Utshovঅধ্যায় 117
117.1
যুধিষ্ঠির উবাচ
ইমে বৈ মানবা লোকে ভৃশং মাংসস্য গৃদ্ধিনঃ
বিসৃজ্য ভক্ষান্বিবিধান্যথা রক্ষোগণাস্তথা
117.2
নাপূপান্বিবিধাকারাঞ্শাকানি বিবিধানি চ
ষাডবান্রসয়োগাংশ্চ তথেচ্ছন্তি যথামিষম্
117.3
তত্র মে বুদ্ধিরত্রৈব বিসর্গে পরিমুহ্যতে
ন মন্যে রসতঃ কিংচিন্মাংসতোঽস্তীহ কিংচন
117.4
তদিচ্ছামি গুণাঞ্শ্রোতুং মাংসস্যাভক্ষণেঽপি বা
ভক্ষণে চৈব যে দোষাস্তাংশ্চৈব পুরুষর্ষভ
117.5
সর্বং তত্ত্বেন ধর্মজ্ঞ যথাবদিহ ধর্মতঃ
কিং বা ভক্ষ্যমভক্ষ্যং বা সর্বমেতদ্বদস্ব মে
117.6
ভীষ্ম উবাচ
এবমেতন্মহাবাহো যথা বদসি ভারত
ন মাংসাত্পরমত্রান্যদ্রসতো বিদ্যতে ভুবি
117.7
ক্ষতক্ষীণাভিতপ্তানাং গ্রাম্যধর্মরতাশ্চ যে
অধ্বনা কর্শিতানাং চ ন মাংসাদ্বিদ্যতে পরম্
117.8
সদ্যো বর্ধয়তি প্রাণান্পুষ্টিমগ্র্যাং দদাতি চ
ন ভক্ষোঽভ্যধিকঃ কশ্চিন্মাংসাদস্তি পরংতপ
117.9
বিবর্জনে তু বহবো গুণাঃ কৌরবনন্দন
যে ভবন্তি মনুষ্যাণাং তান্মে নিগদতঃ শৃণু
117.10
স্বমাংসং পরমাংসৈর্যো বিবর্ধয়িতুমিচ্ছতি
নাস্তি ক্ষুদ্রতরস্তস্মান্ন নৃশংসতরো নরঃ
117.11
ন হি প্রাণাত্প্রিয়তরং লোকে কিংচন বিদ্যতে
তস্মাদ্দয়াং নরঃ কুর্যাদ্যথাত্মনি তথা পরে
117.12
শুক্রাচ্চ তাত সংভূতির্মাংসস্যেহ ন সংশয়ঃ
ভক্ষণে তু মহান্দোষো বধেন সহ কল্পতে
117.13
অহিংসালক্ষণো ধর্ম ইতি বেদবিদো বিদুঃ
যদহিংস্রং ভবেত্কর্ম তত্কুর্যাদাত্মবান্নরঃ
117.14
পিতৃদৈবতয়জ্ঞেষু প্রোক্ষিতং হবিরুচ্যতে
বিধিনা বেদদৃষ্টেন তদ্ভুক্ত্বেহ ন দুষ্যতি
117.15
যজ্ঞার্থে পশবঃ সৃষ্টা ইত্যপি শ্রূয়তে শ্রুতিঃ
অতোঽন্যথা প্রবৃত্তানাং রাক্ষসো বিধিরুচ্যতে
117.16
ক্ষত্রিয়াণাং তু যো দৃষ্টো বিধিস্তমপি মে শৃণু
বীর্যেণোপার্জিতং মাংসং যথা খাদন্ন দুষ্যতি
117.17
আরণ্যাঃ সর্বদৈবত্যাঃ প্রোক্ষিতাঃ সর্বশো মৃগাঃ
অগস্ত্যেন পুরা রাজন্মৃগয়া যেন পূজ্যতে
117.18
নাত্মানমপরিত্যজ্য মৃগয়া নাম বিদ্যতে
সমতামুপসংগম্য রূপং হন্যান্ন বা নৃপ
117.19
অতো রাজর্ষয়ঃ সর্বে মৃগয়াং যান্তি ভারত
লিপ্যন্তে ন হি দোষেণ ন চৈতত্পাতকং বিদুঃ
117.20
ন হি তত্পরমং কিংচিদিহ লোকে পরত্র চ
যত্সর্বেষ্বিহ লোকেষু দয়া কৌরবনন্দন
117.21
ন ভয়ং বিদ্যতে জাতু নরস্যেহ দয়াবতঃ
