Utshovঅধ্যায় 125
125.1
যুধিষ্ঠির উবাচ
সাম্না বাপি প্রদানে বা জ্যায়ঃ কিং ভবতো মতম্
প্রব্রূহি ভরতশ্রেষ্ঠ যদত্র ব্যতিরিচ্যতে
125.2
ভীষ্ম উবাচ
সাম্না প্রসাদ্যতে কশ্চিদ্দানেন চ তথাপরঃ
পুরুষঃ প্রকৃতিং জ্ঞাত্বা তয়োরেকতরং ভজেৎ
125.3
গুণাংস্তু শৃণু মে রাজন্সান্ত্বস্য ভরতর্ষভ
দারুণান্যপি ভূতানি সান্ত্বেনারাধয়েদ্যথা
125.4
অত্রাপ্যুদাহরন্তীমমিতিহাসং পুরাতনম্
গৃহীত্বা রক্ষসা মুক্তো দ্বিজাতিঃ কাননে যথা
125.5
কশ্চিত্তু বুদ্ধিসংপন্নো ব্রাহ্মণো বিজনে বনে
গৃহীতঃ কৃচ্ছ্রমাপন্নো রক্ষসা ভক্ষয়িষ্যতা
125.6
স বুদ্ধিশ্রুতসংপন্নস্তং দৃষ্ট্বাতীব ভীষণম্
সামৈবাস্মিন্প্রয়ুয়ুজে ন মুমোহ ন বিব্যথে
125.7
রক্ষস্তু বাচা সংপূজ্য প্রশ্নং পপ্রচ্ছ তং দ্বিজম্
মোক্ষ্যসে ব্রূহি মে প্রশ্নং কেনাস্মি হরিণঃ কৃশঃ
125.8
মুহূর্তমথ সংচিন্ত্য ব্রাহ্মণস্তস্য রক্ষসঃ
আভির্গাথাভিরব্যগ্রঃ প্রশ্নং প্রতিজগাদ হ
125.9
বিদেশস্থো বিলোকস্থো বিনা নূনং সুহৃজ্জনৈঃ
বিষয়ানতুলান্ভুঙ্ক্ষে তেনাসি হরিণঃ কৃশঃ
125.10
নূনং মিত্রাণি তে রক্ষঃ সাধূপচরিতান্যপি
স্বদোষাদপরজ্যন্তে তেনাসি হরিণঃ কৃশঃ
125.11
ধনৈশ্বর্যাধিকাঃ স্তব্ধাস্ত্বদ্গুণৈঃ পরমাবরাঃ
অবজানন্তি নূনং ত্বাং তেনাসি হরিণঃ কৃশঃ
125.12
গুণবান্বিগুণানন্যান্নূনং পশ্যসি সত্কৃতান্
প্রাজ্ঞোঽপ্রাজ্ঞান্বিনীতাত্মা তেনাসি হরিণঃ কৃশঃ
125.13
অবৃত্ত্যা ক্লিশ্যমানোঽপি বৃত্ত্যুপায়ান্বিগর্হয়ন্
মাহাত্ম্যাদ্ব্যথসে নূনং তেনাসি হরিণঃ কৃশঃ
125.14
সংপীড্যাত্মানমার্যত্বাত্ত্বয়া কশ্চিদুপস্কৃতঃ
জিতং ত্বাং মন্যতে সাধো তেনাসি হরিণঃ কৃশঃ
125.15
ক্লিশ্যমানান্বিমার্গেষু কামক্রোধাবৃতাত্মনঃ
মন্যে নু ধ্যায়সি জনাংস্তেনাসি হরিণঃ কৃশঃ
125.16
প্রাজ্ঞৈঃ সংভাবিতো নূনং নপ্রাজ্ঞৈরুপসংহিতঃ
হ্রীমানমর্ষী দুর্বৃত্তৈস্তেনাসি হরিণঃ কৃশঃ
125.17
নূনং মিত্রমুখঃ শত্রুঃ কশ্চিদার্যবদাচরন্
বঞ্চয়িত্বা গতস্ত্বাং বৈ তেনাসি হরিণঃ কৃশঃ
125.18
প্রকাশার্থগতির্নূনং রহস্যকুশলঃ কৃতী
তজ্জ্ঞৈর্ন পূজ্যসে নূনং তেনাসি হরিণঃ কৃশঃ
125.19
অসত্স্বভিনিবিষ্টেষু ব্রুবতো মুক্তসংশয়ম্
