Utshovঅধ্যায় 131
131.1
উমোবাচ
ভগবন্ভগনেত্রঘ্ন পূষ্ণো দশনপাতন
দক্ষক্রতুহর ত্র্যক্ষ সংশয়ো মে মহানয়ম্
131.2
চাতুর্বর্ণ্যং ভগবতা পূর্বং সৃষ্টং স্বয়ংভুবা
কেন কর্মবিপাকেন বৈশ্যো গচ্ছতি শূদ্রতাম্
131.3
বৈশ্যো বা ক্ষত্রিয়ঃ কেন দ্বিজো বা ক্ষত্রিয়ো ভবেৎ
প্রতিলোমঃ কথং দেব শক্যো ধর্মো নিষেবিতুম্
131.4
কেন বা কর্মণা বিপ্রঃ শূদ্রয়োনৌ প্রজায়তে
ক্ষত্রিয়ঃ শূদ্রতামেতি কেন বা কর্মণা বিভো
131.5
এতং মে সংশয়ং দেব বদ ভূতপতেঽনঘ
ত্রয়ো বর্ণাঃ প্রকৃত্যেহ কথং ব্রাহ্মণ্যমাপ্নুয়ুঃ
131.6
মহেশ্বর উবাচ
ব্রাহ্মণ্যং দেবি দুষ্প্রাপং নিসর্গাদ্ব্রাহ্মণঃ শুভে
ক্ষত্রিয়ো বৈশ্যশূদ্রৌ বা নিসর্গাদিতি মে মতিঃ
131.7
কর্মণা দুষ্কৃতেনেহ স্থানাদ্ভ্রশ্যতি বৈ দ্বিজঃ
জ্যেষ্ঠং বর্ণমনুপ্রাপ্য তস্মাদ্রক্ষেত বৈ দ্বিজঃ
131.8
স্থিতো ব্রাহ্মণধর্মেণ ব্রাহ্মণ্যমুপজীবতি
ক্ষত্রিয়ো বাথ বৈশ্যো বা ব্রহ্মভূয়ায় গচ্ছতি
131.9
যস্তু বিপ্রত্বমুত্সৃজ্য ক্ষাত্রং ধর্মং নিষেবতে
ব্রাহ্মণ্যাত্স পরিভ্রষ্টঃ ক্ষত্রয়োনৌ প্রজায়তে
131.10
বৈশ্যকর্ম চ যো বিপ্রো লোভমোহব্যপাশ্রয়ঃ
ব্রাহ্মণ্যং দুর্লভং প্রাপ্য করোত্যল্পমতিঃ সদা
131.11
স দ্বিজো বৈশ্যতামেতি বৈশ্যো বা শূদ্রতামিয়াৎ
স্বধর্মাত্প্রচ্যুতো বিপ্রস্ততঃ শূদ্রত্বমাপ্নুতে
131.12
তত্রাসৌ নিরয়ং প্রাপ্তো বর্ণভ্রষ্টো বহিষ্কৃতঃ
ব্রহ্মলোকপরিভ্রষ্টঃ শূদ্রঃ সমুপজায়তে
131.13
ক্ষত্রিয়ো বা মহাভাগে বৈশ্যো বা ধর্মচারিণি
স্বানি কর্মাণ্যপাহায় শূদ্রকর্মাণি সেবতে
131.14
স্বস্থানাত্স পরিভ্রষ্টো বর্ণসংকরতাং গতঃ
ব্রাহ্মণঃ ক্ষত্রিয়ো বৈশ্যঃ শূদ্রত্বং যাতি তাদৃশঃ
131.15
যস্তু শুদ্ধঃ স্বধর্মেণ জ্ঞানবিজ্ঞানবাঞ্শুচিঃ
ধর্মজ্ঞো ধর্মনিরতঃ স ধর্মফলমশ্নুতে
131.16
ইদং চৈবাপরং দেবি ব্রহ্মণা সমুদীরিতম্
অধ্যাত্মং নৈষ্ঠিকং সদ্ভির্ধর্মকামৈর্নিষেব্যতে
131.17
উগ্রান্নং গর্হিতং দেবি গণান্নং শ্রাদ্ধসূতকম্
ঘুষ্টান্নং নৈব ভোক্তব্যং শূদ্রান্নং নৈব কর্হিচিৎ
131.18
শূদ্রান্নং গর্হিতং দেবি দেবদেবৈর্মহাত্মভিঃ
পিতামহমুখোত্সৃষ্টং প্রমাণমিতি মে মতিঃ
131.19
শূদ্রান্নেনাবশেষেণ জঠরে যো ম্রিয়েত বৈ
আহিতাগ্নিস্তথা যজ্বা স শূদ্রগতিভাগ্ভবেৎ
