Utshovঅধ্যায় 127
127.1
ভীষ্ম উবাচ
ততো নারায়ণসুহৃন্নারদো ভগবানৃষিঃ
শংকরস্যোময়া সার্ধং সংবাদং প্রত্যভাষত
127.2
তপশ্চচার ধর্মাত্মা বৃষভাঙ্কঃ সুরেশ্বরঃ
পুণ্যে গিরৌ হিমবতি সিদ্ধচারণসেবিতে
127.3
নানৌষধিয়ুতে রম্যে নানাপুষ্পসমাকুলে
অপ্সরোগণসংকীর্ণে ভূতসংঘনিষেবিতে
127.4
তত্র দেবো মুদা যুক্তো ভূতসংঘশতৈর্বৃতঃ
নানারূপৈর্বিরূপৈশ্চ দিব্যৈরদ্ভুতদর্শনৈঃ
127.5
সিংহব্যাঘ্রগজপ্রখ্যৈঃ সর্বজাতিসমন্বিতৈঃ
ক্রোষ্টুকদ্বীপিবদনৈরৃক্ষর্ষভমুখৈস্তথা
127.6
উলূকবদনৈর্ভীমৈঃ শ্যেনভাসমুখৈস্তথা
নানাবর্ণমৃগপ্রখ্যৈঃ সর্বজাতিসমন্বয়ৈঃ
কিংনরৈর্দেবগন্ধর্বৈর্যক্ষভূতগণৈস্তথা
127.7
দিব্যপুষ্পসমাকীর্ণং দিব্যমালাবিভূষিতম্
দিব্যচন্দনসংয়ুক্তং দিব্যধূপেন ধূপিতম্
তত্সদো বৃষভাঙ্কস্য দিব্যবাদিত্রনাদিতম্
127.8
মৃদঙ্গপণবোদ্ঘুষ্টং শঙ্খভেরীনিনাদিতম্
নৃত্যদ্ভির্ভূতসংঘৈশ্চ বর্হিণৈশ্চ সমন্ততঃ
127.9
প্রনৃত্তাপ্সরসং দিব্যং দিব্যস্ত্রীগণসেবিতম্
দৃষ্টিকান্তমনির্দেশ্যং দিব্যমদ্ভুতদর্শনম্
127.10
স গিরিস্তপসা তস্য ভূতেশস্য ব্যরোচত
127.11
স্বাধ্যায়পরমৈর্বিপ্রৈর্ব্রহ্মঘোষৈর্বিনাদিতঃ
ষট্পদৈরুপগীতৈশ্চ মাধবাপ্রতিমো গিরিঃ
127.12
তং মহোত্সবসংকাশং ভীমরূপধরং পুনঃ
দৃষ্ট্বা মুনিগণস্যাসীত্পরা প্রীতির্জনার্দন
127.13
মুনয়শ্চ মহাভাগাঃ সিদ্ধাশ্চৈবোর্ধ্বরেতসঃ
মরুতো বসবঃ সাধ্যা বিশ্বেদেবাঃ সনাতনাঃ
127.14
যক্ষা নাগাঃ পিশাচাশ্চ লোকপালা হুতাশনাঃ
ভাবাশ্চ সর্বে ন্যগ্ভূতাস্তত্রৈবাসন্সমাগতাঃ
127.15
ঋতবঃ সর্বপুষ্পৈশ্চ ব্যকিরন্ত মহাদ্ভুতৈঃ
ওষধ্যো জ্বলমানাশ্চ দ্যোতয়ন্তি স্ম তদ্বনম্
127.16
বিহগাশ্চ মুদা যুক্তাঃ প্রানৃত্যন্ব্যনদংশ্চ হ
গিরিপৃষ্ঠেষু রম্যেষু ব্যাহরন্তো জনপ্রিয়াঃ
127.17
তত্র দেবো গিরিতটে দিব্যধাতুবিভূষিতে
পর্যঙ্ক ইব বিভ্রাজন্নুপবিষ্টো মহামনাঃ
127.18
ব্যাঘ্রচর্মাম্বরধরঃ সিংহচর্মোত্তরচ্ছদঃ
ব্যালয়জ্ঞোপবীতী চ লোহিতাঙ্গদভূষণঃ
127.19
হরিশ্মশ্রুর্জটী ভীমো ভয়কর্তা সুরদ্বিষাম্
অভয়ঃ সর্বভূতানাং ভক্তানাং বৃষভধ্বজঃ
127.20
দৃষ্ট্বা তমৃষয়ঃ সর্বে শিরোভিরবনীং গতাঃ
বিমুক্তাঃ সর্বপাপেভ্যঃ ক্ষান্তা বিগতকল্মষাঃ
127.21
তস্য ভূতপতেঃ স্থানং ভীমরূপধরং বভৌ
অপ্রধৃষ্যতরং চৈব মহোরগসমাকুলম্
127.22
ক্ষণেনৈবাভবত্সর্বমদ্ভুতং মধুসূদন
তত্সদো বৃষভাঙ্কস্য ভীমরূপধরং বভৌ
127.23
তমভ্যয়াচ্ছৈলসুতা ভূতস্ত্রীগণসংবৃতা
হরতুল্যাম্বরধরা সমানব্রতচারিণী
127.24
বিভ্রতী কলশং রৌক্মং সর্বতীর্থজলোদ্ভবম্
গিরিস্রবাভিঃ পুণ্যাভিঃ সর্বতোঽনুগতা শুভা
127.25
পুষ্পবৃষ্ট্যাভিবর্ষন্তী গন্ধৈর্বহুবিধৈস্তথা
সেবন্তী হিমবত্পার্শ্বং হরপার্শ্বমুপাগমৎ
127.26
ততঃ স্ময়ন্তী পাণিভ্যাং নর্মার্থং চারুদর্শনা