গুণাস্তে ন বিরাজন্তে তেনাসি হরিণঃ কৃশঃ
125.20
ধনবুদ্ধিশ্রুতৈর্হীনঃ কেবলং তেজসান্বিতঃ
মহত্প্রার্থয়সে নূনং তেনাসি হরিণঃ কৃশঃ
125.21
তপঃপ্রণিহিতাত্মানং মন্যে ত্বারণ্যকাঙ্ক্ষিণম্
বন্ধুবর্গো ন গৃহ্ণাতি তেনাসি হরিণঃ কৃশঃ
125.22
নূনমর্থবতাং মধ্যে তব বাক্যমনুত্তমম্
ন ভাতি কালেঽভিহিতং তেনাসি হরিণঃ কৃশঃ
125.23
দৃঢপূর্বশ্রুতং মূর্খং কুপিতং হৃদয়প্রিয়ম্
অনুনেতুং ন শক্নোষি তেনাসি হরিণঃ কৃশঃ
125.24
নূনমাসংজয়িত্বা তে কৃত্যে কস্মিংশ্চিদীপ্সিতে
কশ্চিদর্থয়তেঽত্যর্থং তেনাসি হরিণঃ কৃশঃ
125.25
নূনং ত্বা স্বগুণাপেক্ষং পূজয়ানং সুহৃদ্ধ্রুবম্
ময়ার্থ ইতি জানাতি তেনাসি হরিণঃ কৃশঃ
125.26
অন্তর্গতমভিপ্রায়ং ন নূনং লজ্জয়েচ্ছসি
বিবক্তুং প্রাপ্তিশৈথিল্যাত্তেনাসি হরিণঃ কৃশঃ
125.27
নানাবুদ্ধিরুচীঁল্লোকে মনুষ্যান্নূনমিচ্ছসি
গ্রহীতুং স্বগুণৈঃ সর্বাংস্তেনাসি হরিণঃ কৃশঃ
125.28
অবিদ্বান্ভীরুরল্পার্থো বিদ্যাবিক্রমদানজম্
যশঃ প্রার্থয়সে নূনং তেনাসি হরিণঃ কৃশঃ
125.29
চিরাভিলষিতং কিংচিত্ফলমপ্রাপ্তমেব তে
কৃতমন্যৈরপহৃতং তেনাসি হরিণঃ কৃশঃ
125.30
নূনমাত্মকৃতং দোষমপশ্যন্কিংচিদাত্মনি
অকারণেঽভিশস্তোঽসি তেনাসি হরিণঃ কৃশঃ
125.31
সুহৃদামপ্রমত্তানামপ্রমোক্ষ্যার্থহানিজম্
দুঃখমর্থগুণৈর্হীনং তেনাসি হরিণঃ কৃশঃ
125.32
সাধূন্গৃহস্থান্দৃষ্ট্বা চ তথাসাধূন্বনেচরান্
মুক্তাংশ্চাবসথে সক্তাংস্তেনাসি হরিণঃ কৃশঃ
125.33
ধর্ম্যমর্থং চ কালে চ দেশে চাভিহিতং বচঃ
ন প্রতিষ্ঠতি তে নূনং তেনাসি হরিণঃ কৃশঃ
125.34
দত্তানকুশলৈরর্থান্মনীষী সংজিজীবিষুঃ
প্রাপ্য বর্তয়সে নূনং তেনাসি হরিণঃ কৃশঃ
125.35
পাপান্বিবর্ধতো দৃষ্ট্বা কল্যাণাংশ্চাবসীদতঃ
ধ্রুবং মৃগয়সে যোগ্যং তেনাসি হরিণঃ কৃশঃ
125.36
পরস্পরবিরুদ্ধানাং প্রিয়ং নূনং চিকীর্ষসি
সুহৃদামবিরোধেন তেনাসি হরিণঃ কৃশঃ
125.37
শ্রোত্রিয়াংশ্চ বিকর্মস্থান্প্রাজ্ঞাংশ্চাপ্যজিতেন্দ্রিয়ান্
মন্যেঽনুধ্যায়সি জনাংস্তেনাসি হরিণঃ কৃশঃ
125.38
এবং সংপূজিতং রক্ষো বিপ্রং তং প্রত্যপূজয়ৎ
সখায়মকরোচ্চৈনং সংয়োজ্যার্থৈর্মুমোচ হ