Utshovঅধ্যায় 116
116.1
যুধিষ্ঠির উবাচ
অহিংসা পরমো ধর্ম ইত্যুক্তং বহুশস্ত্বয়া
শ্রাদ্ধেষু চ ভবানাহ পিতৄনামিষকাঙ্ক্ষিণঃ
116.2
মাংসৈর্বহুবিধৈঃ প্রোক্তস্ত্বয়া শ্রাদ্ধবিধিঃ পুরা
অহত্বা চ কুতো মাংসমেবমেতদ্বিরুধ্যতে
116.3
জাতো নঃ সংশয়ো ধর্মে মাংসস্য পরিবর্জনে
দোষো ভক্ষয়তঃ কঃ স্যাত্কশ্চাভক্ষয়তো গুণঃ
116.4
হত্বা ভক্ষয়তো বাপি পরেণোপহৃতস্য বা
হন্যাদ্বা যঃ পরস্যার্থে ক্রীত্বা বা ভক্ষয়েন্নরঃ
116.5
এতদিচ্ছামি তত্ত্বেন কথ্যমানং ত্বয়ানঘ
নিশ্চয়েন চিকীর্ষামি ধর্মমেতং সনাতনম্
116.6
কথমায়ুরবাপ্নোতি কথং ভবতি সত্ত্ববান্
কথমব্যঙ্গতামেতি লক্ষণ্যো জায়তে কথম্
116.7
ভীষ্ম উবাচ
মাংসস্য ভক্ষণে রাজন্যোঽধর্মঃ কুরুপুংগব
তং মে শৃণু যথাতত্ত্বং যশ্চাস্য বিধিরুত্তমঃ
116.8
রূপমব্যঙ্গতামায়ুর্বুদ্ধিং সত্ত্বং বলং স্মৃতিম্
প্রাপ্তুকামৈর্নরৈর্হিংসা বর্জিতা বৈ কৃতাত্মভিঃ
116.9
ঋষীণামত্র সংবাদো বহুশঃ কুরুপুংগব
বভূব তেষাং তু মতং যত্তচ্ছৃণু যুধিষ্ঠির
116.10
যো যজেতাশ্বমেধেন মাসি মাসি যতব্রতঃ
বর্জয়েন্মধু মাংসং চ সমমেতদ্যুধিষ্ঠির
116.11
সপ্তর্ষয়ো বালখিল্যাস্তথৈব চ মরীচিপাঃ
অমাংসভক্ষণং রাজন্প্রশংসন্তি মনীষিণঃ
116.12
ন ভক্ষয়তি যো মাংসং ন হন্যান্ন চ ঘাতয়েৎ
তং মিত্রং সর্বভূতানাং মনুঃ স্বায়ংভুবোঽব্রবীৎ
116.13
অধৃষ্যঃ সর্বভূতানাং বিশ্বাস্যঃ সর্বজন্তুষু
সাধূনাং সংমতো নিত্যং ভবেন্মাংসস্য বর্জনাৎ
116.14
স্বমাংসং পরমাংসেন যো বর্ধয়িতুমিচ্ছতি
নারদঃ প্রাহ ধর্মাত্মা নিয়তং সোঽবসীদতি
116.15
দদাতি যজতে চাপি তপস্বী চ ভবত্যপি
মধুমাংসনিবৃত্ত্যেতি প্রাহৈবং স বৃহস্পতিঃ
116.16
মাসি মাস্যশ্বমেধেন যো যজেত শতং সমাঃ
ন খাদতি চ যো মাংসং সমমেতন্মতং মম
116.17
সদা যজতি সত্রেণ সদা দানং প্রয়চ্ছতি
সদা তপস্বী ভবতি মধুমাংসস্য বর্জনাৎ
116.18
সর্বে বেদা ন তত্কুর্যুঃ সর্বয়জ্ঞাশ্চ ভারত
যো ভক্ষয়িত্বা মাংসানি পশ্চাদপি নিবর্ততে
116.19
দুষ্করং হি রসজ্ঞেন মাংসস্য পরিবর্জনম্
চর্তুং ব্রতমিদং শ্রেষ্ঠং সর্বপ্রাণ্যভয়প্রদম্
116.20
সর্বভূতেষু যো বিদ্বান্দদাত্যভয়দক্ষিণাম্
