Utshovঅধ্যায় 128
128.1
মহেশ্বর উবাচ
তিলোত্তমা নাম পুরা ব্রহ্মণা যোষিদুত্তমা
তিলং তিলং সমুদ্ধৃত্য রত্নানাং নির্মিতা শুভা
128.2
সাভ্যগচ্ছত মাং দেবি রূপেণাপ্রতিমা ভুবি
প্রদক্ষিণং লোভয়ন্তী মাং শুভে রুচিরাননা
128.3
যতো যতঃ সা সুদতী মামুপাধাবদন্তিকে
ততস্ততো মুখং চারু মম দেবি বিনির্গতম্
128.4
তাং দিদৃক্ষুরহং যোগাচ্চতুর্মূর্তিত্বমাগতঃ
চতুর্মুখশ্চ সংবৃত্তো দর্শয়ন্যোগমাত্মনঃ
128.5
পূর্বেণ বদনেনাহমিন্দ্রত্বমনুশাস্মি হ
উত্তরেণ ত্বয়া সার্ধং রমাম্যহমনিন্দিতে
128.6
পশ্চিমং মে মুখং সৌম্যং সর্বপ্রাণিসুখাবহম্
দক্ষিণং ভীমসংকাশং রৌদ্রং সংহরতি প্রজাঃ
128.7
জটিলো ব্রহ্মচারী চ লোকানাং হিতকাম্যয়া
দেবকার্যার্থসিদ্ধ্যর্থং পিনাকং মে করে স্থিতম্
128.8
ইন্দ্রেণ চ পুরা বজ্রং ক্ষিপ্তং শ্রীকাঙ্ক্ষিণা মম
দগ্ধ্বা কণ্ঠং তু তদ্যাতং তেন শ্রীকণ্ঠতা মম
128.9
উমোবাচ
বাহনেষু প্রভূতেষু শ্রীমত্স্বন্যেষু সত্সু তে
কথং গোবৃষভো দেব বাহনত্বমুপাগতঃ
128.10
মহেশ্বর উবাচ
সুরভীং সসৃজে ব্রহ্মামৃতধেনুং পয়োমুচম্
সা সৃষ্টা বহুধা জাতা ক্ষরমাণা পয়োঽমৃতম্
128.11
তস্যা বত্সমুখোত্সৃষ্টঃ ফেনো মদ্গাত্রমাগতঃ
ততো দগ্ধা ময়া গাবো নানাবর্ণত্বমাগতাঃ
128.12
ততোঽহং লোকগুরুণা শমং নীতোঽর্থবেদিনা
বৃষং চেমং ধ্বজার্থং মে দদৌ বাহনমেব চ
128.13
উমোবাচ
নিবাসা বহুরূপাস্তে বিশ্বরূপগুণান্বিতাঃ
তাংশ্চ সংত্যজ্য ভগবঞ্শ্মশানে রমসে কথম্
128.14
কেশাস্থিকলিলে ভীমে কপালঘটসংকুলে
গৃধ্রগোমায়ুকলিলে চিতাগ্নিশতসংকুলে
128.15
অশুচৌ মাংসকলিলে বসাশোণিতকর্দমে
বিনিকীর্ণামিষচয়ে শিবানাদবিনাদিতে
128.16
মহেশ্বর উবাচ
মেধ্যান্বেষী মহীং কৃত্স্নাং বিচরামি নিশাস্বহম্
ন চ মেধ্যতরং কিংচিচ্ছ্মশানাদিহ বিদ্যতে
128.17
তেন মে সর্ববাসানাং শ্মশানে রমতে মনঃ
ন্যগ্রোধশাখাসংছন্নে নির্ভুক্তস্রগ্বিভূষিতে
128.18
তত্র চৈব রমন্তে মে ভূতসংঘাঃ শুভাননে
ন চ ভূতগণৈর্দেবি বিনাহং বস্তুমুত্সহে
128.19
এষ বাসো হি মে মেধ্যঃ স্বর্গীয়শ্চ মতো হি মে
পুণ্যঃ পরমকশ্চৈব মেধ্যকামৈরুপাস্যতে
128.20
উমোবাচ
ভগবন্সর্বভূতেশ সর্বধর্মভৃতাং বর
পিনাকপাণে বরদ সংশয়ো মে মহানয়ম্
