Utshovঅধ্যায় 133
133.1
উমোবাচ
কিংশীলাঃ কিংসমাচারাঃ পুরুষাঃ কৈশ্চ কর্মভিঃ
স্বর্গং সমভিপদ্যন্তে সংপ্রদানেন কেন বা
133.2
মহেশ্বর উবাচ
দাতা ব্রাহ্মণসত্কর্তা দীনান্ধকৃপণাদিষু
ভক্ষ্যভোজ্যান্নপানানাং বাসসাং চ প্রদায়কঃ
133.3
প্রতিশ্রয়ান্সভাঃ কূপান্প্রপাঃ পুষ্করিণীস্তথা
নৈত্যকানি চ সর্বাণি কিমিচ্ছকমতীব চ
133.4
আসনং শয়নং যানং ধনং রত্নং গৃহাংস্তথা
সস্যজাতানি সর্বাণি গাঃ ক্ষেত্রাণ্যথ যোষিতঃ
133.5
সুপ্রতীতমনা নিত্যং যঃ প্রয়চ্ছতি মানবঃ
এবংভূতো মৃতো দেবি দেবলোকেঽভিজায়তে
133.6
তত্রোষ্য সুচিরং কালং ভুক্ত্বা ভোগাননুত্তমান্
সহাপ্সরোভির্মুদিতো রমিত্বা নন্দনাদিষু
133.7
তস্মাত্স্বর্গাচ্চ্যুতো লোকান্মানুষেষূপজায়তে
মহাভোগে কুলে দেবি ধনধান্যসমাচিতে
133.8
তত্র কামগুণৈঃ সর্বৈঃ সমুপেতো মুদা যুতঃ
মহাভোগো মহাকোশো ধনী ভবতি মানবঃ
133.9
এতে দেবি মহাভোগাঃ প্রাণিনো দানশীলিনঃ
ব্রহ্মণা বৈ পুরা প্রোক্তাঃ সর্বস্য প্রিয়দর্শনাঃ
133.10
অপরে মানবা দেবি প্রদানকৃপণা দ্বিজৈঃ
যাচিতা ন প্রয়চ্ছন্তি বিদ্যমানেঽপ্যবুদ্ধয়ঃ
133.11
দীনান্ধকৃপণান্দৃষ্ট্বা ভিক্ষুকানতিথীনপি
যাচ্যমানা নিবর্তন্তে জিহ্বালোভসমন্বিতাঃ
133.12
ন ধনানি ন বাসাংসি ন ভোগান্ন চ কাঞ্চনম্
ন গাবো নান্নবিকৃতিং প্রয়চ্ছন্তি কদাচন
133.13
অপ্রবৃত্তাস্তু যে লুব্ধা নাস্তিকা দানবর্জিতাঃ
এবংভূতা নরা দেবি নিরয়ং যান্ত্যবুদ্ধয়ঃ
133.14
তে চেন্মনুষ্যতাং যান্তি যদা কালস্য পর্যয়াৎ
ধনরিক্তে কুলে জন্ম লভন্তে স্বল্পবুদ্ধয়ঃ
133.15
ক্ষুত্পিপাসাপরীতাশ্চ সর্বভোগবহিষ্কৃতাঃ
নিরাশাঃ সর্বভোগেভ্যো জীবন্ত্যধমজীবিকাম্
133.16
অল্পভোগকুলে জাতা অল্পভোগরতা নরাঃ
অনেন কর্মণা দেবি ভবন্ত্যধনিনো নরাঃ
133.17
অপরে স্তম্ভিনো নিত্যং মানিনঃ পাপতো রতাঃ
আসনার্হস্য যে পীঠং ন প্রয়চ্ছন্ত্যচেতসঃ
133.18
মার্গার্হস্য চ যে মার্গং ন যচ্ছন্ত্যল্পবুদ্ধয়ঃ
পাদ্যার্হস্য চ যে পাদ্যং ন দদত্যল্পবুদ্ধয়ঃ
133.19
অর্ঘার্হান্ন চ সত্কারৈরর্চয়ন্তি যথাবিধি
অর্ঘ্যমাচমনীয়ং বা ন যচ্ছন্ত্যল্পবুদ্ধয়ঃ
133.20
গুরুং চাভিগতং প্রেম্ণা গুরুবন্ন বুভূষতে
অভিমানপ্রবৃত্তেন লোভেন সমবস্থিতাঃ
133.21
সংমান্যাংশ্চাবমন্যন্তে বৃদ্ধান্পরিভবন্তি চ
এবংবিধা নরা দেবি সর্বে নিরয়গামিনঃ
133.22
তে বৈ যদি নরাস্তস্মান্নিরয়াদুত্তরন্তি বৈ
