অধ্যায় 124

124.1

যুধিষ্ঠির উবাচ
সত্স্ত্রীণাং সমুদাচারং সর্বধর্মভৃতাং বর
শ্রোতুমিচ্ছাম্যহং ত্বত্তস্তং মে ব্রূহি পিতামহ

ভীষ্ম উবাচ
সর্বজ্ঞাং সর্বধর্মজ্ঞাং দেবলোকে মনস্বিনীম্
কৈকেয়ী সুমনা নাম শাণ্ডিলীং পর্যপৃচ্ছত

কেন বৃত্তেন কল্যাণি সমাচারেণ কেন বা
বিধূয় সর্বপাপানি দেবলোকং ত্বমাগতা

হুতাশনশিখেব ত্বং জ্বলমানা স্বতেজসা
সুতা তারাধিপস্যেব প্রভয়া দিবমাগতা

অরজাংসি চ বস্ত্রাণি ধারয়ন্তী গতক্লমা
বিমানস্থা শুভে ভাসি সহস্রগুণমোজসা

ন ত্বমল্পেন তপসা দানেন নিয়মেন বা
ইমং লোকমনুপ্রাপ্তা তস্মাত্তত্ত্বং বদস্ব মে

ইতি পৃষ্টা সুমনয়া মধুরং চারুহাসিনী
শাণ্ডিলী নিভৃতং বাক্যং সুমনামিদমব্রবীৎ

নাহং কাষায়বসনা নাপি বল্কলধারিণী
ন চ মুণ্ডা ন জটিলা ভূত্বা দেবত্বমাগতা

অহিতানি চ বাক্যানি সর্বাণি পরুষাণি চ
অপ্রমত্তা চ ভর্তারং কদাচিন্নাহমব্রুবম্

দেবতানাং পিতৄণাং চ ব্রাহ্মণানাং চ পূজনে
অপ্রমত্তা সদায়ুক্তা শ্বশ্রূশ্বশুরবর্তিনী

পৈশুন্যে ন প্রবর্তামি ন মমৈতন্মনোগতম্
অদ্বারে ন চ তিষ্ঠামি চিরং ন কথয়ামি চ

অসদ্বা হসিতং কিংচিদহিতং বাপি কর্মণা
রহস্যমরহস্যং বা ন প্রবর্তামি সর্বথা

কার্যার্থে নির্গতং চাপি ভর্তারং গৃহমাগতম্
আসনেনোপসংয়োজ্য পূজয়ামি সমাহিতা

যদ্যচ্চ নাভিজানাতি যদ্ভোজ্যং নাভিনন্দতি
ভক্ষ্যং বাপ্যথ বা লেহ্যং তত্সর্বং বর্জয়াম্যহম্

কুটুম্বার্থে সমানীতং যত্কিংচিত্কার্যমেব তু
প্রাতরুত্থায় তত্সর্বং কারয়ামি করোমি চ

প্রবাসং যদি মে ভর্তা যাতি কার্যেণ কেনচিৎ
মঙ্গলৈর্বহুভির্যুক্তা ভবামি নিয়তা সদা

অঞ্জনং রোচনাং চৈব স্নানং মাল্যানুলেপনম্
প্রসাধনং চ নিষ্ক্রান্তে নাভিনন্দামি ভর্তরি

নোত্থাপয়ামি ভর্তারং সুখসুপ্তমহং সদা
আতুরেষ্বপি কার্যেষু তেন তুষ্যতি মে মনঃ

নায়াসয়ামি ভর্তারং কুটুম্বার্থে চ সর্বদা
গুপ্তগুহ্যা সদা চাস্মি সুসংমৃষ্টনিবেশনা

ইমং ধর্মপথং নারী পালয়ন্তী সমাহিতা
অরুন্ধতীব নারীণাং স্বর্গলোকে মহীয়তে

ভীষ্ম উবাচ
এতদাখ্যায় সা দেবী সুমনায়ৈ তপস্বিনী
পতিধর্মং মহাভাগা জগামাদর্শনং তদা

যশ্চেদং পাণ্ডবাখ্যানং পঠেত্পর্বণি পর্বণি
স দেবলোকং সংপ্রাপ্য নন্দনে সুসুখং বসেৎ