Utshovঅধ্যায় 130
130.1
উমোবাচ
দেশেষু রমণীয়েষু গিরীণাং নির্ঝরেষু চ
স্রবন্তীনাং চ কুঞ্জেষু পর্বতোপবনেষু চ
130.2
দেশেষু চ বিচিত্রেষু ফলবত্সু সমাহিতাঃ
মূলবত্সু চ দেশেষু বসন্তি নিয়তব্রতাঃ
130.3
তেষামপি বিধিং পুণ্যং শ্রোতুমিচ্ছামি শংকর
বানপ্রস্থেষু দেবেশ স্বশরীরোপজীবিষু
130.4
মহেশ্বর উবাচ
বানপ্রস্থেষু যো ধর্মস্তং মে শৃণু সমাহিতা
শ্রুত্বা চৈকমনা দেবি ধর্মবুদ্ধিপরা ভব
130.5
সংসিদ্ধৈর্নিয়তৈঃ সদ্ভির্বনবাসমুপাগতৈঃ
বানপ্রস্থৈরিদং কর্ম কর্তব্যং শৃণু যাদৃশম্
130.6
ত্রিকালমভিষেকার্থঃ পিতৃদেবার্চনং ক্রিয়া
অগ্নিহোত্রপরিস্পন্দ ইষ্টিহোমবিধিস্তথা
130.7
নীবারগ্রহণং চৈব ফলমূলনিষেবণম্
ইঙ্গুদৈরণ্ডতৈলানাং স্নেহার্থং চ নিষেবণম্
130.8
যোগচর্যাকৃতৈঃ সিদ্ধৈঃ কামক্রোধবিবর্জনম্
বীরশয্যামুপাসদ্ভির্বীরস্থানোপসেবিভিঃ
130.9
যুক্তৈর্যোগবহৈঃ সদ্ভির্গ্রীষ্মে পঞ্চতপৈস্তথা
মণ্ডূকয়োগনিয়তৈর্যথান্যায়নিষেবিভিঃ
130.10
বীরাসনগতৈর্নিত্যং স্থণ্ডিলে শয়নৈস্তথা
শীতয়োগোঽগ্নিয়োগশ্চ চর্তব্যো ধর্মবুদ্ধিভিঃ
130.11
অব্ভক্ষৈর্বায়ুভক্ষৈশ্চ শৈবালোত্তরভোজনৈঃ
অশ্মকুট্টৈস্তথা দান্তৈঃ সংপ্রক্ষালৈস্তথাপরৈঃ
130.12
চীরবল্কলসংবীতৈর্মৃগচর্মনিবাসিভিঃ
কার্যা যাত্রা যথাকালং যথাধর্মং যথাবিধি
130.13
বননিত্যৈর্বনচরৈর্বনপৈর্বনগোচরৈঃ
বনং গুরুমিবাসাদ্য বস্তব্যং বনজীবিভিঃ
130.14
তেষাং হোমক্রিয়া ধর্মঃ পঞ্চয়জ্ঞনিষেবণম্
নাগপঞ্চময়জ্ঞস্য বেদোক্তস্যানুপালনম্
130.15
অষ্টমীয়জ্ঞপরতা চাতুর্মাস্যনিষেবণম্
পৌর্ণমাস্যাং তু যো যজ্ঞো নিত্যয়জ্ঞস্তথৈব চ
130.16
বিমুক্তা দারসংয়োগৈর্বিমুক্তাঃ সর্বসংকরৈঃ
বিমুক্তাঃ সর্বপাপৈশ্চ চরন্তি মুনয়ো বনে
130.17
স্রুগ্ভাণ্ডপরমা নিত্যং ত্রেতাগ্নিশরণাঃ সদা
সন্তঃ সত্পথনিত্যা যে তে যান্তি পরমাং গতিম্
130.18
ব্রহ্মলোকং মহাপুণ্যং সোমলোকং চ শাশ্বতম্
গচ্ছন্তি মুনয়ঃ সিদ্ধা ঋষিধর্মব্যপাশ্রয়াৎ
130.19
এষ ধর্মো ময়া দেবি বানপ্রস্থাশ্রিতঃ শুভঃ
বিস্তরেণার্থসংপন্নো যথাস্থূলমুদাহৃতঃ
130.20
উমোবাচ
ভগবন্দেবদেবেশ সর্বভূতনমস্কৃত
