অধ্যায় 119

119.1

ব্যাস উবাচ
শুভেন কর্মণা যদ্বৈ তির্যগ্যোনৌ ন মুহ্যসে
মমৈব কীট তত্কর্ম যেন ত্বং ন প্রমুহ্যসে

অহং হি দর্শনাদেব তারয়ামি তপোবলাৎ
তপোবলাদ্ধি বলবদ্বলমন্যন্ন বিদ্যতে

জানামি পাপৈঃ স্বকৃতৈর্গতং ত্বাং কীট কীটতাম্
অবাপ্স্যসি পরং ধর্মং ধর্মস্থো যদি মন্যসে

কর্ম ভূমিকৃতং দেবা ভুঞ্জতে তির্যগাশ্চ যে
ধর্মাদপি মনুষ্যেষু কামোঽর্থশ্চ যথা গুণৈঃ

বাগ্বুদ্ধিপাণিপাদৈশ্চাপ্যুপেতস্য বিপশ্চিতঃ
কিং হীয়তে মনুষ্যস্য মন্দস্যাপি হি জীবতঃ

জীবন্হি কুরুতে পূজাং বিপ্রাগ্র্যঃ শশিসূর্যয়োঃ
ব্রুবন্নপি কথাং পুণ্যাং তত্র কীট ত্বমেষ্যসি

গুণভূতানি ভূতানি তত্র ত্বমুপভোক্ষ্যসে
তত্র তেঽহং বিনেষ্যামি ব্রহ্মত্বং যত্র চেচ্ছসি

স তথেতি প্রতিশ্রুত্য কীটো বর্ত্মন্যতিষ্ঠত
তমৃষিং দ্রষ্টুমগমত্সর্বাস্বন্যাসু যোনিষু

শ্বাবিদ্গোধাবরাহাণাং তথৈব মৃগপক্ষিণাম্
শ্বপাকবৈশ্যশূদ্রাণাং ক্ষত্রিয়াণাং চ যোনিষু

স কীটেত্যেবমাভাষ্য ঋষিণা সত্যবাদিনা
প্রতিস্মৃত্যাথ জগ্রাহ পাদৌ মূর্ধ্না কৃতাঞ্জলিঃ

কীট উবাচ
ইদং তদতুলং স্থানমীপ্সিতং দশভির্গুণৈঃ
যদহং প্রাপ্য কীটত্বমাগতো রাজপুত্রতাম্

বহন্তি মামতিবলাঃ কুঞ্জরা হেমমালিনঃ
স্যন্দনেষু চ কাম্বোজা যুক্তাঃ পরমবাজিনঃ

উষ্ট্রাশ্বতরয়ুক্তানি যানানি চ বহন্তি মাম্
সবান্ধবঃ সহামাত্যশ্চাশ্নামি পিশিতৌদনম্

গৃহেষু সুনিবাসেষু সুখেষু শয়নেষু চ
পরার্ধ্যেষু মহাভাগ স্বপামীহ সুপূজিতঃ

সর্বেষ্বপররাত্রেষু সূতমাগধবন্দিনঃ
স্তুবন্তি মাং যথা দেবং মহেন্দ্রং প্রিয়বাদিনঃ

প্রসাদাত্সত্যসংধস্য ভবতোঽমিততেজসঃ
যদহং কীটতাং প্রাপ্য সংপ্রাপ্তো রাজপুত্রতাম্

নমস্তেঽস্তু মহাপ্রাজ্ঞ কিং করোমি প্রশাধি মাম্
ত্বত্তপোবলনির্দিষ্টমিদং হ্যধিগতং ময়া

ব্যাস উবাচ
অর্চিতোঽহং ত্বয়া রাজন্বাগ্ভিরদ্য যদৃচ্ছয়া
অদ্য তে কীটতাং প্রাপ্য স্মৃতির্জাতাজুগুপ্সিতা

ন তু নাশোঽস্তি পাপস্য যত্ত্বয়োপচিতং পুরা
শূদ্রেণার্থপ্রধানেন নৃশংসেনাততায়িনা

মম তে দর্শনং প্রাপ্তং তচ্চৈব সুকৃতং পুরা
তির্যগ্যোনৌ স্ম জাতেন মম চাপ্যর্চনাত্তথা

ইতস্ত্বং রাজপুত্রত্বাদ্ব্রাহ্মণ্যং সমবাপ্স্যসি
গোব্রাহ্মণকৃতে প্রাণান্হুত্বাত্মীয়ান্রণাজিরে

রাজপুত্রসুখং প্রাপ্য ঋতূংশ্চৈবাপ্তদক্ষিণান্
অথ মোদিষ্যসে স্বর্গে ব্রহ্মভূতোঽব্যয়ঃ সুখী

তির্যগ্যোন্যাঃ শূদ্রতামভ্যুপৈতি; শূদ্রো বৈশ্যত্বং ক্ষত্রিয়ত্বং চ বৈশ্যঃ
বৃত্তশ্লাঘী ক্ষত্রিয়ো ব্রাহ্মণত্বং; স্বর্গং পুণ্যং ব্রাহ্মণঃ সাধুবৃত্তঃ