Utshovঅধ্যায় 123
123.1
ভীষ্ম উবাচ
এবমুক্তঃ স ভগবান্মৈত্রেয়ং প্রত্যভাষত
দিষ্ট্যৈবং ত্বং বিজানাসি দিষ্ট্যা তে বুদ্ধিরীদৃশী
লোকো হ্যয়ং গুণানেব ভূয়িষ্ঠং স্ম প্রশংসতি
123.2
রূপমানবয়োমানশ্রীমানাশ্চাপ্যসংশয়ম্
দিষ্ট্যা নাভিভবন্তি ত্বাং দৈবস্তেঽয়মনুগ্রহঃ
যত্তে ভৃশতরং দানাদ্বর্তয়িষ্যামি তচ্ছৃণু
123.3
যানীহাগমশাস্ত্রাণি যাশ্চ কাশ্চিত্প্রবৃত্তয়ঃ
তানি বেদং পুরস্কৃত্য প্রবৃত্তানি যথাক্রমম্
123.4
অহং দানং প্রশংসামি ভবানপি তপঃশ্রুতে
তপঃ পবিত্রং বেদস্য তপঃ স্বর্গস্য সাধনম্
123.5
তপসা মহদাপ্নোতি বিদ্যয়া চেতি নঃ শ্রুতম্
তপসৈব চাপনুদেদ্যচ্চান্যদপি দুষ্কৃতম্
123.6
যদ্যদ্ধি কিংচিত্সংধায় পুরুষস্তপ্যতে তপঃ
সর্বমেতদবাপ্নোতি ব্রাহ্মণো বেদপারগঃ
123.7
দুরন্বয়ং দুষ্প্রধৃষ্যং দুরাপং দুরতিক্রমম্
সর্বং বৈ তপসাভ্যেতি তপো হি বলবত্তরম্
123.8
সুরাপোঽসংমতাদায়ী ভ্রূণহা গুরুতল্পগঃ
তপসা তরতে সর্বমেনসশ্চ প্রমুচ্যতে
123.9
সর্ববিদ্যস্তু চক্ষুষ্মানপি যাদৃশতাদৃশঃ
তপস্বিনৌ চ তাবাহুস্তাভ্যাং কার্যং সদা নমঃ
123.10
সর্বে পূজ্যাঃ শ্রুতধনাস্তথৈব চ তপস্বিনঃ
দানপ্রদাঃ সুখং প্রেত্য প্রাপ্নুবন্তীহ চ শ্রিয়ম্
123.11
ইমং চ ব্রহ্মলোকং চ লোকং চ বলবত্তরম্
অন্নদানৈঃ সুকৃতিনঃ প্রতিপদ্যন্তি লৌকিকাঃ
123.12
পূজিতাঃ পূজয়ন্ত্যেতান্মানিতা মানয়ন্তি চ
অদাতা যত্র যত্রৈতি সর্বতঃ সংপ্রণুদ্যতে
123.13
অকর্তা চৈব কর্তা চ লভতে যস্য যাদৃশম্
যদ্যেবোর্ধ্বং যদ্যবাক্চ ত্বং লোকমভিয়াস্যসি
123.14
প্রাপ্স্যসে ত্বন্নপানানি যানি দাস্যসি কানিচিৎ
মেধাব্যসি কুলে জাতঃ শ্রুতবাননৃশংসবান্
123.15
কৌমারদারব্রতবান্মৈত্রেয় নিরতো ভব
এতদ্গৃহাণ প্রথমং প্রশস্তং গৃহমেধিনাম্
123.16
যো ভর্তা বাসিতাতুষ্টো ভর্তুস্তুষ্টা চ বাসিতা
যস্মিন্নেবং কুলে সর্বং কল্যাণং তত্র বর্ততে
123.17
অদ্ভির্গাত্রান্মলমিব তমোঽগ্নিপ্রভয়া যথা
দানেন তপসা চৈব সর্বপাপমপোহ্যতে
123.18
স্বস্তি প্রাপ্নুহি মৈত্রেয় গৃহান্সাধু ব্রজাম্যহম্
এতন্মনসি কর্তব্যং শ্রেয় এবং ভবিষ্যতি
123.19
তং প্রণম্যাথ মৈত্রেয়ঃ কৃত্বা চাভিপ্রদক্ষিণম্
স্বস্তি প্রাপ্নোতু ভগবানিত্যুবাচ কৃতাঞ্জলিঃ