131.20
তেন শূদ্রান্নশেষেণ ব্রহ্মস্থানাদপাকৃতঃ
ব্রাহ্মণঃ শূদ্রতামেতি নাস্তি তত্র বিচারণা
131.21
যস্যান্নেনাবশেষেণ জঠরে যো ম্রিয়েত বৈ
তাং তাং যোনিং ব্রজেদ্বিপ্রো যস্যান্নমুপজীবতি
131.22
ব্রাহ্মণত্বং শুভং প্রাপ্য দুর্লভং যোঽবমন্যতে
অভোজ্যান্নানি চাশ্নাতি স দ্বিজত্বাত্পতেত বৈ
131.23
সুরাপো ব্রহ্মহা ক্ষুদ্রশ্চৌরো ভগ্নব্রতোঽশুচিঃ
স্বাধ্যায়বর্জিতঃ পাপো লুব্ধো নৈকৃতিকঃ শঠঃ
131.24
অব্রতী বৃষলীভর্তা কুণ্ডাশী সোমবিক্রয়ী
নিহীনসেবী বিপ্রো হি পততি ব্রহ্ময়োনিতঃ
131.25
গুরুতল্পী গুরুদ্বেষী গুরুকুত্সারতিশ্চ যঃ
ব্রহ্মদ্বিট্চাপি পততি ব্রাহ্মণো ব্রহ্ময়োনিতঃ
131.26
এভিস্তু কর্মভির্দেবি শুভৈরাচরিতৈস্তথা
শূদ্রো ব্রাহ্মণতাং গচ্ছেদ্বৈশ্যঃ ক্ষত্রিয়তাং ব্রজেৎ
131.27
শূদ্রকর্মাণি সর্বাণি যথান্যায়ং যথাবিধি
শুশ্রূষাং পরিচর্যাং চ জ্যেষ্ঠে বর্ণে প্রয়ত্নতঃ
কুর্যাদবিমনাঃ শূদ্রঃ সততং সত্পথে স্থিতঃ
131.28
দৈবতদ্বিজসত্কর্তা সর্বাতিথ্যকৃতব্রতঃ
ঋতুকালাভিগামী চ নিয়তো নিয়তাশনঃ
131.29
চৌক্ষশ্চৌক্ষজনান্বেষী শেষান্নকৃতভোজনঃ
বৃথামাংসান্যভুঞ্জানঃ শূদ্রো বৈশ্যত্বমৃচ্ছতি
131.30
ঋতবাগনহংবাদী নির্দ্বংদ্বঃ শমকোবিদঃ
যজতে নিত্যয়জ্ঞৈশ্চ স্বাধ্যায়পরমঃ শুচিঃ
131.31
দান্তো ব্রাহ্মণসত্কর্তা সর্ববর্ণবুভূষকঃ
গৃহস্থব্রতমাতিষ্ঠন্দ্বিকালকৃতভোজনঃ
131.32
শেষাশী বিজিতাহারো নিষ্কামো নিরহংবদঃ
অগ্নিহোত্রমুপাসংশ্চ জুহ্বানশ্চ যথাবিধি
131.33
সর্বাতিথ্যমুপাতিষ্ঠঞ্শেষান্নকৃতভোজনঃ
ত্রেতাগ্নিমন্ত্রবিহিতো বৈশ্যো ভবতি বৈ যদি
স বৈশ্যঃ ক্ষত্রিয়কুলে শুচৌ মহতি জায়তে
131.34
স বৈশ্যঃ ক্ষত্রিয়ো জাতো জন্মপ্রভৃতি সংস্কৃতঃ
উপনীতো ব্রতপরো দ্বিজো ভবতি সত্কৃতঃ
131.35
দদাতি যজতে যজ্ঞৈঃ সংস্কৃতৈরাপ্তদক্ষিণৈঃ
অধীতে স্বর্গমন্বিচ্ছংস্ত্রেতাগ্নিশরণঃ সদা
131.36
আর্তহস্তপ্রদো নিত্যং প্রজা ধর্মেণ পালয়ন্
সত্যঃ সত্যানি কুরুতে নিত্যং যঃ সুখদর্শনঃ
131.37
ধর্মদণ্ডো ন নির্দণ্ডো ধর্মকার্যানুশাসকঃ
যন্ত্রিতঃ কার্যকরণে ষড্ভাগকৃতলক্ষণঃ
131.38
গ্রাম্যধর্মান্ন সেবেত স্বচ্ছন্দেনার্থকোবিদঃ
ঋতুকালে তু ধর্মাত্মা পত্নীং সেবেত নিত্যদা
131.39
সর্বোপবাসী নিয়তঃ স্বাধ্যায়পরমঃ শুচিঃ