যো ধর্মো মুনিসংঘস্য সিদ্ধিবাদেষু তং বদ
130.21
সিদ্ধিবাদেষু সংসিদ্ধাস্তথা বননিবাসিনঃ
স্বৈরিণো দারসংয়ুক্তাস্তেষাং ধর্মঃ কথং স্মৃতঃ
130.22
মহেশ্বর উবাচ
স্বৈরিণস্তাপসা দেবি সর্বে দারবিহারিণঃ
তেষাং মৌণ্ড্যং কষায়শ্চ বাসরাত্রিশ্চ কারণম্
130.23
ত্রিকালমভিষেকশ্চ হোত্রং ত্বৃষিকৃতং মহৎ
সমাধিঃ সত্পথস্থানং যথোদিতনিষেবণম্
130.24
যে চ তে পূর্বকথিতা ধর্মা বননিবাসিনাম্
যদি সেবন্তি ধর্মাংস্তানাপ্নুবন্তি তপঃফলম্
130.25
যে চ দংপতিধর্মাণঃ স্বদারনিয়তেন্দ্রিয়াঃ
চরন্তি বিধিদৃষ্টং তদৃতুকালাভিগামিনঃ
130.26
তেষামৃষিকৃতো ধর্মো ধর্মিণামুপপদ্যতে
ন কামকারাত্কামোঽন্যঃ সংসেব্যো ধর্মদর্শিভিঃ
130.27
সর্বভূতেষু যঃ সম্যগ্দদাত্যভয়দক্ষিণাম্
হিংসারোষবিমুক্তাত্মা স বৈ ধর্মেণ যুজ্যতে
130.28
সর্বভূতানুকম্পী যঃ সর্বভূতার্জবব্রতঃ
সর্বভূতাত্মভূতশ্চ স বৈ ধর্মেণ যুজ্যতে
130.29
সর্ববেদেষু বা স্নানং সর্বভূতেষু চার্জবম্
উভে এতে সমে স্যাতামার্জবং বা বিশিষ্যতে
130.30
আর্জবং ধর্ম ইত্যাহুরধর্মো জিহ্ম উচ্যতে
আর্জবেনেহ সংয়ুক্তো নরো ধর্মেণ যুজ্যতে
130.31
আর্জবো ভুবনে নিত্যং বসত্যমরসংনিধৌ
তস্মাদার্জবনিত্যঃ স্যাদ্য ইচ্ছেদ্ধর্মমাত্মনঃ
130.32
ক্ষান্তো দান্তো জিতক্রোধো ধর্মভূতোঽবিহিংসকঃ
ধর্মে রতমনা নিত্যং নরো ধর্মেণ যুজ্যতে
130.33
ব্যপেততন্দ্রো ধর্মাত্মা শক্যা সত্পথমাশ্রিতঃ
চারিত্রপরমো বুদ্ধো ব্রহ্মভূয়ায় কল্পতে
130.34
উমোবাচ
আশ্রমাভিরতা দেব তাপসা যে তপোধনাঃ
দীপ্তিমন্তঃ কয়া চৈব চর্যয়াথ ভবন্তি তে
130.35
রাজানো রাজপুত্রাশ্চ নির্ধনা বা মহাধনাঃ
কর্মণা কেন ভগবন্প্রাপ্নুবন্তি মহাফলম্
130.36
নিত্যং স্থানমুপাগম্য দিব্যচন্দনরূষিতাঃ
কেন বা কর্মণা দেব ভবন্তি বনগোচরাঃ
130.37
এতং মে সংশয়ং দেব তপশ্চর্যাগতং শুভম্
শংস সর্বমশেষেণ ত্র্যক্ষ ত্রিপুরনাশন
130.38
মহেশ্বর উবাচ
উপবাসব্রতৈর্দান্তা অহিংস্রাঃ সত্যবাদিনঃ
সংসিদ্ধাঃ প্রেত্য গন্ধর্বৈঃ সহ মোদন্ত্যনাময়াঃ
130.39
মণ্ডূকয়োগশয়নো যথাস্থানং যথাবিধি
দীক্ষাং চরতি ধর্মাত্মা স নাগৈঃ সহ মোদতে
130.40