দাতা ভবতি লোকে স প্রাণানাং নাত্র সংশয়ঃ
116.21
এবং বৈ পরমং ধর্মং প্রশংসন্তি মনীষিণঃ
প্রাণা যথাত্মনোঽভীষ্টা ভূতানামপি তে তথা
116.22
আত্মৌপম্যেন গন্তব্যং বুদ্ধিমদ্ভির্মহাত্মভিঃ
মৃত্যুতো ভয়মস্তীতি বিদুষাং ভূতিমিচ্ছতাম্
116.23
কিং পুনর্হন্যমানানাং তরসা জীবিতার্থিনাম্
অরোগাণামপাপানাং পাপৈর্মাংসোপজীবিভিঃ
116.24
তস্মাদ্বিদ্ধি মহারাজ মাংসস্য পরিবর্জনম্
ধর্মস্যায়তনং শ্রেষ্ঠং স্বর্গস্য চ সুখস্য চ
116.25
অহিংসা পরমো ধর্মস্তথাহিংসা পরং তপঃ
অহিংসা পরমং সত্যং ততো ধর্মঃ প্রবর্ততে
116.26
ন হি মাংসং তৃণাত্কাষ্ঠাদুপলাদ্বাপি জায়তে
হত্বা জন্তুং ততো মাংসং তস্মাদ্দোষোঽস্য ভক্ষণে
116.27
স্বাহাস্বধামৃতভুজো দেবাঃ সত্যার্জবপ্রিয়াঃ
ক্রব্যাদান্রাক্ষসান্বিদ্ধি জিহ্মানৃতপরায়ণান্
116.28
কান্তারেষ্বথ ঘোরেষু দুর্গেষু গহনেষু চ
রাত্রাবহনি সংধ্যাসু চত্বরেষু সভাসু চ
অমাংসভক্ষণে রাজন্ভয়মন্তে ন গচ্ছতি
116.29
যদি চেত্খাদকো ন স্যান্ন তদা ঘাতকো ভবেৎ
ঘাতকঃ খাদকার্থায় তং ঘাতয়তি বৈ নরঃ
116.30
অভক্ষ্যমেতদিতি বা ইতি হিংসা নিবর্ততে
খাদকার্থমতো হিংসা মৃগাদীনাং প্রবর্ততে
116.31
যস্মাদ্গ্রসতি চৈবায়ুর্হিংসকানাং মহাদ্যুতে
তস্মাদ্বিবর্জয়েন্মাংসং য ইচ্ছেদ্ভূতিমাত্মনঃ
116.32
ত্রাতারং নাধিগচ্ছন্তি রৌদ্রাঃ প্রাণিবিহিংসকাঃ
উদ্বেজনীয়া ভূতানাং যথা ব্যালমৃগাস্তথা
116.33
লোভাদ্বা বুদ্ধিমোহাদ্বা বলবীর্যার্থমেব চ
সংসর্গাদ্বাথ পাপানামধর্মরুচিতা নৃণাম্
116.34
স্বমাংসং পরমাংসেন যো বর্ধয়িতুমিচ্ছতি
উদ্বিগ্নবাসে বসতি যত্রতত্রাভিজায়তে
116.35
ধন্যং যশস্যমায়ুষ্যং স্বর্গ্যং স্বস্ত্যয়নং মহৎ
মাংসস্যাভক্ষণং প্রাহুর্নিয়তাঃ পরমর্ষয়ঃ
116.36
ইদং তু খলু কৌন্তেয় শ্রুতমাসীত্পুরা ময়া
মার্কণ্ডেয়স্য বদতো যে দোষা মাংসভক্ষণে
116.37
যো হি খাদতি মাংসানি প্রাণিনাং জীবিতার্থিনাম্
হতানাং বা মৃতানাং বা যথা হন্তা তথৈব সঃ
116.38
ধনেন ক্রায়কো হন্তি খাদকশ্চোপভোগতঃ
ঘাতকো বধবন্ধাভ্যামিত্যেষ ত্রিবিধো বধঃ
116.39
অখাদন্ননুমোদংশ্চ ভাবদোষেণ মানবঃ
