Utshovঅধ্যায় 134
134.1
মহেশ্বর উবাচ
পরাবরজ্ঞে ধর্মজ্ঞে তপোবননিবাসিনি
সাধ্বি সুভ্রু সুকেশান্তে হিমবত্পর্বতাত্মজে
134.2
দক্ষে শমদমোপেতে নির্মমে ধর্মচারিণি
পৃচ্ছামি ত্বাং বরারোহে পৃষ্টা বদ মমেপ্সিতম্
134.3
সাবিত্রী ব্রহ্মণঃ সাধ্বী কৌশিকস্য শচী সতী
মার্তণ্ডজস্য ধূমোর্ণা ঋদ্ধির্বৈশ্রবণস্য চ
134.4
বরুণস্য ততো গৌরী সূর্যস্য চ সুবর্চলা
রোহিণী শশিনঃ সাধ্বী স্বাহা চৈব বিভাবসোঃ
134.5
অদিতিঃ কশ্যপস্যাথ সর্বাস্তাঃ পতিদেবতাঃ
পৃষ্টাশ্চোপাসিতাশ্চৈব তাস্ত্বয়া দেবি নিত্যশঃ
134.6
তেন ত্বাং পরিপৃচ্ছামি ধর্মজ্ঞে ধর্মবাদিনি
স্ত্রীধর্মং শ্রোতুমিচ্ছামি ত্বয়োদাহৃতমাদিতঃ
134.7
সহধর্মচরী মে ত্বং সমশীলা সমব্রতা
সমানসারবীর্যা চ তপস্তীব্রং কৃতং চ তে
ত্বয়া হ্যুক্তো বিশেষেণ প্রমাণত্বমুপৈষ্যতি
134.8
স্ত্রিয়শ্চৈব বিশেষেণ স্ত্রীজনস্য গতিঃ সদা
গৌর্গাং গচ্ছতি সুশ্রোণি লোকেষ্বেষা স্থিতিঃ সদা
134.9
মম চার্ধং শরীরস্য মম চার্ধাদ্বিনিঃসৃতা
সুরকার্যকরী চ ত্বং লোকসংতানকারিণী
134.10
তব সর্বঃ সুবিদিতঃ স্ত্রীধর্মঃ শাশ্বতঃ শুভে
তস্মাদশেষতো ব্রূহি স্ত্রীধর্মং বিস্তরেণ মে
134.11
উমোবাচ
ভগবন্সর্বভূতেশ ভূতভব্যভবোদ্ভব
ত্বত্প্রভাবাদিয়ং দেব বাক্চৈব প্রতিভাতি মে
134.12
ইমাস্তু নদ্যো দেবেশ সর্বতীর্থোদকৈর্যুতাঃ
উপস্পর্শনহেতোস্ত্বা সমীপস্থা উপাসতে
134.13
এতাভিঃ সহ সংমন্ত্র্য প্রবক্ষ্যাম্যনুপূর্বশঃ
প্রভবন্যোঽনহংবাদী স বৈ পুরুষ উচ্যতে
134.14
স্ত্রী চ ভূতেশ সততং স্ত্রিয়মেবানুধাবতি
ময়া সংমানিতাশ্চৈব ভবিষ্যন্তি সরিদ্বরাঃ
134.15
এষা সরস্বতী পুণ্যা নদীনামুত্তমা নদী
প্রথমা সর্বসরিতাং নদী সাগরগামিনী
134.16
বিপাশা চ বিতস্তা চ চন্দ্রভাগা ইরাবতী
শতদ্রুর্দেবিকা সিন্ধুঃ কৌশিকী গোমতী তথা
134.17
তথা দেবনদী চেয়ং সর্বতীর্থাভিসংবৃতা
গগনাদ্গাং গতা দেবী গঙ্গা সর্বসরিদ্বরা
134.18
ইত্যুক্ত্বা দেবদেবস্য পত্নী ধর্মভৃতাং বরা
স্মিতপূর্বমিবাভাষ্য সর্বাস্তাঃ সরিতস্তদা
134.19
অপৃচ্ছদ্দেবমহিষী স্ত্রীধর্মং ধর্মবত্সলা
স্ত্রীধর্মকুশলাস্তা বৈ গঙ্গাদ্যাঃ সরিতাং বরাঃ
