UtshovChapter 122
122.1
भीष्म उवाच
एवमुक्तः प्रत्युवाच मैत्रेयः कर्मपूजकः
अत्यन्तं श्रीमति कुले जातः प्राज्ञो बहुश्रुतः
Bhishma uvacha
Evamuktah pratyuvacha maitreyah karmapujakah
Atyantam shrimati kule jatah pragyo bahushrutah
122.2
असंशयं महाप्राज्ञ यथैवात्थ तथैव तत्
अनुज्ञातस्तु भवता किंचिद्ब्रूयामहं विभो
Asanshayam mahapragya yathaivattha tathaiva tat
Anugyatastu bhavata kinchidbruyamaham vibho
122.3
व्यास उवाच
यद्यदिच्छसि मैत्रेय यावद्यावद्यथा तथा
ब्रूहि तावन्महाप्राज्ञ शुश्रूषे वचनं तव
Vyasa uvacha
Yadyadichchhasi maitreya yavadyavadyatha tatha
Bruhi tavanmahapragya shushrushe vachanam tava
122.4
मैत्रेय उवाच
निर्दोषं निर्मलं चैव वचनं दानसंहितम्
विद्यातपोभ्यां हि भवान्भावितात्मा न संशयः
Maitreya uvacha
Nirdosham nirmalam chaiva vachanam danasanhitam
Vidyatapobhyam hi bhavanbhavitatma na sanshayah
122.5
भवतो भावितात्मत्वाद्दायोऽयं सुमहान्मम
भूयो बुद्ध्यानुपश्यामि सुसमृद्धतपा इव
Bhavato bhavitatmatvaddayoyam sumahanmama
Bhuyo buddhyanupashyami susamriddhatapa iva
122.6
अपि मे दर्शनादेव भवतोऽभ्युदयो महान्
मन्ये भवत्प्रसादोऽयं तद्धि कर्म स्वभावतः
Api me darshanadeva bhavatobhyudayo mahan
Manye bhavatprasadoyam taddhi karma svabhavatah
122.7
तपः श्रुतं च योनिश्चाप्येतद्ब्राह्मण्यकारणम्
त्रिभिर्गुणैः समुदितस्ततो भवति वै द्विजः
Tapah shrutam cha yonishchapyetadbrahmanyakaranam
Tribhirgunaih samuditastato bhavati vai dvijah
122.8
तस्मिंस्तृप्ते च तृप्यन्ते पितरो दैवतानि च
न हि श्रुतवतां किंचिदधिकं ब्राह्मणादृते
Tasminstripte cha tripyante pitaro daivatani cha
Na hi shrutavatam kinchidadhikam brahmanadrite
122.9
यथा हि सुकृते क्षेत्रे फलं विन्दति मानवः
एवं दत्त्वा श्रुतवति फलं दाता समश्नुते
Yatha hi sukrite kshetre phalam vindati manavah
Evam dattva shrutavati phalam data samashnute
122.10
ब्राह्मणश्चेन्न विद्येत श्रुतवृत्तोपसंहितः
प्रतिग्रहीता दानस्य मोघं स्याद्धनिनां धनम्
Brahmanashchenna vidyeta shrutavrittopasanhitah
Pratigrahita danasya mogham syaddhaninam dhanam
122.11
अदन्ह्यविद्वान्हन्त्यन्नमद्यमानं च हन्ति तम्
तं च हन्यति यस्यान्नं स हत्वा हन्यतेऽबुधः
Adanhyavidvanhantyannamadyamanam cha hanti tam
Tam cha hanyati yasyannam sa hatva hanyatebudhah
122.12
प्रभुर्ह्यन्नमदन्विद्वान्पुनर्जनयतीश्वरः
स चान्नाज्जायते तस्मात्सूक्ष्म एव व्यतिक्रमः
Prabhurhyannamadanvidvanpunarjanayatishvarah
Sa channajjayate tasmatsukshma eva vyatikramah
122.13
यदेव ददतः पुण्यं तदेव प्रतिगृह्णतः
न ह्येकचक्रं वर्तेत इत्येवमृषयो विदुः
Yadeva dadatah punyam tadeva pratigrihnatah
Na hyekachakram varteta ityevamrishayo viduh
122.14
यत्र वै ब्राह्मणाः सन्ति श्रुतवृत्तोपसंहिताः
तत्र दानफलं पुण्यमिह चामुत्र चाश्नुते
Yatra vai brahmanah santi shrutavrittopasanhitah
Tatra danaphalam punyamiha chamutra chashnute
122.15
ये योनिशुद्धाः सततं तपस्यभिरता भृशम्
दानाध्ययनसंपन्नास्ते वै पूज्यतमाः सदा
Ye yonishuddhah satatam tapasyabhirata bhrisham
Danadhyayanasampannaste vai pujyatamah sada
122.16
तैर्हि सद्भिः कृतः पन्थाश्चेतयानो न मुह्यते
ते हि स्वर्गस्य नेतारो यज्ञवाहाः सनातनाः
Tairhi sadbhih kritah panthashchetayano na muhyate
Te hi svargasya netaro yagyavahah sanatanah