UtshovChapter 124
124.1
युधिष्ठिर उवाच
सत्स्त्रीणां समुदाचारं सर्वधर्मभृतां वर
श्रोतुमिच्छाम्यहं त्वत्तस्तं मे ब्रूहि पितामह
Yudhishthira uvacha
Satstrinam samudacharam sarvadharmabhritam vara
Shrotumichchhamyaham tvattastam me bruhi pitamaha
124.2
भीष्म उवाच
सर्वज्ञां सर्वधर्मज्ञां देवलोके मनस्विनीम्
कैकेयी सुमना नाम शाण्डिलीं पर्यपृच्छत
Bhishma uvacha
Sarvagyam sarvadharmagyam devaloke manasvinim
Kaikeyi sumana nama shandilim paryaprichchhata
124.3
केन वृत्तेन कल्याणि समाचारेण केन वा
विधूय सर्वपापानि देवलोकं त्वमागता
Kena vrittena kalyani samacharena kena va
Vidhuya sarvapapani devalokam tvamagata
124.4
हुताशनशिखेव त्वं ज्वलमाना स्वतेजसा
सुता ताराधिपस्येव प्रभया दिवमागता
Hutashanashikheva tvam jvalamana svatejasa
Suta taradhipasyeva prabhaya divamagata
124.5
अरजांसि च वस्त्राणि धारयन्ती गतक्लमा
विमानस्था शुभे भासि सहस्रगुणमोजसा
Arajansi cha vastrani dharayanti gataklama
Vimanastha shubhe bhasi sahasragunamojasa
124.6
न त्वमल्पेन तपसा दानेन नियमेन वा
इमं लोकमनुप्राप्ता तस्मात्तत्त्वं वदस्व मे
Na tvamalpena tapasa danena niyamena va
Imam lokamanuprapta tasmattattvam vadasva me
124.7
इति पृष्टा सुमनया मधुरं चारुहासिनी
शाण्डिली निभृतं वाक्यं सुमनामिदमब्रवीत्
Iti prishta sumanaya madhuram charuhasini
Shandili nibhritam vakyam sumanamidamabravit
124.8
नाहं काषायवसना नापि वल्कलधारिणी
न च मुण्डा न जटिला भूत्वा देवत्वमागता
Naham kashayavasana napi valkaladharini
Na cha munda na jatila bhutva devatvamagata
124.9
अहितानि च वाक्यानि सर्वाणि परुषाणि च
अप्रमत्ता च भर्तारं कदाचिन्नाहमब्रुवम्
Ahitani cha vakyani sarvani parushani cha
Apramatta cha bhartaram kadachinnahamabruvam
124.10
देवतानां पितॄणां च ब्राह्मणानां च पूजने
अप्रमत्ता सदायुक्ता श्वश्रूश्वशुरवर्तिनी
Devatanam pitrinam cha brahmananam cha pujane
Apramatta sadayukta shvashrushvashuravartini
124.11
पैशुन्ये न प्रवर्तामि न ममैतन्मनोगतम्
अद्वारे न च तिष्ठामि चिरं न कथयामि च
Paishunye na pravartami na mamaitanmanogatam
Advare na cha tishthami chiram na kathayami cha
124.12
असद्वा हसितं किंचिदहितं वापि कर्मणा
रहस्यमरहस्यं वा न प्रवर्तामि सर्वथा
Asadva hasitam kinchidahitam vapi karmana
Rahasyamarahasyam va na pravartami sarvatha
124.13
कार्यार्थे निर्गतं चापि भर्तारं गृहमागतम्
आसनेनोपसंयोज्य पूजयामि समाहिता
Karyarthe nirgatam chapi bhartaram grihamagatam
Asanenopasanyojya pujayami samahita
124.14
यद्यच्च नाभिजानाति यद्भोज्यं नाभिनन्दति
भक्ष्यं वाप्यथ वा लेह्यं तत्सर्वं वर्जयाम्यहम्
Yadyachcha nabhijanati yadbhojyam nabhinandati
Bhakshyam vapyatha va lehyam tatsarvam varjayamyaham
124.15
कुटुम्बार्थे समानीतं यत्किंचित्कार्यमेव तु
प्रातरुत्थाय तत्सर्वं कारयामि करोमि च
Kutumbarthe samanitam yatkinchitkaryameva tu
Pratarutthaya tatsarvam karayami karomi cha
124.16
प्रवासं यदि मे भर्ता याति कार्येण केनचित्
मङ्गलैर्बहुभिर्युक्ता भवामि नियता सदा
Pravasam yadi me bharta yati karyena kenachit
Mangalairbahubhiryukta bhavami niyata sada
124.17
अञ्जनं रोचनां चैव स्नानं माल्यानुलेपनम्
प्रसाधनं च निष्क्रान्ते नाभिनन्दामि भर्तरि
Anjanam rochanam chaiva snanam malyanulepanam
Prasadhanam cha nishkrante nabhinandami bhartari
124.18
नोत्थापयामि भर्तारं सुखसुप्तमहं सदा
आतुरेष्वपि कार्येषु तेन तुष्यति मे मनः
Notthapayami bhartaram sukhasuptamaham sada
Atureshvapi karyeshu tena tushyati me manah
124.19
नायासयामि भर्तारं कुटुम्बार्थे च सर्वदा
गुप्तगुह्या सदा चास्मि सुसंमृष्टनिवेशना
Nayasayami bhartaram kutumbarthe cha sarvada
Guptaguhya sada chasmi susammrishtaniveshana
124.20
इमं धर्मपथं नारी पालयन्ती समाहिता
अरुन्धतीव नारीणां स्वर्गलोके महीयते
Imam dharmapatham nari palayanti samahita
Arundhativa narinam svargaloke mahiyate
124.21
भीष्म उवाच
एतदाख्याय सा देवी सुमनायै तपस्विनी
पतिधर्मं महाभागा जगामादर्शनं तदा
Bhishma uvacha
Etadakhyaya sa devi sumanayai tapasvini
Patidharmam mahabhaga jagamadarshanam tada
124.22
यश्चेदं पाण्डवाख्यानं पठेत्पर्वणि पर्वणि
स देवलोकं संप्राप्य नन्दने सुसुखं वसेत्
Yashchedam pandavakhyanam pathetparvani parvani
Sa devalokam samprapya nandane susukham vaset