অধ্যায় 122

122.1

ভীষ্ম উবাচ
এবমুক্তঃ প্রত্যুবাচ মৈত্রেয়ঃ কর্মপূজকঃ
অত্যন্তং শ্রীমতি কুলে জাতঃ প্রাজ্ঞো বহুশ্রুতঃ

অসংশয়ং মহাপ্রাজ্ঞ যথৈবাত্থ তথৈব তৎ
অনুজ্ঞাতস্তু ভবতা কিংচিদ্ব্রূয়ামহং বিভো

ব্যাস উবাচ
যদ্যদিচ্ছসি মৈত্রেয় যাবদ্যাবদ্যথা তথা
ব্রূহি তাবন্মহাপ্রাজ্ঞ শুশ্রূষে বচনং তব

মৈত্রেয় উবাচ
নির্দোষং নির্মলং চৈব বচনং দানসংহিতম্
বিদ্যাতপোভ্যাং হি ভবান্ভাবিতাত্মা ন সংশয়ঃ

ভবতো ভাবিতাত্মত্বাদ্দায়োঽয়ং সুমহান্মম
ভূয়ো বুদ্ধ্যানুপশ্যামি সুসমৃদ্ধতপা ইব

অপি মে দর্শনাদেব ভবতোঽভ্যুদয়ো মহান্
মন্যে ভবত্প্রসাদোঽয়ং তদ্ধি কর্ম স্বভাবতঃ

তপঃ শ্রুতং চ যোনিশ্চাপ্যেতদ্ব্রাহ্মণ্যকারণম্
ত্রিভির্গুণৈঃ সমুদিতস্ততো ভবতি বৈ দ্বিজঃ

তস্মিংস্তৃপ্তে চ তৃপ্যন্তে পিতরো দৈবতানি চ
ন হি শ্রুতবতাং কিংচিদধিকং ব্রাহ্মণাদৃতে

যথা হি সুকৃতে ক্ষেত্রে ফলং বিন্দতি মানবঃ
এবং দত্ত্বা শ্রুতবতি ফলং দাতা সমশ্নুতে

ব্রাহ্মণশ্চেন্ন বিদ্যেত শ্রুতবৃত্তোপসংহিতঃ
প্রতিগ্রহীতা দানস্য মোঘং স্যাদ্ধনিনাং ধনম্

অদন্হ্যবিদ্বান্হন্ত্যন্নমদ্যমানং চ হন্তি তম্
তং চ হন্যতি যস্যান্নং স হত্বা হন্যতেঽবুধঃ

প্রভুর্হ্যন্নমদন্বিদ্বান্পুনর্জনয়তীশ্বরঃ
স চান্নাজ্জায়তে তস্মাত্সূক্ষ্ম এব ব্যতিক্রমঃ

যদেব দদতঃ পুণ্যং তদেব প্রতিগৃহ্ণতঃ
ন হ্যেকচক্রং বর্তেত ইত্যেবমৃষয়ো বিদুঃ

যত্র বৈ ব্রাহ্মণাঃ সন্তি শ্রুতবৃত্তোপসংহিতাঃ
তত্র দানফলং পুণ্যমিহ চামুত্র চাশ্নুতে

যে যোনিশুদ্ধাঃ সততং তপস্যভিরতা ভৃশম্
দানাধ্যয়নসংপন্নাস্তে বৈ পূজ্যতমাঃ সদা

তৈর্হি সদ্ভিঃ কৃতঃ পন্থাশ্চেতয়ানো ন মুহ্যতে
তে হি স্বর্গস্য নেতারো যজ্ঞবাহাঃ সনাতনাঃ