128.21
অয়ং মুনিগণঃ সর্বস্তপস্তপ ইতি প্রভো
তপোন্বেষকরো লোকে ভ্রমতে বিবিধাকৃতিঃ
128.22
অস্য চৈবর্ষিসংঘস্য মম চ প্রিয়কাম্যয়া
এতং মমেহ সংদেহং বক্তুমর্হস্যরিংদম
128.23
ধর্মঃ কিংলক্ষণঃ প্রোক্তঃ কথং বাচরিতুং নরৈঃ
শক্যো ধর্মমবিন্দদ্ভির্ধর্মজ্ঞ বদ মে প্রভো
128.24
নারদ উবাচ
ততো মুনিগণঃ সর্বস্তাং দেবীং প্রত্যপূজয়ৎ
বাগ্ভিরৃগ্ভূষিতার্থাভিঃ স্তবৈশ্চার্থবিদাং বর
128.25
মহেশ্বর উবাচ
অহিংসা সত্যবচনং সর্বভূতানুকম্পনম্
শমো দানং যথাশক্তি গার্হস্থ্যো ধর্ম উত্তমঃ
128.26
পরদারেষ্বসংকল্পো ন্যাসস্ত্রীপরিরক্ষণম্
অদত্তাদানবিরমো মধুমাংসস্য বর্জনম্
128.27
এষ পঞ্চবিধো ধর্মো বহুশাখঃ সুখোদয়ঃ
দেহিভির্ধর্মপরমৈঃ কর্তব্যো ধর্মসংচয়ঃ
128.28
উমোবাচ
ভগবন্সংশয়ং পৃষ্টস্তং মে ব্যাখ্যাতুমর্হসি
চাতুর্বর্ণ্যস্য যো ধর্মঃ স্বে স্বে বর্ণে গুণাবহঃ
128.29
ব্রাহ্মণে কীদৃশো ধর্মঃ ক্ষত্রিয়ে কীদৃশো ভবেৎ
বৈশ্যে কিংলক্ষণো ধর্মঃ শূদ্রে কিংলক্ষণো ভবেৎ
128.30
মহেশ্বর উবাচ
ন্যায়তস্তে মহাভাগে সংশয়ঃ সমুদীরিতঃ
ভূমিদেবা মহাভাগাঃ সদা লোকে দ্বিজাতয়ঃ
128.31
উপবাসঃ সদা ধর্মো ব্রাহ্মণস্য ন সংশয়ঃ
স হি ধর্মার্থমুত্পন্নো ব্রহ্মভূয়ায় কল্পতে
128.32
তস্য ধর্মক্রিয়া দেবি ব্রতচর্যা চ ন্যায়তঃ
তথোপনয়নং চৈব দ্বিজায়ৈবোপপদ্যতে
128.33
গুরুদৈবতপূজার্থং স্বাধ্যায়াভ্যসনাত্মকঃ
দেহিভির্ধর্মপরমৈশ্চর্তব্যো ধর্মসংভবঃ
128.34
উমোবাচ
ভগবন্সংশয়ো মেঽত্র তং মে ব্যাখ্যাতুমর্হসি
চাতুর্বর্ণ্যস্য ধর্মং হি নৈপুণ্যেন প্রকীর্তয়
128.35
মহেশ্বর উবাচ
রহস্যশ্রবণং ধর্মো বেদব্রতনিষেবণম্
ব্রতচর্যাপরো ধর্মো গুরুপাদপ্রসাদনম্
128.36
ভৈক্ষচর্যাপরো ধর্মো ধর্মো নিত্যোপবাসিতা
নিত্যস্বাধ্যায়িতা ধর্মো ব্রহ্মচর্যাশ্রমস্তথা
128.37
গুরুণা ত্বভ্যনুজ্ঞাতঃ সমাবর্তেত বৈ দ্বিজঃ
বিন্দেতানন্তরং ভার্যামনুরূপাং যথাবিধি
128.38
শূদ্রান্নবর্জনং ধর্মস্তথা সত্পথসেবনম্
ধর্মো নিত্যোপবাসিত্বং ব্রহ্মচর্যং তথৈব চ
128.39
আহিতাগ্নিরধীয়ানো জুহ্বানঃ সংয়তেন্দ্রিয়ঃ
বিঘসাশী যতাহারো গৃহস্থঃ সত্যবাক্শুচিঃ
128.40
অতিথিব্রততা ধর্মো ধর্মস্ত্রেতাগ্নিধারণম্
