অধ্যায় 120

120.1

ভীষ্ম উবাচ
ক্ষত্রধর্মমনুপ্রাপ্তঃ স্মরন্নেব স বীর্যবান্
ত্যক্ত্বা স কীটতাং রাজংশ্চচার বিপুলং তপঃ

তস্য ধর্মার্থবিদুষো দৃষ্ট্বা তদ্বিপুলং তপঃ
আজগাম দ্বিজশ্রেষ্ঠঃ কৃষ্ণদ্বৈপায়নস্তদা

ব্যাস উবাচ
ক্ষাত্রং চৈব ব্রতং কীট ভূতানাং পরিপালনম্
ক্ষাত্রং চৈব ব্রতং ধ্যায়ংস্ততো বিপ্রত্বমেষ্যসি

পাহি সর্বাঃ প্রজাঃ সম্যক্শুভাশুভবিদাত্মবান্
শুভৈঃ সংবিভজন্কামৈরশুভানাং চ পাবনৈঃ

আত্মবান্ভব সুপ্রীতঃ স্বধর্মচরণে রতঃ
ক্ষাত্রীং তনুং সমুত্সৃজ্য ততো বিপ্রত্বমেষ্যসি

ভীষ্ম উবাচ
সোঽথারণ্যমভিপ্রেত্য পুনরেব যুধিষ্ঠির
মহর্ষের্বচনং শ্রুত্বা প্রজা ধর্মেণ পাল্য চ

অচিরেণৈব কালেন কীটঃ পার্থিবসত্তম
প্রজাপালনধর্মেণ প্রেত্য বিপ্রত্বমাগতঃ

ততস্তং ব্রাহ্মণং দৃষ্ট্বা পুনরেব মহায়শাঃ
আজগাম মহাপ্রাজ্ঞঃ কৃষ্ণদ্বৈপায়নস্তদা

ব্যাস উবাচ
ভো ভো বিপ্রর্ষভ শ্রীমন্মা ব্যথিষ্ঠাঃ কথংচন
শুভকৃচ্ছুভয়োনীষু পাপকৃত্পাপয়োনিষু
উপপদ্যতি ধর্মজ্ঞ যথাধর্মং যথাগমম্

তস্মান্মৃত্যুভয়াত্কীট মা ব্যথিষ্ঠাঃ কথংচন
ধর্মলোপাদ্ভয়ং তে স্যাত্তস্মাদ্ধর্মং চরোত্তমম্

কীট উবাচ
সুখাত্সুখতরং প্রাপ্তো ভগবংস্ত্বত্কৃতে হ্যহম্
ধর্মমূলাং শ্রিয়ং প্রাপ্য পাপ্মা নষ্ট ইহাদ্য মে

ভীষ্ম উবাচ
ভগবদ্বচনাত্কীটো ব্রাহ্মণ্যং প্রাপ্য দুর্লভম্
অকরোত্পৃথিবীং রাজন্যজ্ঞয়ূপশতাঙ্কিতাম্
ততঃ সালোক্যমগমদ্ব্রহ্মণো ব্রহ্মবিত্তমঃ

অবাপ চ পরং কীটঃ পার্থ ব্রহ্ম সনাতনম্
স্বকর্মফলনির্বৃত্তং ব্যাসস্য বচনাত্তদা

তেঽপি যস্মাত্স্বভাবেন হতাঃ ক্ষত্রিয়পুংগবাঃ
সংপ্রাপ্তাস্তে গতিং পুণ্যাং তস্মান্মা শোচ পুত্রক