UtshovChapter 100
100.1
युधिष्ठिर उवाच
गार्हस्थ्यं धर्ममखिलं प्रब्रूहि भरतर्षभ
ऋद्धिमाप्नोति किं कृत्वा मनुष्य इह पार्थिव
Yudhishthira uvacha
Garhasthyam dharmamakhilam prabruhi bharatarshabha
Riddhimapnoti kim kritva manushya iha parthiva
100.2
भीष्म उवाच
अत्र ते वर्तयिष्यामि पुरावृत्तं जनाधिप
वासुदेवस्य संवादं पृथिव्याश्चैव भारत
Bhishma uvacha
Atra te vartayishyami puravrittam janadhipa
Vasudevasya sanvadam prithivyashchaiva bharata
100.3
संस्तूय पृथिवीं देवीं वासुदेवः प्रतापवान्
पप्रच्छ भरतश्रेष्ठ यदेतत्पृच्छसेऽद्य माम्
Sanstuya prithivim devim vasudevah pratapavan
Paprachchha bharatashreshtha yadetatprichchhasedya mam
100.4
वासुदेव उवाच
गार्हस्थ्यं धर्ममाश्रित्य मया वा मद्विधेन वा
किमवश्यं धरे कार्यं किं वा कृत्वा सुखी भवेत्
Vasudeva uvacha
Garhasthyam dharmamashritya maya va madvidhena va
Kimavashyam dhare karyam kim va kritva sukhi bhavet
100.5
पृथिव्युवाच
ऋषयः पितरो देवा मनुष्याश्चैव माधव
इज्याश्चैवार्चनीयाश्च यथा चैवं निबोध मे
Prithivyuvacha
Rishayah pitaro deva manushyashchaiva madhava
Ijyashchaivarchaniyashcha yatha chaivam nibodha me
100.6
सदा यज्ञेन देवांश्च आतिथ्येन च मानवान्
छन्दतश्च यथानित्यमर्हान्युञ्जीत नित्यशः
तेन ह्यृषिगणाः प्रीता भवन्ति मधुसूदन
Sada yagyena devanshcha atithyena cha manavan
Chhandatashcha yathanityamarhanyunjita nityashah
Tena hyrishiganah prita bhavanti madhusudana
100.7
नित्यमग्निं परिचरेदभुक्त्वा बलिकर्म च
कुर्यात्तथैव देवा वै प्रीयन्ते मधुसूदन
Nityamagnim paricharedabhuktva balikarma cha
Kuryattathaiva deva vai priyante madhusudana
100.8
कुर्यादहरहः श्राद्धमन्नाद्येनोदकेन वा
पयोमूलफलैर्वापि पितॄणां प्रीतिमाहरन्
Kuryadaharahah shraddhamannadyenodakena va
Payomulaphalairvapi pitrinam pritimaharan
100.9
सिद्धान्नाद्वैश्वदेवं वै कुर्यादग्नौ यथाविधि
अग्नीषोमं वैश्वदेवं धान्वन्तर्यमनन्तरम्
Siddhannadvaishvadevam vai kuryadagnau yathavidhi
Agnishomam vaishvadevam dhanvantaryamanantaram
100.10
प्रजानां पतये चैव पृथग्घोमो विधीयते
तथैव चानुपूर्व्येण बलिकर्म प्रयोजयेत्
Prajanam pataye chaiva prithagghomo vidhiyate
Tathaiva chanupurvyena balikarma prayojayet
100.11
दक्षिणायां यमायेह प्रतीच्यां वरुणाय च
सोमाय चाप्युदीच्यां वै वास्तुमध्ये द्विजातये
Dakshinayam yamayeha pratichyam varunaya cha
Somaya chapyudichyam vai vastumadhye dvijataye
100.12
धन्वन्तरेः प्रागुदीच्यां प्राच्यां शक्राय माधव
मनोर्वै इति च प्राहुर्बलिं द्वारे गृहस्य वै
मरुद्भ्यो देवताभ्यश्च बलिमन्तर्गृहे हरेत्
Dhanvantareh pragudichyam prachyam shakraya madhava
