Utshovঅধ্যায় 132
132.1
উমোবাচ
ভগবন্সর্বভূতেশ সুরাসুরনমস্কৃত
ধর্মাধর্মে নৃণাং দেব ব্রূহি মে সংশয়ং বিভো
132.2
কর্মণা মনসা বাচা ত্রিবিধং হি নরঃ সদা
বধ্যতে বন্ধনৈঃ পাশৈর্মুচ্যতেঽপ্যথ বা পুনঃ
132.3
কেন শীলেন বা দেব কর্মণা কীদৃশেন বা
সমাচারৈর্গুণৈর্বাক্যৈঃ স্বর্গং যান্তীহ মানবাঃ
132.4
মহেশ্বর উবাচ
দেবি ধর্মার্থতত্ত্বজ্ঞে সত্যনিত্যে দমে রতে
সর্বপ্রাণিহিতঃ প্রশ্নঃ শ্রূয়তাং বুদ্ধিবর্ধনঃ
132.5
সত্যধর্মরতাঃ সন্তঃ সর্বলিপ্সাবিবর্জিতাঃ
নাধর্মেণ ন ধর্মেণ বধ্যন্তে ছিন্নসংশয়াঃ
132.6
প্রলয়োত্পত্তিতত্ত্বজ্ঞাঃ সর্বজ্ঞাঃ সমদর্শিনঃ
বীতরাগা বিমুচ্যন্তে পুরুষাঃ সর্ববন্ধনৈঃ
132.7
কর্মণা মনসা বাচা যে ন হিংসন্তি কিংচন
যে ন সজ্জন্তি কস্মিংশ্চিদ্বধ্যন্তে তে ন কর্মভিঃ
132.8
প্রাণাতিপাতাদ্বিরতাঃ শীলবন্তো দয়ান্বিতাঃ
তুল্যদ্বেষ্যপ্রিয়া দান্তা মুচ্যন্তে কর্মবন্ধনৈঃ
132.9
সর্বভূতদয়াবন্তো বিশ্বাস্যাঃ সর্বজন্তুষু
ত্যক্তহিংসাসমাচারাস্তে নরাঃ স্বর্গগামিনঃ
132.10
পরস্বে নির্মমা নিত্যং পরদারবিবর্জকাঃ
ধর্মলব্ধার্থভোক্তারস্তে নরাঃ স্বর্গগামিনঃ
132.11
মাতৃবত্স্বসৃবচ্চৈব নিত্যং দুহিতৃবচ্চ যে
পরদারেষু বর্তন্তে তে নরাঃ স্বর্গগামিনঃ
132.12
স্তৈন্যান্নিবৃত্তাঃ সততং সংতুষ্টাঃ স্বধনেন চ
স্বভাগ্যান্যুপজীবন্তি তে নরাঃ স্বর্গগামিনঃ
132.13
স্বদারনিরতা যে চ ঋতুকালাভিগামিনঃ
অগ্রাম্যসুখভোগাশ্চ তে নরাঃ স্বর্গগামিনঃ
132.14
পরদারেষু যে নিত্যং চারিত্রাবৃতলোচনাঃ
যতেন্দ্রিয়াঃ শীলপরাস্তে নরাঃ স্বর্গগামিনঃ
132.15
এষ দেবকৃতো মার্গঃ সেবিতব্যঃ সদা নরৈঃ
অকষায়কৃতশ্চৈব মার্গঃ সেব্যঃ সদা বুধৈঃ
132.16
দানধর্মতপোয়ুক্তঃ শীলশৌচদয়াত্মকঃ
বৃত্ত্যর্থং ধর্মহেতোর্বা সেবিতব্যঃ সদা নরৈঃ
স্বর্গবাসমভীপ্সদ্ভির্ন সেব্যস্ত্বত উত্তরঃ
132.17
উমোবাচ
বাচাথ বধ্যতে যেন মুচ্যতেঽপ্যথ বা পুনঃ
তানি কর্মাণি মে দেব বদ ভূতপতেঽনঘ
132.18
মহেশ্বর উবাচ
আত্মহেতোঃ পরার্থে বা নর্মহাস্যাশ্রয়াত্তথা
যে মৃষা ন বদন্তীহ তে নরাঃ স্বর্গগামিনঃ
132.19
বৃত্ত্যর্থং ধর্মহেতোর্বা কামকারাত্তথৈব চ