বর্হিষ্কান্তরিতে নিত্যং শয়ানোঽগ্নিগৃহে সদা
131.40
সর্বাতিথ্যং ত্রিবর্গস্য কুর্বাণঃ সুমনাঃ সদা
শূদ্রাণাং চান্নকামানাং নিত্যং সিদ্ধমিতি ব্রুবন্
131.41
স্বার্থাদ্বা যদি বা কামান্ন কিংচিদুপলক্ষয়েৎ
পিতৃদেবাতিথিকৃতে সাধনং কুরুতে চ যঃ
131.42
স্ববেশ্মনি যথান্যায়মুপাস্তে ভৈক্ষমেব চ
ত্রিকালমগ্নিহোত্রং চ জুহ্বানো বৈ যথাবিধি
131.43
গোব্রাহ্মণহিতার্থায় রণে চাভিমুখো হতঃ
ত্রেতাগ্নিমন্ত্রপূতং বা সমাবিশ্য দ্বিজো ভবেৎ
131.44
জ্ঞানবিজ্ঞানসংপন্নঃ সংস্কৃতো বেদপারগঃ
বিপ্রো ভবতি ধর্মাত্মা ক্ষত্রিয়ঃ স্বেন কর্মণা
131.45
এতৈঃ কর্মফলৈর্দেবি ন্যূনজাতিকুলোদ্ভবঃ
শূদ্রোঽপ্যাগমসংপন্নো দ্বিজো ভবতি সংস্কৃতঃ
131.46
ব্রাহ্মণো বাপ্যসদ্বৃত্তঃ সর্বসংকরভোজনঃ
ব্রাহ্মণ্যং পুণ্যমুত্সৃজ্য শূদ্রো ভবতি তাদৃশঃ
131.47
কর্মভিঃ শুচিভির্দেবি শুদ্ধাত্মা বিজিতেন্দ্রিয়ঃ
শূদ্রোঽপি দ্বিজবত্সেব্য ইতি ব্রহ্মাব্রবীত্স্বয়ম্
131.48
স্বভাবকর্ম চ শুভং যত্র শূদ্রেঽপি তিষ্ঠতি
বিশুদ্ধঃ স দ্বিজাতির্বৈ বিজ্ঞেয় ইতি মে মতিঃ
131.49
ন যোনির্নাপি সংস্কারো ন শ্রুতং ন চ সংনতিঃ
কারণানি দ্বিজত্বস্য বৃত্তমেব তু কারণম্
131.50
সর্বোঽয়ং ব্রাহ্মণো লোকে বৃত্তেন তু বিধীয়তে
বৃত্তে স্থিতশ্চ সুশ্রোণি ব্রাহ্মণত্বং নিগচ্ছতি
131.51
ব্রাহ্মঃ স্বভাবঃ কল্যাণি সমঃ সর্বত্র মে মতিঃ
নির্গুণং নির্মলং ব্রহ্ম যত্র তিষ্ঠতি স দ্বিজঃ
131.52
এতে যোনিফলা দেবি স্থানভাগনিদর্শকাঃ
স্বয়ং চ বরদেনোক্তা ব্রহ্মণা সৃজতা প্রজাঃ
131.53
ব্রাহ্মণো হি মহত্ক্ষেত্রং লোকে চরতি পাদবৎ
যত্তত্র বীজং বপতি সা কৃষিঃ পারলৌকিকী
131.54
মিতাশিনা সদা ভাব্যং সত্পথালম্বিনা সদা
ব্রাহ্মমার্গমতিক্রম্য বর্তিতব্যং বুভূষতা
131.55
সংহিতাধ্যায়িনা ভাব্যং গৃহে বৈ গৃহমেধিনা
নিত্যং স্বাধ্যায়য়ুক্তেন দানাধ্যয়নজীবিনা
131.56
এবংভূতো হি যো বিপ্রঃ সততং সত্পথে স্থিতঃ
আহিতাগ্নিরধীয়ানো ব্রহ্মভূয়ায় কল্পতে
131.57
ব্রাহ্মণ্যমেব সংপ্রাপ্য রক্ষিতব্যং যতাত্মভিঃ
যোনিপ্রতিগ্রহাদানৈঃ কর্মভিশ্চ শুচিস্মিতে
131.58
এতত্তে সর্বমাখ্যাতং যথা শূদ্রো ভবেদ্দ্বিজঃ
ব্রাহ্মণো বা চ্যুতো ধর্মাদ্যথা শূদ্রত্বমাপ্নুতে