Utshovঅধ্যায় 118
118.1
যুধিষ্ঠির উবাচ
অকামাশ্চ সকামাশ্চ হতা যেঽস্মিন্মহাহবে
কাং যোনিং প্রতিপন্নাস্তে তন্মে ব্রূহি পিতামহ
118.2
দুঃখং প্রাণপরিত্যাগঃ পুরুষাণাং মহামৃধে
জানামি তত্ত্বং ধর্মজ্ঞ প্রাণত্যাগং সুদুষ্করম্
118.3
সমৃদ্ধে বাসমৃদ্ধে বা শুভে বা যদি বাশুভে
কারণং তত্র মে ব্রূহি সর্বজ্ঞো হ্যসি মে মতঃ
118.4
ভীষ্ম উবাচ
সমৃদ্ধে বাসমৃদ্ধে বা শুভে বা যদি বাশুভে
সংসারেঽস্মিন্সমাজাতাঃ প্রাণিনঃ পৃথিবীপতে
118.5
নিরতা যেন ভাবেন তত্র মে শৃণু কারণম্
সম্যক্চায়মনুপ্রশ্নস্ত্বয়োক্তশ্চ যুধিষ্ঠির
118.6
অত্র তে বর্তয়িষ্যামি পুরাবৃত্তমিদং নৃপ
দ্বৈপায়নস্য সংবাদং কীটস্য চ যুধিষ্ঠির
118.7
ব্রহ্মভূতশ্চরন্বিপ্রঃ কৃষ্ণদ্বৈপায়নঃ পুরা
দদর্শ কীটং ধাবন্তং শীঘ্রং শকটবর্ত্মনি
118.8
গতিজ্ঞঃ সর্বভূতানাং রুতজ্ঞশ্চ শরীরিণাম্
সর্বজ্ঞঃ সর্বতো দৃষ্ট্বা কীটং বচনমব্রবীৎ
118.9
কীট সংত্রস্তরূপোঽসি ত্বরিতশ্চৈব লক্ষ্যসে
ক্ব ধাবসি তদাচক্ষ্ব কুতস্তে ভয়মাগতম্
118.10
কীট উবাচ
শকটস্যাস্য মহতো ঘোষং শ্রুত্বা ভয়ং মম
আগতং বৈ মহাবুদ্ধে স্বন এষ হি দারুণঃ
শ্রূয়তে ন স মাং হন্যাদিতি তস্মাদপাক্রমে
118.11
শ্বসতাং চ শৃণোম্যেবং গোপুত্রাণাং প্রচোদ্যতাম্
বহতাং সুমহাভারং সংনিকর্ষে স্বনং প্রভো
নৃণাং চ সংবাহয়তাং শ্রূয়তে বিবিধঃ স্বনঃ
118.12
সোঢুমস্মদ্বিধেনৈষ ন শক্যঃ কীটয়োনিনা
তস্মাদপক্রমাম্যেষ ভয়াদস্মাত্সুদারুণাৎ
118.13
দুঃখং হি মৃত্যুর্ভূতানাং জীবিতং চ সুদুর্লভম্
অতো ভীতঃ পলায়ামি গচ্ছেয়ং নাসুখং সুখাৎ
118.14
ভীষ্ম উবাচ
ইত্যুক্তঃ স তু তং প্রাহ কুতঃ কীট সুখং তব
মরণং তে সুখং মন্যে তির্যগ্যোনৌ হি বর্তসে
118.15
শব্দং স্পর্শং রসং গন্ধং ভোগাংশ্চোচ্চাবচান্বহূন্
নাভিজানাসি কীট ত্বং শ্রেয়ো মরণমেব তে
118.16
কীট উবাচ
সর্বত্র নিরতো জীব ইতীহাপি সুখং মম
চেতয়ামি মহাপ্রাজ্ঞ তস্মাদিচ্ছামি জীবিতুম্
118.17
ইহাপি বিষয়ঃ সর্বো যথাদেহং প্রবর্তিতঃ
মানুষাস্তির্যগাশ্চৈব পৃথগ্ভোগা বিশেষতঃ
118.18
অহমাসং মনুষ্যো বৈ শূদ্রো বহুধনঃ পুরা
অব্রহ্মণ্যো নৃশংসশ্চ কদর্যো বৃদ্ধিজীবনঃ
118.19
বাক্তীক্ষ্ণো নিকৃতিপ্রজ্ঞো মোষ্টা বিশ্বস্য সর্বশঃ
মিথঃকৃতোঽপনিধনঃ পরস্বহরণে রতঃ
118.20
ভৃত্যাতিথিজনশ্চাপি গৃহে পর্যুষিতো ময়া
মাত্সর্যাত্স্বাদুকামেন নৃশংসেন বুভূষতা
118.21
দেবার্থং পিতৃয়জ্ঞার্থমন্নং শ্রদ্ধাকৃতং ময়া
ন দত্তমর্থকামেন দেয়মন্নং পুনাতি হ
118.22
গুপ্তং শরণমাশ্রিত্য ভয়েষু শরণাগতাঃ
অকস্মান্নো ভয়াত্ত্যক্তা ন চ ত্রাতাভয়ৈষিণঃ
118.23
ধনং ধান্যং প্রিয়ান্দারান্যানং বাসস্তথাদ্ভুতম্
শ্রিয়ং দৃষ্ট্বা মনুষ্যাণামসূয়ামি নিরর্থকম্
118.24
ঈর্ষ্যুঃ পরসুখং দৃষ্ট্বা আততায্যবুভূষকঃ
ত্রিবর্গহন্তা চান্যেষামাত্মকামানুবর্তকঃ
118.25
নৃশংসগুণভূয়িষ্ঠং পুরা কর্ম কৃতং ময়া
স্মৃত্বা তদনুতপ্যেঽহং ত্যক্ত্বা প্রিয়মিবাত্মজম্
118.26
শুভানামপি জানামি কৃতানাং কর্মণাং ফলম্
মাতা চ পূজিতা বৃদ্ধা ব্রাহ্মণশ্চার্চিতো ময়া
118.27
সকৃজ্জাতিগুণোপেতঃ সংগত্যা গৃহমাগতঃ
অতিথিঃ পূজিতো ব্রহ্মংস্তেন মাং নাজহাত্স্মৃতিঃ
118.28
কর্মণা তেন চৈবাহং সুখাশামিহ লক্ষয়ে
তচ্ছ্রোতুমহমিচ্ছামি ত্বত্তঃ শ্রেয়স্তপোধন