Utshovঅধ্যায় 112
112.1
যুধিষ্ঠির উবাচ
পিতামহ মহাবাহো সর্বশাস্ত্রবিশারদ
শ্রোতুমিচ্ছামি মর্ত্যানাং সংসারবিধিমুত্তমম্
112.2
কেন বৃত্তেন রাজেন্দ্র বর্তমানা নরা যুধি
প্রাপ্নুবন্ত্যুত্তমং স্বর্গং কথং চ নরকং নৃপ
112.3
মৃতং শরীরমুত্সৃজ্য কাষ্ঠলোষ্টসমং জনাঃ
প্রয়ান্ত্যমুং লোকমিতঃ কো বৈ তাননুগচ্ছতি
112.4
ভীষ্ম উবাচ
অসাবায়াতি ভগবান্বৃহস্পতিরুদারধীঃ
পৃচ্ছৈনং সুমহাভাগমেতদ্গুহ্যং সনাতনম্
112.5
নৈতদন্যেন শক্যং হি বক্তুং কেনচিদদ্য বৈ
বক্তা বৃহস্পতিসমো ন হ্যন্যো বিদ্যতে ক্বচিৎ
112.6
বৈশংপায়ন উবাচ
তয়োঃ সংবদতোরেবং পার্থগাঙ্গেয়য়োস্তদা
আজগাম বিশুদ্ধাত্মা ভগবান্স বৃহস্পতিঃ
112.7
ততো রাজা সমুত্থায় ধৃতরাষ্ট্রপুরোগমঃ
পূজামনুপমাং চক্রে সর্বে তে চ সভাসদঃ
112.8
ততো ধর্মসুতো রাজা ভগবন্তং বৃহস্পতিম্
উপগম্য যথান্যায়ং প্রশ্নং পপ্রচ্ছ সুব্রতঃ
112.9
যুধিষ্ঠির উবাচ
ভগবন্সর্বধর্মজ্ঞ সর্বশাস্ত্রবিশারদ
মর্ত্যস্য কঃ সহায়ো বৈ পিতা মাতা সুতো গুরুঃ
112.10
মৃতং শরীরমুত্সৃজ্য কাষ্ঠলোষ্টসমং জনাঃ
গচ্ছন্ত্যমুত্রলোকং বৈ ক এনমনুগচ্ছতি
112.11
বৃহস্পতিরুবাচ
একঃ প্রসূতো রাজেন্দ্র জন্তুরেকো বিনশ্যতি
একস্তরতি দুর্গাণি গচ্ছত্যেকশ্চ দুর্গতিম্
112.12
অসহায়ঃ পিতা মাতা তথা ভ্রাতা সুতো গুরুঃ
জ্ঞাতিসংবন্ধিবর্গশ্চ মিত্রবর্গস্তথৈব চ
112.13
মৃতং শরীরমুত্সৃজ্য কাষ্ঠলোষ্টসমং জনাঃ
মুহূর্তমুপতিষ্ঠন্তি ততো যান্তি পরাঙ্মুখাঃ
তৈস্তচ্ছরীরমুত্সৃষ্টং ধর্ম একোঽনুগচ্ছতি
112.14
তস্মাদ্ধর্মঃ সহায়ার্থে সেবিতব্যঃ সদা নৃভিঃ
প্রাণী ধর্মসমায়ুক্তো গচ্ছতে স্বর্গতিং পরাম্
তথৈবাধর্মসংয়ুক্তো নরকায়োপপদ্যতে
112.15
তস্মান্ন্যায়াগতৈরর্থৈর্ধর্মং সেবেত পণ্ডিতঃ
ধর্ম একো মনুষ্যাণাং সহায়ঃ পারলৌকিকঃ
112.16
লোভান্মোহাদনুক্রোশাদ্ভয়াদ্বাপ্যবহুশ্রুতঃ
নরঃ করোত্যকার্যাণি পরার্থে লোভমোহিতঃ
112.17
ধর্মশ্চার্থশ্চ কামশ্চ ত্রিতয়ং জীবিতে ফলম্
এতত্ত্রয়মবাপ্তব্যমধর্মপরিবর্জিতম্
112.18
যুধিষ্ঠির উবাচ
শ্রুতং ভগবতো বাক্যং ধর্ময়ুক্তং পরং হিতম্
শরীরবিচয়ং জ্ঞাতুং বুদ্ধিস্তু মম জায়তে
112.19