134.20
অয়ং ভগবতা দত্তঃ প্রশ্নঃ স্ত্রীধর্মসংশ্রিতঃ
তং তু সংমন্ত্র্য যুষ্মাভির্বক্তুমিচ্ছামি শংকরে
134.21
ন চৈকসাধ্যং পশ্যামি বিজ্ঞানং ভুবি কস্যচিৎ
দিবি বা সাগরগমাস্তেন বো মানয়াম্যহম্
134.22
ভীষ্ম উবাচ
এবং সর্বাঃ সরিচ্ছ্রেষ্ঠাঃ পৃষ্টাঃ পুণ্যতমাঃ শিবাঃ
ততো দেবনদী গঙ্গা নিয়ুক্তা প্রতিপূজ্য তাম্
134.23
বহ্বীভির্বুদ্ধিভিঃ স্ফীতা স্ত্রীধর্মজ্ঞা শুচিস্মিতা
শৈলরাজসুতাং দেবীং পুণ্যা পাপাপহাং শিবাম্
134.24
বুদ্ধ্যা বিনয়সংপন্না সর্বজ্ঞানবিশারদা
সস্মিতং বহুবুদ্ধ্যাঢ্যা গঙ্গা বচনমব্রবীৎ
134.25
ধন্যাঃ স্মোঽনুগৃহীতাঃ স্মো দেবি ধর্মপরায়ণা
যা ত্বং সর্বজগন্মান্যা নদীর্মানয়সেঽনঘে
134.26
প্রভবন্পৃচ্ছতে যো হি সংমানয়তি বা পুনঃ
নূনং জনমদুষ্টাত্মা পণ্ডিতাখ্যাং স গচ্ছতি
134.27
জ্ঞানবিজ্ঞানসংপন্নানূহাপোহবিশারদান্
প্রবক্তৄন্পৃচ্ছতে যোঽন্যান্স বৈ না পদমর্চ্ছতি
134.28
অন্যথা বহুবুদ্ধ্যাঢ্যো বাক্যং বদতি সংসদি
অন্যথৈব হ্যহংমানী দুর্বলং বদতে বচঃ
134.29
দিব্যজ্ঞানে দিবি শ্রেষ্ঠে দিব্যপুণ্যে সদোত্থিতে
ত্বমেবার্হসি নো দেবি স্ত্রীধর্মমনুশাসিতুম্
134.30
ভীষ্ম উবাচ
ততঃ সারাধিতা দেবী গঙ্গয়া বহুভির্গুণৈঃ
প্রাহ সর্বমশেষেণ স্ত্রীধর্মং সুরসুন্দরী
134.31
স্ত্রীধর্মো মাং প্রতি যথা প্রতিভাতি যথাবিধি
তমহং কীর্তয়িষ্যামি তথৈব প্রথিতো ভবেৎ
134.32
স্ত্রীধর্মঃ পূর্ব এবায়ং বিবাহে বন্ধুভিঃ কৃতঃ
সহধর্মচরী ভর্তুর্ভবত্যগ্নিসমীপতঃ
134.33
সুস্বভাবা সুবচনা সুবৃত্তা সুখদর্শনা
অনন্যচিত্তা সুমুখী ভর্তুঃ সা ধর্মচারিণী
134.34
সা ভবেদ্ধর্মপরমা সা ভবেদ্ধর্মভাগিনী
দেববত্সততং সাধ্বী যা ভর্তারং প্রপশ্যতি
134.35
শুশ্রূষাং পরিচারং চ দেববদ্যা করোতি চ
নান্যভাবা হ্যবিমনাঃ সুব্রতা সুখদর্শনা
134.36
পুত্রবক্ত্রমিবাভীক্ষ্ণং ভর্তুর্বদনমীক্ষতে
যা সাধ্বী নিয়তাচারা সা ভবেদ্ধর্মচারিণী
134.37
শ্রুত্বা দংপতিধর্মং বৈ সহধর্মকৃতং শুভম্
অনন্যচিত্তা সুমুখী ভর্তুঃ সা ধর্মচারিণী
134.38
পরুষাণ্যপি চোক্তা যা দৃষ্টা বা ক্রূরচক্ষুষা