ইষ্টীশ্চ পশুবন্ধাংশ্চ বিধিপূর্বং সমাচরেৎ
128.41
যজ্ঞশ্চ পরমো ধর্মস্তথাহিংসা চ দেহিষু
অপূর্বভোজনং ধর্মো বিঘসাশিত্বমেব চ
128.42
ভুক্তে পরিজনে পশ্চাদ্ভোজনং ধর্ম উচ্যতে
ব্রাহ্মণস্য গৃহস্থস্য শ্রোত্রিয়স্য বিশেষতঃ
128.43
দংপত্যোঃ সমশীলত্বং ধর্মশ্চ গৃহমেধিনাম্
গৃহ্যাণাং চৈব দেবানাং নিত্যং পুষ্পবলিক্রিয়া
128.44
নিত্যোপলেপনং ধর্মস্তথা নিত্যোপবাসিতা
সুসংমৃষ্টোপলিপ্তে চ সাজ্যধূমোদ্গমে গৃহে
128.45
এষ দ্বিজজনে ধর্মো গার্হস্থ্যো লোকধারণঃ
দ্বিজাতীনাং সতাং নিত্যং সদৈবৈষ প্রবর্ততে
128.46
যস্তু ক্ষত্রগতো দেবি ত্বয়া ধর্ম উদীরিতঃ
তমহং তে প্রবক্ষ্যামি তং মে শৃণু সমাহিতা
128.47
ক্ষত্রিয়স্য স্মৃতো ধর্মঃ প্রজাপালনমাদিতঃ
নির্দিষ্টফলভোক্তা হি রাজা ধর্মেণ যুজ্যতে
128.48
প্রজাঃ পালয়তে যো হি ধর্মেণ মনুজাধিপঃ
তস্য ধর্মার্জিতা লোকাঃ প্রজাপালনসংচিতাঃ
128.49
তত্র রাজ্ঞঃ পরো ধর্মো দমঃ স্বাধ্যায় এব চ
অগ্নিহোত্রপরিস্পন্দো দানাধ্যয়নমেব চ
128.50
যজ্ঞোপবীতধারণং যজ্ঞো ধর্মক্রিয়াস্তথা
ভৃত্যানাং ভরণং ধর্মঃ কৃতে কর্মণ্যমোঘতা
128.51
সম্যগ্দণ্ডে স্থিতির্ধর্মো ধর্মো বেদক্রতুক্রিয়াঃ
ব্যবহারস্থিতির্ধর্মঃ সত্যবাক্যরতিস্তথা
128.52
আর্তহস্তপ্রদো রাজা প্রেত্য চেহ মহীয়তে
গোব্রাহ্মণার্থে বিক্রান্তঃ সংগ্রামে নিধনং গতঃ
অশ্বমেধজিতাঁল্লোকান্প্রাপ্নোতি ত্রিদিবালয়ে
128.53
বৈশ্যস্য সততং ধর্মঃ পাশুপাল্যং কৃষিস্তথা
অগ্নিহোত্রপরিস্পন্দো দানাধ্যয়নমেব চ
128.54
বাণিজ্যং সত্পথস্থানমাতিথ্যং প্রশমো দমঃ
বিপ্রাণাং স্বাগতং ত্যাগো বৈশ্যধর্মঃ সনাতনঃ
128.55
তিলান্গন্ধান্রসাংশ্চৈব ন বিক্রীণীত বৈ ক্বচিৎ
বণিক্পথমুপাসীনো বৈশ্যঃ সত্পথমাশ্রিতঃ
128.56
সর্বাতিথ্যং ত্রিবর্গস্য যথাশক্তি যথার্হতঃ
শূদ্রধর্মঃ পরো নিত্যং শুশ্রূষা চ দ্বিজাতিষু
128.57
স শূদ্রঃ সংশিততপাঃ সত্যসংধো জিতেন্দ্রিয়ঃ
শুশ্রূষন্নতিথিং প্রাপ্তং তপঃ সংচিনুতে মহৎ
128.58
ত্যক্তহিংসঃ শুভাচারো দেবতাদ্বিজপূজকঃ
শূদ্রো ধর্মফলৈরিষ্টৈঃ সংপ্রয়ুজ্যেত বুদ্ধিমান্
128.59
এতত্তে সর্বমাখ্যাতং চাতুর্বর্ণ্যস্য শোভনে
একৈকস্যেহ সুভগে কিমন্যচ্ছ্রোতুমিচ্ছসি