মৃতং শরীররহিতং সূক্ষ্মমব্যক্ততাং গতম্
অচক্ষুর্বিষয়ং প্রাপ্তং কথং ধর্মোঽনুগচ্ছতি
112.20
বৃহস্পতিরুবাচ
পৃথিবী বায়ুরাকাশমাপো জ্যোতিশ্চ পঞ্চমম্
বুদ্ধিরাত্মা চ সহিতা ধর্মং পশ্যন্তি নিত্যদা
112.21
প্রাণিনামিহ সর্বেষাং সাক্ষিভূতানি চানিশম্
এতৈশ্চ স হ ধর্মোঽপি তং জীবমনুগচ্ছতি
112.22
ত্বগস্থিমাংসং শুক্রং চ শোণিতং চ মহামতে
শরীরং বর্জয়ন্ত্যেতে জীবিতেন বিবর্জিতম্
112.23
ততো ধর্মসমায়ুক্তঃ স জীবঃ সুখমেধতে
ইহ লোকে পরে চৈব কিং ভূয়ঃ কথয়ামি তে
112.24
যুধিষ্ঠির উবাচ
অনুদর্শিতং ভগবতা যথা ধর্মোঽনুগচ্ছতি
এতত্তু জ্ঞাতুমিচ্ছামি কথং রেতঃ প্রবর্ততে
112.25
বৃহস্পতিরুবাচ
অন্নমশ্নন্তি যে দেবাঃ শরীরস্থা নরেশ্বর
পৃথিবী বায়ুরাকাশমাপো জ্যোতির্মনস্তথা
112.26
ততস্তৃপ্তেষু রাজেন্দ্র তেষু ভূতেষু পঞ্চসু
মনঃষষ্ঠেষু শুদ্ধাত্মন্রেতঃ সংপদ্যতে মহৎ
112.27
ততো গর্ভঃ সংভবতি স্ত্রীপুংসোঃ পার্থ সংগমে
এতত্তে সর্বমাখ্যাতং কিং ভূয়ঃ শ্রোতুমিচ্ছসি
112.28
যুধিষ্ঠির উবাচ
আখ্যাতমেতদ্ভবতা গর্ভঃ সংজায়তে যথা
যথা জাতস্তু পুরুষঃ প্রপদ্যতি তদুচ্যতাম্
112.29
বৃহস্পতিরুবাচ
আসন্নমাত্রঃ সততং তৈর্ভূতৈরভিভূয়তে
বিপ্রমুক্তশ্চ তৈর্ভূতৈঃ পুনর্যাত্যপরাং গতিম্
স তু ভূতসমায়ুক্তঃ প্রাপ্নুতে জীব এব হ
112.30
ততোঽস্য কর্ম পশ্যন্তি শুভং বা যদি বাশুভম্
দেবতাঃ পঞ্চভূতস্থাঃ কিং ভূয়ঃ শ্রোতুমিচ্ছসি
112.31
যুধিষ্ঠির উবাচ
ত্বগস্থিমাংসমুত্সৃজ্য তৈশ্চ ভূতৈর্বিবর্জিতঃ
জীবঃ স ভগবন্ক্বস্থঃ সুখদুঃখে সমশ্নুতে
112.32
বৃহস্পতিরুবাচ
জীবো ধর্মসমায়ুক্তঃ শীঘ্রং রেতস্ত্বমাগতঃ
স্ত্রীণাং পুষ্পং সমাসাদ্য সূতে কালেন ভারত
112.33
যমস্য পুরুষৈঃ ক্লেশং যমস্য পুরুষৈর্বধম্
দুঃখং সংসারচক্রং চ নরঃ ক্লেশং চ বিন্দতি
112.34
ইহলোকে চ স প্রাণী জন্মপ্রভৃতি পার্থিব
স্বকৃতং কর্ম বৈ ভুঙ্ক্তে ধর্মস্য ফলমাশ্রিতঃ
112.35
যদি ধর্মং যথাশক্তি জন্মপ্রভৃতি সেবতে
ততঃ স পুরুষো ভূত্বা সেবতে নিত্যদা সুখম্
112.36
অথান্তরা তু ধর্মস্য অধর্মমুপসেবতে
সুখস্যানন্তরং দুঃখং স জীবোঽপ্যধিগচ্ছতি
112.37
অধর্মেণ সমায়ুক্তো যমস্য বিষয়ং গতঃ
মহদ্দুঃখং সমাসাদ্য তির্যগ্যোনৌ প্রজায়তে