দয়াবতামিমে লোকাঃ পরে চাপি তপস্বিনাম্
117.22
অভয়ং সর্বভূতেভ্যো যো দদাতি দয়াপরঃ
অভয়ং তস্য ভূতানি দদতীত্যনুশুশ্রুমঃ
117.23
ক্ষতং চ স্খলিতং চৈব পতিতং ক্লিষ্টমাহতম্
সর্বভূতানি রক্ষন্তি সমেষু বিষমেষু চ
117.24
নৈনং ব্যালমৃগা ঘ্নন্তি ন পিশাচা ন রাক্ষসাঃ
মুচ্যন্তে ভয়কালেষু মোক্ষয়ন্তি চ যে পরান্
117.25
প্রাণদানাত্পরং দানং ন ভূতং ন ভবিষ্যতি
ন হ্যাত্মনঃ প্রিয়তরঃ কশ্চিদস্তীতি নিশ্চিতম্
117.26
অনিষ্টং সর্বভূতানাং মরণং নাম ভারত
মৃত্যুকালে হি ভূতানাং সদ্যো জায়তি বেপথুঃ
117.27
জাতিজন্মজরাদুঃখে নিত্যং সংসারসাগরে
জন্তবঃ পরিবর্তন্তে মরণাদুদ্বিজন্তি চ
117.28
গর্ভবাসেষু পচ্যন্তে ক্ষারাম্লকটুকৈ রসৈঃ
মূত্রশ্লেষ্মপুরীষাণাং স্পর্শৈশ্চ ভৃশদারুণৈঃ
117.29
জাতাশ্চাপ্যবশাস্তত্র ভিদ্যমানাঃ পুনঃ পুনঃ
পাট্যমানাশ্চ দৃশ্যন্তে বিবশা মাংসগৃদ্ধিনঃ
117.30
কুম্ভীপাকে চ পচ্যন্তে তাং তাং যোনিমুপাগতাঃ
আক্রম্য মার্যমাণাশ্চ ভ্রাম্যন্তে বৈ পুনঃ পুনঃ
117.31
নাত্মনোঽস্তি প্রিয়তরঃ পৃথিব্যামনুসৃত্য হ
তস্মাত্প্রাণিষু সর্বেষু দয়াবানাত্মবান্ভবেৎ
117.32
সর্বমাংসানি যো রাজন্যাবজ্জীবং ন ভক্ষয়েৎ
স্বর্গে স বিপুলং স্থানং প্রাপ্নুয়ান্নাত্র সংশয়ঃ
117.33
যে ভক্ষয়ন্তি মাংসানি ভূতানাং জীবিতৈষিণাম্
ভক্ষ্যন্তে তেঽপি তৈর্ভূতৈরিতি মে নাস্তি সংশয়ঃ
117.34
মাং স ভক্ষয়তে যস্মাদ্ভক্ষয়িষ্যে তমপ্যহম্
এতন্মাংসস্য মাংসত্বমতো বুধ্যস্ব ভারত
117.35
ঘাতকো বধ্যতে নিত্যং তথা বধ্যেত বন্ধকঃ
আক্রোষ্টাক্রুশ্যতে রাজন্দ্বেষ্টা দ্বেষ্যত্বমাপ্নুতে
117.36
যেন যেন শরীরেণ যদ্যত্কর্ম করোতি যঃ
তেন তেন শরীরেণ তত্তত্ফলমুপাশ্নুতে
117.37
অহিংসা পরমো ধর্মস্তথাহিংসা পরো দমঃ
অহিংসা পরমং দানমহিংসা পরমং তপঃ
117.38
অহিংসা পরমো যজ্ঞস্তথাহিংসা পরং বলম্
অহিংসা পরমং মিত্রমহিংসা পরমং সুখম্
অহিংসা পরমং সত্যমহিংসা পরমং শ্রুতম্
117.39
সর্বয়জ্ঞেষু বা দানং সর্বতীর্থেষু চাপ্লুতম্
সর্বদানফলং বাপি নৈতত্তুল্যমহিংসয়া
117.40
অহিংস্রস্য তপোঽক্ষয্যমহিংস্রো যজতে সদা
অহিংস্রঃ সর্বভূতানাং যথা মাতা যথা পিতা
117.41
এতত্ফলমহিংসায়া ভূয়শ্চ কুরুপুংগব
ন হি শক্যা গুণা বক্তুমিহ বর্ষশতৈরপি