শষ্পং মৃগমুখোত্সৃষ্টং যো মৃগৈঃ সহ সেবতে
দীক্ষিতো বৈ মুদা যুক্তঃ স গচ্ছত্যমরাবতীম্
130.41
শৈবালং শীর্ণপর্ণং বা তদ্ব্রতো যো নিষেবতে
শীতয়োগবহো নিত্যং স গচ্ছেত্পরমাং গতিম্
130.42
বায়ুভক্ষোঽম্বুভক্ষো বা ফলমূলাশনোঽপি বা
যক্ষেষ্বৈশ্বর্যমাধায় মোদতেঽপ্সরসাং গণৈঃ
130.43
অগ্নিয়োগবহো গ্রীষ্মে বিধিদৃষ্টেন কর্মণা
চীর্ত্বা দ্বাদশ বর্ষাণি রাজা ভবতি পার্থিবঃ
130.44
আহারনিয়মং কৃত্বা মুনির্দ্বাদশবার্ষিকম্
মরুং সংসাধ্য যত্নেন রাজা ভবতি পার্থিবঃ
130.45
স্থণ্ডিলে শুদ্ধমাকাশং পরিগৃহ্য সমন্ততঃ
প্রবিশ্য চ মুদা যুক্তো দীক্ষাং দ্বাদশবার্ষিকীম্
130.46
স্থণ্ডিলস্য ফলান্যাহুর্যানানি শয়নানি চ
গৃহাণি চ মহার্হাণি চন্দ্রশুভ্রাণি ভামিনি
130.47
আত্মানমুপজীবন্যো নিয়তো নিয়তাশনঃ
দেহং বানশনে ত্যক্ত্বা স স্বর্গং সমুপাশ্নুতে
130.48
আত্মানমুপজীবন্যো দীক্ষাং দ্বাদশবার্ষিকীম্
ত্যক্ত্বা মহার্ণবে দেহং বারুণং লোকমশ্নুতে
130.49
আত্মানমুপজীবন্যো দীক্ষাং দ্বাদশবার্ষিকীম্
অশ্মনা চরণৌ ভিত্ত্বা গুহ্যকেষু স মোদতে
130.50
সাধয়িত্বাত্মনাত্মানং নির্দ্বংদ্বো নিষ্পরিগ্রহঃ
চীর্ত্বা দ্বাদশ বর্ষাণি দীক্ষামেকাং মনোগতাম্
স্বর্গলোকমবাপ্নোতি দেবৈশ্চ সহ মোদতে
130.51
আত্মানমুপজীবন্যো দীক্ষাং দ্বাদশবার্ষিকীম্
হুত্বাগ্নৌ দেহমুত্সৃজ্য বহ্নিলোকে মহীয়তে
130.52
যস্তু দেবি যথান্যায়ং দীক্ষিতো নিয়তো দ্বিজঃ
আত্মন্যাত্মানমাধায় নির্দ্বংদ্বো নিষ্পরিগ্রহঃ
130.53
চীর্ত্বা দ্বাদশ বর্ষাণি দীক্ষামেকাং মনোগতাম্
অরণীসহিতং স্কন্ধে বদ্ধ্বা গচ্ছত্যনাবৃতঃ
130.54
বীরাধ্বানমনা নিত্যং বীরাসনরতস্তথা
বীরস্থায়ী চ সততং স বীরগতিমাপ্নুয়াৎ
130.55
স শক্রলোকগো নিত্যং সর্বকামপুরস্কৃতঃ
দিব্যপুষ্পসমাকীর্ণো দিব্যচন্দনভূষিতঃ
সুখং বসতি ধর্মাত্মা দিবি দেবগণৈঃ সহ
130.56
বীরলোকগতো বীরো বীরয়োগবহঃ সদা
সত্ত্বস্থঃ সর্বমুত্সৃজ্য দীক্ষিতো নিয়তঃ শুচিঃ
বীরাধ্বানং প্রপদ্যেদ্যস্তস্য লোকাঃ সনাতনাঃ
130.57
কামগেন বিমানেন স বৈ চরতি চ্ছন্দতঃ
শক্রলোকগতঃ শ্রীমান্মোদতে চ নিরাময়ঃ