112.38
কর্মণা যেন যেনেহ যস্যাং যোনৌ প্রজায়তে
জীবো মোহসমায়ুক্তস্তন্মে নিগদতঃ শৃণু
112.39
যদেতদুচ্যতে শাস্ত্রে সেতিহাসে সচ্ছন্দসি
যমস্য বিষয়ং ঘোরং মর্ত্যো লোকঃ প্রপদ্যতে
112.40
অধীত্য চতুরো বেদান্দ্বিজো মোহসমন্বিতঃ
পতিতাত্প্রতিগৃহ্যাথ খরয়োনৌ প্রজায়তে
112.41
খরো জীবতি বর্ষাণি দশ পঞ্চ চ ভারত
খরো মৃতো বলীবর্দঃ সপ্ত বর্ষাণি জীবতি
112.42
বলীবর্দো মৃতশ্চাপি জায়তে ব্রহ্মরাক্ষসঃ
ব্রহ্মরক্ষস্তু ত্রীন্মাসাংস্ততো জায়তি ব্রাহ্মণঃ
112.43
পতিতং যাজয়িত্বা তু কৃমিয়োনৌ প্রজায়তে
তত্র জীবতি বর্ষাণি দশ পঞ্চ চ ভারত
112.44
কৃমিভাবাত্প্রমুক্তস্তু ততো জায়তি গর্দভঃ
গর্দভঃ পঞ্চ বর্ষাণি পঞ্চ বর্ষাণি সূকরঃ
শ্বা বর্ষমেকং ভবতি ততো জায়তি মানবঃ
112.45
উপাধ্যায়স্য যঃ পাপং শিষ্যঃ কুর্যাদবুদ্ধিমান্
স জীব ইহ সংসারাংস্ত্রীনাপ্নোতি ন সংশয়ঃ
112.46
প্রাক্শ্বা ভবতি রাজেন্দ্র ততঃ ক্রব্যাত্ততঃ খরঃ
ততঃ প্রেতঃ পরিক্লিষ্টঃ পশ্চাজ্জায়তি ব্রাহ্মণঃ
112.47
মনসাপি গুরোর্ভার্যাং যঃ শিষ্যো যাতি পাপকৃৎ
সোঽধমান্যাতি সংসারানধর্মেণেহ চেতসা
112.48
শ্বয়োনৌ তু স সংভূতস্ত্রীণি বর্ষাণি জীবতি
তত্রাপি নিধনং প্রাপ্তঃ কৃমিয়োনৌ প্রজায়তে
112.49
কৃমিভাবমনুপ্রাপ্তো বর্ষমেকং স জীবতি
ততস্তু নিধনং প্রাপ্য ব্রহ্ময়োনৌ প্রজায়তে
112.50
যদি পুত্রসমং শিষ্যং গুরুর্হন্যাদকারণে
আত্মনঃ কামকারেণ সোঽপি হংসঃ প্রজায়তে
112.51
পিতরং মাতরং বাপি যস্তু পুত্রোঽবমন্যতে
সোঽপি রাজন্মৃতো জন্তুঃ পূর্বং জায়তি গর্দভঃ
112.52
খরো জীবতি মাসাংস্তু দশ শ্বা চ চতুর্দশ
বিডালঃ সপ্ত মাসাংস্তু ততো জায়তি মানবঃ
112.53
মাতাপিতরমাক্রুশ্য সারিকঃ সংপ্রজায়তে
তাডয়িত্বা তু তাবেব জায়তে কচ্ছপো নৃপ
112.54
কচ্ছপো দশ বর্ষাণি ত্রীণি বর্ষাণি শল্যকঃ
ব্যালো ভূত্বা তু ষণ্মাসাংস্ততো জায়তি মানুষঃ
112.55
ভর্তৃপিণ্ডমুপাশ্নন্যো রাজদ্বিষ্টানি সেবতে
সোঽপি মোহসমাপন্নো মৃতো জায়তি বানরঃ
112.56
বানরো দশ বর্ষাণি ত্রীণি বর্ষাণি মূষকঃ
শ্বা ভূত্বা চাথ ষণ্মাসাংস্ততো জায়তি মানুষঃ
112.57
ন্যাসাপহর্তা তু নরো যমস্য বিষয়ং গতঃ
