Utshovঅধ্যায় 113
113.1
যুধিষ্ঠির উবাচ
অধর্মস্য গতির্ব্রহ্মন্কথিতা মে ত্বয়ানঘ
ধর্মস্য তু গতিং শ্রোতুমিচ্ছামি বদতাং বর
কৃত্বা কর্মাণি পাপানি কথং যান্তি শুভাং গতিম্
113.2
বৃহস্পতিরুবাচ
কৃত্বা পাপানি কর্মাণি অধর্মবশমাগতঃ
মনসা বিপরীতেন নিরয়ং প্রতিপদ্যতে
113.3
মোহাদধর্মং যঃ কৃত্বা পুনঃ সমনুতপ্যতে
মনঃসমাধিসংয়ুক্তো ন স সেবেত দুষ্কৃতম্
113.4
যথা যথা নরঃ সম্যগধর্মমনুভাষতে
সমাহিতেন মনসা বিমুচ্যতি তথা তথা
ভুজংগ ইব নির্মোকাত্পূর্বভুক্তাজ্জরান্বিতাৎ
113.5
অদত্ত্বাপি প্রদানানি বিবিধানি সমাহিতঃ
মনঃসমাধিসংয়ুক্তঃ সুগতিং প্রতিপদ্যতে
113.6
প্রদানানি তু বক্ষ্যামি যানি দত্ত্বা যুধিষ্ঠির
নরঃ কৃত্বাপ্যকার্যাণি তদা ধর্মেণ যুজ্যতে
113.7
সর্বেষামেব দানানামন্নং শ্রেষ্ঠমুদাহৃতম্
পূর্বমন্নং প্রদাতব্যমৃজুনা ধর্মমিচ্ছতা
113.8
প্রাণা হ্যন্নং মনুষ্যাণাং তস্মাজ্জন্তুশ্চ জায়তে
অন্নে প্রতিষ্ঠিতা লোকাস্তস্মাদন্নং প্রকাশতে
113.9
অন্নমেব প্রশংসন্তি দেবর্ষিপিতৃমানবাঃ
অন্নস্য হি প্রদানেন স্বর্গমাপ্নোতি কৌশিকঃ
113.10
ন্যায়লব্ধং প্রদাতব্যং দ্বিজেভ্যো হ্যন্নমুত্তমম্
স্বাধ্যায়সমুপেতেভ্যঃ প্রহৃষ্টেনান্তরাত্মনা
113.11
যস্য হ্যন্নমুপাশ্নন্তি ব্রাহ্মণানাং শতা দশ
হৃষ্টেন মনসা দত্তং ন স তির্যগ্গতির্ভবেৎ
113.12
ব্রাহ্মণানাং সহস্রাণি দশ ভোজ্য নরর্ষভ
নরোঽধর্মাত্প্রমুচ্যেত পাপেষ্বভিরতঃ সদা
113.13
ভৈক্ষেণান্নং সমাহৃত্য বিপ্রো বেদপুরস্কৃতঃ
স্বাধ্যায়নিরতে বিপ্রে দত্ত্বেহ সুখমেধতে
113.14
অহিংসন্ব্রাহ্মণং নিত্যং ন্যায়েন পরিপাল্য চ
ক্ষত্রিয়স্তরসা প্রাপ্তমন্নং যো বৈ প্রয়চ্ছতি
113.15
দ্বিজেভ্যো বেদবৃদ্ধেভ্যঃ প্রয়তঃ সুসমাহিতঃ
তেনাপোহতি ধর্মাত্মা দুষ্কৃতং কর্ম পাণ্ডব
113.16
ষড্ভাগপরিশুদ্ধং চ কৃষের্ভাগমুপার্জিতম্
বৈশ্যো দদদ্দ্বিজাতিভ্যঃ পাপেভ্যঃ পরিমুচ্যতে
113.17
অবাপ্য প্রাণসংদেহং কার্কশ্যেন সমার্জিতম্
অন্নং দত্ত্বা দ্বিজাতিভ্যঃ শূদ্রঃ পাপাত্প্রমুচ্যতে
113.18
ঔরসেন বলেনান্নমর্জয়িত্বাবিহিংসকঃ
যঃ প্রয়চ্ছতি বিপ্রেভ্যো ন স দুর্গাণি সেবতে
113.19
ন্যায়েনাবাপ্তমন্নং তু নরো লোভবিবর্জিতঃ
দ্বিজেভ্যো বেদবৃদ্ধেভ্যো দত্ত্বা পাপাত্প্রমুচ্যতে
113.20
অন্নমূর্জস্করং লোকে দত্ত্বোর্জস্বী ভবেন্নরঃ
সতাং পন্থানমাশ্রিত্য সর্বপাপাত্প্রমুচ্যতে
113.21
দানকৃদ্ভিঃ কৃতঃ পন্থা যেন যান্তি মনীষিণঃ
তে স্ম প্রাণস্য দাতারস্তেভ্যো ধর্মঃ সনাতনঃ
113.22
সর্বাবস্থং মনুষ্যেণ ন্যায়েনান্নমুপার্জিতম্
কার্যং পাত্রগতং নিত্যমন্নং হি পরমা গতিঃ
113.23
অন্নস্য হি প্রদানেন নরো দুর্গং ন সেবতে
তস্মাদন্নং প্রদাতব্যমন্যায়পরিবর্জিতম্
113.24
যতেদ্ব্রাহ্মণপূর্বং হি ভোক্তুমন্নং গৃহী সদা
অবন্ধ্যং দিবসং কুর্যাদন্নদানেন মানবঃ
113.25
ভোজয়িত্বা দশশতং নরো বেদবিদাং নৃপ
ন্যায়বিদ্ধর্মবিদুষামিতিহাসবিদাং তথা
113.26
ন যাতি নরকং ঘোরং সংসারাংশ্চ ন সেবতে
সর্বকামসমায়ুক্তঃ প্রেত্য চাপ্যশ্নুতে ফলম্
113.27
এবং সুখসমায়ুক্তো রমতে বিগতজ্বরঃ
রূপবান্কীর্তিমাংশ্চৈব ধনবাংশ্চোপপদ্যতে
113.28
এতত্তে সর্বমাখ্যাতমন্নদানফলং মহৎ
মূলমেতদ্ধি ধর্মাণাং প্রদানস্য চ ভারত