UtshovChapter 120
120.1
भीष्म उवाच
क्षत्रधर्ममनुप्राप्तः स्मरन्नेव स वीर्यवान्
त्यक्त्वा स कीटतां राजंश्चचार विपुलं तपः
Bhishma uvacha
Kshatradharmamanupraptah smaranneva sa viryavan
Tyaktva sa kitatam rajanshchachara vipulam tapah
120.2
तस्य धर्मार्थविदुषो दृष्ट्वा तद्विपुलं तपः
आजगाम द्विजश्रेष्ठः कृष्णद्वैपायनस्तदा
Tasya dharmarthavidusho drishtva tadvipulam tapah
Ajagama dvijashreshthah krishnadvaipayanastada
120.3
व्यास उवाच
क्षात्रं चैव व्रतं कीट भूतानां परिपालनम्
क्षात्रं चैव व्रतं ध्यायंस्ततो विप्रत्वमेष्यसि
Vyasa uvacha
Kshatram chaiva vratam kita bhutanam paripalanam
Kshatram chaiva vratam dhyayanstato vipratvameshyasi
120.4
पाहि सर्वाः प्रजाः सम्यक्शुभाशुभविदात्मवान्
शुभैः संविभजन्कामैरशुभानां च पावनैः
Pahi sarvah prajah samyakshubhashubhavidatmavan
Shubhaih sanvibhajankamairashubhanam cha pavanaih
120.5
आत्मवान्भव सुप्रीतः स्वधर्मचरणे रतः
क्षात्रीं तनुं समुत्सृज्य ततो विप्रत्वमेष्यसि
Atmavanbhava supritah svadharmacharane ratah
Kshatrim tanum samutsrijya tato vipratvameshyasi
120.6
भीष्म उवाच
सोऽथारण्यमभिप्रेत्य पुनरेव युधिष्ठिर
महर्षेर्वचनं श्रुत्वा प्रजा धर्मेण पाल्य च
Bhishma uvacha
Sotharanyamabhipretya punareva yudhishthira
Maharshervachanam shrutva praja dharmena palya cha
120.7
अचिरेणैव कालेन कीटः पार्थिवसत्तम
प्रजापालनधर्मेण प्रेत्य विप्रत्वमागतः
Achirenaiva kalena kitah parthivasattama
Prajapalanadharmena pretya vipratvamagatah
120.8
ततस्तं ब्राह्मणं दृष्ट्वा पुनरेव महायशाः
आजगाम महाप्राज्ञः कृष्णद्वैपायनस्तदा
Tatastam brahmanam drishtva punareva mahayashah
Ajagama mahapragyah krishnadvaipayanastada
120.9
व्यास उवाच
भो भो विप्रर्षभ श्रीमन्मा व्यथिष्ठाः कथंचन
शुभकृच्छुभयोनीषु पापकृत्पापयोनिषु
उपपद्यति धर्मज्ञ यथाधर्मं यथागमम्
Vyasa uvacha
Bho bho viprarshabha shrimanma vyathishthah kathanchana
Shubhakrichchhubhayonishu papakritpapayonishu
Upapadyati dharmagya yathadharmam yathagamam
120.10
तस्मान्मृत्युभयात्कीट मा व्यथिष्ठाः कथंचन
धर्मलोपाद्भयं ते स्यात्तस्माद्धर्मं चरोत्तमम्
Tasmanmrityubhayatkita ma vyathishthah kathanchana
Dharmalopadbhayam te syattasmaddharmam charottamam
120.11
कीट उवाच
सुखात्सुखतरं प्राप्तो भगवंस्त्वत्कृते ह्यहम्
धर्ममूलां श्रियं प्राप्य पाप्मा नष्ट इहाद्य मे
Kita uvacha
Sukhatsukhataram prapto bhagavanstvatkrite hyaham
Dharmamulam shriyam prapya papma nashta ihadya me
120.12
भीष्म उवाच
भगवद्वचनात्कीटो ब्राह्मण्यं प्राप्य दुर्लभम्
अकरोत्पृथिवीं राजन्यज्ञयूपशताङ्किताम्
ततः सालोक्यमगमद्ब्रह्मणो ब्रह्मवित्तमः
Bhishma uvacha
Bhagavadvachanatkito brahmanyam prapya durlabham
Akarotprithivim rajanyagyayupashatankitam
Tatah salokyamagamadbrahmano brahmavittamah
120.13
अवाप च परं कीटः पार्थ ब्रह्म सनातनम्
स्वकर्मफलनिर्वृत्तं व्यासस्य वचनात्तदा
Avapa cha param kitah partha brahma sanatanam
Svakarmaphalanirvrittam vyasasya vachanattada
120.14
तेऽपि यस्मात्स्वभावेन हताः क्षत्रियपुंगवाः
संप्राप्तास्ते गतिं पुण्यां तस्मान्मा शोच पुत्रक
Tepi yasmatsvabhavena hatah kshatriyapungavah
Sampraptaste gatim punyam tasmanma shocha putraka