সংসারাণাং শতং গত্বা কৃমিয়োনৌ প্রজায়তে
112.58
তত্র জীবতি বর্ষাণি দশ পঞ্চ চ ভারত
দুষ্কৃতস্য ক্ষয়ং গত্বা ততো জায়তি মানুষঃ
112.59
অসূয়কো নরশ্চাপি মৃতো জায়তি শার্ঙ্গকঃ
বিশ্বাসহর্তা তু নরো মীনো জায়তি দুর্মতিঃ
112.60
ভূত্বা মীনোঽষ্ট বর্ষাণি মৃগো জায়তি ভারত
মৃগস্তু চতুরো মাসাংস্ততশ্ছাগঃ প্রজায়তে
112.61
ছাগস্তু নিধনং প্রাপ্য পূর্ণে সংবত্সরে ততঃ
কীটঃ সংজায়তে জন্তুস্ততো জায়তি মানুষঃ
112.62
ধান্যান্যবাংস্তিলান্মাষান্কুলত্থান্সর্ষপাংশ্চণান্
কলায়ানথ মুদ্গাংশ্চ গোধূমানতসীস্তথা
112.63
সস্যস্যান্যস্য হর্তা চ মোহাজ্জন্তুরচেতনঃ
স জায়তে মহারাজ মূষকো নিরপত্রপঃ
112.64
ততঃ প্রেত্য মহারাজ পুনর্জায়তি সূকরঃ
সূকরো জাতমাত্রস্তু রোগেণ ম্রিয়তে নৃপ
112.65
শ্বা ততো জায়তে মূঢঃ কর্মণা তেন পার্থিব
শ্বা ভূত্বা পঞ্চ বর্ষাণি ততো জায়তি মানুষঃ
112.66
পরদারাভিমর্শং তু কৃত্বা জায়তি বৈ বৃকঃ
শ্বা সৃগালস্ততো গৃধ্রো ব্যালঃ কঙ্কো বকস্তথা
112.67
ভ্রাতুর্ভার্যাং তু দুর্বুদ্ধির্যো ধর্ষয়তি মোহিতঃ
পুংস্কোকিলত্বমাপ্নোতি সোঽপি সংবত্সরং নৃপ
112.68
সখিভার্যাং গুরোর্ভার্যাং রাজভার্যাং তথৈব চ
প্রধর্ষয়িত্বা কামাদ্যো মৃতো জায়তি সূকরঃ
112.69
সূকরঃ পঞ্চ বর্ষাণি পঞ্চ বর্ষাণি শ্বাবিধঃ
পিপীলকস্তু ষণ্মাসান্কীটঃ স্যান্মাসমেব চ
এতানাসাদ্য সংসারান্কৃমিয়োনৌ প্রজায়তে
112.70
তত্র জীবতি মাসাংস্তু কৃমিয়োনৌ ত্রয়োদশ
ততোঽধর্মক্ষয়ং কৃত্বা পুনর্জায়তি মানুষঃ
112.71
উপস্থিতে বিবাহে তু দানে যজ্ঞেঽপি বাভিভো
মোহাত্করোতি যো বিঘ্নং স মৃতো জায়তে কৃমিঃ
112.72
কৃমির্জীবতি বর্ষাণি দশ পঞ্চ চ ভারত
অধর্মস্য ক্ষয়ং কৃত্বা ততো জায়তি মানুষঃ
112.73
পূর্বং দত্ত্বা তু যঃ কন্যাং দ্বিতীয়ে সংপ্রয়চ্ছতি
সোঽপি রাজন্মৃতো জন্তুঃ কৃমিয়োনৌ প্রজায়তে
112.74
তত্র জীবতি বর্ষাণি ত্রয়োদশ যুধিষ্ঠির
অধর্মসংক্ষয়ে যুক্তস্ততো জায়তি মানুষঃ
112.75
দেবকার্যমুপাকৃত্য পিতৃকার্যমথাপি চ
অনির্বাপ্য সমশ্নন্বৈ ততো জায়তি বায়সঃ
112.76
বায়সো দশ বর্ষাণি ততো জায়তি কুক্কুটঃ
জায়তে লবকশ্চাপি মাসং তস্মাত্তু মানুষঃ