অনৃতং যে ন ভাষন্তে তে নরাঃ স্বর্গগামিনঃ
132.20
শ্লক্ষ্ণাং বাণীং নিরাবাধাং মধুরাং পাপবর্জিতাম্
স্বাগতেনাভিভাষন্তে তে নরাঃ স্বর্গগামিনঃ
132.21
কটুকাং যে ন ভাষন্তে পরুষাং নিষ্ঠুরাং গিরম্
অপৈশুন্যরতাঃ সন্তস্তে নরাঃ স্বর্গগামিনঃ
132.22
পিশুনাং যে ন ভাষন্তে মিত্রভেদকরীং গিরম্
ঋতাং মৈত্রীং প্রভাষন্তে তে নরাঃ স্বর্গগামিনঃ
132.23
বর্জয়ন্তি সদা সূচ্যং পরদ্রোহং চ মানবাঃ
সর্বভূতসমা দান্তাস্তে নরাঃ স্বর্গগামিনঃ
132.24
শঠপ্রলাপাদ্বিরতা বিরুদ্ধপরিবর্জকাঃ
সৌম্যপ্রলাপিনো নিত্যং তে নরাঃ স্বর্গগামিনঃ
132.25
ন কোপাদ্ব্যাহরন্তে যে বাচং হৃদয়দারণীম্
সান্ত্বং বদন্তি ক্রুদ্ধাপি তে নরাঃ স্বর্গগামিনঃ
132.26
এষ বাণীকৃতো দেবি ধর্মঃ সেব্যঃ সদা নরৈঃ
শুভঃ সত্যগুণো নিত্যং বর্জনীয়া মৃষা বুধৈঃ
132.27
উমোবাচ
মনসা বধ্যতে যেন কর্মণা পুরুষঃ সদা
তন্মে ব্রূহি মহাভাগ দেবদেব পিনাকধৃক্
132.28
মহেশ্বর উবাচ
মানসেনেহ ধর্মেণ সংয়ুক্তাঃ পুরুষাঃ সদা
স্বর্গং গচ্ছন্তি কল্যাণি তন্মে কীর্তয়তঃ শৃণু
132.29
দুষ্প্রণীতেন মনসা দুষ্প্রণীততরাকৃতিঃ
বধ্যতে মানবো যেন শৃণু চান্যচ্ছুভাননে
132.30
অরণ্যে বিজনে ন্যস্তং পরস্বং বীক্ষ্য যে নরাঃ
মনসাপি ন হিংসন্তি তে নরাঃ স্বর্গগামিনঃ
132.31
গ্রামে গৃহে বা যদ্দ্রব্যং পারক্যং বিজনে স্থিতম্
নাভিনন্দন্তি বৈ নিত্যং তে নরাঃ স্বর্গগামিনঃ
132.32
তথৈব পরদারান্যে কামবৃত্তান্রহোগতান্
মনসাপি ন হিংসন্তি তে নরাঃ স্বর্গগামিনঃ
132.33
শত্রুং মিত্রং চ যে নিত্যং তুল্যেন মনসা নরাঃ
ভজন্তি মৈত্রাঃ সংগম্য তে নরাঃ স্বর্গগামিনঃ
132.34
শ্রুতবন্তো দয়াবন্তঃ শুচয়ঃ সত্যসংগরাঃ
স্বৈরর্থৈঃ পরিসংতুষ্টাস্তে নরাঃ স্বর্গগামিনঃ
132.35
অবৈরা যে ত্বনায়াসা মৈত্রচিত্তপরাঃ সদা
সর্বভূতদয়াবন্তস্তে নরাঃ স্বর্গগামিনঃ
132.36
শ্রদ্ধাবন্তো দয়াবন্তশ্চোক্ষাশ্চোক্ষজনপ্রিয়াঃ
ধর্মাধর্মবিদো নিত্যং তে নরাঃ স্বর্গগামিনঃ
132.37
শুভানামশুভানাং চ কর্মণাং ফলসংচয়ে
বিপাকজ্ঞাশ্চ যে দেবি তে নরাঃ স্বর্গগামিনঃ
132.38
ন্যায়োপেতা গুণোপেতা দেবদ্বিজপরাঃ সদা
সমতাং সমনুপ্রাপ্তাস্তে নরাঃ স্বর্গগামিনঃ
132.39
