অধ্যায় 115

115.1

বৈশংপায়ন উবাচ
ততো যুধিষ্ঠিরো রাজা শরতল্পে পিতামহম্
পুনরেব মহাতেজাঃ পপ্রচ্ছ বদতাং বরম্

ঋষয়ো ব্রাহ্মণা দেবাঃ প্রশংসন্তি মহামতে
অহিংসালক্ষণং ধর্মং বেদপ্রামাণ্যদর্শনাৎ

কর্মণা মনুজঃ কুর্বন্হিংসাং পার্থিবসত্তম
বাচা চ মনসা চৈব কথং দুঃখাত্প্রমুচ্যতে

ভীষ্ম উবাচ
চতুর্বিধেয়ং নির্দিষ্টা অহিংসা ব্রহ্মবাদিভিঃ
এষৈকতোঽপি বিভ্রষ্টা ন ভবত্যরিসূদন

যথা সর্বশ্চতুষ্পাদস্ত্রিভিঃ পাদৈর্ন তিষ্ঠতি
তথৈবেয়ং মহীপাল প্রোচ্যতে কারণৈস্ত্রিভিঃ

যথা নাগপদেঽন্যানি পদানি পদগামিনাম্
সর্বাণ্যেবাপিধীয়ন্তে পদজাতানি কৌঞ্জরে
এবং লোকেষ্বহিংসা তু নির্দিষ্টা ধর্মতঃ পরা

কর্মণা লিপ্যতে জন্তুর্বাচা চ মনসৈব চ

পূর্বং তু মনসা ত্যক্ত্বা তথা বাচাথ কর্মণা
ত্রিকারণং তু নির্দিষ্টং শ্রূয়তে ব্রহ্মবাদিভিঃ

মনোবাচি তথাস্বাদে দোষা হ্যেষু প্রতিষ্ঠিতাঃ
ন ভক্ষয়ন্ত্যতো মাংসং তপোয়ুক্তা মনীষিণঃ

দোষাংস্তু ভক্ষণে রাজন্মাংসস্যেহ নিবোধ মে
পুত্রমাংসোপমং জানন্খাদতে যো বিচেতনঃ

মাতাপিতৃসমায়োগে পুত্রত্বং জায়তে যথা
রসং চ প্রতি জিহ্বায়াঃ প্রজ্ঞানং জায়তে তথা
তথা শাস্ত্রেষু নিয়তং রাগো হ্যাস্বাদিতাদ্ভবেৎ

অসংস্কৃতাঃ সংস্কৃতাশ্চ লবণালবণাস্তথা
প্রজ্ঞায়ন্তে যথা ভাবাস্তথা চিত্তং নিরুধ্যতে

ভেরীশঙ্খমৃদঙ্গাদ্যাংস্তন্ত্রীশব্দাংশ্চ পুষ্কলান্
নিষেবিষ্যন্তি বৈ মন্দা মাংসভক্ষাঃ কথং নরাঃ

অচিন্তিতমনুদ্দিষ্টমসংকল্পিতমেব চ
রসং গৃদ্ধ্যাভিভূতা বৈ প্রশংসন্তি ফলার্থিনঃ
প্রশংসা হ্যেব মাংসস্য দোষকর্মফলান্বিতা

জীবিতং হি পরিত্যজ্য বহবঃ সাধবো জনাঃ
স্বমাংসৈঃ পরমাংসানি পরিপাল্য দিবং গতাঃ

এবমেষা মহারাজ চতুর্ভিঃ কারণৈর্বৃতা
অহিংসা তব নির্দিষ্টা সর্বধর্মার্থসংহিতা