112.77
জ্যেষ্ঠং পিতৃসমং চাপি ভ্রাতরং যোঽবমন্যতে
সোঽপি মৃত্যুমুপাগম্য ক্রৌঞ্চয়োনৌ প্রজায়তে
112.78
ক্রৌঞ্চো জীবতি মাসাংস্তু দশ দ্বৌ সপ্ত পঞ্চ চ
ততো নিধনমাপন্নো মানুষত্বমুপাশ্নুতে
112.79
বৃষলো ব্রাহ্মণীং গত্বা কৃমিয়োনৌ প্রজায়তে
তত্রাপত্যং সমুত্পাদ্য ততো জায়তি মূষকঃ
112.80
কৃতঘ্নস্তু মৃতো রাজন্যমস্য বিষয়ং গতঃ
যমস্য বিষয়ে ক্রুদ্ধৈর্বধং প্রাপ্নোতি দারুণম্
112.81
পট্টিসং মুদ্গরং শূলমগ্নিকুম্ভং চ দারুণম্
অসিপত্রবনং ঘোরং বালুকাং কূটশাল্মলীম্
112.82
এতাশ্চান্যাশ্চ বহ্বীঃ স যমস্য বিষয়ং গতঃ
যাতনাঃ প্রাপ্য তত্রোগ্রাস্ততো বধ্যতি ভারত
112.83
সংসারচক্রমাসাদ্য কৃমিয়োনৌ প্রজায়তে
কৃমির্ভবতি বর্ষাণি দশ পঞ্চ চ ভারত
ততো গর্ভং সমাসাদ্য তত্রৈব ম্রিয়তে শিশুঃ
112.84
ততো গর্ভশতৈর্জন্তুর্বহুভিঃ সংপ্রজায়তে
সংসারাংশ্চ বহূন্গত্বা ততস্তির্যক্প্রজায়তে
112.85
মৃতো দুঃখমনুপ্রাপ্য বহুবর্ষগণানিহ
অপুনর্ভাবসংয়ুক্তস্ততঃ কূর্মঃ প্রজায়তে
112.86
অশস্ত্রং পুরুষং হত্বা সশস্ত্রঃ পুরুষাধমঃ
অর্থার্থী যদি বা বৈরী স মৃতো জায়তে খরঃ
112.87
খরো জীবতি বর্ষে দ্বে ততঃ শস্ত্রেণ বধ্যতে
স মৃতো মৃগয়োনৌ তু নিত্যোদ্বিগ্নোঽভিজায়তে
112.88
মৃগো বধ্যতি শস্ত্রেণ গতে সংবত্সরে তু সঃ
হতো মৃগস্ততো মীনঃ সোঽপি জালেন বধ্যতে
112.89
মাসে চতুর্থে সংপ্রাপ্তে শ্বাপদঃ সংপ্রজায়তে
শ্বাপদো দশ বর্ষাণি দ্বীপী বর্ষাণি পঞ্চ চ
112.90
ততস্তু নিধনং প্রাপ্তঃ কালপর্যায়চোদিতঃ
অধর্মস্য ক্ষয়ং কৃত্বা ততো জায়তি মানুষঃ
112.91
স্ত্রিয়ং হত্বা তু দুর্বুদ্ধির্যমস্য বিষয়ং গতঃ
বহূন্ক্লেশান্সমাসাদ্য সংসারাংশ্চৈব বিংশতিম্
112.92
ততঃ পশ্চান্মহারাজ কৃমিয়োনৌ প্রজায়তে
কৃমির্বিংশতিবর্ষাণি ভূত্বা জায়তি মানুষঃ
112.93
ভোজনং চোরয়িত্বা তু মক্ষিকা জায়তে নরঃ
মক্ষিকাসংঘবশগো বহূন্মাসান্ভবত্যুত
ততঃ পাপক্ষয়ং কৃত্বা মানুষত্বমবাপ্নুতে
112.94
বাদ্যং হৃত্বা তু পুরুষো মশকঃ সংপ্রজায়তে
তথা পিণ্যাকসংমিশ্রমশনং চোরয়েন্নরঃ
স জায়তে বভ্রুসমো দারুণো মূষকো নরঃ
112.95
লবণং চোরয়িত্বা তু চীরীবাকঃ প্রজায়তে
