অধ্যায় 121

121.1

যুধিষ্ঠির উবাচ
বিদ্যা তপশ্চ দানং চ কিমেতেষাং বিশিষ্যতে
পৃচ্ছামি ত্বা সতাং শ্রেষ্ঠ তন্মে ব্রূহি পিতামহ

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
মৈত্রেয়স্য চ সংবাদং কৃষ্ণদ্বৈপায়নস্য চ

কৃষ্ণদ্বৈপায়নো রাজন্নজ্ঞাতচরিতং চরন্
বারাণস্যামুপাতিষ্ঠন্মৈত্রেয়ং স্বৈরিণীকুলে

তমুপস্থিতমাসীনং জ্ঞাত্বা স মুনিসত্তমম্
অর্চিত্বা ভোজয়ামাস মৈত্রেয়োঽশনমুত্তমম্

তদন্নমুত্তমং ভুক্ত্বা গুণবত্সার্বকামিকম্
প্রতিষ্ঠমানোঽস্ময়ত প্রীতঃ কৃষ্ণো মহামনাঃ

তমুত্স্ময়ন্তং সংপ্রেক্ষ্য মৈত্রেয়ঃ কৃষ্ণমব্রবীৎ
কারণং ব্রূহি ধর্মাত্মন্যোঽস্ময়িষ্ঠাঃ কুতশ্চ তে
তপস্বিনো ধৃতিমতঃ প্রমোদঃ সমুপাগতঃ

এতত্পৃচ্ছামি তে বিদ্বন্নভিবাদ্য প্রণম্য চ
আত্মনশ্চ তপোভাগ্যং মহাভাগ্যং তথৈব চ

পৃথগাচরতস্তাত পৃথগাত্মনি চাত্মনোঃ
অল্পান্তরমহং মন্যে বিশিষ্টমপি বা ত্বয়া

ব্যাস উবাচ
অতিচ্ছেদাতিবাদাভ্যাং স্ময়োঽয়ং সমুপাগতঃ
অসত্যং বেদবচনং কস্মাদ্বেদোঽনৃতং বদেৎ

ত্রীণ্যেব তু পদান্যাহুঃ পুরুষস্যোত্তমং ব্রতম্
ন দ্রুহ্যেচ্চৈব দদ্যাচ্চ সত্যং চৈব পরং বদেৎ
ইদানীং চৈব নঃ কৃত্যং পুরস্তাচ্চ পরং স্মৃতম্

অল্পোঽপি তাদৃশো দায়ো ভবত্যুত মহাফলঃ
তৃষিতায় চ যদ্দত্তং হৃদয়েনানসূয়তা

তৃষিতস্তৃষিতায় ত্বং দত্ত্বৈতদশনং মম
অজৈষীর্মহতো লোকান্মহায়জ্ঞৈরিবাভিভো
অতো দানপবিত্রেণ প্রীতোঽস্মি তপসৈব চ

পুণ্যস্যৈব হি তে গন্ধঃ পুণ্যস্যৈব চ দর্শনম্
পুণ্যশ্চ বাতি গন্ধস্তে মন্যে কর্মবিধানতঃ

অধিকং মার্জনাত্তাত তথৈবাপ্যনুলেপনাৎ
শুভং সর্বপবিত্রেভ্যো দানমেব পরং ভবেৎ

যানীমান্যুত্তমানীহ বেদোক্তানি প্রশংসসি
তেষাং শ্রেষ্ঠতমং দানমিতি মে নাস্তি সংশয়ঃ

দানকৃদ্ভিঃ কৃতঃ পন্থা যেন যান্তি মনীষিণঃ
তে হি প্রাণস্য দাতারস্তেষু ধর্মঃ প্রতিষ্ঠিতঃ

যথা বেদাঃ স্বধীতাশ্চ যথা চেন্দ্রিয়সংয়মঃ
সর্বত্যাগো যথা চেহ তথা দানমনুত্তমম্

ত্বং হি তাত সুখাদেব সুখমেষ্যসি শোভনম্
সুখাত্সুখতরপ্রাপ্তিমাপ্নুতে মতিমান্নরঃ

তন্নঃ প্রত্যক্ষমেবেদমুপলব্ধমসংশয়ম্
শ্রীমন্তমাপ্নুবন্ত্যর্থা দানং যজ্ঞস্তথা সুখম্

সুখাদেব পরং দুঃখং দুঃখাদন্যত্পরং সুখম্
দৃশ্যতে হি মহাপ্রাজ্ঞ নিয়তং বৈ স্বভাবতঃ

ত্রিবিধানীহ বৃত্তানি নরস্যাহুর্মনীষিণঃ
পুণ্যমন্যত্পাপমন্যন্ন পুণ্যং ন চ পাপকম্

ন বৃত্তং মন্যতেঽন্যস্য মন্যতেঽন্যস্য পাপকম্
তথা স্বকর্মনির্বৃত্তং ন পুণ্যং ন চ পাপকম্

রমস্বৈধস্ব মোদস্ব দেহি চৈব যজস্ব চ
ন ত্বামভিভবিষ্যন্তি বৈদ্যা ন চ তপস্বিনঃ