Utshovঅধ্যায় 129
129.1
উমোবাচ
উক্তাস্ত্বয়া পৃথগ্ধর্মাশ্চাতুর্বর্ণ্যহিতাঃ শুভাঃ
সর্বব্যাপী তু যো ধর্মো ভগবংস্তং ব্রবীহি মে
129.2
মহেশ্বর উবাচ
ব্রাহ্মণা লোকসারেণ সৃষ্টা ধাত্রা গুণার্থিনা
লোকাংস্তারয়িতুং কৃত্স্নান্মর্ত্যেষু ক্ষিতিদেবতাঃ
129.3
তেষামিমং প্রবক্ষ্যামি ধর্মকর্মফলোদয়ম্
ব্রাহ্মণেষু হি যো ধর্মঃ স ধর্মঃ পরমো মতঃ
129.4
ইমে তু লোকধর্মার্থং ত্রয়ঃ সৃষ্টাঃ স্বয়ংভুবা
পৃথিব্যাঃ সর্জনে নিত্যং সৃষ্টাস্তানপি মে শৃণু
129.5
বেদোক্তঃ পরমো ধর্মঃ স্মৃতিশাস্ত্রগতোঽপরঃ
শিষ্টাচীর্ণঃ পরঃ প্রোক্তস্ত্রয়ো ধর্মাঃ সনাতনাঃ
129.6
ত্রৈবিদ্যো ব্রাহ্মণো বিদ্বান্ন চাধ্যয়নজীবনঃ
ত্রিকর্মা ত্রিপরিক্রান্তো মৈত্র এষ স্মৃতো দ্বিজঃ
129.7
ষডিমানি তু কর্মাণি প্রোবাচ ভুবনেশ্বরঃ
বৃত্ত্যর্থং ব্রাহ্মণানাং বৈ শৃণু তানি সমাহিতা
129.8
যজনং যাজনং চৈব তথা দানপ্রতিগ্রহৌ
অধ্যাপনমধীতং চ ষট্কর্মা ধর্মভাগ্দ্বিজঃ
129.9
নিত্যস্বাধ্যায়তা ধর্মো ধর্মো যজ্ঞঃ সনাতনঃ
দানং প্রশস্যতে চাস্য যথাশক্তি যথাবিধি
129.10
অয়ং তু পরমো ধর্মঃ প্রবৃত্তঃ সত্সু নিত্যশঃ
গৃহস্থতা বিশুদ্ধানাং ধর্মস্য নিচয়ো মহান্
129.11
পঞ্চয়জ্ঞবিশুদ্ধাত্মা সত্যবাগনসূয়কঃ
দাতা ব্রাহ্মণসত্কর্তা সুসংমৃষ্টনিবেশনঃ
129.12
অমানী চ সদাজিহ্মঃ স্নিগ্ধবাণীপ্রদস্তথা
অতিথ্যভ্যাগতরতিঃ শেষান্নকৃতভোজনঃ
129.13
পাদ্যমর্ঘ্যং যথান্যায়মাসনং শয়নং তথা
দীপং প্রতিশ্রয়ং চাপি যো দদাতি স ধার্মিকঃ
129.14
প্রাতরুত্থায় চাচম্য ভোজনেনোপমন্ত্র্য চ
সত্কৃত্যানুব্রজেদ্যশ্চ তস্য ধর্মঃ সনাতনঃ
129.15
সর্বাতিথ্যং ত্রিবর্গস্য যথাশক্তি দিবানিশম্
শূদ্রধর্মঃ সমাখ্যাতস্ত্রিবর্ণপরিচারণম্
129.16
প্রবৃত্তিলক্ষণো ধর্মো গৃহস্থেষু বিধীয়তে
তমহং কীর্তয়িষ্যামি সর্বভূতহিতং শুভম্
129.17
দাতব্যমসকৃচ্ছক্ত্যা যষ্টব্যমসকৃত্তথা
পুষ্টিকর্মবিধানং চ কর্তব্যং ভূতিমিচ্ছতা
129.18
ধর্মেণার্থঃ সমাহার্যো ধর্মলব্ধং ত্রিধা ধনম্
কর্তব্যং ধর্মপরমং মানবেন প্রয়ত্নতঃ