হরনেত্রে শুভে দেবী সহসা সা সমাবৃণোৎ
127.27
সংবৃতাভ্যাং তু নেত্রাভ্যাং তমোভূতমচেতনম্
নির্হোমং নির্বষট্কারং তত্সদঃ সহসাভবৎ
127.28
জনশ্চ বিমনাঃ সর্বো ভয়ত্রাসসমন্বিতঃ
নিমীলিতে ভূতপতৌ নষ্টসূর্য ইবাভবৎ
127.29
ততো বিতিমিরো লোকঃ ক্ষণেন সমপদ্যত
জ্বালা চ মহতী দীপ্তা ললাটাত্তস্য নিঃসৃতা
127.30
তৃতীয়ং চাস্য সংভূতং নেত্রমাদিত্যসংনিভম্
যুগান্তসদৃশং দীপ্তং যেনাসৌ মথিতো গিরিঃ
127.31
ততো গিরিসুতা দৃষ্ট্বা দীপ্তাগ্নিসদৃশেক্ষণম্
হরং প্রণম্য শিরসা দদর্শায়তলোচনা
127.32
দহ্যমানে বনে তস্মিন্সশালসরলদ্রুমে
সচন্দনবনে রম্যে দিব্যৌষধিবিদীপিতে
127.33
মৃগয়ূথৈর্দ্রুতৈর্ভীতৈর্হরপার্শ্বমুপাগতৈঃ
শরণং চাপ্যবিন্দদ্ভিস্তত্সদঃ সংকুলং বভৌ
127.34
ততো নভঃস্পৃশজ্বালো বিদ্যুল্লোলার্চিরুজ্জ্বলঃ
দ্বাদশাদিত্যসদৃশো যুগান্তাগ্নিরিবাপরঃ
127.35
ক্ষণেন তেন দগ্ধঃ স হিমবানভবন্নগঃ
সধাতুশিখরাভোগো দীনদগ্ধবনৌষধিঃ
127.36
তং দৃষ্ট্বা মথিতং শৈলং শৈলরাজসুতা ততঃ
ভগবন্তং প্রপন্না সা সাঞ্জলিপ্রগ্রহা স্থিতা
127.37
উমাং শর্বস্তদা দৃষ্ট্বা স্ত্রীভাবাগতমার্দবাম্
পিতুর্দৈন্যমনিচ্ছন্তীং প্রীত্যাপশ্যত্ততো গিরিম্
127.38
ততোঽভবত্পুনঃ সর্বঃ প্রকৃতিস্থঃ সুদর্শনঃ
প্রহৃষ্টবিহগশ্চৈব প্রপুষ্পিতবনদ্রুমঃ
127.39
প্রকৃতিস্থং গিরিং দৃষ্ট্বা প্রীতা দেবী মহেশ্বরম্
উবাচ সর্বভূতানাং পতিং পতিমনিন্দিতা
127.40
ভগবন্সর্বভূতেশ শূলপাণে মহাব্রত
সংশয়ো মে মহাঞ্জাতস্তং মে ব্যাখ্যাতুমর্হসি
127.41
কিমর্থং তে ললাটে বৈ তৃতীয়ং নেত্রমুত্থিতম্
কিমর্থং চ গিরির্দগ্ধঃ সপক্ষিগণকাননঃ
127.42
কিমর্থং চ পুনর্দেব প্রকৃতিস্থঃ ক্ষণাত্কৃতঃ
তথৈব দ্রুমসংছন্নঃ কৃতোঽয়ং তে মহেশ্বর
127.43
মহেশ্বর উবাচ
নেত্রে মে সংবৃতে দেবি ত্বয়া বাল্যাদনিন্দিতে
নষ্টালোকস্ততো লোকঃ ক্ষণেন সমপদ্যত
127.44
নষ্টাদিত্যে তথা লোকে তমোভূতে নগাত্মজে
তৃতীয়ং লোচনং দীপ্তং সৃষ্টং তে রক্ষতা প্রজাঃ
127.45
তস্য চাক্ষ্ণো মহত্তেজো যেনায়ং মথিতো গিরিঃ
ত্বত্প্রিয়ার্থং চ মে দেবি প্রকৃতিস্থঃ ক্ষণাত্কৃতঃ
127.46
উমোবাচ
ভগবন্কেন তে বক্ত্রং চন্দ্রবত্প্রিয়দর্শনম্
পূর্বং তথৈব শ্রীকান্তমুত্তরং পশ্চিমং তথা
127.47
দক্ষিণং চ মুখং রৌদ্রং কেনোর্ধ্বং কপিলা জটাঃ
কেন কণ্ঠশ্চ তে নীলো বর্হিবর্হনিভঃ কৃতঃ
127.48
হস্তে চৈতত্পিনাকং তে সততং কেন তিষ্ঠতি
জটিলো ব্রহ্মচারী চ কিমর্থমসি নিত্যদা
127.49
এতং মে সংশয়ং সর্বং বদ ভূতপতেঽনঘ
সধর্মচারিণী চাহং ভক্তা চেতি বৃষধ্বজ
127.50
এবমুক্তঃ স ভগবাঞ্শৈলপুত্র্যা পিনাকধৃক্
তস্যা বৃত্ত্যা চ বুদ্ধ্যা চ প্রীতিমানভবত্প্রভুঃ
127.51
ততস্তামব্রবীদ্দেবঃ সুভগে শ্রূয়তামিতি
হেতুভির্যৈর্মমৈতানি রূপাণি রুচিরাননে