বর্ষপূগৈস্ততো জন্ম লভন্তে কুত্সিতে কুলে
133.23
শ্বপাকপুল্কসাদীনাং কুত্সিতানামচেতসাম্
কুলেষু তেষু জায়ন্তে গুরুবৃদ্ধাপচায়িনঃ
133.24
ন স্তম্ভী ন চ মানী যো দেবতাদ্বিজপূজকঃ
লোকপূজ্যো নমস্কর্তা প্রশ্রিতো মধুরং বদন্
133.25
সর্ববর্ণপ্রিয়করঃ সর্বভূতহিতঃ সদা
অদ্বেষী সুমুখঃ শ্লক্ষ্ণঃ স্নিগ্ধবাণীপ্রদঃ সদা
133.26
স্বাগতেনৈব সর্বেষাং ভূতানামবিহিংসকঃ
যথার্হসত্ক্রিয়াপূর্বমর্চয়ন্নুপতিষ্ঠতি
133.27
মার্গার্হায় দদন্মার্গং গুরুং গুরুবদর্চয়ন্
অতিথিপ্রগ্রহরতস্তথাভ্যাগতপূজকঃ
133.28
এবংভূতো নরো দেবি স্বর্গতিং প্রতিপদ্যতে
ততো মানুষতাং প্রাপ্য বিশিষ্টকুলজো ভবেৎ
133.29
তত্রাসৌ বিপুলৈর্ভোগৈঃ সর্বরত্নসমায়ুতঃ
যথার্হদাতা চার্হেষু ধর্মচর্যাপরো ভবেৎ
133.30
সংমতঃ সর্বভূতানাং সর্বলোকনমস্কৃতঃ
স্বকর্মফলমাপ্নোতি স্বয়মেব নরঃ সদা
133.31
উদাত্তকুলজাতীয় উদাত্তাভিজনঃ সদা
এষ ধর্মো ময়া প্রোক্তো বিধাত্রা স্বয়মীরিতঃ
133.32
যস্তু রৌদ্রসমাচারঃ সর্বসত্ত্বভয়ংকরঃ
হস্তাভ্যাং যদি বা পদ্ভ্যাং রজ্জ্বা দণ্ডেন বা পুনঃ
133.33
লোষ্টৈঃ স্তম্ভৈরুপায়ৈর্বা জন্তূন্বাধতি শোভনে
হিংসার্থং নিকৃতিপ্রজ্ঞঃ প্রোদ্বেজয়তি চৈব হ
133.34
উপক্রামতি জন্তূংশ্চ উদ্বেগজননঃ সদা
এবংশীলসমাচারো নিরয়ং প্রতিপদ্যতে
133.35
স চেন্মানুষতাং গচ্ছেদ্যদি কালস্য পর্যয়াৎ
বহ্বাবাধপরিক্লিষ্টে সোঽধমে জায়তে কুলে
133.36
লোকদ্বেষ্যোঽধমঃ পুংসাং স্বয়ং কর্মকৃতৈঃ ফলৈঃ
এষ দেবি মনুষ্যেষু বোদ্ধব্যো জ্ঞাতিবন্ধুষু
133.37
অপরঃ সর্বভূতানি দয়াবাননুপশ্যতি
মৈত্রদৃষ্টিঃ পিতৃসমো নির্বৈরো নিয়তেন্দ্রিয়ঃ
133.38
নোদ্বেজয়তি ভূতানি ন বিহিংসয়তে তথা
হস্তপাদৈঃ সুনিয়তৈর্বিশ্বাস্যঃ সর্বজন্তুষু
133.39
ন রজ্জ্বা ন চ দণ্ডেন ন লোষ্টৈর্নায়ুধেন চ
উদ্বেজয়তি ভূতানি শ্লক্ষ্ণকর্মা দয়াপরঃ
133.40
এবংশীলসমাচারঃ স্বর্গে সমুপজায়তে
তত্রাসৌ ভবনে দিব্যে মুদা বসতি দেববৎ
133.41
স চেত্কর্মক্ষয়ান্মর্ত্যো মনুষ্যেষূপজায়তে
অল্পাবাধো নিরীতীকঃ স জাতঃ সুখমেধতে
133.42
সুখভাগী নিরায়াসো নিরুদ্বেগঃ সদা নরঃ
এষ দেবি সতাং মার্গো বাধা যত্র ন বিদ্যতে
133.43
উমোবাচ
ইমে মনুষ্যা দৃশ্যন্তে ঊহাপোহবিশারদাঃ
জ্ঞানবিজ্ঞানসংপন্নাঃ প্রজ্ঞাবন্তোঽর্থকোবিদাঃ
দুষ্প্রজ্ঞাশ্চাপরে দেব জ্ঞানবিজ্ঞানবর্জিতাঃ