যোঽনুমন্যেত হন্তব্যং সোঽপি দোষেণ লিপ্যতে
116.40
অধৃষ্যঃ সর্বভূতানামায়ুষ্মান্নীরুজঃ সুখী
ভবত্যভক্ষয়ন্মাংসং দয়াবান্প্রাণিনামিহ
116.41
হিরণ্যদানৈর্গোদানৈর্ভূমিদানৈশ্চ সর্বশঃ
মাংসস্যাভক্ষণে ধর্মো বিশিষ্টঃ স্যাদিতি শ্রুতিঃ
116.42
অপ্রোক্ষিতং বৃথামাংসং বিধিহীনং ন ভক্ষয়েৎ
ভক্ষয়ন্নিরয়ং যাতি নরো নাস্ত্যত্র সংশয়ঃ
116.43
প্রোক্ষিতাভ্যুক্ষিতং মাংসং তথা ব্রাহ্মণকাম্যয়া
অল্পদোষমিহ জ্ঞেয়ং বিপরীতে তু লিপ্যতে
116.44
খাদকস্য কৃতে জন্তুং যো হন্যাত্পুরুষাধমঃ
মহাদোষকরস্তত্র খাদকো ন তু ঘাতকঃ
116.45
ইজ্যায়জ্ঞশ্রুতিকৃতৈর্যো মার্গৈরবুধো জনঃ
হন্যাজ্জন্তুং মাংসগৃদ্ধ্রী স বৈ নরকভাঙ্নরঃ
116.46
ভক্ষয়িত্বা তু যো মাংসং পশ্চাদপি নিবর্ততে
তস্যাপি সুমহান্ধর্মো যঃ পাপাদ্বিনিবর্ততে
116.47
আহর্তা চানুমন্তা চ বিশস্তা ক্রয়বিক্রয়ী
সংস্কর্তা চোপভোক্তা চ ঘাতকাঃ সর্ব এব তে
116.48
ইদমন্যত্তু বক্ষ্যামি প্রমাণং বিধিনির্মিতম্
পুরাণমৃষিভির্জুষ্টং বেদেষু পরিনিশ্চিতম্
116.49
প্রবৃত্তিলক্ষণে ধর্মে ফলার্থিভিরভিদ্রুতে
যথোক্তং রাজশার্দূল ন তু তন্মোক্ষকাঙ্ক্ষিণাম্
116.50
হবির্যত্সংস্কৃতং মন্ত্রৈঃ প্রোক্ষিতাভ্যুক্ষিতং শুচি
বেদোক্তেন প্রমাণেন পিতৄণাং প্রক্রিয়াসু চ
অতোঽন্যথা বৃথামাংসমভক্ষ্যং মনুরব্রবীৎ
116.51
অস্বর্গ্যময়শস্যং চ রক্ষোবদ্ভরতর্ষভ
বিধিনা হি নরাঃ পূর্বং মাংসং রাজন্নভক্ষয়ন্
116.52
য ইচ্ছেত্পুরুষোঽত্যন্তমাত্মানং নিরুপদ্রবম্
স বর্জয়েত মাংসানি প্রাণিনামিহ সর্বশঃ
116.53
শ্রূয়তে হি পুরাকল্পে নৃণাং ব্রীহিময়ঃ পশুঃ
যেনায়জন্ত যজ্বানঃ পুণ্যলোকপরায়ণাঃ
116.54
ঋষিভিঃ সংশয়ং পৃষ্টো বসুশ্চেদিপতিঃ পুরা
অভক্ষ্যমিতি মাংসং স প্রাহ ভক্ষ্যমিতি প্রভো
116.55
আকাশান্মেদিনীং প্রাপ্তস্ততঃ স পৃথিবীপতিঃ
এতদেব পুনশ্চোক্ত্বা বিবেশ ধরণীতলম্
116.56
প্রজানাং হিতকামেন ত্বগস্ত্যেন মহাত্মনা
আরণ্যাঃ সর্বদৈবত্যাঃ প্রোক্ষিতাস্তপসা মৃগাঃ
116.57
ক্রিয়া হ্যেবং ন হীয়ন্তে পিতৃদৈবতসংশ্রিতাঃ
প্রীয়ন্তে পিতরশ্চৈব ন্যায়তো মাংসতর্পিতাঃ
116.58