দধি হৃত্বা বকশ্চাপি প্লবো মত্স্যানসংস্কৃতান্
112.96
চোরয়িত্বা পয়শ্চাপি বলাকা সংপ্রজায়তে
যস্তু চোরয়তে তৈলং তৈলপায়ী প্রজায়তে
চোরয়িত্বা তু দুর্বুদ্ধির্মধু দংশঃ প্রজায়তে
112.97
অয়ো হৃত্বা তু দুর্বুদ্ধির্বায়সো জায়তে নরঃ
পায়সং চোরয়িত্বা তু তিত্তিরিত্বমবাপ্নুতে
112.98
হৃত্বা পৈষ্টমপূপং চ কুম্ভোলূকঃ প্রজায়তে
ফলং বা মূলকং হৃত্বা অপূপং বা পিপীলিকঃ
112.99
কাংস্যং হৃত্বা তু দুর্বুদ্ধির্হারীতো জায়তে নরঃ
রাজতং ভাজনং হৃত্বা কপোতঃ সংপ্রজায়তে
112.100
হৃত্বা তু কাঞ্চনং ভাণ্ডং কৃমিয়োনৌ প্রজায়তে
ক্রৌঞ্চঃ কার্পাসিকং হৃত্বা মৃতো জায়তি মানবঃ
112.101
চোরয়িত্বা নরঃ পট্টং ত্বাবিকং বাপি ভারত
ক্ষৌমং চ বস্ত্রমাদায় শশো জন্তুঃ প্রজায়তে
112.102
বর্ণান্হৃত্বা তু পুরুষো মৃতো জায়তি বর্হিণঃ
হৃত্বা রক্তানি বস্ত্রাণি জায়তে জীবজীবকঃ
112.103
বর্ণকাদীংস্তথা গন্ধাংশ্চোরয়িত্বা তু মানবঃ
ছুচ্ছুন্দরিত্বমাপ্নোতি রাজঁল্লোভপরায়ণঃ
112.104
বিশ্বাসেন তু নিক্ষিপ্তং যো নিহ্নবতি মানবঃ
স গতাসুর্নরস্তাদৃঙ্মত্স্যয়োনৌ প্রজায়তে
112.105
মত্স্যয়োনিমনুপ্রাপ্য মৃতো জায়তি মানুষঃ
মানুষত্বমনুপ্রাপ্য ক্ষীণায়ুরুপপদ্যতে
112.106
পাপানি তু নরঃ কৃত্বা তির্যগ্জায়তি ভারত
ন চাত্মনঃ প্রমাণং তে ধর্মং জানন্তি কিংচন
112.107
যে পাপানি নরাঃ কৃত্বা নিরস্যন্তি ব্রতৈঃ সদা
সুখদুঃখসমায়ুক্তা ব্যাধিতাস্তে ভবন্ত্যুত
112.108
অসংবাসাঃ প্রজায়ন্তে ম্লেচ্ছাশ্চাপি ন সংশয়ঃ
নরাঃ পাপসমাচারা লোভমোহসমন্বিতাঃ
112.109
বর্জয়ন্তি চ পাপানি জন্মপ্রভৃতি যে নরাঃ
অরোগা রূপবন্তস্তে ধনিনশ্চ ভবন্ত্যুত
112.110
স্ত্রিয়োঽপ্যেতেন কল্পেন কৃত্বা পাপমবাপ্নুয়ুঃ
এতেষামেব জন্তূনাং পত্নীত্বমুপয়ান্তি তাঃ
112.111
পরস্বহরণে দোষাঃ সর্ব এব প্রকীর্তিতাঃ
এতদ্বৈ লেশমাত্রেণ কথিতং তে ময়ানঘ
অপরস্মিন্কথায়োগে ভূয়ঃ শ্রোষ্যসি ভারত
112.112
এতন্ময়া মহারাজ ব্রহ্মণো বদতঃ পুরা
সুরর্ষীণাং শ্রুতং মধ্যে পৃষ্টশ্চাপি যথাতথম্
112.113
ময়াপি তব কার্ত্স্ন্যেন যথাবদনুবর্ণিতম্
এতচ্ছ্রুত্বা মহারাজ ধর্মে কুরু মনঃ সদা