129.19
একেনাংশেন ধর্মার্থশ্চর্তব্যো ভূতিমিচ্ছতা
একেনাংশেন কামার্থ একমংশং বিবর্ধয়েৎ
129.20
নিবৃত্তিলক্ষণস্ত্বন্যো ধর্মো মোক্ষ ইতি স্মৃতঃ
তস্য বৃত্তিং প্রবক্ষ্যামি শৃণু মে দেবি তত্ত্বতঃ
129.21
সর্বভূতদয়া ধর্মো ন চৈকগ্রামবাসিতা
আশাপাশবিমোক্ষশ্চ শস্যতে মোক্ষকাঙ্ক্ষিণাম্
129.22
ন কুণ্ড্যাং নোদকে সঙ্গো ন বাসসি ন চাসনে
ন ত্রিদণ্ডে ন শয়নে নাগ্নৌ ন শরণালয়ে
129.23
অধ্যাত্মগতচিত্তো যস্তন্মনাস্তত্পরায়ণঃ
যুক্তো যোগং প্রতি সদা প্রতিসংখ্যানমেব চ
129.24
বৃক্ষমূলশয়ো নিত্যং শূন্যাগারনিবেশনঃ
নদীপুলিনশায়ী চ নদীতীররতিশ্চ যঃ
129.25
বিমুক্তঃ সর্বসঙ্গেষু স্নেহবন্ধেষু চ দ্বিজঃ
আত্মন্যেবাত্মনো ভাবং সমাসজ্যাটতি দ্বিজঃ
129.26
স্থাণুভূতো নিরাহারো মোক্ষদৃষ্টেন কর্মণা
পরিব্রজতি যো যুক্তস্তস্য ধর্মঃ সনাতনঃ
129.27
ন চৈকত্র চিরাসক্তো ন চৈকগ্রামগোচরঃ
যুক্তো হ্যটতি নির্মুক্তো ন চৈকপুলিনেশয়ঃ
129.28
এষ মোক্ষবিদাং ধর্মো বেদোক্তঃ সত্পথঃ সতাম্
যো মার্গমনুয়াতীমং পদং তস্য ন বিদ্যতে
129.29
চতুর্বিধা ভিক্ষবস্তে কুটীচরকৃতোদকঃ
হংসঃ পরমহংসশ্চ যো যঃ পশ্চাত্স উত্তমঃ
129.30
অতঃ পরতরং নাস্তি নাধরং ন তিরোঽগ্রতঃ
অদুঃখমসুখং সৌম্যমজরামরমব্যয়ম্
129.31
উমোবাচ
গার্হস্থ্যো মোক্ষধর্মশ্চ সজ্জনাচরিতস্ত্বয়া
ভাষিতো মর্ত্যলোকস্য মার্গঃ শ্রেয়স্করো মহান্
129.32
ঋষিধর্মং তু ধর্মজ্ঞ শ্রোতুমিচ্ছাম্যনুত্তমম্
স্পৃহা ভবতি মে নিত্যং তপোবননিবাসিষু
129.33
আজ্যধূমোদ্ভবো গন্ধো রুণদ্ধীব তপোবনম্
তং দৃষ্ট্বা মে মনঃ প্রীতং মহেশ্বর সদা ভবেৎ
129.34
এতং মে সংশয়ং দেব মুনিধর্মকৃতং বিভো
সর্বধর্মার্থতত্ত্বজ্ঞ দেবদেব বদস্ব মে
নিখিলেন ময়া পৃষ্টং মহাদেব যথাতথম্
129.35
মহেশ্বর উবাচ
হন্ত তেঽহং প্রবক্ষ্যামি মুনিধর্মমনুত্তমম্
যং কৃত্বা মুনয়ো যান্তি সিদ্ধিং স্বতপসা শুভে
129.36
ফেনপানামৃষীণাং যো ধর্মো ধর্মবিদাং সদা
তং মে শৃণু মহাভাগে ধর্মজ্ঞে ধর্মমাদিতঃ
129.37