ইদং তু শৃণু রাজেন্দ্র কীর্ত্যমানং ময়ানঘ
অভক্ষণে সর্বসুখং মাংসস্য মনুজাধিপ
116.59
যস্তু বর্ষশতং পূর্ণং তপস্তপ্যেত্সুদারুণম্
যশ্চৈকং বর্জয়েন্মাংসং সমমেতন্মতং মম
116.60
কৌমুদে তু বিশেষেণ শুক্লপক্ষে নরাধিপ
বর্জয়েত্সর্বমাংসানি ধর্মো হ্যত্র বিধীয়তে
116.61
চতুরো বার্ষিকান্মাসান্যো মাংসং পরিবর্জয়েৎ
চত্বারি ভদ্রাণ্যাপ্নোতি কীর্তিমায়ুর্যশো বলম্
116.62
অথ বা মাসমপ্যেকং সর্বমাংসান্যভক্ষয়ন্
অতীত্য সর্বদুঃখানি সুখী জীবেন্নিরাময়ঃ
116.63
যে বর্জয়ন্তি মাংসানি মাসশঃ পক্ষশোঽপি বা
তেষাং হিংসানিবৃত্তানাং ব্রহ্মলোকো বিধীয়তে
116.64
মাংসং তু কৌমুদং পক্ষং বর্জিতং পার্থ রাজভিঃ
সর্বভূতাত্মভূতৈস্তৈর্বিজ্ঞাতার্থপরাবরৈঃ
116.65
নাভাগেনাম্বরীষেণ গয়েন চ মহাত্মনা
আয়ুষা চানরণ্যেন দিলীপরঘুপূরুভিঃ
116.66
কার্তবীর্যানিরুদ্ধাভ্যাং নহুষেণ যয়াতিনা
নৃগেণ বিষ্বগশ্বেন তথৈব শশবিন্দুনা
যুবনাশ্বেন চ তথা শিবিনৌশীনরেণ চ
116.67
শ্যেনচিত্রেণ রাজেন্দ্র সোমকেন বৃকেণ চ
রৈবতেন রন্তিদেবেন বসুনা সৃঞ্জয়েন চ
116.68
দুঃষন্তেন করূষেণ রামালর্কনলৈস্তথা
বিরূপাশ্বেন নিমিনা জনকেন চ ধীমতা
116.69
সিলেন পৃথুনা চৈব বীরসেনেন চৈব হ
ইক্ষ্বাকুণা শংভুনা চ শ্বেতেন সগরেণ চ
116.70
এতৈশ্চান্যৈশ্চ রাজেন্দ্র পুরা মাংসং ন ভক্ষিতম্
শারদং কৌমুদং মাসং ততস্তে স্বর্গমাপ্নুবন্
116.71
ব্রহ্মলোকে চ তিষ্ঠন্তি জ্বলমানাঃ শ্রিয়ান্বিতাঃ
উপাস্যমানা গন্ধর্বৈঃ স্ত্রীসহস্রসমন্বিতাঃ
116.72
তদেতদুত্তমং ধর্মমহিংসালক্ষণং শুভম্
যে চরন্তি মহাত্মানো নাকপৃষ্ঠে বসন্তি তে
116.73
মধু মাংসং চ যে নিত্যং বর্জয়ন্তীহ ধার্মিকাঃ
জন্মপ্রভৃতি মদ্যং চ সর্বে তে মুনয়ঃ স্মৃতাঃ
বিশিষ্টতাং জ্ঞাতিষু চ লভন্তে নাত্র সংশয়ঃ
116.74
আপন্নশ্চাপদো মুচ্যেদ্বদ্ধো মুচ্যেত বন্ধনাৎ
মুচ্যেত্তথাতুরো রোগাদ্দুঃখান্মুচ্যেত দুঃখিতঃ
116.75
তির্যগ্যোনিং ন গচ্ছেত রূপবাংশ্চ ভবেন্নরঃ
বুদ্ধিমান্বৈ কুরুশ্রেষ্ঠ প্রাপ্নুয়াচ্চ মহদ্যশঃ
116.76
এতত্তে কথিতং রাজন্মাংসস্য পরিবর্জনে
প্রবৃত্তৌ চ নিবৃত্তৌ চ বিধানমৃষিনির্মিতম্