অধ্যায় 114

114.1

যুধিষ্ঠির উবাচ
অহিংসা বৈদিকং কর্ম ধ্যানমিন্দ্রিয়সংয়মঃ
তপোঽথ গুরুশুশ্রূষা কিং শ্রেয়ঃ পুরুষং প্রতি

বৃহস্পতিরুবাচ
সর্বাণ্যেতানি ধর্মস্য পৃথগ্দ্বারাণি সর্বশঃ
শৃণু সংকীর্ত্যমানানি ষডেব ভরতর্ষভ

হন্ত নিঃশ্রেয়সং জন্তোরহং বক্ষ্যাম্যনুত্তমম্
অহিংসাপাশ্রয়ং ধর্মং যঃ সাধয়তি বৈ নরঃ

ত্রীন্দোষান্সর্বভূতেষু নিধায় পুরুষঃ সদা
কামক্রোধৌ চ সংয়ম্য ততঃ সিদ্ধিমবাপ্নুতে

অহিংসকানি ভূতানি দণ্ডেন বিনিহন্তি যঃ
আত্মনঃ সুখমন্বিচ্ছন্ন স প্রেত্য সুখী ভবেৎ

আত্মোপমশ্চ ভূতেষু যো বৈ ভবতি পূরুষঃ
ন্যস্তদণ্ডো জিতক্রোধঃ স প্রেত্য সুখমেধতে

সর্বভূতাত্মভূতস্য সর্বভূতানি পশ্যতঃ
দেবাপি মার্গে মুহ্যন্তি অপদস্য পদৈষিণঃ

ন তত্পরস্য সংদদ্যাত্প্রতিকূলং যদাত্মনঃ
এষ সংক্ষেপতো ধর্মঃ কামাদন্যঃ প্রবর্ততে

প্রত্যাখ্যানে চ দানে চ সুখদুঃখে প্রিয়াপ্রিয়ে
আত্মৌপম্যেন পুরুষঃ সমাধিমধিগচ্ছতি

যথা পরঃ প্রক্রমতেঽপরেষু; তথাপরঃ প্রক্রমতে পরস্মিন্
এষৈব তেঽস্তূপমা জীবলোকে; যথা ধর্মো নৈপুণেনোপদিষ্টঃ

বৈশংপায়ন উবাচ
ইত্যুক্ত্বা তং সুরগুরুর্ধর্মরাজং যুধিষ্ঠিরম্
দিবমাচক্রমে ধীমান্পশ্যতামেব নস্তদা