ্বতম্
111.4
তীর্থশৌচমনর্থিত্বমার্দবং সত্যমার্জবম্
অহিংসা সর্বভূতানামানৃশংস্যং দমঃ শমঃ
111.5
নির্মমা নিরহংকারা নির্দ্বংদ্বা নিষ্পরিগ্রহাঃ
শুচয়স্তীর্থভূতাস্তে যে ভৈক্ষমুপভুঞ্জতে
111.6
তত্ত্ববিত্ত্বনহংবুদ্ধিস্তীর্থং পরমমুচ্যতে
শৌচলক্ষণমেতত্তে সর্বত্রৈবান্ববেক্ষণম্
111.7
রজস্তমঃ সত্ত্বমথো যেষাং নির্ধৌতমাত্মনঃ
শৌচাশৌচে ন তে সক্তাঃ স্বকার্যপরিমার্গিণঃ
111.8
সর্বত্যাগেষ্বভিরতাঃ সর্বজ্ঞাঃ সর্বদর্শিনঃ
শৌচেন বৃত্তশৌচার্থাস্তে তীর্থাঃ শুচয়শ্চ তে
111.9
নোদকক্লিন্নগাত্রস্তু স্নাত ইত্যভিধীয়তে
স স্নাতো যো দমস্নাতঃ সবাহ্যাভ্যন্তরঃ শুচিঃ
111.10
অতীতেষ্বনপেক্ষা যে প্রাপ্তেষ্বর্থেষু নির্মমাঃ
শৌচমেব পরং তেষাং যেষাং নোত্পদ্যতে স্পৃহা
111.11
প্রজ্ঞানং শৌচমেবেহ শরীরস্য বিশেষতঃ
তথা নিষ্কিংচনত্বং চ মনসশ্চ প্রসন্নতা
111.12
বৃত্তশৌচং মনঃশৌচং তীর্থশৌচং পরং হিতম্
জ্ঞানোত্পন্নং চ যচ্ছৌচং তচ্ছৌচং পরমং মতম্
111.13
মনসাথ প্রদীপেন ব্রহ্মজ্ঞানবলেন চ
স্নাতা যে মানসে তীর্থে তজ্জ্ঞাঃ ক্ষেত্রজ্ঞদর্শিনঃ
111.14
সমারোপিতশৌচস্তু নিত্যং ভাবসমন্বিতঃ
কেবলং গুণসংপন্নঃ শুচিরেব নরঃ সদা
111.15
শরীরস্থানি তীর্থানি প্রোক্তান্যেতানি ভারত
পৃথিব্যাং যানি তীর্থানি পুণ্যানি শৃণু তান্যপি
111.16
যথা শরীরস্যোদ্দেশাঃ শুচয়ঃ পরিনির্মিতাঃ
তথা পৃথিব্যা ভাগাশ্চ পুণ্যানি সলিলানি চ
111.17
প্রার্থনাচ্চৈব তীর্থস্য স্নানাচ্চ পিতৃতর্পণাৎ
ধুনন্তি পাপং তীর্থেষু পূতা যান্তি দিবং সুখম্
111.18
পরিগ্রহাচ্চ সাধূনাং পৃথিব্যাশ্চৈব তেজসা
অতীব পুণ্যাস্তে ভাগাঃ সলিলস্য চ তেজসা
111.19
মনসশ্চ পৃথিব্যাশ্চ পুণ্যতীর্থাস্তথাপরে
উভয়োরেব যঃ স্নাতঃ স সিদ্ধিং শীঘ্রমাপ্নুয়াৎ
111.20
যথা বলং ক্রিয়াহীনং ক্রিয়া বা বলবর্জিতা
নেহ সাধয়তে কার্যং সমায়ুক্তস্তু সিধ্যতি
111.21
এবং শরীরশৌচেন তীর্থশৌচেন চান্বিতঃ
ততঃ সিদ্ধিমবাপ্নোতি দ্বিবিধং শৌচমুত্তমম্