Utshovঅধ্যায় 126
126.1
যুধিষ্ঠির উবাচ
পিতামহ মহাপ্রাজ্ঞ সর্বশাস্ত্রবিশারদ
আগমৈর্বহুভিঃ স্ফীতো ভবান্নঃ প্রথিতঃ কুলে
126.2
ত্বত্তো ধর্মার্থসংয়ুক্তমায়ত্যাং চ সুখোদয়ম্
আশ্চর্যভূতং লোকস্য শ্রোতুমিচ্ছাম্যরিংদম
126.3
অয়ং চ কালঃ সংপ্রাপ্তো দুর্লভজ্ঞাতিবান্ধবঃ
শাস্তা চ ন হি নঃ কশ্চিত্ত্বামৃতে ভরতর্ষভ
126.4
যদি তেঽহমনুগ্রাহ্যো ভ্রাতৃভিঃ সহিতোঽনঘ
বক্তুমর্হসি নঃ প্রশ্নং যত্ত্বাং পৃচ্ছামি পার্থিব
126.5
অয়ং নারায়ণঃ শ্রীমান্সর্বপার্থিবসংমতঃ
ভবন্তং বহুমানেন প্রশ্রয়েণ চ সেবতে
126.6
অস্য চৈব সমক্ষং ত্বং পার্থিবানাং চ সর্বশঃ
ভ্রাতৄণাং চ প্রিয়ার্থং মে স্নেহাদ্ভাষিতুমর্হসি
126.7
বৈশংপায়ন উবাচ
তস্য তদ্বচনং শ্রুত্বা স্নেহাদাগতসংভ্রমঃ
ভীষ্মো ভাগীরথীপুত্র ইদং বচনমব্রবীৎ
126.8
হন্ত তে কথয়িষ্যামি কথামতিমনোরমাম্
অস্য বিষ্ণোঃ পুরা রাজন্প্রভাবোঽয়ং ময়া শ্রুতঃ
126.9
যশ্চ গোবৃষভাঙ্কস্য প্রভাবস্তং চ মে শৃণু
রুদ্রাণ্যাঃ সংশয়ো যশ্চ দংপত্যোস্তং চ মে শৃণু
126.10
ব্রতং চচার ধর্মাত্মা কৃষ্ণো দ্বাদশবার্ষিকম্
দীক্ষিতং চাগতৌ দ্রষ্টুমুভৌ নারদপর্বতৌ
126.11
কৃষ্ণদ্বৈপায়নশ্চৈব ধৌম্যশ্চ জপতাং বরঃ
দেবলঃ কাশ্যপশ্চৈব হস্তিকাশ্যপ এব চ
126.12
অপরে ঋষয়ঃ সন্তো দীক্ষাদমসমন্বিতাঃ
শিষ্যৈরনুগতাঃ সর্বে দেবকল্পৈস্তপোধনৈঃ
126.13
তেষামতিথিসত্কারমর্চনীয়ং কুলোচিতম্
দেবকীতনয়ঃ প্রীতো দেবকল্পমকল্পয়ৎ
126.14
হরিতেষু সুবর্ণেষু বর্হিষ্কেষু নবেষু চ
উপোপবিবিশুঃ প্রীতা বিষ্টরেষু মহর্ষয়ঃ
126.15
কথাশ্চক্রুস্ততস্তে তু মধুরা ধর্মসংহিতাঃ
রাজর্ষীণাং সুরাণাং চ যে বসন্তি তপোধনাঃ
126.16
ততো নারায়ণং তেজো ব্রতচর্যেন্ধনোত্থিতম্
বক্ত্রান্নিঃসৃত্য কৃষ্ণস্য বহ্নিরদ্ভুতকর্মণঃ
126.17
সোঽগ্নির্দদাহ তং শৈলং সদ্রুমং সলতাক্ষুপম্
সপক্ষিমৃগসংঘাতং সশ্বাপদসরীসৃপম্
126.18
মৃগৈশ্চ বিবিধাকারৈর্হাহাভূতমচেতনম্
শিখরং তস্য শৈলস্য মথিতং দীপ্তদর্শনম্
126.19
স তু বহ্নির্মহাজ্বালো দগ্ধ্বা সর্বমশেষতঃ
বিষ্ণোঃ সমীপমাগম্য পাদৌ শিষ্যবদস্পৃশৎ
126.20
ততো বিষ্ণুর্বনং দৃষ্ট্বা নির্দগ্ধমরিকর্শনঃ
সৌম্যৈর্দৃষ্টিনিপাতৈস্তত্পুনঃ প্রকৃতিমানয়ৎ
126.21
তথৈব স গিরির্ভূয়ঃ প্রপুষ্পিতলতাদ্রুমঃ
সপক্ষিগণসংঘুষ্টঃ সশ্বাপদসরীসৃপঃ
126.22
তদদ্ভুতমচিন্ত্যং চ দৃষ্ট্বা মুনিগণস্তদা
বিস্মিতো হৃষ্টলোমা চ বভূবাস্রাবিলেক্ষণঃ
126.23
ততো নারায়ণো দৃষ্ট্বা তানৃষীন্বিস্ময়ান্বিতান্
প্রশ্রিতং মধুরং স্নিগ্ধং পপ্রচ্ছ বদতাং বরঃ
126.24
কিমস্য ঋষিপূগস্য ত্যক্তসঙ্গস্য নিত্যশঃ
নির্মমস্যাগমবতো বিস্ময়ঃ সমুপাগতঃ
126.25
এতং মে সংশয়ং সর্বং যাথাতথ্যমনিন্দিতাঃ
ঋষয়ো বক্তুমর্হন্তি নিশ্চিতার্থং তপোধনাঃ