সুপ্রসন্নমুখী ভর্তুর্যা নারী সা পতিব্রতা
134.39
ন চন্দ্রসূর্যৌ ন তরুং পুংনাম্নো যা নিরীক্ষতে
ভর্তৃবর্জং বরারোহা সা ভবেদ্ধর্মচারিণী
134.40
দরিদ্রং ব্যাধিতং দীনমধ্বনা পরিকর্শিতম্
পতিং পুত্রমিবোপাস্তে সা নারী ধর্মভাগিনী
134.41
যা নারী প্রয়তা দক্ষা যা নারী পুত্রিণী ভবেৎ
পতিপ্রিয়া পতিপ্রাণা সা নারী ধর্মভাগিনী
134.42
শুশ্রূষাং পরিচর্যাং চ করোত্যবিমনাঃ সদা
সুপ্রতীতা বিনীতা চ সা নারী ধর্মভাগিনী
134.43
ন কামেষু ন ভোগেষু নৈশ্বর্যে ন সুখে তথা
স্পৃহা যস্যা যথা পত্যৌ সা নারী ধর্মভাগিনী
134.44
কল্যোত্থানরতা নিত্যং গুরুশুশ্রূষণে রতা
সুসংমৃষ্টক্ষয়া চৈব গোশকৃত্কৃতলেপনা
134.45
অগ্নিকার্যপরা নিত্যং সদা পুষ্পবলিপ্রদা
দেবতাতিথিভৃত্যানাং নিরুপ্য পতিনা সহ
134.46
শেষান্নমুপভুঞ্জানা যথান্যায়ং যথাবিধি
তুষ্টপুষ্টজনা নিত্যং নারী ধর্মেণ যুজ্যতে
134.47
শ্বশ্রূশ্বশুরয়োঃ পাদৌ তোষয়ন্তী গুণান্বিতা
মাতাপিতৃপরা নিত্যং যা নারী সা তপোধনা
134.48
ব্রাহ্মণান্দুর্বলানাথান্দীনান্ধকৃপণাংস্তথা
বিভর্ত্যন্নেন যা নারী সা পতিব্রতভাগিনী
134.49
ব্রতং চরতি যা নিত্যং দুশ্চরং লঘুসত্ত্বয়া
পতিচিত্তা পতিহিতা সা পতিব্রতভাগিনী
134.50
পুণ্যমেতত্তপশ্চৈব স্বর্গশ্চৈষ সনাতনঃ
যা নারী ভর্তৃপরমা ভবেদ্ভর্তৃব্রতা শিবা
134.51
পতির্হি দেবো নারীণাং পতির্বন্ধুঃ পতির্গতিঃ
পত্যা সমা গতির্নাস্তি দৈবতং বা যথা পতিঃ
134.52
পতিপ্রসাদঃ স্বর্গো বা তুল্যো নার্যা ন বা ভবেৎ
অহং স্বর্গং ন হীচ্ছেয়ং ত্বয্যপ্রীতে মহেশ্বর
134.53
যদ্যকার্যমধর্মং বা যদি বা প্রাণনাশনম্
পতির্ব্রূয়াদ্দরিদ্রো বা ব্যাধিতো বা কথংচন
134.54
আপন্নো রিপুসংস্থো বা ব্রহ্মশাপার্দিতোঽপি বা
আপদ্ধর্মাননুপ্রেক্ষ্য তত্কার্যমবিশঙ্কয়া
134.55
এষ দেব ময়া প্রোক্তঃ স্ত্রীধর্মো বচনাত্তব
যা ত্বেবংভাবিনী নারী সা ভবেদ্ধর্মভাগিনী
134.56
ভীষ্ম উবাচ
ইত্যুক্তঃ স তু দেবেশঃ প্রতিপূজ্য গিরেঃ সুতাম্
লোকান্বিসর্জয়ামাস সর্বৈরনুচরৈঃ সহ
134.57
ততো যয়ুর্ভূতগণাঃ সরিতশ্চ যথাগতম্
গন্ধর্বাপ্সরসশ্চৈব প্রণম্য শিরসা ভবম্