Manorvai iti cha prahurbalim dvare grihasya vai
Marudbhyo devatabhyashcha balimantargrihe haret
100.13
तथैव विश्वेदेवेभ्यो बलिमाकाशतो हरेत्
निशाचरेभ्यो भूतेभ्यो बलिं नक्तं तथा हरेत्
Tathaiva vishvedevebhyo balimakashato haret
Nishacharebhyo bhutebhyo balim naktam tatha haret
100.14
एवं कृत्वा बलिं सम्यग्दद्याद्भिक्षां द्विजातये
अलाभे ब्राह्मणस्याग्नावग्रमुत्क्षिप्य निक्षिपेत्
Evam kritva balim samyagdadyadbhiksham dvijataye
Alabhe brahmanasyagnavagramutkshipya nikshipet
100.15
यदा श्राद्धं पितृभ्यश्च दातुमिच्छेत मानवः
तदा पश्चात्प्रकुर्वीत निवृत्ते श्राद्धकर्मणि
Yada shraddham pitribhyashcha datumichchheta manavah
Tada pashchatprakurvita nivritte shraddhakarmani
100.16
पितॄन्संतर्पयित्वा तु बलिं कुर्याद्विधानतः
वैश्वदेवं ततः कुर्यात्पश्चाद्ब्राह्मणवाचनम्
Pitrinsantarpayitva tu balim kuryadvidhanatah
Vaishvadevam tatah kuryatpashchadbrahmanavachanam
100.17
ततोऽन्नेनावशेषेण भोजयेदतिथीनपि
अर्चापूर्वं महाराज ततः प्रीणाति मानुषान्
Tatonnenavasheshena bhojayedatithinapi
Archapurvam maharaja tatah prinati manushan
100.18
अनित्यं हि स्थितो यस्मात्तस्मादतिथिरुच्यते
Anityam hi sthito yasmattasmadatithiruchyate
100.19
आचार्यस्य पितुश्चैव सख्युराप्तस्य चातिथेः
इदमस्ति गृहे मह्यमिति नित्यं निवेदयेत्
Acharyasya pitushchaiva sakhyuraptasya chatitheh
Idamasti grihe mahyamiti nityam nivedayet
100.20
ते यद्वदेयुस्तत्कुर्यादिति धर्मो विधीयते
गृहस्थः पुरुषः कृष्ण शिष्टाशी च सदा भवेत्
Te yadvadeyustatkuryaditi dharmo vidhiyate
Grihasthah purushah krishna shishtashi cha sada bhavet
100.21
राजर्त्विजं स्नातकं च गुरुं श्वशुरमेव च
अर्चयेन्मधुपर्केण परिसंवत्सरोषितान्
Rajartvijam snatakam cha gurum shvashurameva cha
Archayenmadhuparkena parisanvatsaroshitan
100.22
श्वभ्यश्च श्वपचेभ्यश्च वयोभ्यश्चावपेद्भुवि
वैश्वदेवं हि नामैतत्सायंप्रातर्विधीयते
Shvabhyashcha shvapachebhyashcha vayobhyashchavapedbhuvi
Vaishvadevam hi namaitatsayampratarvidhiyate
100.23
एतांस्तु धर्मान्गार्हस्थान्यः कुर्यादनसूयकः
स इहर्द्धिं परां प्राप्य प्रेत्य नाके महीयते
Etanstu dharmangarhasthanyah kuryadanasuyakah
Sa iharddhim param prapya pretya nake mahiyate
100.24
भीष्म उवाच
इति भूमेर्वचः श्रुत्वा वासुदेवः प्रतापवान्
तथा चकार सततं त्वमप्येवं समाचर
Bhishma uvacha
Iti bhumervachah shrutva vasudevah pratapavan
Tatha chakara satatam tvamapyevam samachara
100.25
एवं गृहस्थधर्मं त्वं चेतयानो नराधिप
इहलोके यशः प्राप्य प्रेत्य स्वर्गमवाप्स्यसि
Evam grihasthadharmam tvam chetayano naradhipa
Ihaloke yashah prapya pretya svargamavapsyasi