126.26
ঋষয় ঊচুঃ
ভবান্বিসৃজতে লোকান্ভবান্সংহরতে পুনঃ
ভবাঞ্শীতং ভবানুষ্ণং ভবানেব প্রবর্ষতি
126.27
পৃথিব্যাং যানি ভূতানি স্থাবরাণি চরাণি চ
তেষাং পিতা ত্বং মাতা চ প্রভুঃ প্রভব এব চ
126.28
এতন্নো বিস্ময়করং প্রশংস মধুসূদন
ত্বমেবার্হসি কল্যাণ বক্তুং বহ্নের্বিনির্গমম্
126.29
ততো বিগতসংত্রাসা বয়মপ্যরিকর্শন
যচ্ছ্রুতং যচ্চ দৃষ্টং নস্তত্প্রবক্ষ্যামহে হরে
126.30
বাসুদেব উবাচ
এতত্তদ্বৈষ্ণবং তেজো মম বক্ত্রাদ্বিনিঃসৃতম্
কৃষ্ণবর্ত্মা যুগান্তাভো যেনায়ং মথিতো গিরিঃ
126.31
ঋষয়শ্চার্তিমাপন্না জিতক্রোধা জিতেন্দ্রিয়াঃ
ভবন্তো ব্যথিতাশ্চাসন্দেবকল্পাস্তপোধনাঃ
126.32
ব্রতচর্যাপরীতস্য তপস্বিব্রতসেবয়া
মম বহ্নিঃ সমুদ্ভূতো ন বৈ ব্যথিতুমর্হথ
126.33
ব্রতং চর্তুমিহায়াতস্ত্বহং গিরিমিমং শুভম্
পুত্রং চাত্মসমং বীর্যে তপসা স্রষ্টুমাগতঃ
126.34
ততো মমাত্মা যো দেহে সোঽগ্নির্ভূত্বা বিনিঃসৃতঃ
গতশ্চ বরদং দ্রষ্টুং সর্বলোকপিতামহম্
126.35
তেন চাত্মানুশিষ্টো মে পুত্রত্বে মুনিসত্তমাঃ
তেজসোঽর্ধেন পুত্রস্তে ভবিতেতি বৃষধ্বজঃ
126.36
সোঽয়ং বহ্নিরুপাগম্য পাদমূলে মমান্তিকম্
শিষ্যবত্পরিচর্যাথ শান্তঃ প্রকৃতিমাগতঃ
126.37
এতদস্য রহস্যং বঃ পদ্মনাভস্য ধীমতঃ
ময়া প্রেম্ণা সমাখ্যাতং ন ভীঃ কার্যা তপোধনাঃ
126.38
সর্বত্র গতিরব্যগ্রা ভবতাং দীর্ঘদর্শনাঃ
তপস্বিব্রতসংদীপ্তা জ্ঞানবিজ্ঞানশোভিতাঃ
126.39
যচ্ছ্রুতং যচ্চ বো দৃষ্টং দিবি বা যদি বা ভুবি
আশ্চর্যং পরমং কিংচিত্তদ্ভবন্তো ব্রুবন্তু মে
126.40
তস্যামৃতনিকাশস্য বাঙ্মধোরস্তি মে স্পৃহা
ভবদ্ভিঃ কথিতস্যেহ তপোবননিবাসিভিঃ
126.41
যদ্যপ্যহমদৃষ্টং বা দিব্যমদ্ভুতদর্শনম্
দিবি বা ভুবি বা কিংচিত্পশ্যাম্যমলদর্শনাঃ
126.42
প্রকৃতিঃ সা মম পরা ন ক্বচিত্প্রতিহন্যতে
ন চাত্মগতমৈশ্বর্যমাশ্চর্যং প্রতিভাতি মে
126.43
শ্রদ্ধেয়ঃ কথিতো হ্যর্থঃ সজ্জনশ্রবণং গতঃ
চিরং তিষ্ঠতি মেদিন্যাং শৈলে লেখ্যমিবার্পিতম্
126.44
তদহং সজ্জনমুখান্নিঃসৃতং তত্সমাগমে
কথয়িষ্যাম্যহরহর্বুদ্ধিদীপকরং নৃণাম্
126.45
ততো মুনিগণাঃ সর্বে প্রশ্রিতাঃ কৃষ্ণসংনিধৌ
নেত্রৈঃ পদ্মদলপ্রখ্যৈরপশ্যন্ত জনার্দনম্
126.46
বর্ধয়ন্তস্তথৈবান্যে পূজয়ন্তস্তথাপরে
বাগ্ভিরৃগ্ভূষিতার্থাভিঃ স্তুবন্তো মধুসূদনম্
126.47
ততো মুনিগণাঃ সর্বে নারদং দেবদর্শনম্
তদা নিয়োজয়ামাসুর্বচনে বাক্যকোবিদম্
126.48
যদাশ্চর্যমচিন্ত্যং চ গিরৌ হিমবতি প্রভো
অনুভূতং মুনিগণৈস্তীর্থয়াত্রাপরায়ণৈঃ
126.49
তদ্ভবানৃষিসংঘস্য হিতার্থং সর্বচোদিতঃ
যথাদৃষ্টং হৃষীকেশে সর্বমাখ্যাতুমর্হতি
126.50
এবমুক্তঃ স মুনিভির্নারদো ভগবানৃষিঃ
কথয়ামাস দেবর্ষিঃ পূর্ববৃত্তাং কথাং শুভাম্