133.44
কেন কর্মবিপাকেন প্রজ্ঞাবান্পুরুষো ভবেৎ
অল্পপ্রজ্ঞো বিরূপাক্ষ কথং ভবতি মানবঃ
এতং মে সংশয়ং ছিন্দ্ধি সর্বধর্মবিদাং বর
133.45
জাত্যন্ধাশ্চাপরে দেব রোগার্তাশ্চাপরে তথা
নরাঃ ক্লীবাশ্চ দৃশ্যন্তে কারণং ব্রূহি তত্র বৈ
133.46
মহেশ্বর উবাচ
ব্রাহ্মণান্বেদবিদুষঃ সিদ্ধান্ধর্মবিদস্তথা
পরিপৃচ্ছন্ত্যহরহঃ কুশলাকুশলং তথা
133.47
বর্জয়ন্ত্যশুভং কর্ম সেবমানাঃ শুভং তথা
লভন্তে স্বর্গতিং নিত্যমিহ লোকে সুখং তথা
133.48
স চেন্মানুষতাং যাতি মেধাবী তত্র জায়তে
শ্রুতং প্রজ্ঞানুগং চাস্য কল্যাণমুপজায়তে
133.49
পরদারেষু যে মূঢাশ্চক্ষুর্দুষ্টং প্রয়ুঞ্জতে
তেন দুষ্টস্বভাবেন জাত্যন্ধাস্তে ভবন্তি হ
133.50
মনসা তু প্রদুষ্টেন নগ্নাং পশ্যন্তি যে স্ত্রিয়ম্
রোগার্তাস্তে ভবন্তীহ নরা দুষ্কৃতকর্মিণঃ
133.51
যে তু মূঢা দুরাচারা বিয়োনৌ মৈথুনে রতাঃ
পুরুষেষু সুদুষ্প্রজ্ঞাঃ ক্লীবত্বমুপয়ান্তি তে
133.52
পশূংশ্চ যে বন্ধয়ন্তি যে চৈব গুরুতল্পগাঃ
প্রকীর্ণমৈথুনা যে চ ক্লীবা জায়ন্তি তে নরাঃ
133.53
উমোবাচ
সাবদ্যং কিং নু বৈ কর্ম নিরবদ্যং তথৈব চ
শ্রেয়ঃ কুর্বন্নবাপ্নোতি মানবো দেবসত্তম
133.54
মহেশ্বর উবাচ
শ্রেয়াংসং মার্গমাতিষ্ঠন্সদা যঃ পৃচ্ছতে দ্বিজান্
ধর্মান্বেষী গুণাকাঙ্ক্ষী স স্বর্গং সমুপাশ্নুতে
133.55
যদি মানুষতাং দেবি কদাচিত্স নিগচ্ছতি
মেধাবী ধারণায়ুক্তঃ প্রাজ্ঞস্তত্রাভিজায়তে
133.56
এষ দেবি সতাং ধর্মো মন্তব্যো ভূতিকারকঃ
নৃণাং হিতার্থায় তব ময়া বৈ সমুদাহৃতঃ
133.57
উমোবাচ
অপরে স্বল্পবিজ্ঞানা ধর্মবিদ্বেষিণো নরাঃ
ব্রাহ্মণান্বেদবিদুষো নেচ্ছন্তি পরিসর্পিতুম্
133.58
ব্রতবন্তো নরাঃ কেচিচ্ছ্রদ্ধাদমপরায়ণাঃ
অব্রতা ভ্রষ্টনিয়মাস্তথান্যে রাক্ষসোপমাঃ
133.59
যজ্বানশ্চ তথৈবান্যে নির্হোমাশ্চ তথাপরে
কেন কর্মবিপাকেন ভবন্তীহ বদস্ব মে
133.60
মহেশ্বর উবাচ
আগমাল্লোকধর্মাণাং মর্যাদাঃ পূর্বনির্মিতাঃ
প্রামাণ্যেনানুবর্তন্তে দৃশ্যন্তে হি দৃঢব্রতাঃ
133.61
অধর্মং ধর্মমিত্যাহুর্যে চ মোহবশং গতাঃ
অব্রতা নষ্টমর্যাদাস্তে প্রোক্তা ব্রহ্মরাক্ষসাঃ
133.62
তে চেত্কালকৃতোদ্যোগাত্সংভবন্তীহ মানুষাঃ
নির্হোমা নির্বষট্কারাস্তে ভবন্তি নরাধমাঃ
133.63
এষ দেবি ময়া সর্বঃ সংশয়চ্ছেদনায় তে
কুশলাকুশলো নৄণাং ব্যাখ্যাতো ধর্মসাগরঃ