উঞ্ছন্তি সততং তস্মিন্ব্রাহ্মং ফেনোত্করং শুভম্
অমৃতং ব্রহ্মণা পীতং মধুরং প্রসৃতং দিবি
129.38
এষ তেষাং বিশুদ্ধানাং ফেনপানাং তপোধনে
ধর্মচর্যাকৃতো মার্গো বালখিল্যগণে শৃণু
129.39
বালখিল্যাস্তপঃসিদ্ধা মুনয়ঃ সূর্যমণ্ডলে
উঞ্ছমুঞ্ছন্তি ধর্মজ্ঞাঃ শাকুনীং বৃত্তিমাস্থিতাঃ
129.40
মৃগনির্মোকবসনাশ্চীরবল্কলবাসসঃ
নির্দ্বংদ্বাঃ সত্পথং প্রাপ্তা বালখিল্যাস্তপোধনাঃ
129.41
অঙ্গুষ্ঠপর্বমাত্রাস্তে স্বেষ্বঙ্গেষু ব্যবস্থিতাঃ
তপশ্চরণমীহন্তে তেষাং ধর্মফলং মহৎ
129.42
তে সুরৈঃ সমতাং যান্তি সুরকার্যার্থসিদ্ধয়ে
দ্যোতয়ন্তো দিশঃ সর্বাস্তপসা দগ্ধকিল্বিষাঃ
129.43
যে ত্বন্যে শুদ্ধমনসো দয়াধর্মপরায়ণাঃ
সন্তশ্চক্রচরাঃ পুণ্যাঃ সোমলোকচরাশ্চ যে
129.44
পিতৃলোকসমীপস্থাস্ত উঞ্ছন্তি যথাবিধি
সংপ্রক্ষালাশ্মকুট্টাশ্চ দন্তোলূখলিনস্তথা
129.45
সোমপানাং চ দেবানামূষ্মপাণাং তথৈব চ
উঞ্ছন্তি যে সমীপস্থাঃ স্বভাবনিয়তেন্দ্রিয়াঃ
129.46
তেষামগ্নিপরিষ্যন্দঃ পিতৃদেবার্চনং তথা
যজ্ঞানাং চাপি পঞ্চানাং যজনং ধর্ম উচ্যতে
129.47
এষ চক্রচরৈর্দেবি দেবলোকচরৈর্দ্বিজৈঃ
ঋষিধর্মঃ সদা চীর্ণো যোঽন্যস্তমপি মে শৃণু
129.48
সর্বেষ্বেবর্ষিধর্মেষু জেয় আত্মা জিতেন্দ্রিয়ঃ
কামক্রোধৌ ততঃ পশ্চাজ্জেতব্যাবিতি মে মতিঃ
129.49
অগ্নিহোত্রপরিস্পন্দো ধর্মরাত্রিসমাসনম্
সোময়জ্ঞাভ্যনুজ্ঞানং পঞ্চমী যজ্ঞদক্ষিণা
129.50
নিত্যং যজ্ঞক্রিয়া ধর্মঃ পিতৃদেবার্চনে রতিঃ
সর্বাতিথ্যং চ কর্তব্যমন্নেনোঞ্ছার্জিতেন বৈ
129.51
নিবৃত্তিরুপভোগস্য গোরসানাং চ বৈ রতিঃ
স্থণ্ডিলে শয়নং যোগঃ শাকপর্ণনিষেবণম্
129.52
ফলমূলাশনং বায়ুরাপঃ শৈবলভক্ষণম্
ঋষীণাং নিয়মা হ্যেতে যৈর্জয়ন্ত্যজিতাং গতিম্
129.53
বিধূমে ন্যস্তমুসলে ব্যঙ্গারে ভুক্তবজ্জনে
অতীতপাত্রসংচারে কালে বিগতভৈক্ষকে
129.54
অতিথিং কাঙ্ক্ষমাণো বৈ শেষান্নকৃতভোজনঃ
সত্যধর্মরতিঃ ক্ষান্তো মুনিধর্মেণ যুজ্যতে
129.55
ন স্তম্ভী ন চ মানী যো ন প্রমত্তো ন বিস্মিতঃ
মিত্রামিত্রসমো মৈত্রো যঃ স ধর্মবিদুত্তমঃ