শুভৈঃ কর্মফলৈর্দেবি ময়ৈতে পরিকীর্তিতাঃ
স্বর্গমার্গোপগা ভূয়ঃ কিমন্যচ্ছ্রোতুমিচ্ছসি
132.40
উমোবাচ
মহান্মে সংশয়ঃ কশ্চিন্মর্ত্যান্প্রতি মহেশ্বর
তস্মাত্তং নৈপুণেনাদ্য মমাখ্যাতুং ত্বমর্হসি
132.41
কেনায়ুর্লভতে দীর্ঘং কর্মণা পুরুষঃ প্রভো
তপসা বাপি দেবেশ কেনায়ুর্লভতে মহৎ
132.42
ক্ষীণায়ুঃ কেন ভবতি কর্মণা ভুবি মানবঃ
বিপাকং কর্মণাং দেব বক্তুমর্হস্যনিন্দিত
132.43
অপরে চ মহাভোগা মন্দভোগাস্তথাপরে
অকুলীনাস্তথা চান্যে কুলীনাশ্চ তথাপরে
132.44
দুর্দর্শাঃ কেচিদাভান্তি নরাঃ কাষ্ঠময়া ইব
প্রিয়দর্শাস্তথা চান্যে দর্শনাদেব মানবাঃ
132.45
দুষ্প্রজ্ঞাঃ কেচিদাভান্তি কেচিদাভান্তি পণ্ডিতাঃ
মহাপ্রজ্ঞাস্তথৈবান্যে জ্ঞানবিজ্ঞানদর্শিনঃ
132.46
অল্পাবাধাস্তথা কেচিন্মহাবাধাস্তথাপরে
দৃশ্যন্তে পুরুষা দেব তন্মে শংসিতুমর্হসি
132.47
মহেশ্বর উবাচ
হন্ত তেঽহং প্রবক্ষ্যামি দেবি কর্মফলোদয়ম্
মর্ত্যলোকে নরাঃ সর্বে যেন স্বং ভুঞ্জতে ফলম্
132.48
প্রাণাতিপাতী যো রৌদ্রো দণ্ডহস্তোদ্যতস্তথা
নিত্যমুদ্যতদণ্ডশ্চ হন্তি ভূতগণান্নরঃ
132.49
নির্দয়ঃ সর্বভূতানাং নিত্যমুদ্বেগকারকঃ
অপি কীটপিপীলানামশরণ্যঃ সুনির্ঘৃণঃ
132.50
এবংভূতো নরো দেবি নিরয়ং প্রতিপদ্যতে
বিপরীতস্তু ধর্মাত্মা রূপবানভিজায়তে
132.51
নিরয়ং যাতি হিংসাত্মা যাতি স্বর্গমহিংসকঃ
যাতনাং নিরয়ে রৌদ্রাং স কৃচ্ছ্রাং লভতে নরঃ
132.52
অথ চেন্নিরয়াত্তস্মাত্সমুত্তরতি কর্হিচিৎ
মানুষ্যং লভতে চাপি হীনায়ুস্তত্র জায়তে
132.53
পাপেন কর্মণা দেবি বদ্ধো হিংসারতির্নরঃ
অপ্রিয়ঃ সর্বভূতানাং হীনায়ুরুপজায়তে
132.54
যস্তু শুক্লাভিজাতীয়ঃ প্রাণিঘাতবিবর্জকঃ
নিক্ষিপ্তদণ্ডো নির্দণ্ডো ন হিনস্তি কদাচন
132.55
ন ঘাতয়তি নো হন্তি ঘ্নন্তং নৈবানুমোদতে
সর্বভূতেষু সস্নেহো যথাত্মনি তথাপরে
132.56
ঈদৃশঃ পুরুষোত্কর্ষো দেবি দেবত্বমশ্নুতে
উপপন্নান্সুখান্ভোগানুপাশ্নাতি মুদা যুতঃ
132.57
অথ চেন্মানুষে লোকে কদাচিদুপপদ্যতে
তত্র দীর্ঘায়ুরুত্পন্নঃ স নরঃ সুখমেধতে
132.58
এবং দীর্ঘায়ুষাং মার্গঃ সুবৃত্তানাং সুকর্মণাম্
প্রাণিহিংসাবিমোক্ষেণ ব্রহ্মণা সমুদীরিতঃ